Purákaꞌaloji riwakáraꞌakare pajimila Sardis e iꞌimakáñojlo marí
3
Jesucristo kemari piño nojló: “Piwakáraꞌa kaja marí purákaꞌaloji noꞌopiyá jemaꞌajeño wakáraꞌajeri Sardis e iꞌimakárejlo. Pimá rijló nunaku: Jesucristo purákaꞌalo marí. Tupana Pechu jaꞌapiyá ke rilaꞌaká piyuke nakaje. Iyamá kuwáꞌata kele ripalamane. Rinaku piyukeja numá: Palá nuweꞌepika nakaje ilaꞌakare nakojé. Ilérowa napechu inaku: ‘Tupana Pechu jaꞌapiyá iꞌimakaño neká’, ke. Eꞌiyonaja unká ñaké kalé riká.
2 Ñakele numá ijló: Aꞌá inakojó nupurákaꞌalo; ilaꞌá kaja kaphí ipéchuwa richojé, rikapichako piyá ipechu nakiyá. Unká paala waja nakaje ilaꞌakare meꞌetení Tupánajlo, unká riwátaka ke kalé ilaꞌakale nakaje.
3 Iwajá ipéchuwa Tupana purákaꞌalo newíñaꞌatakare iká nakojé; jemaꞌá raꞌapiyá; ipajnoꞌotá ipéchuwa puꞌuwaré ilaꞌakare liyá. Unkaja ke aꞌá inakojó piño nupurákaꞌalo, nuphaje wajátakajo inaku. Jataꞌakachi iphákachu iná ñakaré chojé nakaje jataꞌajé, unká raꞌalá inajlo renó. Ñaké kaja unká noꞌolaje ijló nuphájika inaku jená.
4 “Re mekeleja palá péchuruna pajimila Sardis e. Unká puꞌuwaré laꞌajeñó kalé neká, ajopana iꞌimaká ke. Neká iꞌimajeño nujwaꞌaté; palá napechu iꞌimajika nupalamane. Ilé ke riꞌimajika najló, kaliyáruna neꞌemakale nojló.
5 Nupalamane inaꞌuké nakiyana kaꞌá nanakiyó puꞌuwaré nalaꞌakare, nekaja kalé iꞌimajeño palá nujwaꞌaté jeꞌechú chu. Unká kaja nolákalaje neí papera kaje chiyá, ríchuja neí iꞌimajé lanaꞌakeja. Riká papera kaje chu lanaꞌakéjami kemari mékajenaka iꞌimajeño jeꞌechú chu matajnako nujwaꞌaté. Tupana jimaje, rijwaꞌatéjena, jeꞌechú chiyájena jimaje waꞌató, numaje nanaku: Nujwaꞌatéjena neká ke.
6 Jemaꞌá palá mékeka Tupana Pechu kemaká noꞌopiyá jemaꞌajéñojlo”, ke Jesucristo kemaká nojló inaku.
Purákaꞌaloji riwakáraꞌakare pajimila Filadelfia e iꞌimakáñojlo marí
7 Jesucristo kemari piño nojló: “Piwakáraꞌa marí purákaꞌaloji noꞌopiyá jemaꞌajeño wakáraꞌajeri, Filadelfia e iꞌimakárejlo, pimá rijló: Jesucristo purákaꞌalo marí. Unká laꞌalá puꞌuwaré nuká. Kewákaje purákaꞌaloji yukuna iꞌimajeri nuká. Nukaja kalé kemájeri inaꞌuké nakú, mékajenaka mujlúkaꞌajika jeꞌechú chojé. Numájika nanaku keja nakaje iꞌimajika najló. Unká méñoꞌojo apú meꞌetálaje rapu najló; unká kaja méñoꞌojo apú italaje naliyá rapu. Nuká, Jesucrístoja kalé, kemájeri najló, namujlúkaꞌakaloje jeꞌechú chojé.
8 Nuweꞌepí nakaje ilaꞌakare nakojé. Unká kaphí wani kalé ipechu nuwátaka ke laꞌakana nakú. Eꞌiyonaja kalé aꞌá inakojó nupurákaꞌalo; unká kaja imichoꞌotala nuchaya; iꞌimá kaja nuyukuna inaꞌuké rewá iꞌimakáñojlo. Ñakele unká na kalé itájeri ijló rapu, iꞌimaká piyá nuyukuna najló.
9 Re Jiñá Chiꞌinárikana waꞌatéjena ilérowa. Neká kemaño nanakuwá: ‘Jesucristo waꞌatéjena weká’, ke. Unká nujwaꞌatéjena kalé neká, mapeja napajlaka nanakuwá. Neká nuwáꞌaje ijimaje, naweꞌepíkaloje iká cháꞌataka neká. Naweꞌepeje kaja íkiꞌija nuwátakarena iká.
10 Iká jemaꞌañó noꞌopiyá palá, ñakele nupalamane unká amálaje piyukeja chapú kaje ejaꞌawá chuwá iꞌimakare yajwé. Akijñojo piyukeja inaꞌukena amájika chapú kaje yajwé. Raú Tupana atáꞌajeri piyukeja inaꞌukena ejaꞌawá chu iꞌimakaño, ramákaloje mékeka napechu nunaku.
11 “Meketana iꞌimajemi nuká iꞌimajeri ichaje. Iká jemaꞌañó noꞌopiyá, jáchoꞌoniño nupurákaꞌalo chiyá. Unkájika ee jáchoꞌo richiyá, Tupana aꞌajé ijló riwemí jeꞌechú chu iꞌimakana aú. Iyuríniña ajopana jáchoꞌotaka iká richiyá.
12 Marí ke nulaꞌajika kaphí nochojé táraꞌajeño nakú: Nuyureje neꞌemaká ajopana, puꞌují péchuruna Tupana nakú, waꞌaté matajnako. Tupana leꞌejena inaꞌukena neꞌemajika. Jeꞌechú chu re wajé pajimila Jerusalén, riká pajimila witúkaꞌajeri jeꞌechú chiyá majó. Re kaphí nochojé táraꞌajeño iꞌimajé, raú ajopana weꞌepéjeño Tupana waꞌatéjena neká.
13 Jemaꞌá palá mékeka Tupana Pechu kemaká noꞌopiyá jemaꞌajéñojlo”, ke Jesucristo kemaká inaku.
Purákaꞌaloji riwakáraꞌakare pajimila Laodicea e iꞌimakáñojlo marí.
14 Marí ke Jesucristo kemaká piño nojló:
“Eko piwakáraꞌa kaja marí purákaꞌaloji noꞌopiyá jemaꞌajeño, Laodicea e iꞌimakáñojlo. Pimá nawakáraꞌajerijlo nunaku: Jesucristo purákaꞌalo marí. Tupana wátaka ke laꞌajerí riká. Kewákaje purákaꞌaloji nakú kemájeri riká. Rijwaꞌaté Tupana keñoꞌótari piyukeja nakaje iꞌimaká. Riká penaje kemari inaku:
15 Palá nuweꞌepika piyukeja nakaje ilaꞌakare nakojé. Nuweꞌepí unká íkiꞌija kalé iwátaka nuká; unká kaja ipechu iꞌimalá chapú nunaku. Nuwata ipechu iꞌimaká pajluwaja chuwaja nunaku. Nuwata ipechu iꞌimaká íkiꞌija nuwátakana nakú kaꞌajná, chapú nunaku kaꞌajná. Unká nuwátala ipechu iꞌimaká wejápaja nuwátakana nakú, eyá wejápaja chapú nunaku iꞌimakana nakú.
16 Wejápaja kemachi iwátaka nuká, ñakele nukaꞌajé nuliyó iká.
17 Imá inakuwá: ‘Kajrú laꞌakaño weká, unká na nakú kalé walaꞌá kamuꞌují’, ke. Unká iweꞌepila mékeka iká nojló. Kamuꞌují laꞌakaño ke iká nojló; chapú kaje yajwé amájeño penájena nojló iká; maꞌarumakáruna ke iká nojló; mejluruna keja kaja nojló iká.
18 Ijló numá: Ikejaꞌa nuliyá iꞌimakaje, iꞌimakáloje palá laꞌakaño raú. Raú iꞌimajé kajrú laꞌakaño ke nojló. Imá kaja nojló, nulaꞌakáloje iká palá péchuruna, kaja keja iyuríkoloje reyá aꞌajná ñoꞌojó penaje. Imá kaja nojló, nulaꞌakáloje ipechu palá, iweꞌepíkaloje Tupana purákaꞌalo nakojé raú.
19 “Neká, íkiꞌija nuwátakarena, nuwajá, nayuríkaloje puꞌuwaré laꞌakaná naliyó, nemaꞌakáloje noꞌopiyá palá penaje. Aꞌá inakojó nupurákaꞌalo; ipajnoꞌotá kaja ipéchuwa Tupana ejo puꞌuwaré ilaꞌakare liyá.
20 Iyakaꞌo, iñakaré numanaya nuwaꞌa ijló. Jemaꞌarí nunúrupi mejé, meꞌetari nojló rinumaná, numujlúkaꞌakaloje richojé, rijwaꞌaté wajñaje waꞌajnewá pajñakani.
21 Nupalamane inaꞌuké yurí naliyó puꞌuwaré laꞌakaná, neká noꞌojé nujwaꞌaté wakáraꞌajeño penaje. Nuká cháꞌatari puꞌuwaré laꞌakaná, ñakele chuwa Noraꞌapá awaꞌá nuká. Inaꞌuké wakáraꞌajeri nuká rijwaꞌaté.
22 Jemaꞌá palá mékeka Tupana Pechu kemaká noꞌopiyá jemaꞌajeño nakú”, ke Jesucristo kemaká nojló inaku.