2
Ñakele iyurí iliyó piyukeja puꞌuwaré laꞌakaná; iyurí kaja iliyó ajopana waꞌaté pajlakana. Ilaꞌaniña kaja inakuwá mapeja palájneꞌekena ke ajopánajlo, napechu iꞌimakáloje palá inaku penaje. Iwó iꞌimaniña kaja chapú ajopana cha, nacháꞌatakale kaꞌajná iká nakaje aú; iyurí iliyó ajopana nakú chapújraꞌakano.
2-3 Kakámeꞌe yuwaná, wajé mothoꞌokaño, chuꞌuchú iꞌirakana nakú. Ñaké kaja iꞌimá kakámeꞌe Tupana purákaꞌalo nakojé weꞌepíkana nakú richaje, richaje ke, ilaꞌakáloje palá iꞌimajika jeꞌechú chu ejená. Kaja iweꞌepí mékeka Tupana laꞌaká inaku palá wani, ñakele aꞌá wechi Ripurákaꞌalo inakojó.
4-5 Kajmuchaji aꞌajeri Jesucristo. Unká inaꞌuké wátala riꞌimaká, eꞌiyonaja Tupana iꞌiwapá riꞌimaká rijluwa, ajopana chaje wani riꞌimakale. Chuwa Jesucristo waꞌatéjena iká; raꞌá ijló Ripechu iꞌimaká, ripalamane aú iꞌimakáloje matajnako rijwaꞌaté jeꞌechú chu. Iyurí ichó Tupánajlo, jemaꞌakáloje Ripechu jaꞌapiyá, ilaꞌakáloje riwátaka ke penaje. Jesucristo aꞌarí iñathé, ilaꞌakáloje nakaje palá Tupánajlo, ñaké kaja inaꞌukejlo, raú palá Ripechu iꞌimajika nakaje ilaꞌajíkare nakú.
6 Tupana purákaꞌalo lanaꞌakéjami kemari Jesucristo nakú:
“Nuꞌuwapajé inaꞌuké eꞌiyayá pajluwaja, ajopana chaje iꞌimakare,
ripalamane ajopana iꞌimakáloje palá penaje.
Jerusalén ejo nuwakáraꞌaje riká.
Kaphí pechu iꞌimajika richojé, unká wani pechu laꞌalajo ujwí riliyá”,
ke Tupana kemaká rinaku iꞌimaká.
7 Iká, kaphí péchuruna Jesucristo chojejlo, ajopana chaje wani riká. Eyá unká jemaꞌalaño raꞌapiyajlo, Ripurákaꞌalo kemaká rinaku iꞌimaká, keja riká najló. Rimá rinaku iꞌimaká:
“Unká wani nawátalaje riká, ajopana chaje iꞌimakare,
eꞌiyonaja riká, unká nawátalare iꞌimaká penájemi,
iꞌimajeri piyukeja wani inaꞌukena chaje,
richojeja kalé neꞌemajé palá”,
ke rimaká Jesucristo nakú.
8 Tupana purákaꞌalo kemari kaja:
“Unká wani wátalajeño riká, laꞌajeño chapú wani.
Riwajaje neká, unká pachá nemaꞌalaje Ripurákaꞌalo jaꞌapiyá”.
Ilé ke riꞌimajika najló, unká pachá naꞌalá nanakojó Ripurákaꞌalo. Kaja ñaké Tupana pechu nakú nalaꞌakana iꞌimaká, ke rimaká nanaku.
9 Eyá iká, pajluwa yaní keja pajwaꞌatéchaka, Tupana iꞌiwapakale rijluwa iꞌimaká. Ñakele chuwa unká puꞌuwaré laꞌajeñó kalé iká, rileꞌejena iꞌimakale. Riꞌiwapá iká, ilamáꞌatakaloje purákaꞌaloji inaꞌuké chaya rijwaꞌaté; riꞌiwapá kaja iká, iꞌimakáloje palá wani Tupana laꞌaká inaꞌuké yukuna ajopánajlo. Riꞌimatá iká mapéjari purákaꞌaloji liyá, iꞌimakáloje kewákaje purákaꞌaloji jaꞌapiyá.
10 Júpimi unká rileꞌejena kalé iꞌimaká, eyá chuwa rileꞌejena iká. Unká chiyó iꞌimá rileꞌejena, unká na weꞌepike imuꞌují iꞌimajika. Eyá chuwa Tupana weꞌepika imuꞌují, rileꞌejena iꞌimakale.
11 Nojena, íkiꞌija nuwátakarena, unká iñakajela wani kalé marí teꞌerí; ajopana teꞌeré eyájena keja iká rinaku meketánaja. Ñakele iyuríniña puꞌuwaré laꞌakaná aꞌaká imeꞌé rijluwa, ilaꞌakáloje puꞌuwaré ipechu keja.
12 Ilaꞌá palá inaꞌuké eꞌiyowá, raú puraꞌañó inaku puꞌuwaré: “Unká inaꞌukélaruna ta pi neká”, ke, amájeño ilaꞌaká palá neꞌiyowá. Akijñojo Tupana kemaje mékeka rijló nakaje, walaꞌakare marí ejaꞌawá chu weꞌemaká ketana iꞌimaká. Riwakajé naweꞌepeje palá nakaje ilaꞌakare nakojé, raú napuraꞌajó kaja palá Tupana nakú.
13 Palá riꞌimakáloje Tupana nakú, jemaꞌá palá piyukeja iwakáraꞌajeño jaꞌapiyá.
14 Nachaje wakáraꞌaka wakáraꞌari raꞌapiyá wakáraꞌajeño wajaka unká inaꞌukélaruna. Riwakáraꞌa kaja raꞌapiyatéjena laꞌaká palá, palá laꞌakaño nakú.
15 Tupana wátari kaja ilaꞌaká palá nakaje, mapechúruna ke iꞌimakaño puraꞌakó piyá inaku puꞌuwaré.
16 Kaja Tupana iꞌimatá iká pajlakaje purákaꞌaloji chiyá, ilaꞌakáloje piyukeja nakaje palá riwátaka ke. Ñakele ilaꞌaniña puꞌuwaré, Tupana waꞌaté jápajeño iꞌimakale.
17 Iphá piyukeja inaꞌukena jaꞌapí; iwata kaja íkiꞌija ajopana Jesucristo jaꞌapiyá jemaꞌajeño; iphá kaja kajrú wani Tupana jaꞌapí. Wakáraꞌari iká marí teꞌerí nakú jaꞌapí, iphá kaja.
Chapú kaje yajwé ñaꞌakana panaku yukuna marí
18 Iká, ajopana waꞌaté jápajeñojlo numá: Jemaꞌá ikariwátena jaꞌapiyá palá; iphá kaja naꞌapí. Iphaka palájneꞌekena ikariwátena jaꞌapí, ke kaja iphá ikariwátena chapújneꞌekena jaꞌapí.
19 Apala ijñaꞌano panaku chapú kaje yajwé mapeja, ilaꞌakale palá Tupana wátaka ke. Palá rilaꞌajika inaku, ilé ke ilaꞌakale.
20 Eyá nawajákachu iká unká paala ilaꞌakare pachá, unká meke laꞌajé ipechu iꞌimalajla inakuwá: “Wajñaꞌáreja panaku chapú kaje yajwé”, ke. Eyá ijñaꞌakachu chapú kaje yajwé panaku, palá ilaꞌaká eꞌiyonaja, palani Tupánajlo ilé ke ilaꞌakare iꞌimajika.
21 Ilé kaje penaje Tupana iꞌiwapá rijluwa iꞌimaká ajopana inaꞌukena eꞌiyayá. Jesucristo ñaꞌarí chapú kaje yajwé panaku ichaya iꞌimaká, raú ramata iká chapú kaje yajwé ñaꞌakana panaku aú, ijñaꞌakáloje ñaké kaja riká panaku.
22 Unká wani Jesucristo laꞌalá puꞌuwaré iꞌimaká, unká kaja ripajlake na waꞌaté.
23 Eꞌiyonaja puꞌuwaré wani napuraꞌakó rinaku, unká kalé rakhaꞌaké neꞌemajika ilé kaje pachá. Kajrú wani nalaꞌaká riꞌimaká chapú, eꞌiyonaja unká ripuraꞌaló rileꞌejé jakumi nakú. Lanakiya riyurí neꞌemaká piyukeja Tupánajlo, riká weꞌepíkale palá nanaku kemakana mékeka nalaꞌakana iꞌimajika.
24 Jesucristo ñaꞌarí panaku wachaya chapú kajé yajwé, puꞌuwaré walaꞌakare pachá. Wapumí chojé ritakaꞌá aꞌawaná apiyákakanami nakojé, wayuríkaloje raú waliyó puꞌuwaré laꞌakaná, raú weꞌemakáloje palá laꞌakaná nakuja. Ilé kaje aú weꞌemaó Tupana wajájika weká liyá.
25 Kapichájeño penájena iꞌimakajla, eꞌiyonaja kaja iꞌimaó chuwa, iꞌimakáloje Jesucristo jaꞌapiyá jemaꞌajeño penaje. Riká aꞌarí iká rinakojó, ipechu waꞌaphé riꞌimakale.