APOCALIPSIS
Tupana iꞌimaká Jesucrístojlo mékeka nakaje iꞌimajika akijñojo yukuna marí
1
Tupana aꞌarí puꞌuwaká Jesucrístojlo nakaje akijñojo iꞌimajíkare, raꞌapátakaloje riyukuna weká rijwaꞌaté jápajeñojlo. Raú Jesucristo wakáraꞌa pajluwaja Tupana waꞌatéjeri, jeꞌechú chiyaje, riyukuna iꞌimajé nuká Juanjlo.
2 Kewaka marí yuku, Tupana purákaꞌalo riká, rikoja Jesucristo jaꞌapátakale nojló riꞌimaká.
3 Palá Tupana laꞌajika puraꞌajeño marí purákaꞌaloji lanaꞌakéjami waꞌaté nakú; palá kaja rilaꞌajika aꞌajeño nanakojó ripurákaꞌalo. Palani raꞌapiyá jemaꞌakana, riꞌimajíkale marí purákaꞌaloji kemaká ke. Meketana iꞌimajemi riꞌimajé ñaké.
Juan wakáraꞌari Jesucristo jaꞌapiyá jemaꞌajéñojlo marí purákaꞌaloji iꞌimaká
4 Nuká Juan wakáraꞌari ijló marí purákaꞌaloji. Asia teꞌeré e re iyamá kuwáꞌata kele (7) ileꞌejé awakákaꞌalo ñakarelana apú ewá, apú ewá, ke. Piyukeja richojé awakájeñojlo nuwakáraꞌa marí purákaꞌaloji. Nuwata Tupana laꞌaká ipechu palá. Rijwaꞌaté jápajeri nuká. Nuwata iꞌimaká palá ripalamane aú. Júpimi wani eyá iꞌimaká, Tupana; ñakeja riká meꞌetení; ñakeja kaja riꞌimajika maáreya watukumá. Re Ripechu, Tupana iꞌimaká e kaja riká. Iyamá kuwáꞌata kele ripalamane. Nuwata rilaꞌaká iká palá;
5 nuwata kaja Jesucristo laꞌaká iká palá. Kewaka ripurákaꞌalo raꞌapátakare inaꞌukejlo. Rilaꞌá kaja piyuke nakaje Tupana wakáraꞌaka ke. Ajopana kaja takaꞌakaño tukumá rimakápoꞌo iꞌimaká. Inaꞌuké wakáraꞌajeño, marí ejaꞌawá chu iꞌimakaño, chaje riká. Íkiꞌija wani Jesucristo wátaka weká, ñakele ritakaꞌá wachaya aꞌawaná apiyákakanami nakojé iꞌimaká. Re kajrú rira iꞌijnaká itapuwa aphumi chiyá. Ripalamane aú rilaꞌá weká unká puꞌuwaré laꞌajeñó ke kalé rijló.
6 Íkiꞌija Jesucristo wátaka weká. Ritakaꞌakale wachaya, weꞌemaó puꞌuwaré laꞌakana liyá, weꞌemaká piyá puꞌuwaré laꞌakana nakuja. Ñakele piyuke weká puraꞌañó Tupana, Jesucristo jaraꞌapá, waꞌaté ajopana chaya. Palá wapuraꞌajiko Jesucristo nakú ñakeja wani. Unká ráchoꞌolajo inaꞌuké wakáraꞌajeri iꞌimakana chiyá, ilé keja riꞌimajika.
7 Jesucristo paꞌajiko majó wakajé,
piyukeja inaꞌukena, ejaꞌawá chuwá iꞌimakaño,
amájika riwitúkaꞌaka majó juni juwákaꞌala eꞌiyowá;
noño riꞌimaká waꞌató amájeño riwitúkaꞌaka majó.
Riwakajé kajrú neyájika.
Ilé ke riꞌimajika.
8 Piyuke nakaje laꞌajerí Tupana. Rimá rinakuwá imaká: “Piyukeja nakaje keñoꞌótajeri nuká; piyukeja nakaje tajátajeri kaja nuká”.
Júpimi wani eyá iꞌimaká, Tupana; ñakeja riká meꞌetení; ñakeja kaja riꞌimajika maáreya watukumajo.
9 Nuká Juan lanaꞌarí ijló marí. Wejena ke weká pajwaꞌatéchaka, Jesucristo jaꞌapiyá jemaꞌajeño waja weꞌemakale. Rijwaꞌatéjena weꞌemakale, ajopana laꞌañó weká chapú. Ilé kaje aú Jesucristo laꞌarí wapechu kaphí, wayurika piyá raꞌapiyá jemaꞌakana, wajñaꞌakáloje chapú kaje yajwé panaku. Noꞌopátakale ajopánajlo Tupana purákaꞌalo, Jesucristo kemakare nakú nojló, jimaje nawaꞌa nuꞌumaká tejmuji aú paranakuwa Patmos ejo.
10 Chuwa nuꞌumajika ijló nakaje puꞌuwaká nomákare iꞌimaká yukuna. Watánaꞌakaje wakajé iꞌimari riwakajé, e Tupana Pechu jaꞌaró nunakojé, rejéchami nomaꞌaká pajluwa puraꞌakó nuyámojo. Mejrí wani ripurákaꞌalo mejé iꞌimaká. Luwiluwí chojé iná aphoꞌoká, ke rimejé iꞌimaká.
11 E rimá nojló: “Pilanaꞌá papera chojé nakaje pamájikare meꞌetení yukuna. Rejomi piwakáraꞌaje riká iyamá kuwáꞌata kele nawakáꞌalo ñakarelana, Asia teꞌeré nakú iꞌimakare, chiyájenajlo. Re riká Éfeso, Esmirna, Pérgamo, Tiatira, Sardis, Filadelfia eyá, Laodicea kele e. Rejo piwakáraꞌaje najló nakaje pamájikare yukuna”.
12 Ilé ke nomaꞌaká rimaká aú, nupajnoꞌó nuyámojo yakáꞌajo, nomákaloje naka puraꞌakó nujwaꞌaté. Nuyakaꞌo, amari iyamá kuwáꞌata kele jepé kaje lukúnaꞌakejami lapaꞌakó. Oro nakiyá laꞌakanami waja ripatajona iꞌimaká.
13 Reꞌiyá nomá kaja pajluwa inaꞌuké táraꞌako. Inaꞌuké iꞌimakáloje ripalamane penaje iꞌimakare ke ramako. Waphereni raꞌarumaká iꞌimaká; chítaje kaja riwachaphila iꞌimaká, mapíraꞌaro riꞌikú chuwá rinaku, oro pataró rinaku.
14 Jareni riwilá amako, juni juwákaꞌala jareni wani ke. Keraꞌathani ke rijlú amako.
15 Sereni riꞌimá amako, pejruꞌuwá sereni jewani luwaꞌakeja, nawichoꞌokare keraꞌathani imaꞌaní aú, nalaꞌakáloje riká kapiluni penaje, ke ramako. Eyá rinúrupi mejé jemaꞌaró kajruni wani jipa mejé ke.
16 Riyátheꞌela kaꞌañá aú ripatá iyamá kuwáꞌata kele iwijrina. Rinuma chiyá nomá kaja jajalu kaje jáchoꞌoko, iyámojo pumitanó irerí, puꞌuwení wani ramako. Nomá kaja rijimá mokoꞌoká, kamú pataká kaphí wani ke.
17 Nomaka riká ejéchami, noꞌokó riꞌimá nakojé matámiru ke. E ritoꞌotá riyátheꞌela kaꞌañá nunakojé, rimá nojló: “Pikeroꞌoniño, matajnako iꞌimajika nuká. Piyuke nakaje keñoꞌótajeri nuká; piyuke nakaje tajátajeri kaja nuká.
18 Kajmuni nuká. Nutakaꞌá iꞌimaká eꞌiyonaja, chuwa kajmuni nuká, ñakeja nuꞌumajika matajnako. Tupana aꞌarí nuká, nuꞌumatákaloje noꞌopiyá jemaꞌajeño kapichákajo liyá. Raꞌá kaja nuká nuwakáraꞌakaloje unká jemaꞌalaño noꞌopiyá nawajákelana ejo.
19 Pilanaꞌá nakaje wajé pamíchaje, nakaje pamájikare meketánaja iꞌimajemi waꞌató.
20 Marí ke kemakana iyamá kuwáꞌata kele iwijrina jenami pamíchaje nukapi: Noꞌopiyá jemaꞌajeño awakákaꞌalo ñakarelana chiyá wakáraꞌajeño ke neká. Eyá iyamá kuwáꞌata kele jepé kaje lapiꞌichajo pamíchaje: Iyamá kuwáꞌata kele noꞌopiyá jemaꞌajeño awakákaꞌalo ñakarelana, Asia teꞌeré nakú iꞌimakare, ke riká”.