10
Rejomi nomá piño apú Tupana waꞌatéjeri witúkaꞌaka jeꞌechú chiyá. Kajrú weꞌepika nakaje laꞌakana nakojé riꞌimaká. Juni juwákaꞌala eꞌiyowá riwitúkaꞌa. Yurijiri chipúkaꞌari riwílaꞌaru nakuwá; kamú jimá ke rijimá iꞌimaká; eyá ritajné iꞌimari keraꞌathani ke.
2 Kamuꞌujini papera kaje philaꞌakéjami iꞌimari rikapi. Meꞌetákeja riꞌimaká. Riꞌimá, kaꞌañá chojó pitari, táraꞌaro juni jalomi jakú, eyá pajrú chojó pitari táraꞌaro peꞌiyojó teꞌerí nakú.
3 Kaphí wani rawíyoꞌoka. León awíyoꞌoka mejé, ke rinúrupi mejé iꞌimaká. Rawíyoꞌoka ejomi, iyamá kuwáꞌata kele pichaní mejé aꞌajipá rijló.
4 Naꞌajipaká rijló ejomi, nuwata riyukuna lanaꞌakana papera kaje chojé, nakaje nemakare nakú. Nukeñoꞌó riyáꞌatakana ejéchami nomaꞌaká purákaꞌaloji jáchoꞌoko jeꞌechú chiyá, rimá nojló: “¡Pa! Pilanaꞌaniña riyukuna papera kaje chojé mékeka iyamá kuwáꞌata kele pichaní mejé kemaká. Piꞌimaniña kaja riyukuna ajopánajlo”, ke rimaká nojló.
5 E riká Tupana waꞌatéjeri, nomákare táraꞌako juni jalomi jakú, eyá teꞌerí nakú, jáchoꞌotari raꞌanapitá kaꞌañá ají ke jeꞌechú chojé.
6 E rimá najló mékeka nakaje iꞌimajika. Naweꞌepíkaloje rimaká rinaku ke riꞌimajika najló penaje, rimá: “Tupana weꞌepiri kewaka numaká”, ke. Unká tajnákajo penaje kalé iꞌimaká Tupana. Riká keñoꞌótari jeꞌechú, ejaꞌawá, juni jalomi waꞌaté, richu iꞌimakare waꞌatoja. E Tupana waꞌatéjeri kemari: “Chuwa kaja unká rimaláraꞌalajo, meketana iꞌimajémija riꞌimajé.
7 Tupana waꞌatéjeri, iyamá kuwáꞌata kele laꞌaká, aphoꞌorí riluwiluwine chojé. Rejéchami Tupana ñapátaka nakaje laꞌakana, ripechu nakú iꞌimakare, meꞌechú riꞌimaká inaꞌuké liyá júpimi iꞌimaká. Ripurákaꞌalo jaꞌapátajeño michuna iꞌimakeño rijwaꞌaté jápajeño ke, neká iꞌimakeño riyukuna iꞌimajika”, ke rimaká.
8 Rejomi purákaꞌaloji, nomaꞌakare iphaka jeꞌechú chiyá majó penájemi, kemari piño nojló: “Piꞌijná Tupana waꞌatéjeri iꞌimaká ejo. Pajrú chojó pumitá riꞌimá juni jalomi jakú, apoꞌojó pitari teꞌerí nakú, riká ejo piꞌijná. Eko pijñaꞌá rikápiya papera kaje”, ke rimaká.
9 Raú nuꞌujná rejo, numá rijló: “Paꞌá nojló ilé papera kaje pikápiri”. Rimá: “Marí riká, pijñaꞌá riká, pajñachi riká. Munumunú jalá ke pumeka raꞌapájika pinuma chu. Eyá piwó chojé riphájika ee, rilaꞌajó kaꞌamani”, ke rimaká nojló.
10 Nujñaꞌá papera kaje riliyá, rejomi nojñá riká. Munumunú jalá ke pumeka raꞌapaka nunuma chu; nojmíloꞌoka riká ejomi, rilaꞌó kaꞌamani nowó chojé.
11 Rejomi riwakáraꞌa nuká nakaje iꞌimajíkare yukuna iꞌimajé ajopánajlo, naweꞌepíkaloje mékeka inaꞌuké laꞌajiko ajopana teꞌeré nakú, ajopana teꞌeré nakú ke. Mékeka riꞌimajika ajopana, ajopana ke, nakiyánajlo yukuna riwakáraꞌa kaja nuꞌumaká; mékeka riꞌimajika ajopana, ajopana ke, puraꞌakó chu puraꞌajéñojlo yukuna, riwakáraꞌaka kaja nuꞌumaká; mékeka riꞌimajika ajopana, ajopana ke wakáraꞌajeñojlo yukuna, riwakáraꞌa kaja nuꞌumaká najló.