2 E nuyakaꞌo, amari kawarú jareni. Rinaku pajluwaja yáꞌaro. Wiraꞌapaji iꞌimari rikapi. Apú aꞌarí pútenaji richá. E nacháꞌatajeri ke raꞌapaka kawarú nakú. Raú riꞌijná ajopana cháꞌataje nókakajo aú.

3 Rejomi Oveja iꞌirí wichoꞌorí apú ripapi, papera kaje philaꞌakéjami, nakiyá. Rejéchami apú, paꞌu kele lapaꞌakaño re, nakiyana kemaká nojló: “Majó piꞌijná”.

4 Raú nuꞌujná rejo, amari apú kawarú jáchoꞌoko, kerani riꞌimaká. Apú aꞌarí rinaku jaꞌapájerijlo jajalu kaje kajruni wani. Rinaku jaꞌapájeri wakáraꞌari inaꞌuké nókako pajwaꞌatéchaka ejaꞌawá chuwá, raú nakapichátakaloje pekowáaka.

5 Rejomi Oveja iꞌirí kaꞌarí piño apú ripapi rinakiyá. Weji kele cha rikaꞌaká ripapi.

6 Paꞌu kele re lapaꞌakaño nakiyana kemari: “Pajluwa kala iná jápakaꞌala wemí naꞌá inajlo pajluwaja jená ñaꞌakó trigo. Pajluwa kala iná jápakaꞌala wemí naꞌá inajlo weji kele jená ñaꞌakó cebada. ¡Pa! Apichániña Olivos icha jilá. Apichániña kaja kajmú kaje jalá amúraꞌatakanami”, ke.

7 Rejomi Oveja iꞌirí kaꞌarí piño apú ripapi, paꞌu kele laꞌaká kele papera kaje, nakiyá. Rejéchami apú piño, kele paꞌu kele re lapaꞌakaño, nakiyana kemaká nojló: “Majó piꞌijná, piyakaꞌo”.

8 Nuyakaꞌo rejo, amari piño apú kawarú, memáreni riꞌimaká. Rinaku jaꞌapájeri ií iꞌimari Takaꞌakaje. Rápumichu apú jaꞌapari. Kaja Takaꞌakaño, Puꞌuwaré Laꞌakaño Apukuna, rií iꞌimaká. Neká wakáraꞌaño inaꞌuké nókako pajwaꞌatéchaka. Nawakáraꞌa kaja kajrú meꞌepijí, kajrú inaꞌukena takaꞌakáloje raú penaje. Nawakáraꞌa kaja natami kaje noka kajrú inaꞌukena, natakaꞌakáloje rinaku. Nawakáraꞌa kaja kamejérina yuriná noka inaꞌuké. Ilé ke nawakáraꞌaka kajrú inaꞌukena laꞌakana chapú ejaꞌawá chuwá.

9 Rejomi Oveja iꞌirí kaꞌarí piño apú ripapi, pajluwa théꞌela kele laꞌaká kele papera kaje philaꞌakéjami, nakiyá. E nomá kaja takaꞌakaño péchumi iꞌimaká altar jaꞌapí. Nenókarena neꞌemaká, naꞌapátakale Tupana yukuna ajopánajlo, jimaje nalaꞌá neꞌemaká chapú. Chapú nalaꞌajika neká, eꞌiyonaja unká nayurike Tupana yukuna iꞌimakana raú.

10 Awíyoꞌokeja nemaká Tupánajlo: “Piká wawakáraꞌajeri. Piyukeja weꞌepika nakaje laꞌakana piká. Unká weꞌepila puꞌuwaré laꞌakaná piká. Pimaká ke laꞌajerí piká. ¿Mékechami pimájika noño weꞌemaká nakú, meke nalaꞌakana iꞌimajika? ¿Mékechami piwajájika neká ripachá?”, ke nemaká Tupánajlo.

11 E apú aꞌarí najló pajluwano, pajluwano ke aꞌarumakaji jaré nojé wani. Rimá najló, nawatánaꞌakaloje re kaja joꞌó piño. Nenoje piño nejena nakiyana, nenoka neꞌemaká ke kaja. Najlupemí chami neꞌemajika ejéchami Tupana wajájika nenójeño.

12 E nomá piño Oveja iꞌirí kaꞌaká apú ripapi papera kaje nakiyá. Pajluwa kuwáꞌata kele (6) cha rikaꞌaká ripapi rinakiyá. Raú nomá ejaꞌawá ñakaꞌakó kajrú wani, waꞌató ke kamú jimá yakaka kamé. Aꞌarumakaji kameni, meꞌejñapí nojé wani, ke rijimá amako. Waꞌató ke kerá keri amako; jirá ke rijimá amako.

13 Iwijrina kaje nakiyana kujrúkaꞌaño ejaꞌawá nakojé. Paijí icha, unká joꞌó aparálare, karená kujrúkaꞌataka, ke nakujrúkaꞌaka marí ejaꞌawá nakojé.

14 Waꞌató ke jeꞌechú kapichako. Iná philaꞌaká papera kaje, ke kaja rikapichako. Piyuke wani ipuré, paranakuwa kaje maká, jatatako rapukuna chiyá apoꞌojó.

15 Rejéchami piyukeja inaꞌuké wakáraꞌajeño ñaakó raú, jataꞌañó jipa pajremi chojé. Piyuke neká jataꞌañó: nawakáraꞌajeño, suráana wakáraꞌajeño, kajrú laꞌakaño, kajrú péchuruna, wejapa péchuruna, ajopana waꞌaté jápajeño, najluwa jápajeño, kele piyukeja neká jataꞌañó jipa pajremi chojé. Neꞌiyajena ñaañó ipuré eꞌiyajé jataꞌajó.

16 Nemá jípajlo raꞌakóloje nachá penaje, Tupana amaka piyá neká. Piyuke wakáraꞌajeri riká. Nemá jípajlo raꞌakóloje nachá penaje, namejñátakoloje raꞌapejé Oveja iꞌirí yuchá liyá.

17 Kaja riphá rená chojé unká jemaꞌalaño raꞌapiyajlo, namákaloje riyuchá yajwé. Unká na kalé ñaꞌajeri riyuchá panaku.