5
Nomá kaja papera kaje, philaꞌakeja iꞌimaká, peꞌiyorí ñákaꞌajori chu yáꞌako kapi. Kaꞌañá aú ripatá riká; riyámajo pumitanó rinaku lanaꞌakéjami iꞌimaká; iyamá kuwáꞌata kele ripapi iꞌimaká rinaku.
2 E nomá Tupana waꞌatéjeri, jeꞌechú chiyaje, piyuke laꞌajerí riꞌimaká. Riká kemari kaphí mejrini chiyá marí ke: “¿Na palani Tupánajlo maare, riká kaꞌakáloje ripapi rinakiyá penaje?”
3 Unká na iꞌimalá palani papera kaje meꞌetájeri penaje, ramákaloje mékeka lanaꞌakéjami kemaká richu. Unká na iꞌimalá jeꞌechú chu, unká kaja na iꞌimalá ejaꞌawá chu, unká kaja na iꞌimalá kaja takaꞌakaño nakiyana eꞌiyá, rijmeꞌetájeri penaje.
4 Kajrú nuyaka, unkale na iꞌimalá palani rijmeꞌetájeri penaje, ramákaloje ripurákaꞌalo richu penaje.
5 E pajluwaja pheñawilana, re iꞌimakaño nakiyana, kemari nojló: “Piyániña, piyakaꞌo, re pajluwaja, nawakáraꞌajeri wani. Judá lakénami nakiyana riká; neꞌemakana David lakénami nakiyana kaja riká. Riká kapichátari puꞌuwaré laꞌakaná inaꞌuké liyá. Rikaja kalé palani papera kaje meꞌetájeri penaje. Palani riká ripapi kaꞌajeri rinakiyá penaje”, ke rimaká nojló.
6 Rejéchami nomaka riká, nemakare nakú: “Oveja iꞌirí (el Cordero)”, ke. Nomá ritáraꞌako peꞌiyó. Paꞌu kele lapaꞌakaño, eyá veinticuatro pheñawilana, kele lapaꞌañó rinaku tujlá ke pajimájechaka. Nenókare penájemi keja Oveja iꞌirí amako. Iyamá kuwáꞌata kele riꞌiwawi iꞌimaká; iyamá kuwáꞌata kele kaja rijlú iꞌimaká; iyamá kuwáꞌata kele Tupana Pechu, ripalamane iꞌimakare nakiyana riꞌimaká, riwakáraꞌakare piyuke ejaꞌawá chuwá iꞌimaká. a
7 E Oveja iꞌirí iꞌijnari peꞌiyorí ñákaꞌajori chu yáꞌako jimaje. Rijñaꞌá riká papera kaje philaꞌakéjami riyátheꞌela kaꞌañá chiyá.
8 Ilé kaje aú re paꞌu kele lapaꞌakaño, veinticuatro pheñawilana waꞌaté, lámaꞌaño Oveja iꞌirí nakojé najimá aú. Guitarra kaje waja iꞌimari nakapi; tiyela, oro nakiyá laꞌakanami, iꞌimari kaja nakapi. Aꞌawaná iká, iná káraꞌatakare, iꞌimari tiyela chu. Nakaje Tupana leꞌejena inaꞌukena kemakare nakú rijwaꞌaté puraꞌakano aú, ke kemakánaka aꞌawaná iká, iꞌimari tiyela chu.
9 E nataní wajé yáleje Tupánajlo marí ke:
“Palani piká Tupánajlo, ilé papera kaje ñaꞌajeri penaje.
Palani piká Tupánajlo, rijmeꞌetájeri penaje,
ripapi kaꞌajeri rinakiyá penaje.
Nenó piꞌimaká, pitakaꞌá inaꞌuké chaya iꞌimaká,
neꞌemakáloje Tupana waꞌatéjena raú penaje.
Ajopana, ajopana ke, rijwaꞌatéjena iꞌimakáloje penaje
pitakaꞌá nachaya iꞌimaká.
Ajopana, ajopana ke, ikáꞌana nakiyana iꞌimaño rijwaꞌatéjena.
Apú, apú chu, ke puraꞌajeño nakiyana iꞌimaño kaja rijwaꞌatéjena.
Piyukeja ajopana teꞌeré, ajopana teꞌeré eyájena, ke iꞌimaño rijwaꞌatéjena.
10 Piká aꞌarí neká Tupana waꞌatéjena penaje,
nalaꞌakáloje riwátaka ke penaje.
Piká kaja aꞌarí neká piyuke ejaꞌawá chu iꞌimakaño
wakáraꞌajeño penaje”,
ke natanika rijló.
11 E nuyakaꞌo piño ají ke, amari Tupana waꞌatéjena, jeꞌechú chiyájena. Jataníkaje nakú kaja neꞌemá. Íkiꞌiruna wani neꞌemaká, millones neꞌemaká. Ajopana iꞌimaño ñaké kaja millones kaja. Neká piyuke iꞌimaño tujlá ke pajimájechaka ilé yáꞌaro ñákaꞌajori chu nakojé. E neká paꞌu kele lapaꞌakaño, veinticuatro pheñawilana waꞌaté, ataniño kaja Tupánajlo kaphí wani.
12 Marí ke nemaká kaphí nataniko:
“Oveja iꞌirí, nenókare inaꞌuké chaya iꞌimaká, palani riká,
Tupana aꞌakáloje riká piyukeja amájeri penaje.
Palani riká, piyukeja nakaje iꞌimakáloje rileꞌejé waja penaje.
Palani riká, piyukeja inaꞌuké pechu iꞌimakáloje rinaku palá penaje,
piyukeja weꞌepika riꞌimakale.
Palani riká, piyukeja inaꞌuké puraꞌakóloje rinaku palá penaje”,
ke natanika rijló.
13 Rejomi nomaꞌá ajopana atanika piño, Tupana keñoꞌótakarena neꞌemaká: ejaꞌawá chu iꞌimakaño, jeꞌechú chu iꞌimakaño, kaja takaꞌakaño penájemi, kele neꞌemaká. Piyukeja neká, kamejérina waꞌató, ataniño. Marí ke nemaká nataniko:
“Palá wemaká kele yáꞌaro ñákaꞌajori chu nakú.
Palá kaja wemaká Oveja iꞌirí nakú.
Palá kaja wapechu iꞌimajika nanaku ñakeja.
Piyukeja nakaje laꞌajeño neꞌemajika waꞌajini wani”,