8
E kaja Oveja iꞌirí kaꞌarí kaja penaje ripapi iꞌimakare papera kaje nakiyá. Rikaꞌaká riká ejomi, mamejeru wani jeꞌechú chu yuriko peꞌiyojé kamú jená ketana.
2 Rejéchami nomaka iyamá kuwáꞌata kele Tupana waꞌatéjena, jeꞌechú chiyájena, táraꞌako Tupana jimaje. E pajluwa aꞌarí pajluwano, pajluwánojlo ke, luwiluwí kaje.
3 Apú Tupana waꞌatéjeri iꞌimari re, rikapi nomá oro nakiyá laꞌakanami aꞌawaná iká, puꞌumé amarí káraꞌajona. Rileꞌejena inaꞌukena puraꞌañó Tupana waꞌaté, ke kemakánaka riꞌimaká.
4 Nomá ija jáchoꞌoko Tupana waꞌatéjeri leꞌejé rikáraꞌajona chiyá, waꞌaté ke kaja inaꞌuké purákaꞌalo jáchoꞌoko. Tupana waꞌaté puraꞌakano nakú neꞌemá.
5 E Tupana waꞌatéjeri ñaꞌarí keraꞌathani mesa nakiyá, rimanoꞌotákaloje aꞌawaná iká aꞌakunami raú penaje. Kéchami rikaꞌaká riká jeꞌechú chiyá, ají ke ejaꞌawá nakojé. Raú kajrú pichaní majákaꞌako; kajrú kaja rimejé iꞌimaká; kajrú pichaní kamaré pataká; ejaꞌawá ñaꞌakaró kaja raú.
Luwiluwí kaje yukuna marí
6 Re iyamá kuwáꞌata kele Tupana waꞌatéjena, jeꞌechú chiyájena iꞌimaño. Iyamá kuwáꞌata kele kaja luwiluwí kaje iꞌimaká nakapi, kaja lamáꞌatakejanami ke neꞌemaká, naphoꞌokáloje richojé penaje.
7 Pajluwaja nanakiyana aphoꞌorí riluwiluwine kaje chojé, raú juni takaꞌátakanami, keraꞌathani jirá waꞌaté, jaꞌaró jeꞌechú chiyá ejaꞌawá nakojé. Raú kajrú ejaꞌawá lukúnaꞌako; aꞌawaná, jimichi, kaje maká káraꞌataro. Peꞌiyó jaꞌapejé ejaꞌawá nakiyana kapichako raú.
8 Rejomi apú Tupana waꞌatéjeri, iyamá laꞌaká, aphoꞌorí kaja riluwiluwine kaje chojé, raú ipuré káraꞌako, ke amákanami jaꞌaró juni jalomi jakojé. Raú peꞌiyó jaꞌapejé yuriro jirá ke;
9 peꞌiyó jaꞌapejé kaja juni jalomi yajné nakiyana kapichaño raú. Ñakeja kaja peꞌiyó jaꞌapejé wapuru, rakú iꞌimakare nakiyana, kapichako raú.
10 Rejomi apú Tupana waꞌatéjeri, weji kele laꞌaká, aphoꞌorí piño riluwiluwine chojé, raú iwijrí kajruni wani jaꞌaró jeꞌechú chiyá majó. Jepé lukúnaꞌakeja ke raꞌakó junápeje, raú rapichata ajopana, ajopana ke, leꞌejé juni. Rapichata juni, muthú kaje waꞌató. Peꞌiyó jaꞌapejé piyuke juni nakiyana apichako raú.
11 Ipijini, riká iwijrí ií iꞌimaká, jaꞌaró majó; peꞌiyó jaꞌapejé piyuke juni nakiyana laꞌakó ipijí raú. Kajrú inaꞌukena takaꞌaká rinakiyana iꞌirakana aú, ipijini riꞌimakale.
12 Rejomi apú Tupana waꞌatéjeri, paꞌu ke laꞌaká, aphoꞌorí piño riluwiluwine chojé, raú kamú, keri waꞌaté, nakiyana apicharo peꞌiyó jaꞌapejé. Ñaké kaja iwijrina nakiyana apichako peꞌiyó jaꞌapejé kaja, ñakele rikamaré patá wejápaja rapichako lokópaꞌalaja. Peꞌiyó jaꞌapejeja rikamaré iꞌimaká weꞌechú japi, ñaké kaja lapí japi iꞌimaká.
13 Rejomi nuyakaꞌo jeꞌechú chojé, amari perí kaje ajraka yenuwa, kaphí rimaká: “Chapú wani, chapú wani ke, re kaja joꞌó weji kele Tupana waꞌatéjena yuriko, unká joꞌó aphoꞌolaño naluwiluwine chojé. Nakeñoꞌojika richojé aphoꞌokana wakajé, chapú wani nakaje iꞌimajika inaꞌuké ejaꞌawá chu iꞌimakáñojlo”.