9
Rejomi apú Tupana waꞌatéjeri, pajluwa théꞌela kele laꞌaká, aphoꞌorí piño riluwiluwine chojé, raú iꞌijwijí ke jaꞌaró jeꞌechú chiyá majó. Rijló apú aꞌá chawi, ulawí meꞌetájona penaje. Ulawí matajnákaꞌaru meꞌetájona riꞌimaká.
2 Raú rijmeꞌetaka richaya ejéchami, kajrú wani ija jeñoꞌoká richiyá majó. Iná iꞌikakapere eꞌiyá iná káraꞌaka ee, ija jeñoꞌoká, ke reñoꞌoká majó richiyá. Unká kamú amalo rinakojé, ija itákale rijimá.
3 Ija eꞌiyayá majichíraꞌapana kajena kujrúkaꞌaño marí ejaꞌawá nakojé; ipijí iꞌiraká ke kewika neꞌeraká inaꞌuké.
4 Nawakáraꞌajeri kemari najló, nakapichátaka piyá aꞌawaná, jimichi, piyukeja nakaje teꞌerí eꞌiyá iphákare, kaje maká waꞌaté. Rimá kaja najló, nalaꞌakáloje inaꞌuké, unká Tupana leꞌejena kalé iꞌimakaño, chapú, unká Tupana lanaꞌakare iꞌimalárena pulá nakú.
5 Unká nawakáraꞌajeri yurila nenoka neká, riwata nalaꞌaká neká chapú pajluwa théꞌela keta keri ketana. Kewí neꞌeraká neká, ipijí iꞌiraká iná ke kaja.
6 Neꞌerajika neká wakajé, nawátakejla takaꞌakaje, eꞌiyonaja unká natakaꞌaké rikeyá nakú; nakulákejla naowá, eꞌiyonaja unká nephátake riká.
7 Kawaruna iꞌijnaká nókakajo ejo, ke majichíraꞌapana amako. Newílaꞌaru nakú pútenaji ke iꞌimari oro nakiyá laꞌakanami; inaꞌuké achiñana jimá, ke najimá iꞌimaká;
8 inaana wilá, ke newilá iꞌimaká; león aí, ke naí iꞌimaká;
9 neꞌekú pajré iꞌimari pejruꞌuwá nakiyana laꞌakanami. Kajrú wani nayuphé mejé iꞌimaká najraka kewá. Kawaruna chíraꞌaka peꞌiyowá jaꞌapaka jechoꞌokelo, richu jaꞌapákaño iꞌijnakáloje ajopana waꞌaté nókajo, ke nayuphé mejé iꞌimaká.
10 Kajipíruna neꞌemaká, rinaku neꞌerajowa iꞌimari ipijí iꞌirajowa ke. Riká najipí aú nalaꞌá inaꞌuké chapú pajluwa théꞌela keta keri ketana.
11 Re nawakáraꞌajeri, rikaja kaja ulawí chiyá wakáraꞌajeri. Abadón rií hebréona puraꞌakó chu; eyá griégona puraꞌakó chu rií iꞌimari Apolión. “Apichátajeri”, ke kemakana rií iꞌimaká ñaké.
12 Kaja chapú kaje paineko iꞌimakare jaꞌapari; re joꞌó kaja joꞌó iyamá yuriko.
13 E kaja apú Tupana waꞌatéjeri, pajluwaja kuwáꞌata kele laꞌaká, aphoꞌorí piño riluwiluwine chojé; raú purákaꞌaloji mejé jáchoꞌoro mesa kuꞌuwere chiyá. Paꞌu kele rikuꞌuwere chiyá purákaꞌaloji jáchoꞌoro. Tupana jimaje riká mesa táraꞌo, oro nakiyá laꞌakanami riꞌimaká.
14 Purákaꞌaloji kemari Tupana waꞌatéjeri aphoꞌorí riluwiluwine chojejlo: “Juni Éufrates e paꞌu kele Tupana waꞌatéjena aꞌakéjami mukúruna, chuwa pikaꞌá namukú nanakiyá”.
15 Raú rikaꞌá namukú nanakiyá. Paꞌu kele neꞌemaká, kaja riphá rená chojé najló. Riká kamú jená, riká weꞌechú, riká keri, riká jarechí, ke neꞌemaká lamáꞌatakeja, nakapichátakaloje kajrú inaꞌukena penaje. Peꞌiyó jaꞌapejé nakapichata piyuke inaꞌuké nakiyana.
16 E kaja nemá nojló mékele suráana iꞌimaká najwaꞌatéjena: kawaruna nakú jaꞌapákaño iꞌimaño doscientos millones.
17 Nutapú keja nomaka kawaruna, nanaku jaꞌapájeño waꞌaté. Marí ke nomaka neká: suráana iꞌikú mejñátajona iꞌimari nanaku, kerá nojé waja neꞌekú mejñátajona iꞌimaká, keraꞌathani ke ramako. Ipureni, jewani waꞌaté, iꞌimari kaja rinaku. Nakawarútena wílaꞌaru amaro león wílaꞌaru ke. Keraꞌathani, ija, azufre, kele waꞌaté jeñoꞌorí nanuma chiyá.
18 Raú nakapichata inaꞌuké nakiyana, peꞌiyó jaꞌapejé nakapichata. Keraꞌathani, ija, azufre, kaje jeñoꞌorí kawaruna numá chiyá; riká aú nakapichata inaꞌuké.
19 Nanuma chiyá jeñoꞌokare aú ja nakapichata neká; najipí aú nalaꞌá kaja inaꞌuké chapú. Jeína, ke kawaruna jipí iꞌimaká.
20 Ilé ke nalaꞌaká neká chapú. Eꞌiyonaja neká, unká nakapichátalarena, unká yurila naliyó nakaje jenami jaꞌapí iphákana, nemakare nakú, “wachiꞌinárikana”, ke. Puꞌují napechu iꞌimajika jiñana nakiyana nakú, ñaké kaja napechu iꞌimajika nakaje jenami nakú. Oro, plata, pejruꞌuwá, jipa, aꞌawaná, kaje maká nakiyá laꞌakanami riꞌimaká. Unká méñoꞌojo nakaje jenami, nalaꞌakare nachiꞌinárikana penaje, amala; unká kaja méñoꞌojo remaꞌalá; unká kaja raꞌapala. Ilé kaje iꞌimari najló nachiꞌinárikana ke, unká nayurila naliyó riká.
21 Unká kaja napajnoꞌotala napéchuwa Tupana ejo, inaꞌuké nókana liyá; unká kaja nayurila naliyó nalawichure, lejñákaje waꞌaté; unká kaja achiñana, inaana waꞌaté, pajnoꞌotala napéchuwa, namanáicho nalaꞌakare liyá; unká kaja nayurila jataꞌakaje naliyó.