Purákaꞌaloji riwakáraꞌakare pajimila Éfeso e iꞌimakáñojlo marí
2
Rimá nojló: “Pilanaꞌá marí ke noꞌopiyá jemaꞌajeño wakáraꞌajeri Éfeso e iꞌimakárejlo: Noꞌopiyá jemaꞌajeño awakáñono iyamá kuwáꞌata kele nawakákaꞌalo ñakarelana iꞌimakare chojé nateꞌeré ewá. Najwaꞌaté nuká. Richiyá wakáraꞌajeño, nujwaꞌatéjena waja neká. Ñakele numá marí ke Éfeso e iꞌimakaño nakú:
2 Nuweꞌepí palá ilaꞌakare nakojé. Nuweꞌepí kaja ijápaka kajrú, ilaꞌakáloje nakaje nuwátaka ke. Re inaꞌuké nakiyana kemaño nanakuwá mapeja: ‘Tupana nakú jewíñaꞌatajeño weká’, ke. Kaja iweꞌepí mékajenaka neká, raú iweꞌepí unká ñaké kalé neká. Pajlákachina neká.
3 Jemaꞌakale palá noꞌopiyá, nalaꞌá iká chapú ilérowa iꞌimaká eꞌiyonaja, unká jáchoꞌolo noꞌopiyá jemaꞌakana chiyá raú.
4 Eꞌiyonaja kalé ilaꞌá marí ke, unká nuwátalare kaje: Ikeñoꞌoká noꞌopiyá jemaꞌakana iꞌimaká wakajé, íkiꞌija iwátaka nuꞌumaká. Eyá meꞌetení, unká ñaké kalé iwátaka nuká.
5 Iweꞌepí na aú ka ikeñoꞌó nuliyá pajnoꞌokano. Kaja iyurí puꞌuwaré laꞌakana iliyó iꞌimaká. Eyá chuwa, ilaꞌá piño nakaje ikeñoꞌoká noꞌopiyá jemaꞌakana wakajé, ilaꞌaká iꞌimaká ke kaja. Unkájika ee iyurí puꞌuwaré laꞌakana iliyó, nukaꞌajé iliyá vela patajona.
6 Re kaja kalé nojló palani nakaje ilaꞌakare: Unká wani paala ijló puꞌuwaré Nicolaítas nakiyana laꞌakare. Nupechu nakaje nalaꞌakare nakú, ke kaja ipechu nakaje nalaꞌakare nakú.
7 Jemaꞌá palá mékeka Tupana Pechu kemaká noꞌopiyá jemaꞌajéñojlo: Táraꞌajeño kaphí nochojejlo noꞌojé kajmuchaji, neꞌemakáloje matajnako Tupana waꞌaté”, ke Jesucristo kemaká nojló inaku.
Purákaꞌaloji riwakáraꞌakare pajimila Esmirna e iꞌimakáñojlo marí
8 Jesucristo kemari piño nojló: “Piwakáraꞌa piño marí purákaꞌaloji noꞌopiyá jemaꞌajeño wakáraꞌajeri Esmirna e iꞌimakárejlo. Pimá rijló: Matajnako iꞌimajika nuká. Nuká keñoꞌótari piyukeja nakaje iꞌimaká; nuká kaja ñapátajeri piyukeja nakaje meꞌetení iꞌimakare laꞌakana. Nenókare penájemi nuká, rejomi numakápoꞌo piño iꞌimaká. Raú numá inaku:
9 Palá nuweꞌepika chapú kaje yajwé amákare meꞌetení nakojé; nuweꞌepí kaja kamuꞌují ilaꞌaká nakaje nakú maare. Jeꞌechú chu, kajrú nakaje iꞌimajika ijló. Nuweꞌepí kaja puꞌuwaré ajopana kemakare inaku nakojé, nemá nanakuwá: ‘Tupana leꞌejena weká’, ke, eꞌiyonaja unká Tupana leꞌejena kalé neká, Jiñá Chiꞌinárikana waꞌatéjena neꞌemakale.
10 Ikeroꞌoniño chapú nalaꞌajíkare iká piyá. Jiñá Chiꞌinárikana wakáraꞌajeri ajopana kaꞌaká inakiyana inaꞌuké wajákelana chojé. Jiñá Chiꞌinárikana laꞌajeri iká chapú; iyamá théꞌela ke kala rilaꞌajika iká chapú, riwátakale iyurika noꞌopiyá jemaꞌakana. Jáchoꞌoniño noꞌopiyá jemaꞌakana chiyá raú; apala ke kaꞌajná nenójika inakiyana, noꞌopiyá jemaꞌajeño iꞌimakale. Ilé ke ilaꞌajika ee, iꞌimajé matajnako jeꞌechú chu, palá ilaꞌakare wemí.
11 ¡Jemaꞌá palá mékeka Tupana Pechu kemaká Jesucristo jaꞌapiyá jemaꞌajéñojlo! Unká kaphí richojé péchuruna kapichálajo piño Tupana liyá”, ke rimaká.
Purákaꞌaloji riwakáraꞌakare pajimila Pérgamo e iꞌimakáñojlo marí
12 Jesucristo kemari piño nojló: “Piwakáraꞌa piño marí purákaꞌaloji noꞌopiyá jemaꞌajeño wakáraꞌajeri, Pérgamo e iꞌimakárejlo. Pimá rijló nunaku: Riká jajalu kajé, iyamá pitari rireri jáchoꞌokaro numá chiyá, kemari inaku:
13 “Nuweꞌepí mékeka nakaje ijló iñakajela ewá. Kajrú inaꞌukena, Jiñá Chiꞌinárikana waꞌatéjena, rewá. Nawakáraꞌajeri wani riká; eyá iká jemaꞌañó palá noꞌopiyá. Antipas iꞌimakeri inaꞌukejlo nuyukuna rewá iꞌimajika, richona nenó riꞌimaká. Chapú wani nalaꞌaká riꞌimaká, eꞌiyonaja unká imichoꞌotala nuchaya raú, kaphí ipechu nochojé. Ilé kaje aú ilaꞌá palá.
14 Eꞌiyonaja kalé re nakaje ilaꞌakare unká paala nojló: re inaꞌuké ijwaꞌaté, unká wani paala napurákaꞌalo, Balaam michú purákaꞌalomi chuwá nalaꞌá nakaje. Marí ke Balaam michú laꞌaká puꞌuwaré iꞌimaká: Rimá Balac michujlo iꞌimaká, raꞌakáloje Israel lakénami meꞌé, najñákaloje aꞌajnejí, natoꞌotákare nakaje jenami, ‘wachiꞌinárikana riká’, ke nemakare nakojé. Rimá kaja rijló, raꞌakáloje nameꞌé, nalaꞌakáloje namanáicho ajopana waꞌaté penaje.
15 “Re kaja eꞌiyowá ajopana, Nicolaítas purákaꞌalo jaꞌapiyá iꞌimakaño, puꞌuwaré wani nojló napurákaꞌalo, unká wani nuwátalare. Re kaja inakiyana unká yurílaño naliyó napurákaꞌalo aꞌakana nanakojó.
16 Nekajlo pimá, napajnoꞌotákaloje Tupana ejo napéchuwa puꞌuwaré nalaꞌakare liyá. Unkaja ke napajnoꞌotá napéchuwa puꞌuwaré nalaꞌakare liyá, nuꞌujnajé neꞌemaká ejo nakapichátaje nupurákaꞌalo aú.
17 ¡Jemaꞌá palá mékeka Tupana Pechu kemaká noꞌopiyá jemaꞌajeño nakú!”, ke Jesucristo kemaká najló.
Rimá piño nojló: “Nulaꞌajé unká jáchoꞌolajeño nupurákaꞌalo jaꞌapiyá jemaꞌakana chiyá pechu kaphí. Noꞌojé kaja pajluwánojlo, pajluwánojlo ke, jipa jareni, rinaku wajé neí iꞌimajé lanaꞌakeja. Unká na weꞌepílaje naka wajé neí iꞌimajika; nekaja kalé, noꞌojíkarenajlo wajé neí, weꞌepéjeño riká”, ke Jesucristo kemaká nojló inaku.
Purákaꞌaloji riwakáraꞌakare Tiatira e iꞌimakáñojlo marí
18 Marí ke Jesucristo kemaká raꞌapiyá jemaꞌajeño wakáraꞌajeri, pajimila Tiatira e iꞌimakárejlo: “Tupana iꞌirí purákaꞌalo marí. Keraꞌathani ke ijluri, amari piyukeja nakaje. Pejruꞌuwá kapiluni, sereni ke jiꞌimari, kemari inaku:
19 Nuweꞌepí nakaje ilaꞌakare nakojé. Nuweꞌepí kaja íkiꞌija iwátaka ajopana inaꞌukena; kaphí kaja ipechu nochojé; palá ilaꞌaká ajopana inaꞌukena nakú; unká kaja iyúchaꞌalo kiñaja. Nuweꞌepí ilaꞌaká palá meꞌetení; ikeñoꞌoká noꞌopiyá jemaꞌakana wakajé, chaje ilaꞌaká palá meꞌetení.
20 “Eꞌiyonaja kalé re apú nakaje ilaꞌakare, unká wani paala nojló: re ilérowa ijwaꞌaté Jezabel. Ruká kemayo runakuwá: ‘Tupana purákaꞌalo jaꞌapátajeyo nuká’, ke. Eꞌiyonaja unká kewaka kalé rumaká, rupurákaꞌalo jimaje noꞌopiyá jemaꞌajeño nakiyana jáchoꞌoño kewákaje purákaꞌaloji chiyá. Re nakaje jenami nemakare nakú: ‘wachiꞌinárikana jenami riká’, ke. Renami nakojé natoꞌotá aꞌajnejí, rejomi naꞌá riká ajopánajlo, najñákaloje penaje. Ruká kemayo ilé aꞌajnejí nakú: ‘Unká iná laꞌalá puꞌuwaré rajñakana aú’. Rumá kaja: ‘Unká achiñana, inaana waꞌaté laꞌalá puꞌuwaré, nalaꞌakachu namanáicho pajwaꞌatéchaka’, ke.
21 Kaja noꞌó rojló weꞌechú kaꞌalá, rupajnoꞌotákaloje rupéchuwa Tupana ejo rumanáicho rulaꞌakare liyá, eꞌiyonaja unká ruwátala riyuríkana ruliyó.
22 Nuwakáraꞌaje támikaje noka ruká, raú romaje kajrú chapú kaje yajwé. Ñaké kaja, laꞌañó namanáicho rujwaꞌaté, amájika chapú kaje yajwé roꞌopona. Ilé ke nulaꞌajika neká chuwa. Napajnoꞌotájika ee napéchuwa namanáicho nalaꞌakare liyá, e unká nukapichátalaje neká rujwaꞌaté.
23 Unkaja ke napajnoꞌotá napéchuwa Tupana ejo, nukapichátaje roꞌopiyá jemaꞌajeño rujwaꞌaté, raú piyuke Jesucristo jaꞌapiyá jemaꞌajeño weꞌepeje mékajeka nuká. Palá nomaka inaꞌuké pechu; nuweꞌepí mékeka napechu nakú nakaje nawátakare laꞌakana. Puꞌuwaré nalaꞌakare lokópaꞌala nuwajaje neká.
24 Eyá kajrú iká, Tiatira e iꞌimakaño, unká jemaꞌalaño rupurákaꞌalo jaꞌapiyá. Unká kaja jemaꞌalá Jiñá Chiꞌinárikana purákaꞌalo nemakare nakú: ‘Meꞌechuje purákaꞌaloji riká’, ke jaꞌapiyá. Iká unká jemaꞌalaño raꞌapiyá, ilé kaje palani, ijló numá: Meꞌetení ilaꞌaká keja ilaꞌajika, unká numalaje ijló apú nakaje nakú ilaꞌakáloje penaje.
25 Jáchoꞌoniño purákaꞌaloji meꞌetení iꞌimakare jaꞌapiyá; raꞌapiyaja iꞌimá, aꞌajná nupaꞌajiko ejaꞌawá nakojé ejená”, ke rimaká.
26 Rimá piño: “Nuká aꞌajeri inaꞌuké, ajopana, ajopana ke, teꞌeré eyájena wakáraꞌajeño penaje. Marí ke iꞌimakaño neꞌemajika: Unká jáchoꞌolajeño nupurákaꞌalo jaꞌapiyá jemaꞌakana chiyá; laꞌajeño nakaje nuwátaka ke, aꞌajná natakaꞌajika ejená. Ilé kajena noꞌojé ajopana inaꞌukena wakáraꞌajeño penaje.
27 Noraꞌapá aꞌaká nuká iwakáraꞌajeri penaje, ke kaja noꞌojika neká nawakáraꞌajeño penaje. Kaphí nawakáraꞌajika neká. Iná kapichátaka iꞌichilá rimajákaꞌakana aú, keja unká jemaꞌalaño Tupana jaꞌapiyá kapichájiko.
28 Noꞌojé noꞌopiyá jemaꞌajeño, neꞌemakáloje matajnako nujwaꞌaté penaje”, ke Jesucristo kemaká.
29 Jemaꞌá palá mékeka Tupana Pechu kemaká Jesucristo jaꞌapiyá jemaꞌajeño nakú, awakaño apú ewá, apú ewá ke, nakú.