4
1-2 Kajrú Jesucristo ñaꞌaká chapú kaje yajwé panaku marí ejaꞌawá chu riꞌimaká wakajé, ñakele ilaꞌá kaphí ipéchuwa, ijñaꞌakáloje chapú kaje yajwé panaku. Ñaꞌarí chapú kaje yajwé panaku, yuriri kaja riliyó puꞌuwaré laꞌakaná, riꞌimakáloje marí ejaꞌawá chu Tupana wátaka ke laꞌakana nakú. Raú unká rilaꞌalaje puꞌuwaré ripechu keja.
3 Iká laꞌakeño puꞌuwaré iꞌimajika, unká jemaꞌalaño Tupana jaꞌapiyá laꞌajika ke kaja. Keꞌiyapejé nakaje puꞌuwaré laꞌakaná nakú iꞌimaké; puꞌuwaré kaja iꞌijnatájika ipéchuwa; imanáicho laꞌakana ajopana waꞌaté nakuja iꞌijnatake ipéchuwa. Yuwéraꞌakajo nakuja iꞌimaké riwakajé; iꞌijnaké kaja nakajmókaꞌalo ejo, kajrú mureji kaja mejé iꞌimajíkare ejo. Iphake kaja nakaje jenami jaꞌapí; nakaje unká wani Tupana wátalare laꞌakana nakú iꞌimaké.
4 Eyá chuwa, kaja unká ilaꞌalá ñaké najwaꞌaté puꞌuwaré, raú apú ke napechu inaku, raú napuraꞌó kaja inaku puꞌuwaré.
5 Piyukeja Tupana kemájika nanaku mékeka rijló nakaje nalaꞌakare iꞌimaká. Kaja takaꞌakaño, eyá kajmuruna iꞌimakaño nakú waꞌató, rimaje mékeka rijló nakaje nalaꞌakare iꞌimaká.
6 Inaꞌukena, kaja takaꞌakaño, jemaꞌañó kaja Tupana iꞌimataka inaꞌuké kapichákajo liyá yukuna iꞌimaká. Raꞌapiyá jemaꞌajeño iꞌimajeño matajnako jeꞌechú chu. Re napechu re joꞌó kaja, nanapónaja kalé kapicharo iꞌimaká.
7 Yewíchaja riphaka rená chojé, nakaje marí ejaꞌawá chu iꞌimakare kapichákoloje piyukeja, ñakele iꞌimá palá laꞌakaná nakuja. Tupana waꞌaté puraꞌakánoja iweꞌepí itukumó.
8 Apú nakaje chaje ilaꞌá marí ke: Iwata íkiꞌija pekowáaka; amó nachaje nalaꞌajika iká puꞌuwaré ke pe liyá.
9 Iꞌimá palá pajwaꞌatéchaka; aꞌatá iphájeño inaku iñakaré chojé; ipuraꞌaniño puꞌuwaré panakuwáaka;
10 ilaꞌá piyuke palá, péchuji Tupana aꞌakare ijló jaꞌapiyá. Ñakele riwakáraꞌaka ke aꞌaká palá pañathéchaka, ripalamane iweꞌepíkale rilaꞌakana.
11 Ñakele iꞌimajeri Tupana yukuna, iꞌimaré riyukuna palá, rikó japi Tupana iꞌimaká riyukúnawa ke. Eyá aꞌajeri kaꞌajná ajopana ñathé, aꞌaré nañathé puꞌují ripechu ke, Tupana aꞌakale riñathé rilaꞌakana aú. Piyukeja nakaje ilaꞌajíkare, ilaꞌá palá, raú piyukeja iphákaloje Tupana jaꞌapí Jesucristo palamane aú. Ñakeja wani riꞌimajika palá laꞌakaná nakú, piyukeja wani laꞌajerí riꞌimakale. Ñaké riká.
Puꞌují napechu ke Jesucristo jaꞌapiyá jemaꞌajeño ñaꞌaká chapú kaje yajwé panaku yukuna marí
12 Nojena, íkiꞌija nuwátakarena, ipechu kechíraꞌaniño ijló Tupana atáꞌajika wakajé iká chapú kaje yajwé amákana aú. Ipechu iꞌimaniña inakuwá: “Unká ko ñaké kalé ajopana amaka chapú kaje yajwé”, ke.
13 Amájika wakajé chapú kaje yajwé, ilaꞌá puꞌují ipéchuwa, ijñaꞌakale panaku chapú kaje yajwé, Jesucristo ñaꞌaká panaku riꞌimaká ke. Raú ipechu iꞌimajé puꞌují wani, majó riphájika piño wakajé, amájikale palá wani riká riwakajé.
14 Palá kaja ipechu iꞌimá ajopana puraꞌajiko ee inaku puꞌuwaré, jemaꞌakale Jesucristo jaꞌapiyá, ñakeja wani Tupana, piyukeja wani laꞌajerí Pechu iꞌimakale ijwaꞌaté.
15-16 Apala pajluwa inakiyana kaꞌajná amájeri chapú kaje yajwé, unká inaꞌuké nójeri kalé riꞌimaká eꞌiyonaja; unká kaja jataꞌakachi kalé riꞌimaká eꞌiyonaja; unká kaja ajopana nakú kulákatajero kalé riꞌimaká eꞌiyonaja. Iká amájika ee chapú kaje yajwé, Jesucristo jaꞌapiyá jemaꞌajeño iꞌimakale, palani ijló ñaké riꞌimajika. Apáñaꞌaniño jaꞌapiwá raú; ipuraꞌó palá Tupana nakú, rijwaꞌatéjena iꞌimakale.
17 Kaja riphá weká, Tupana jaꞌapiyá jemaꞌajéñojlo rená chojé, Tupana kemakáloje wanaku mékeka rijló nakaje walaꞌakare iꞌimaká. Palá kaꞌajná wemaꞌaká raꞌapiyá, eꞌiyonaja rikeñoꞌojé wanaku kemakana mékeka rijló nakaje walaꞌakare iꞌimaká. Chaje wani kaꞌajná riꞌimajika chapú, unká wani aꞌalaño Tupana iꞌimataka inaꞌuké kapichákajo liyá yukuna nanakojojlo.
18 Ripurákaꞌalo lanaꞌakéjami nakiyana kemari: “Chapú kaje yajwé amákana aú waꞌató Tupana iꞌimatá palá laꞌakaño, kaphí richojé péchuruna kapichákajo liyá. Eyá puꞌuwaré laꞌajeñó, unká wani meke laꞌajé riꞌimatálaje”, ke rimaká.
19 Ñakele ñaꞌañó panaku chapú kaje yajwé, Tupana wátaka ke, weꞌepiño natukumó palá laꞌakanaja. Nayurí napechu rijló, riká keñoꞌótakale neꞌemaká. Rimaká nakaje nakú keja laꞌajerí riká.