Inanaru, eyá lánawaru yukuna marí
12
Rejomi nomá jeꞌechú chu nakaje apú kaje wani. Nomá pajluwájaru inanaru. Kamú iꞌimari roꞌorumaká ke, eyá keri iꞌimari ruꞌumá jaꞌapí, ruwílaꞌaru nakú rupútena iꞌimá. Rinaku iyamá iphata jiꞌimaji nakojé kele iwijrina iꞌimaká.
2 Kaja riphá rená chojé rojló, ruwáꞌakaloje ruꞌurí penaje, raú kajrú rowíyoꞌoka, kewini yajwé romákale.
3 E apú, kajruni wani riꞌimaká, yaꞌataró rojló jeꞌechú chiyá majó. Kajruni wani lánawaru ke riꞌimaká; kerani rinaku iꞌimaká; iyamá kuwáꞌata kele riwílaꞌaru iꞌimaká; iyamá théꞌela kele kaja riꞌiwawi iꞌimaká; pútenaji ke iꞌimari kaja piyuke riwílaꞌaru kele nakú.
4 Rijipí aú richíraꞌa iwijrina jeꞌechú chiyá, rikaꞌakáloje neká marí ejaꞌawá nakojé. Peꞌiyó jaꞌapejé rikaꞌá piyuke iwijrina nakiyana marí ejaꞌawá nakojé. Rejomi ritáraꞌo inanaru yewicha wáꞌakayo ruꞌurí awaꞌajé, rajñákaloje ruꞌurí, ruwáꞌajika riká ejomi penaje.
5 E kaja ruwaꞌa ruꞌurí, achiñá riꞌimaká. Piyukeja inaꞌukena ejaꞌawá chu iꞌimakaño wakáraꞌajeri penaje riꞌimaká, riwakáraꞌakaloje neká kaphí penaje. Ramako ralojlo ejomi, Tupana wáꞌari riká jeꞌechú chojé, riꞌimakáloje rawaꞌá penaje.
6 Eyá ilerú inanaru ñaayó puꞌutheni chojé. Pukunaji, Tupana lamáꞌatakare rojló iꞌimaká, ejo ruñaó. Re raꞌá rinakojó ruká weji kele jarechí, eyá apú peꞌiyojé ketana.
7 E kaja nakeñoꞌó pajwaꞌatéchaka nókakajo jeꞌechú chu. Tupana waꞌatéjena, jeꞌechú chu iꞌimakaño, wakáraꞌajeri ií iꞌimari Miguel. Riká, rijwaꞌatéjena waꞌaté, nókaño lánawaru kaje waꞌaté.
8 Unká nacháꞌatala riká, unká kaja pukunaji iꞌimalá najló jeꞌechú chu.
9 Kaja nakaꞌá riká lánawaru kaje jeꞌechú chiyá. Kajruni wani riꞌimaká, jeí chiꞌinárikana riꞌimaká. Riká ií Jiñá Chiꞌinárikana, Satanás. Kajrú ripajlaka piyuke inaꞌukena ejaꞌawá chu iꞌimakaño waꞌaté. Riká nakaꞌá jeꞌechú chiyá, rijwaꞌatéjena waꞌaté.
10 Rejomi nomaꞌá kaphí purákaꞌaloji marí ke:
“Kaja chuwa, Tupana iꞌimatájika inaꞌuké kapichákajo liyá.
Chuwa, Tupana iꞌimajika piyukeja inaꞌukena wakáraꞌajeri.
Chuwa riká, riwakáraꞌakare ejaꞌawá chojé iꞌimaká inaꞌuké iꞌimatájeri penaje, wakáraꞌajika kaja rijwaꞌaté.
Kaja nakaꞌá jeꞌechú chiyá Jesucristo jaꞌapiyá jemaꞌajeño arukátajeri.
Waꞌajini wani rarukátaka Tupánajlo neká.
11 Jesucristo jaꞌapiyá jemaꞌajeño cháꞌataño Jiñá Chiꞌinárikana,
Jesucristo takaꞌakale nachaya aꞌawaná apiyákakanami nakojé iꞌimaká.
Nacháꞌata kaja riká kewákaje purákaꞌaloji aú.
Riyukuna neꞌemá ajopánajlo.
Unká naweꞌepila khaí nanakuwá.
Ajopana kaꞌajná wátaño nenókana,
nemaꞌakale Jesucristo jaꞌapiyá.
Eꞌiyonaja unká nayurila naliyó raꞌapiyá jemaꞌakana.
Ilé kajena cháꞌataño Jiñá Chiꞌinárikana.
12 Eyá rimá piño jeꞌechú churúnajlo,
napechu iꞌimakáloje puꞌují penaje.
Chapú wani riꞌimajika ejaꞌawá chu iꞌimakáñojlo,
juni jalomi jakuwá iꞌimakáñojlo waꞌaté,
Jiñá Chiꞌinárikana witúkaꞌakale rejo.
Yurí riꞌimajika, riweꞌepíkale meketánaja riꞌimajika re joꞌó kaja”.
13 Kaja lánawaru kaje weꞌepí nakaꞌaká riká jeꞌechú chiyá ejaꞌawá nakojé. Raú rikeñoꞌó inanaru, wáꞌayo ruꞌurí iꞌimaká penájemiru, jechoꞌótakana.
14 Tupana aꞌarí rojló iyamata yupheji, rojrákaloje desierto chojé raú. Perí kajruni wani yuphé, ke ruyuphé iꞌimaká. Desierto chu ruꞌumá weji kele jarechí, eyá apú peꞌiyojé ketana. Palá Tupana aꞌaká rinakojó ruká, jeí chiꞌinárikana liyá.
15 E jeí chiꞌinárikana yurí kajrú juni jeñoꞌoká rinuma chiyá, rapichátakaloje ilerú inanaru raú penaje.
16 Eꞌiyonaja teꞌerí aꞌarí ruñathé, riká ajmíloꞌori juni jeñoꞌokare lánawaru kaje numá chiyá.
17 Ilé kaje aú lánawaru kaje yúchaꞌaro íkiꞌija wani inanaru cha, raú riꞌijná piño rulakénami waꞌaté nókajo. Riꞌijná Tupana jaꞌapiyá jemaꞌajeño, Jesucristo purákaꞌalo jaꞌapiyá jemaꞌajeño, kele waꞌaté nókajo.
18 Eyá lánawaru kaje táraꞌaro juni jalomi turenaje.