Melquisedec iꞌimaká, ke kaja Jesús iꞌimaká. Riyukuna marí
7
Pajimi Salem eyájena iꞌimakana Melquisedec iꞌimaká. a Tupana, ajopana chaje wani iꞌimakare, waꞌaté rilamáꞌatake purákaꞌaloji inaꞌukejlo. Riká puraꞌaró Abraham michú waꞌaté iꞌimaká. Riká, rijwaꞌatéjena waꞌaté, iꞌimaño nókakajo nakú ajopana waꞌaté. Neká cháꞌataño neꞌemaká, nañapátaka nókakajo ejomi napaꞌó. E Melquisedec iphari Abraham nakú. Riphaka rinaku ee, ripuraꞌó Tupana waꞌaté rinaku, rilaꞌakáloje riká palá penaje.
2 Rejomi Abraham aꞌarí Melquisedecjlo nakaje, najñaꞌakare napinana nacháꞌatakarena iꞌimaká liyá, nakiyana. Iyamá théꞌela (10) kele nakaje najñaꞌakare nakiyana, raꞌá rijló pajluwano, pajluwano ke.
“Palá wakáraꞌaka”, ke kemakana rií iꞌimaká Melquisedec. Eyá Salem, ke kemakana iꞌimari: “Palá pajwaꞌatéchaka iꞌimakaño ñakajela”, ke. Reyájena iꞌimakana riꞌimaká.
3 Unká Melquisedec chiꞌiná, eyá raꞌajútaya michuna, kajena yukuna iꞌimalá. Unká kaja rimothoꞌoká yukuna iꞌimalá, eyá ritakaꞌaká yukuna unká kaja iꞌimalá; Tupana iꞌirí keja kaja riꞌimaká. Inaꞌuké chaya Jesucristo lamáꞌata purákaꞌaloji Tupánajlo; ñakeja riꞌimajika ilé kaje laꞌakana nakú, unká ráchoꞌolajo richiyá.
4 Ajopana chaje Melquisedec iꞌimakale, Abraham aꞌá rijló pajluwano, pajluwano ke nakaje iyamá théꞌela kele nakaje najñaꞌakare iꞌimaká nakiyana. Raú iná weꞌepí Abraham chaje Melquisedec iꞌimaká.
5 Moisés michú wakáraꞌari naꞌaká iyamá théꞌela kele nanane iꞌimakare nakiyana pajluwano, pajluwano ke, Tupana waꞌaté jápajeñojlo. Leví michú lakénami nakiyana neꞌemaká. Nekáꞌana neꞌemajika eꞌiyonaja, najñaꞌaké naliyá riká.
6 Eyá Melquisedec, unká Leví michú lakénami nakiyana kalé riꞌimaká, eꞌiyonaja rijñaꞌá Abraham liyá iyamá théꞌela kele rinane nakiyana raꞌakare rijló pajluwano, pajluwano ke. Ripuraꞌó kaja palá rinaku Tupana waꞌaté, rilaꞌakáloje riká palá penaje. Abrahamjlo Tupana awaká kajrú nakaje iꞌimaká, riyuríkaloje rilakénamijlo penaje.
7 Iná chaje iꞌimaká kemari raꞌapejé iꞌimakare nakú Tupánajlo, rilaꞌakáloje riká palá penaje.
8 Kapichákajo penájena Leví michú lakénami iꞌimaká, eꞌiyonaja naꞌaké najló nanane nakiyana iꞌimajika. Eyá Melquisedec, “Unká kapichákajo penaje kalé riꞌimaká”, ke Tupana purákaꞌalo kemaká rinaku iꞌimaká. Rijló Abraham aꞌarí iyamá théꞌela kele nakaje rikapi iꞌimakare nakiyana pajluwano, pajluwano ke.
9-10 Unká chiyó Leví mothoꞌó iꞌimaká, Melquisedec iphari rinaku. Abraham lakénami nakiyana Leví iꞌimaká. Riwakajé Abraham aꞌarí Melquisedecjlo iyamá théꞌela kele nakaje rikapi iꞌimakare nakiyana pajluwano, pajluwano ke iꞌimaká, rilakénami apumí chojé ke.
11 Tupana kemari Leví michú lakénami nakú, neká iꞌimakáloje purákaꞌaloji lamáꞌatajeño inaꞌuké chaya penaje. Napurákaꞌalomi jaꞌapiyá Israel lakénami yuró. E Tupana aꞌá piño pajluwa inaꞌuké, kaja penaje purákaꞌaloji lamáꞌatajeri inaꞌuké chaya penaje. Melquisedec nakiyánami ke riꞌimaká, unká ajopana ke kalé riꞌimaká. Palani ñakeja napumí chojé aꞌakana iꞌimakela, unká na penaje Tupana aꞌalajla apú kaja penaje, eꞌiyonaja raꞌá piño apú, riꞌimakáloje Melquisedec ke kaja. Unká raꞌalá apú, Aarón michú nakiyana naꞌajika iꞌimajika ke kaja.
12 Naꞌakela ajopana nakiyana inaꞌuké chaya purákaꞌaloji lamáꞌatajeño penaje, napiyákajla najló nakaje nawakáraꞌakare nalaꞌaká, neꞌemakáloje raꞌapiyá penaje.
13 Tupana purákaꞌalo lanaꞌakéjami kemari Jesucristo nakú: “Ajopana nakiyana riꞌimajika. Ñakele unká naꞌalaje apú neꞌiyayá, riꞌimakáloje purákaꞌaloji lamáꞌatajeri inaꞌuké chaya penaje”.
14 Naweꞌepí palá Judá michú lakénami nakiyana Jesucristo iꞌimaká, marí ejaꞌawá chu riꞌimaká wakajé. Unká Moisés kemalá Judá nakiyana nakú, neꞌemakáloje purákaꞌaloji lamáꞌatajeño inaꞌuké chaya penaje.
15 Raú iná weꞌepí Tupana apiyákaka nakaje, júpimi ke nalaꞌajíkare. Ñakele raꞌá apú purákaꞌaloji lamáꞌatajeri inaꞌuké chaya penaje, riꞌimakáloje Melquisedec ke kaja.
16 Unká Tupana aꞌalá Jesucristo, júpimi naꞌajika neꞌemajika ke kaja. Unká tajnákajo penaje kalé riꞌimajíkale, raꞌá riꞌimaká.
17 Tupana kemari Jesucristo nakú:
“Ñakeja piꞌimajika purákaꞌaloji lamáꞌatajeri inaꞌuké chaya nujwaꞌaté.
Melquisedec iꞌimaká, ke kaja piꞌimajika”, ke rimaká rinaku.
18 Unká méñoꞌojo inaꞌuké laꞌaké nakaje Moisés michú wakáraꞌajika nalaꞌaká ke, maliyáruna neꞌemajíkale rilaꞌakánajlo. Ñakele unká na penaje riꞌimaké najló.
19 Ripurákaꞌalomi jaꞌapiyá jemaꞌakana aú unká méñoꞌojo neꞌemaké unká japi laꞌalaño puꞌuwaré ke Tupánajlo. Rapumí chojé re apú yuró, laꞌarí iná palá. Chuwa, richojé wapechu kaphí, raú wephajla ripalamane aú Tupana jaꞌapí.
20 Tupana kemari Jesucristo nakú, riꞌimakáloje purákaꞌaloji lamáꞌatajeri inaꞌuké chaya penaje. Kaja keja riꞌimajika ñakeja wani.
21 Ajopana purákaꞌaloji lamáꞌatajeño, ripiyá iꞌimakaño, nakú unká rimalá iꞌimaká: “Kaja keja neꞌemajika”, ke. Jesucristo nakuja kalé rimá: “Kaja keja riꞌimajika ñakeja wani”, ke. Rijló kaja rimá:
“Unká wani nopiyákalaje piꞌimajika.
Ñakeja piꞌimajika purákaꞌaloji lamáꞌatajeri inaꞌuké chaya nujwaꞌaté”,
ke rimaká.
22 Jesucristo laꞌarí wajló nakaje Tupana kemakare nakú iꞌimaká, ñakele apú purákaꞌaloji chaje palaka riká wajló.
23 Kajrú purákaꞌaloji lamáꞌatajeño inaꞌuké chaya iꞌimaká, aꞌajná natakaꞌaká ejená.
24 Eyá Jesucristo, unká tajnákajo penaje kalé riꞌimajika, ñakele unká rijápakaꞌala yurílajo apujlo.
25 Chuwa, Jesucristo iꞌimatákarena kapichákajo liyá wátaka Tupana waꞌaté iꞌimakana ripalamane aú. Unká tajnákajo penaje kalé riká, ñakele ripuraꞌono Tupana waꞌaté nachaya meꞌetení. Ñakeja riꞌimajika.
26 Palá wani Jesucristo puraꞌakó wachaya Tupana waꞌaté. Palá péchuri riká, unká na kalé rilaꞌá puꞌuwaré. Kaja Tupana waꞌa riká jeꞌechú chojé iꞌimaká.
27 Ajopana chaje wani riꞌimakale, unká ajopana purákaꞌaloji lamáꞌatajeño ripiyá iꞌimakaño, ke kalé riká. Neká laꞌakeño marí ke: Paineko nenoke weꞌechú kaꞌalá keja pirájina nakiyana najluwa, nalamáꞌatakaloje napéchuwa Tupánajlo raú. Rejomi nenoke piño pirájina nakiyana puꞌuwaré ajopana inaꞌukena laꞌajíkare chaya penaje. Eyá Jesucristo, unká laꞌalá ñaké. Pajluwa peja ritakaꞌaká iꞌimaká; raꞌá rikó iꞌimaká, nenókaloje riká puꞌuwaré inaꞌuké laꞌakare chaya penaje. Reyá aꞌajná ñoꞌojó unká nachaya takaꞌakana iꞌimalaje piño Tupánajlo.
28 Moisés purákaꞌalomi jaꞌapiyá neꞌemaká wakajé, naꞌaké purákaꞌaloji lamáꞌatajeño wakáraꞌajeño. Neká, naꞌajíkarena, unká méñoꞌojo nalaꞌaké palá piyuke Tupana wátaka ke, unkale napechu iphake rilaꞌakana lokópaꞌala. Ñakele Tupana aꞌá Riꞌirí Jesucristo, riwátaka ke laꞌajerí wani riꞌimakale. Ñakeja riꞌimajika, iná iꞌimakáloje ripurákaꞌalo jaꞌapiyá.