Pajlákachina yukuna marí
2
Tupana purákaꞌalo jaꞌapátajeño iꞌimakeño Israel lakénami eꞌiyowá iꞌimaká. Maꞌapona ke pajlákachina iꞌimajika kaja neꞌiyowá. Neká kemakeño nanakuwá: “Tupana purákaꞌalo jaꞌapátajeño weká”, ke. Ñaké kaja pajlákachina iꞌimajika piño ijwaꞌaté; napajlákare aú newíñaꞌataje iká nakaje nakú apoꞌojó. Nakaje newíñaꞌatajikare nakú apichátari iná pechu Tupana liyá. Unká kaja nawátala wawakáraꞌajeri Jesucristo, iꞌimatari iná kapichákajo liyá. Ilé kaje pachá Tupana wajájeri neká meketana iꞌimajemi.
2 Napurákaꞌalo aú kajrú inaꞌukena iꞌijnatájika nápumichu puꞌuwaré laꞌakaná; nanakojé kaja kajrú inaꞌukena puraꞌajiko puꞌuwaré kewákaje purákaꞌaloji nakú.
3 Kamejéneꞌekena kaja neꞌemajika. Neká jewíñaꞌatajeño iká pajlakaje purákaꞌaloji nakú, aꞌakáloje najló liñeru. Kapichájeño penájena neꞌemajika, unká wani neꞌemalajo riliyá, kaja júpimi ke ñaké ilé kajena nakú kemakana iꞌimaká: “Marí ke laꞌajíkaño amájeño wajákaje yajwé”.
4 Ñaké kaja Tupana waꞌatéjena, jeꞌechú chiyájena, nakiyana iꞌimaká puꞌuwaré laꞌajeñó. Unká Tupana amalo nachaje puꞌuwaré nalaꞌakare liyá; rikaꞌá neꞌemaká puꞌuwaré laꞌakaño wajákelana pukuna chojé. Kalajeruni wani chojé riyurí neꞌemaká, aꞌajná riwajájika chapújneꞌekena wakajé ejená. Rejéchami rimájika nanaku mékeka riwajájika piño neká, reyá aꞌajná ñoꞌojó.
5 Unká kaja Tupana amalo júpimi iꞌimakaño michuna chaje, puꞌuwaré nalaꞌakare liyá iꞌimaká. Noé michú iꞌimari riyukuna najló iꞌimaká, eꞌiyonaja unká nemaꞌalá raꞌapiyá. Raú kalé Tupana wakáraꞌari kajrú juni jaꞌakó, rikapichátakaloje piyukeja puꞌuwaré laꞌajeñó raú. Mekeleja kalé riꞌimatá kapichákajo liyá iꞌimaká: Noé, eyá iyamá kuwáꞌata kele (7) rijwaꞌaté iꞌimakaño, keleja.
6 Apú wakajé piño júpimi iꞌimaká, Tupana kapichátari iyamá pajimila Sodoma, Gomorra waꞌaté. Pajimila e iꞌimakaño rikapichata keraꞌathani aú iꞌimaká, pajimila pukunami yuriro paꞌilá ke. Ilé ke rilaꞌaká neꞌemaká, ajopana puꞌuwaré laꞌakaño weꞌepíkaloje mékeka riwajaka puꞌuwaré laꞌakaño.
7-8 Riwakajé Lot ja kalé iꞌimaró neꞌiyayá. Palá laꞌajerí riꞌimaká. Chapú wani nalaꞌajika pekowáaka rewá. Ramake nalaꞌajika namanáicho pajwaꞌatéchaka; remaꞌaké kaja napuraꞌajiko puꞌuwaré pajwaꞌatéchaka. Riká iꞌimakeri chapú kaje wani rijló, riwajwé majákaꞌaro raú.
9 Tupana weꞌepiri puꞌuwaré kaje yajwé jaꞌapátakana, riwátaka ke laꞌakaño liyá; riweꞌepí kaja chapú laꞌakaño wajákana, riphájika rená chojé wakajé. Rimájika mékeka rijló nakaje piyukeja inaꞌukena laꞌakare, marí ejaꞌawá chu neꞌemaká ketana. Riwakajé kaja puꞌuwaré laꞌakaño amaje Tupana wajákaꞌala yajwé.
10 Marí kajena Tupana wajaje ajopana chaje íkiꞌika: ñujuꞌukena wani iꞌimakaño; napechu keja laꞌakaño; unká laꞌalaño Tupana wakáraꞌaka ke; unká keroꞌolaño Tupana waꞌatéjena, jeꞌechú chiyájena, nakú puraꞌakano puꞌuwaré piyá.
11 Rijwaꞌatéjena, jeꞌechú chiyájena, inaꞌukena chaje neká, eꞌiyonaja unká napuraꞌaló puꞌuwaré wani puꞌuwaré laꞌakaño nakú, narukátaka aú Tupánajlo neká.
12 Eyá pajlakaje purákaꞌaloji nakú jewíñaꞌatajeño, numakárena nakú, kamejérina keja neká. Napechu keja laꞌakaño neká; unká méñoꞌojo iná laꞌalá nenakú, kamejérina jaꞌakaño napatajona chojé keja neká. Kapichájeño penájena neká, jewíñaꞌataño ajopana pajlakaje purákaꞌaloji nakú.
13 Chapú wani nalaꞌaká ajopana inaꞌukena lokópaꞌalaja namájika chapú kaje yajwé. Puꞌuwaká nalaꞌaká puꞌuwaré namanáicho ajopana waꞌaté; puꞌují napechu nanakuwá, nalaꞌakale napechu keja. Mapeja kaja napáñaꞌataka inaku, awakako aú aꞌajnewá ajñakana nakú. Puꞌují napechu nakaje nakú, laꞌarí napechu puꞌují najluwa mapeja.
14 Namanaicha aú nayakaꞌo inaana chaje; unká nayaꞌaló puꞌuwaré laꞌakaná nakú. Unká pechu iꞌimalaño kaphí Tupana chojé, namata puꞌuwaré laꞌakaná aú. Kanakújeꞌekena wani neká; kapichákajo penájena wani neká.
15 Kaja nayurí palani purákaꞌalo jaꞌapiyá iꞌimakana. Nalaꞌá Tupana purákaꞌalo jaꞌapátajeri Balaam, Beor michú iꞌirimi, laꞌaká iꞌimaká ke. Liñeru chaya rilaꞌá puꞌuwaré iꞌimaká,
16 eyá rileꞌejé burra akhaꞌayó riꞌimaká, riwátakale puꞌuwaré laꞌakaná chona. Unká méñoꞌojo rupuraꞌaló, eꞌiyonaja Tupana puraꞌátari ruká, rokhaꞌakáloje Balaam, rilaꞌaká piyá puꞌuwaré.
17 Apichátakeja purákaꞌaloji nakú jewíñaꞌatajeño, numakárena nakú, unká na penaje kalé neká. Unká na penaje kalé juni jamoꞌokelana, unká juni iꞌimalare chu; unká kaja na penaje kalé juni juwákaꞌala, karená jaꞌapátakare mapeja, unká juni jaꞌalaro eꞌiyayá. Ñaké kaja neká, matajnako neꞌemajika kalajeruni chu.
18 Inaꞌuké nakiyana keñoꞌoñó pajlakaje purákaꞌaloji chiyá jáchoꞌokano; nakeñoꞌó kaja puꞌuwaré laꞌakaná yuríkana naliyó. Raú ajopana amátaño ilé kajena puꞌuwaré laꞌakaná aú, napaꞌakóloje rilaꞌajé piño.
19 Nemá najló: “Ilaꞌá iwátaka ke, unká na iꞌimalá iwakáraꞌajeri, riwajákaloje iká richona penaje”, ke napajlaka najwaꞌaté. Re nawakáraꞌajeri, puꞌuwaré laꞌakaná nakú wakáraꞌajeri riká. Rijwaꞌatéjena neꞌemakale, nalaꞌá puꞌuwaré, ñakele unká méñoꞌojo nalaꞌalá palá. Kaja puꞌuwaré laꞌakaná iꞌiwapataro nachá rijluwa, neꞌemakáloje ñakeja laꞌakana nakú.
20 Wawakáraꞌajeri Jesucristo, weꞌematájeri kaja riká. Neꞌiyajena keñoꞌoñó riyukuna aꞌakana nanakojó, raú kalé neꞌemaó puꞌuwaré nalaꞌakare liyá. Eꞌiyonaja kalé napaꞌó piño puꞌuwaré laꞌakaná chojé, raú naꞌó piño puꞌuwaré laꞌakañó wakáraꞌajeri kápeje. Ilé ke nalaꞌakale, chapú wani riꞌimajika najló. Unkákela nakeñoꞌolajla Jesucristo jaꞌapiyá jemaꞌakana iꞌimaká, unká ñaké chapú wani riꞌimakajla najló.
21 Re kaꞌajná inaꞌuké nakiyana weꞌepiño Jesucristo purákaꞌalo nakojé, raú nalaꞌá palá, eꞌiyonaja rejomi náchoꞌo piño richiyá. Richaje palaka riꞌimakajla najló, unkákela naweꞌepílajla Tupana purákaꞌalo nakojé. Chapú wani riꞌimajika najló nayurika riká pachá.
22 Marí ke nemaká ilé ke laꞌakaño nakú: “Yawi pirakana chilákari raꞌajné, kéchami rajñaka piño riká. Ñaké kaja jeꞌerú pirakana aꞌapitaká palani juni jakojé, kéchami ripaꞌakó piño kajakaꞌapé jakojé toꞌojó”.