Puꞌují jeꞌechú chu iꞌimakaño pechu Tupana nakú yukuna marí
4
Rejomi nomá piño jeꞌechú numaná ke meꞌetákeja, richiyá nomaꞌá pajluwa puraꞌakó. Luwiluwí mejé jemaꞌakó, ke kaja rinúrupi mejé jemaꞌakó. Maapami ke puraꞌakó nujwaꞌaté penájemi riꞌimaká. Riká kemari piño nojló: “Páchoꞌo majó, nuyaꞌatachi pijló mékeka nakaje iꞌimajika marí ejomi”.
2 Rejéchami Tupana Pechu jaꞌapiyá ke nóchoꞌoko jeꞌechú chojé. Re nomá ñákaꞌajori nawakáraꞌajerijlo penaje, richu nomá pajluwa yáꞌako.
3 Jipa palá nojé wani diamante, eyá rubí, ke rijimá amako. Ilé jipa palá nojé wani ke ramákana iꞌimaká. Ñákaꞌajori nakuwá nomá yurijiri chipúkaꞌaka, esmeralda kamaré ke rikamaré iꞌimaká.
4 Peꞌiyó ñákaꞌajori iꞌimakare nakojé veinticuatro ñákaꞌajori chipúkaꞌari tujlá ke pajimájechaka. Nawakáraꞌajeño yaꞌakóloje richu penaje riꞌimaká. Veinticuatro kaja pheñawilana yáꞌaño richu. Jaré nojé waja naꞌarumaká iꞌimaká. Pútenaji kaje oro nakiyá laꞌakanami iꞌimari nachá.
5 Ñákaꞌajori peꞌiyó yáꞌako e, nomaꞌá kajrú pichaní majákaꞌako mejé. Riká ñákaꞌajori jimaje nomá kaja iyamá kuwáꞌata kele kamareji lapaꞌakó lukúnaꞌakeja. Tupana Pechu kele kaja riꞌimaká.
6 Peꞌiyó ñákaꞌajori iꞌimakare nakú nomá kaja kajrú wíluru kaje, meꞌejñapí nojé wani, toꞌokó, jamáraꞌapani riꞌimaká.
Ñákaꞌajori awaꞌá nomá ajopana paꞌu kele lapaꞌakó. Pajluwaja táraꞌaro majó pitá nakojó; apú táraꞌaro apoꞌojó pitá nakojó; eyá apú táraꞌaro riwajlé chojó; eyá apú táraꞌaro rijimá ejo pitá nakojó, ke natáraꞌako. Kajrú nojé nejlú iꞌimaká piyukeja nanakuwá, najimá chuwá, nawajlé chuwá waꞌató, nejlú pajaꞌó nanakuwá.
7 Pajluwaja nanakiyana amaro león ke; apú amaro jema pirakana achiñá ke; apú jimá amaro inaꞌuké jimá ke; iná amaka perí ajraka, ke apú amako.
8 Paꞌu kele neꞌemaká, kayuphéruna waja neꞌemaká. Pajluwa kuwáꞌata keleno waja nayuphé iꞌimaká nanaku; kejlú nojé nayuphé iꞌimaká. Raꞌapojó pitá kajrú nejlú iꞌimaká; richajo pitá kajrú kaja nejlú iꞌimaká. Unká nayurila jataníkaje, rinákuja neꞌemá weꞌechú, eyá lapí ketana. Marí ke nataníjika:
“Palani, palani, palani Tupana, unká laꞌalá puꞌuwaré.
Piyukeja wakáraꞌajeri riká.
Piyukeja laꞌajerí kaja riká.
Riká iꞌimari paineko iꞌimaká;
rikaja kaja meꞌetení.
Ñakeja riꞌimajika maáreya watukumó aꞌajná ñoꞌojó”.
9 Ilé ke neká paꞌu kele atanika. Palá nemájika peꞌiyorí ñákaꞌajori chu yáꞌako nakú. Matajnako penaje riká, palá rilaꞌaká nanaku yukuna neꞌemá jataníkaje aú.
10 Natanika aú neká veinticuatro pheñawilana lámaꞌaño rinakojé najimá aú. Peꞌiyorí ñákaꞌajori chu yáꞌako nakojé najlámaꞌo, puꞌují napechu iꞌimakale rinaku. Unká tajnákajo penaje kalé iꞌimajika nakú napechu iꞌimá puꞌují, raú nakaꞌá napútena riꞌimá nakojé, nemá Tupánajlo:
11 “Wawakáraꞌajeri, kaphí wapechu iꞌimakare chojé.
pikaja kalé palani, wemakáloje pinaku palá penaje;
pikaja kalé palani, wapechu iꞌimakáloje pinaku palá penaje;
pikaja kalé weꞌepiri piyuke nakaje laꞌakana;
pikaja kaja kalé keñoꞌótari piyukeja nakaje iꞌimaká.
Pikaja kaja kalé kaja aꞌarí puꞌuwaká nakaje inaꞌukejlo,
pipechu nakú riꞌimaká ke.
Kajmuchaji aꞌajeri wani piká”,
ke nemaká rijló.