Waweꞌepíkaloje na penájeka Juan wakáraꞌaka najló marí purákaꞌaloji yukuna marí:

Jesucristo iꞌimaká ejaꞌawá chu wakajé, weká ke kaja riꞌimaká inaꞌuké. Puꞌuwaré walaꞌakare chaya ritakaꞌá iꞌimaká. Ripalamane aú Tupana amaro Jesucristo jaꞌapiyá jemaꞌajeño chaje. Raꞌapiyatéjena penájemina, ajopana waꞌaté, jaꞌapátaño palá richuwá Tupana purákaꞌalo, eꞌiyonaja ajopana pechu iꞌimari apoꞌojó wani Ripurákaꞌalo nakú. Nemaké Jesucristo nakú: “Unká weká ke kalé riꞌimaká inaꞌuké, marí ejaꞌawá chu riꞌimaké wakajé. Ripéchuja kalé iꞌimari pajluwaja inaꞌuké eꞌiyá meketánaja, eꞌiyonaja unká riꞌimalá rinapona waꞌaté, weká ke kaja”, ke nemájika rinaku. Nemaké kaja Tupana nakú: “Palájneꞌeke riká, unká laꞌalá puꞌuwaré, ke. Marí ejaꞌawá chu inaꞌuké laꞌañó puꞌuwaré, raú waweꞌepí unká Tupana keñoꞌótakarena kalé weká”. Nemaké kaja: “Apala rijwaꞌatéjena, jeꞌechú chiyájena, kaꞌajná keñoꞌótaño weꞌemaká, nakaje marí ejaꞌawá chu iꞌimakare waꞌaté. Unká paala wanapona, walaꞌakare aú puꞌuwaré. Unká Tupana kalé keñoꞌótari weká, ñakele unká kaja raꞌalá rinakojó puꞌuwaré walaꞌakare. Iná pechu keja iná laꞌaká puꞌuwaré, iná wátaka ke. Unká Tupana wajálaje weká ripachá”, ke nemájika.

Nemá kaja: “Piyukeja weká iꞌimajeñó kapichákajo liyá Tupana palamane aú, ñakele unká na penaje kalé Jesucristo takaꞌá inaꞌuké chaya iꞌimaká”, ke napechu iꞌimajika apoꞌojó wani Tupana pechu liyá. Nalaꞌaké kaja nekó weꞌepiño ke wani. Raú nalaꞌaké ajopana inaꞌukena mapechúruna ke najluwa, unkale napechu iꞌimalá napechu ke kaja.

Inaꞌuké weꞌepíkaloje kewákaje purákaꞌaloji nakojé penaje Juan lanaꞌá marí purákaꞌaloji najló iꞌimaká. Riká yuriro kaja wajló. Riꞌimá wajló riyukuna, wemaꞌaká piyá pajlakaje purákaꞌaloji jaꞌapiyá. Rimá kaja wajló, wawátakaloje íkiꞌija pekowáaka penaje, walaꞌakáloje palá Tupana wátaka ke.