Marí ke wáꞌakajeñomi iꞌimajika palá pajwaꞌatéchaka
3
Ñaké kaja iká, inaana wáꞌakajeñomi, iꞌimajika. Jemaꞌá palá iyajná jaꞌapiyá. Apala raú neká, unká jemaꞌalaño Tupana jaꞌapiyá, jemaꞌajé kaja raꞌapiyá, namájikale palá wani iꞌimaká pajwaꞌatéchaka. Palá ilaꞌajíkare aú, jewíñaꞌatajikale neká, palá kaja iphákale paꞌapíchaka.
2 Namájika aú palá ilaꞌaká Tupana jaꞌapiyá jemaꞌakana aú, ñaké kaja nephájika raꞌapí.
3 Ilamáꞌataniña kaja ikó palá kajrú nakaje aú paláruna ke, ajopana amákaloje iká penaje; jaꞌataniña kaja iwilá palá; aꞌaniña kaja iwilá eꞌiyajé kawemí nojé ripatajona; akúwaꞌataniña kaja inakuwá kajrú nakaje kawemí nojé, ñaké kaja aꞌarumakaji kawemí nojé kaje.
4 Lanakiya ilamáꞌata ipechu palá wani, iꞌimakáloje palá péchuruna penaje. Riká paláchaji unká wani kapichálajo inakiyá, manaꞌija kaja iꞌimajika; riká paláchaji palani wani Tupánajlo.
5 Ñaké kaja ajopana inaana, ipiyá iꞌimakaño michuna, weꞌepíjika natukumó napéchuwaja lamáꞌatakana palá Tupánajlo, palá laꞌajeñó neꞌemakáloje penaje. Kaphí napechu iꞌimajíkale Tupana chojé, nephake kaja naluna jaꞌapí.
6 Palá Sara micholo jemaꞌajika ruyajná Abraham michú jaꞌapiyá, raú rumaké rinaku: “Nuwakáraꞌajeri riká”, ke. Palá laꞌajeyo ruꞌumaká, ñakele unká ruꞌumaké keroꞌokajo nakú. Ñaké ilaꞌajika ee, iꞌimajé rulakénami nakiyana ke.
7 Eyá iká, achiñana wáꞌakajeñomijlo, numá, iꞌimakáloje palá kapechú iyajalo waꞌaté. Naꞌapí iphákana lokópaꞌala iphá naꞌapí. Matejmúruna kemachi inaana, ñakele unká paala iphaka jaꞌapiwá najló. Tupana weꞌepika imuꞌují, ke kaja riweꞌepika namuꞌují rejenowaja. Ñakele rejenowaja iꞌimatájika ikó kapichákajo liyá, iꞌimakáloje matajnako rijwaꞌaté penaje. Iꞌimá palá pajwaꞌatéchaka, ipechu kawílaꞌako piyá ipuraꞌajiko Tupana waꞌaté kewá.
Nalaꞌaká chapú palá laꞌakaño yukuna marí
8 Palá iꞌimá pajwaꞌatéchaka puꞌují ipechu ke; iweꞌepí kaja pamuꞌujíchaka; iwata kaja íkiꞌija pekowáaka, pajluwa yaní waja iꞌimakale. Palájneꞌekena iꞌimá pajwaꞌatéchaka; ilaꞌaniña inakuwá kajrú weꞌepíkaño ke.
9 Nalaꞌajika ee iká chapú, ilaꞌaniña kaja inakojó neká ñaké. Napuraꞌajiko ee puꞌuwaré inaku, ipuraꞌaniño kaja nanaku ñaké. Lanakiya ipuraꞌó palá wani nanaku, Tupana iꞌiwapakale iká rijluwa, riwátakale piyukeja nakú laꞌakana palá.
10 Tupana purákaꞌalo kemari inaꞌuké nakú:
“Wátajeri palá keyajupa iꞌimakana, amaré rikó palá,
ripuraꞌakó piyá mapeja puꞌuwaré ajopana nakú,
ripajlaka piyá kaja mapeja.
11 Riyureje kaja puꞌuwaré laꞌakaná, rilaꞌakáloje palá penaje.
Palá pajwaꞌatéchaka iꞌimakánaja riweꞌepeje ritukumó.
12 Palá Tupana aꞌaká rinakojó palá laꞌakaño.
Palá kaja raꞌaká rinakojó napurákaꞌalo, napuraꞌakó kewá rijwaꞌaté.
Eyá puꞌuwaré laꞌajeñó waꞌaté, unká ñaké kalé riká,
unká riwátala nalaꞌaká puꞌuwaré”,
ke rimaká.
13 Palá laꞌakaná nakuja iꞌimajika ee, ¿meke chi ajopana laꞌakajla iká?
14 Palá laꞌajeñó iꞌimaká eꞌiyonaja, amaje chapú kaje yajwé apú eyá ke, eꞌiyonaja ipechu iꞌimá palá raú. Ikeroꞌoniño na piyá; iweꞌepíniña kaja ijluwa.
15 Iphá Jesucristo jaꞌapija; iyurí ichó rijló, riꞌimakáloje iwakáraꞌajeri wani penaje. Iꞌijnatá ipéchuwa mékeka imájika ajopánajlo rinaku, nemájika ee ijló: “¿Naje ilé ke ipechu Jesucristo nakú?”
16 Ilaꞌaniña inakuwá kajrú najló, iꞌimajika najló riyukuna kewá. Iphá naꞌapí. Palá ipechu ke iꞌimá najló riyukuna, raú puraꞌañó puꞌuwaré inaku, jemaꞌakale Jesucristo jaꞌapiyá, apáñaꞌajo napurákaꞌalo jaꞌapí.
17 Nalaꞌakachu iká chapú, palá ilaꞌakare jimaje, palani ijló ñaké ilaꞌakana iꞌimajika. Tupana wátajika ee nalaꞌaká iká ilé ke, palani riꞌimajika ijló. Eyá iná amákachu chapú kaje yajwé puꞌuwaré iná laꞌakare jimaje, ilé unká wani paala iꞌimajika.
18 Jesucristo amari chapú kaje yajwé, puꞌuwaré walaꞌakare pachá. Pajlúwamaja ritakaꞌaká wachaya iꞌimaká, raú ja riꞌimatá weꞌemaká puꞌuwaré walaꞌakare liyá. Palájneꞌeke wani riꞌimaká, eꞌiyonaja ramá chapú kaje yajwé puꞌuwaré walaꞌakare pachá, ripalamane weꞌemakáloje Tupana waꞌaté. Inaꞌuké ke riꞌimaká aú ritakaꞌá iꞌimaká, eꞌiyonaja Tupana Pechu palamane aú rimakápoꞌo piño iꞌimaká.
19 Unká chiyó rimakápoꞌo iꞌimaká, riꞌijná ajopana péchumi patakéjanami ke iꞌimakáñojlo Tupana yukuna iꞌimajé.
20 Júpimi ejaꞌawá chu iꞌimakaño michuna péchumi neꞌemaká. Noé michú iꞌimaká wakajé, riꞌimaké najló Tupana purákaꞌalo yukuna. Unká nemaꞌaké raꞌapiyá, eꞌiyonaja Tupana ñaꞌá neꞌemaká panaku, Noé ñapátaka wapuru laꞌakana ketana, richojé mekeleja inaꞌukena iꞌimakóloje juni liyá. Weji ke kuwáꞌata keleja (8) neꞌemaká iꞌimañó juni liyá riwakajé, wapuru chu neꞌemakale.
21 Neká unká juni kapichátala iꞌimaká, wapuru chu neꞌemakale neꞌemaó kapichákajo liyá. Tupana iꞌimatákarena kapichákajo liyá nalaꞌá bautizar, nemakale rijló, rikaꞌakáloje napechu nakiyá puꞌuwaré nalaꞌakare. Jesucristo makápoꞌokole piño iꞌimaká aú, iná iꞌimaó kapichákajo liyá.
22 Rimakápoꞌoko iꞌimaká ejomi, ráchoꞌo jeꞌechú chojé, re riká Tupana awaꞌá meꞌetení. Jesucristo jaꞌapiyá waja piyuke Tupana waꞌatéjena, jeꞌechú chiyájena, nawakáraꞌajeño waꞌaté. Piyukeja wakáraꞌajeri riká re.