Nenakú laꞌakana yukuna marí
5
Meꞌetení nuwata Jesucristo jaꞌapiyá jemaꞌajeño wakáraꞌajeño jenakú laꞌakana. Neká ke kaja nuká, raꞌapiyá jemaꞌajeño wakáraꞌajeri. Nomá mékeka Jesucristo ñaꞌaká kajrú wani chapú kaje yajwé panaku iꞌimaká. Palá wani Tupana laꞌajika raꞌapiyá jemaꞌajeño nakú ripaꞌajiko majó wakajé. Nuꞌumajé kaja najwaꞌaté riwakajé.
2 Aꞌá palá inakojó Tupana jaꞌapiyá jemaꞌajeño amákarena meꞌetení. Ilaꞌá wechi ijápakaꞌala Tupana wátaka ke. Unká liñeru chaya kalé amá neká; palá ipechu ke ijápaka.
3 Ilaꞌaniña kaja inakuwá piyukeja amákarenajlo, nawakáraꞌajeño ke wani. Amata neká palá laꞌakaná aú, nalaꞌakáloje ilaꞌaká ke kaja.
4 Ñaké ilaꞌajika ee, wamájeri wani aꞌajé ijló riwemí, majó riphájika wakajé. Riwakajé raꞌajé ijló palá ilaꞌakare wemí; unká wani ripalamane tajnáñaalaje.
5 Marí purákaꞌaloji walijímakanajlo, ináyanajlo waꞌaté: Jemaꞌá palá piyukeja Tupana jaꞌapiyá jemaꞌajeño wakáraꞌajeño jaꞌapiyá; iphá paꞌapíchaka. Ilaꞌaniña inakuwá kajrú laꞌakaño ke, Tupana purákaꞌalo lanaꞌakéjami kemakale:
“Unká Tupana wátala kajrú laꞌakaño nanakuwá.
Eyá unká laꞌalaño nanakuwá kajrú weꞌepíkaño ke ajopánajlo, ñathé raꞌá,
palá ripechu iꞌimakale nanaku”,
ke rimaká.
6 Ñakele ilaꞌaniña inakuwá kajrú wani weꞌepíkaño ke ajopánajlo, ichaje wani weꞌepika Tupana iꞌimakale. Riká laꞌajeri iká palá wani, riphájika rená chojé wakajé.
7 Iyurí Tupánajlo piyukeja nakaje iwó kaꞌakaro waꞌaté, ñakeja wani raꞌakale rinakojó iká.
8 Amá ikó palá. Kapechú kaja iꞌimá kajmuruna ke, ipiná Jiñá Chiꞌinárikana kulákale iká, rilaꞌakáloje iká chapú. Yawi, ejaꞌawá eꞌiyowaje, kulaka rijwánaꞌapa, ke kaja rikulákale iká.
9 Iyuríniña ichó Jiñá Chiꞌinárikanajlo, richáꞌataka piyá iká. Ilaꞌá kaphí ipéchuwa Tupana chojé; richojé itáraꞌo kamachá rijló, ñaké waja piyuke ejaꞌawá chuwá Jesucristo jaꞌapiyá jemaꞌajeño amaka chapú kaje yajwé.
10 Ilé keja ijñaꞌajika chapú kaje yajwé panaku meketánaja, rejomi Tupana laꞌajé ipechu palá, ipechu iꞌimakáloje kaphí richojé, riwátaka ke penaje. Íkiꞌija wani Tupana wátaka weká, ñakele raꞌapiyá jemaꞌajeño iꞌimajeño matajnako rijwaꞌaté jeꞌechú chu.
11 Piyuke laꞌajerí wani Tupana; ñakeja wani riweꞌepíjika piyukeja nakaje laꞌakana. Ñaké riꞌimajika.
Kaja penaje Pedro kemakare nakú yukuna marí
12 Silvano waꞌaté nulanaꞌá marí ijló, noꞌowé ke riká nojló. Rimaká nakaje nakú ke laꞌajerí riká. Metajlánija nulanaꞌaká ijló riyukuna. Richu nulaꞌá jenakú; richu kaja nuꞌumá ijló palá wani Tupana laꞌaká iká yukuna, íkiꞌija wani riwátakale iká. Ilaꞌá ipéchuwa kaphí raꞌapiyá iꞌimakana nakú.
13 Tupana iꞌiwapakárena rijluwa iká, ke kaja Jesucristo jaꞌapiyá jemaꞌajeño, Babilonia teꞌeré e iꞌimakaño. Neká kemaño inaku: “Eko palá najló kaꞌajnó”, ke. Ñaké kaja Marcos, nuꞌurí ke nojló iꞌimakare, kemaká inaku: “Eko palá najló kaꞌajnó”, ke.
14 Íkiꞌija Jesucristo jaꞌapiyá jemaꞌajeño wátaka pekowáaka, ñakele ajalaka pekowáaka palá. Nuwata Tupana laꞌaká ipechu palá.
Kaja.