11
Rejomi apú aꞌarí nojló nakaje jená ñaꞌajona, kutiwá ke riꞌimaká. Rimá nojló: “Páchoꞌo, pijiꞌichá Tupana ñakaré wapheréchaka jená; pijñaꞌá kaja mesa richu toꞌokó jená; pilapaꞌatá kaja inaꞌukena, mekeleka neká laꞌañó puꞌují napéchuwa Tupana nakú richu.
2 Kurara chipúkaꞌari Tupana ñakaré nakuwá jená unká pijñaꞌalaje, unká weꞌepílaño Tupana nakojejlo penaje riyurejo. Neká iꞌimajeño Tupana leꞌejé pajimila e weji kele jarechí, eyá apú peꞌiyojé ketana. Chapú nalaꞌajika neká re.
3 Eyá nuká wakáraꞌaje iyamá nuyukuna iꞌimajeño rejo riwakajé. Costal kaje iꞌimajeri naꞌarumaká, ajopana weꞌepíkaloje raú kamuꞌují napechu iꞌimaká. Kamuꞌují napechu iꞌimajika, unká paala ajopana laꞌajíkale neká rewá. Ñaketana júpika nuyukuna iꞌimajeño jaꞌapátajika najló Tupana purákaꞌalo yukuna, weji kele jarechí, eyá apú peꞌiyojé ketana”, ke rimaká.
4 Iyamá nuyukuna iꞌimajeño, iyamana aꞌawaná olivos ke. Iyamá rikamaré táraꞌako Tupana jimaje, ke kaja neká. Tupana leꞌejé piyukeja ejaꞌawá.
5 Chapú nanaku péchuruna laꞌajika ee chapú neká, keraꞌathani jeñoꞌojé nanuma chiyá, riká aú nakapichátaje neká.
6 Tupana kemari najló napurákaꞌalo aú, juni jaꞌakó piyá, naꞌapátaka inaꞌukejlo Tupana purákaꞌalo ketana. Juni jeñoꞌokare teꞌerí eꞌiyayá muthú chiyá, kaje waꞌató unká kaja jeñoꞌolaje reꞌiyayá. Nawakáraꞌaje kaja juni jewíñaꞌako jirá penaje. Tupana kemari kaja najló, nawakáraꞌakaloje inaꞌuké amaka chapú kaje yajwé, nemájika rinaku ke.
7 Nañapátajika Tupana purákaꞌalo jaꞌapátakana inaꞌukénajlo ejomi, kamejeri kajruni wani jáchoꞌojero ulawí matajnákaꞌaru chiyá najwaꞌaté nókajo. Riká cháꞌatajeri neká, iyamá nuyukuna iꞌimajeño, rinoje neká.
8 Tupana leꞌejé pajimila eꞌiyá, iñeꞌepú iꞌimakare chu, natami pitajó. Riká pajimila e kaja nenó Nawakáraꞌajeri wani iꞌimaká. Mapeja naꞌaká riká pajimila ií Sodoma, ke, eyá ñaké kaja Egipto, ke.
9 Weji ke kala, eyá apú peꞌiyojé ketana, natami pitajiko re iñeꞌepú chu. Piyukeja inaꞌukena ejaꞌawá chu iꞌimakaño yakáꞌajiko natami chaje. Ajopana teꞌeré, ajopana teꞌeré eyájena ke, yakáꞌajeño natami chaje. Apú, apú chu ke, puraꞌakaño yakáꞌajeño kaja natami chaje, unká nayurílaje natami jaꞌakana.
10 Piyukeja inaꞌukena, ejaꞌawá chu iꞌimakaño, pechu iꞌimajika puꞌují natakaꞌajika aú, napachá inaꞌuké amákale kajrú chapú kaje yajwé. Ñakele natakaꞌajika wakajé, nalaꞌajé fiesta najluwa; naꞌajé kaja nakaje pajlokaka raú.
11 Weji ke kala, apú peꞌiyojé ketana, jaꞌapájeri, rejéchami Tupana paꞌatájika piño najló kajmuchaji. Raú takaꞌañó penájemina jáchoꞌojeño piño táraꞌajo; raú kajrú wani amájeño namakápoꞌoko keroꞌojiko.
12 Rejomi purákaꞌaloji kemájeri jeꞌechú chiyá najló: “Majó iꞌijná”, ke. Raú juni juwákaꞌala wáꞌajeri neká jeꞌechú chojé. Chapú péchuruna nanaku ijlú chuwaja riwáꞌaje neká neꞌiyayá.
13 Rejéchami teꞌerí ñakaꞌajiko kaphí wani, rapichátaje pajimila nakiyana. Iyamá théꞌela kele nakaje iꞌimajíkare nakiyana, pajluwa apichájero. Ají ke pajluwano, pajluwano ke, nakaje iyamá théꞌela kele iꞌimajíkare nakiyana apichájiko. Ñaké kaja siete mil inaꞌukena kapichájiko raú. Najlupemí yuríjikaño iꞌimajeño keroꞌokajo nakú kajrú, rejéchami napuraꞌajiko Tupana, jeꞌechú chu iꞌimakare, nakú palá. Piyukeja nakaje riweꞌepíkare laꞌakana nakú napuraꞌajó kaja palá.
14 Kaja namá chapú kaje wani yajwé iyaampe laꞌaká. ¡Eko pamá! Meketana iꞌimajémija namaje piño apú chapú kaje wani yajwé, weji ke pe laꞌaká riꞌimajika.
15 Eyá Tupana waꞌatéjeri, iyamá kuwáꞌata kele laꞌaká, aphoꞌorí piño riluwiluwine chojé. Rejéchami kaphí wani napurákaꞌalo jemaꞌakó jeꞌechú chiyá, nemá:
“Chuwaka, wawakáraꞌajeri Tupana iꞌimajika piyukeja
ejaꞌawá churuna wakáraꞌajeri.
Matajnako riꞌimajika nawakáraꞌakana nakú.
Riꞌirí, riwakáraꞌakare ejaꞌawá chojé iꞌimaká
inaꞌuké iꞌimatájeri penaje,
wakáraꞌajeri kaja rijwaꞌaté”,
ke nemaká.
16 E veinticuatro pheñawilana yáꞌaño tujlá ke Tupana nakojé, lámaꞌaño najimá aú Tupana nakojé, puꞌují napechu iꞌimakale rinaku.
17 Nemá rijló:
“Weꞌemakana Tupana, wapechu iꞌimakare chojé kaphí, piká.
Piyuke laꞌajeri piká.
Piká iꞌimari meꞌetení;
piká kaja iꞌimari júpimi iꞌimaká.
Palá pilaꞌaká weká.
Piká weꞌepiri piyukeja nakaje laꞌakana.
Chuwaka, piyukeja inaꞌukena wakáraꞌajeri piká.
18 Unká weꞌepílaño piká yúchaꞌaño raú.
Chuwa piwajájika neká, kaja takaꞌakaño waꞌató,
piwajaje puꞌuwaré nalaꞌakare chona.
Chuwa, paꞌajika pijwaꞌaté jápajeñojlo riwemí,
Pipurákaꞌalo jaꞌapátajeño pijwaꞌaté jápajeño.
Paꞌajé kaja piyuke paꞌapí iphájeñojlo riwemí.
Re paꞌapí iphájeño: kajrú péchuruna,
wejapa péchuruna, kele neká.
Najló piyukeja paꞌajé riwemí.
Chuwa, kaja riphaka puꞌuwaré laꞌajeño kapichátakana jená chojé:
Puꞌuwaré laꞌakaná nakuja neꞌemá ejaꞌawá chu iꞌimaká”,
ke nemaká Tupánajlo.
19 Eyá najmeꞌetá Tupana ñakaré numaná, jeꞌechú chu iꞌimakare. Najmeꞌetaka aú riká, kajrú pichaní kamaré jaꞌakó majó; kajrú pichaní mejé jemaꞌakó richiyá, raú kajrú teꞌerí ñakaꞌakó. Kajrú juni takaꞌátakanami jaꞌakó richiyá majó. Tupana ñakaré chu kaichama kaje iꞌimari, riká chu Tupana purákaꞌalo lanaꞌakéjami jipa nakú iꞌimari.