7
1-2 Rejéchami nomaka paꞌu kele Tupana waꞌatéjena, jeꞌechú chiyájena. Paꞌu kele ejaꞌawá kuꞌuruwere keja natáraꞌako. Neká patañó paꞌu kele karená, raꞌapaka piyá piyuke ejaꞌawá eꞌiyowá. Napatá riká, raꞌapaka piyá juni jalomi jimó, aꞌawaná eꞌiyowá waꞌaté. Tupana kemari najló iꞌimaká, napichátakaloje ejaꞌawá, juni jalomi, kaje maká penaje. E nomá piño apú Tupana waꞌatéjeri, jeꞌechú chiyaje, iphaka kamú jeñoꞌoká eyá. Kajmuni Tupana leꞌejé lanaꞌajówaji iꞌimari rikapi. Awíyoꞌokeja rimaká ajopana Tupana waꞌatéjenajlo, ejaꞌawá kuꞌuruwere chu táraꞌakañojlo waꞌaté:
3 “Ikapichátaniña ejaꞌawá, juni jalomi, aꞌawaná, kaje maká waꞌaté, Tupana leꞌejena inaꞌukena iꞌimakale rewá. Paineko walanaꞌajé Tupana leꞌejena inaꞌukena pulá nakú, naweꞌepíkaloje Tupana leꞌejena neká raú”, ke rimaká najló.
4 Nemá nojló: “Kaja nalanaꞌá ciento cuarenta y cuatro mil (144,000) Israel lakénami nakiyana pulá nakú, raú ajopana weꞌepíkaloje neká pe penaje.
5 Doce mil nanakiyana iꞌimaká Judá michú lakénami, doce mil kaja iꞌimaño Rubén michú lakénami nakiyana, doce mil kaja iꞌimaño Gad michú lakénami nakiyana,
6 doce mil kaja iꞌimaño Aser michú lakénami nakiyana, doce mil kaja iꞌimaño Neftalí michú lakénami nakiyana, doce mil kaja iꞌimaño Manasés michú lakénami nakiyana,
7 doce mil kaja iꞌimaño Simeón michú lakénami nakiyana, doce mil kaja iꞌimaño Leví michú lakénami nakiyana, doce mil kaja iꞌimaño Isacar michú lakénami nakiyana,
8 doce mil kaja iꞌimaño Zabulón michú lakénami nakiyana, doce mil kaja iꞌimaño José michú lakénami nakiyana, doce mil kaja iꞌimaño Benjamín michú lakénami nakiyana. Ilé kele neꞌemaká.”
Jareni aꞌarumakáruna yukuna marí
9 Rejomi nuyakaꞌo piño, e nomá kajrú wani inaꞌukena tami yáꞌako. Unká méñoꞌojo iná lapaꞌatala neꞌemaká, íkiꞌiruna wani neꞌemakale. Ajopana, ajopana ke, neꞌemaká apú, apú chu ke puraꞌajeño. Piyuke ajopana teꞌeré, ajopana teꞌeré eyájena ke, neꞌemaká. Ñákaꞌajori, Tupana yáꞌakaro chu, awaꞌá natáraꞌo. Oveja iꞌirí awaꞌá natáraꞌo. Jareni aꞌarumakáruna waja neꞌemaká piyukeja, wejirí wirulá nakapi ke natáraꞌako.
10 E kaphí nawíyoꞌoko nemaká:
“Weꞌematájeri Tupana,
kaphí wapechu iꞌimakare chojé riká, yáꞌaro ñákaꞌajori chu.
Riꞌirí palamane riꞌimatá weká kapichákajo liyá”,
ke nemaká.
11 Piyuke Tupana waꞌatéjena, jeꞌechú chiyájena, táraꞌako Tupana awaꞌá, veinticuatro pheñawilana waꞌaté. Paꞌu kele re lapaꞌakaño iꞌimaño kaja re najwaꞌaté, e najlámaꞌo najimá aú Tupana nakojé.
12 Nemá:
“Palani Tupana, wapuraꞌakóloje palá wani rinaku penaje.
Palá rilaꞌakare weká yukuna weꞌemá rijló.
Piyukeja nakaje nakojé weꞌepéjeri riká.
Palá kaja inaꞌuké pechu rinaku.
Piyukeja nakaje laꞌajeri riká;
piyukeja kaja riweꞌepika nakaje laꞌakana.
Ilé kaje Tupana, wapechu iꞌimakare chojé kaphí,
matajnako iꞌimajika riká”.
13 E pajluwaja pheñawilana nakiyana kemari nojló: “¿Mékajena inaꞌukena chi kele jaré aꞌarumakáruna? ¿Mere eyájena chi neká?” “Kaapí”, ke numaká rijló, “piká weꞌepiri”.
14 Rimá nojló: “Chapú wani nalaꞌaká Tupana jaꞌapiyá jemaꞌajeño iꞌimaká. Unká ileruna pamákarena meꞌetení, yurila naliyó Tupana jaꞌapiyá iꞌimakana raú. Tupana aꞌarí Riꞌirí Jesucristo inaꞌukejlo iꞌimaká, nenókaloje riká puꞌuwaré nalaꞌakare chaya penaje, raú rikaꞌá riká naliyá. Neká pamákarena meꞌetení, yuriño nachó rijló, raú rilaꞌá neká unká japi laꞌalaño puꞌuwaré ke rijló. Kele jareni aꞌarumakáruna, jareni naꞌarumaká, nepakale reꞌiyayá Oveja iꞌirí írami aú.
15 “Tupana awaꞌá neká; riwátaka ke nalaꞌajika ñakeja wani riñakaré chu.
Tupana mejñátari neká, rawaꞌá neꞌemakale.
16 Unká wani kewí meꞌepijí iꞌimalaje najló,
unká kaja nanúrupi chu makáraꞌatalajo,
unká kaja kamú káraꞌatalaje neká,
unká kaja imaꞌá iꞌimalaje najló.
17 Oveja iꞌirí, Tupana awaꞌá iꞌimakare, iꞌimajeri namájeri.
Riwáꞌaje neká juni matajnako jeñoꞌojika teꞌerí eꞌiyayá ejo.
Inajlo kajmuchá aꞌajeri penaje riká juni. Rejo riwáꞌaje neká.
Tupana jalákajeri nejlú jalá nejlú chiyá.
Reyá aꞌajná ñoꞌojó unká iyakaje iꞌimalaje najló”,
ke rimaká nojló.