3 Iweꞌepí kaja marí: Ejaꞌawá iphájika rená chojé kaja penaje wakajé, inaꞌuké nakiyana laꞌajeño neꞌechajnó Tupana purákaꞌalo nakú; napechu keja nalaꞌajika puꞌuwaré.

4 Marí ke nemájika: “Jesucristo kemari rinakuwá iꞌimaká: ‘Nupaꞌajó piño majó’, ke. Eta, ¿mere chi riká, kemari ilé ke rinakuwá iꞌimaká? Kaja waꞌajútaya michuna tajnaño iꞌimaká; ejaꞌawá keñoꞌokó wakajé eyá, ñakeja kaja piyukeja nakaje jaꞌapaka maárejecha”, ke nemájika.

5 Ijnú nawátajika nakaje Tupana laꞌakare nakojé weꞌepíkana. Júpimi rikeñoꞌota ejaꞌawá, jeꞌechú waꞌaté. Ripurákaꞌalo aú ja juni eꞌiyayá rikeñoꞌota ejaꞌawá iꞌimaká.

6 Juni aú kaja rikapichata ejaꞌawá chu iꞌimakaño michuna júpimi iꞌimaká. Riwakáraꞌa kajrú juni jaꞌakó iꞌimaká, raú rikapichata neꞌemaká.

7 Eyá piyukeja jeꞌechú, ejaꞌawá waꞌaté, meꞌetení iꞌimakare kapichájero keraꞌathani aú, Tupana wakáraꞌajika riꞌimaká ñaké wakajé. Riwakajé riwajaje puꞌuwaré laꞌajeñó. Ejaꞌawá kapichájiko waꞌató nakapichájiko Tupana liyá.

8 Nojena, kajrú nuwátakarena, ipechu kapicháñaaniña marí: Pajluwa kala keja Tupánajlo mil jarechí, eyá mil jarechí rijló pajluwa kala keja.

9 Unká Tupana maláraꞌatala rikó; neꞌiyajena pechu iꞌimá rinaku: “Rimaláraꞌata japi rikó”, ke. Unká ñaké kalé riká. Unká kiñaja kalé riwajájika inaꞌuké, puꞌuwaré nalaꞌakare pachá; riwata napajnoꞌokó puꞌuwaré nalaꞌakare liyá. Unká wani riwátala inaꞌuké nakiyana kapichako, raú kalé unká joꞌó riꞌimalá rimaká ke.

10 Nakaje rimakare nakú iꞌimajeri rimaká ke. Wajátakaje Jesucristo waíchaka majó; manaꞌí chiyó piroꞌokeji iphaka lapí nakaje jataꞌajé, ke kaja riphájika, unká kaja raꞌalaje renó. Riphájika penaje jeꞌechú kapichájiko. Mejeji keroꞌótakare wani inaꞌukejlo, ke kaja rimejé iꞌimajika, jeꞌechú meꞌetení iꞌimakare kapichájiko aú. Keraꞌathani aú piyukeja nakaje kapichájero; piyuke ejaꞌawá, piyukeja nakaje richu iꞌimakare waꞌató, kapichájero keraꞌathani aú.

11 Ilé ke piyukeja nakaje kapichájiko. Ñakele numá ijló, iꞌimakáloje palá laꞌakaná nakuja meꞌetení; iweꞌepí itukumó Tupana wátaka ke laꞌakana.

12 Iꞌimá riwakajé wátakana nakú. Ilaꞌá ipéchuwa kaphí Tupana wátaka ke laꞌakana, wajé ejaꞌawá, jeꞌechú kaje iꞌimakáloje kiñaja penaje. Riꞌimajika wakajé, jeꞌechú meꞌetení iꞌimakare, kapichájero keraꞌathani aú; piyukeja richuwá iꞌimakare waꞌató, kapichájero kaja keraꞌathani aú.

13 Rapumí chojé, wajé ejaꞌawá, wajé jeꞌechú waꞌaté, iꞌimajeri piño. Kaja Tupana aruká wajló riká, raú riká wátakana nakú weꞌemajé. Re piyukeja nakaje iꞌimajé palani wani, palá laꞌakañoja kalé iꞌimajeño re.

14 Nojena, íkiꞌija nuwátakarena, kaja numá ijló mékeka riꞌimajika. Riwátakana nakú ilaꞌá ipéchuwa kaphí, ilaꞌakáloje palá ajopana inaꞌukena; ilaꞌá kaja ipéchuwa kaphí, ilaꞌaká piyá puꞌuwaré.

15 Jemaꞌá marí: Unká wawakáraꞌajeri Jesucristo laꞌalá rikó tuꞌujné majó iphákana nakú. Inaꞌuké palaꞌatákaloje napéchuwa puꞌuwaré nalaꞌakare liyá penaje unká riphálaje majó kiñaja, raú weꞌechú kaꞌalá iꞌimajé jupi najló, neꞌemakóloje kapichákajo liyá penaje. Riká yukuna kaja Pablo iꞌimá iꞌimaká. Wanakiyana kaja riká. Tupana aꞌarí rijló weꞌepíkaje rilanaꞌakáloje riyukuna penaje.

16 Raú kalé Pablo wakáraꞌari ajopana Jesucristo jaꞌapiyá jemaꞌajéñojlo purákaꞌaloji. Puwichani ripurákaꞌalo nakiyana, unká iná weꞌepila palá paineko chiyó, meke kemakánaka riká. Re inaꞌuké nakiyana unká weꞌepila palá Tupana purákaꞌalo nakojé, apoꞌojó nemaká rinaku. Neká kechíraꞌaño Tupana purákaꞌalo Pablo lanaꞌakare iꞌimaká, ñaké kaja nakechíraꞌataka apú Tupana purákaꞌalo lanaꞌakéjami nakiyana. Ilé ke laꞌakana aú nalaꞌá nekó chapú.

17 Nojena, íkiꞌija nuwátakarena, kaja nuꞌumá ijló mékeka riꞌimajika yukuna. Unká chiyó riꞌimá ñaké, kaja iweꞌepí riyukuna nakojé, ñakele ilaꞌá ipéchuwa kaphí richojé. Unká laꞌalaño Tupana wátaka ke yukuna nuꞌumá ijló. Chapú laꞌajeñó neká, unká kaja kewákaje kalé napurákaꞌalo. Iweꞌepí ikó naliyá, nakaꞌaká piyá iká kewákaje purákaꞌaloji liyá.

18 Ñakele iweꞌepí richaje, richájeno ke, wawakáraꞌajeri Jesucristo nakojé. Weꞌematájeri riká. Ripalamane aú ipechu iꞌimá richaje, richaje ke richojé kaphí. ¡Palánijlaka ipuraꞌakojla palá wani rinaku meꞌetení, ñaké kaja ipuraꞌajiko waꞌajini wani rinaku palá! Ilé keja riꞌimajika.