13
Rejomi nomá kamejeri apú kaje wani jáchoꞌoko juni jalomi jakiyá. Iyamá théꞌela kele riꞌiwawi iꞌimaká; iyamá théꞌela kele pútenaji kaje patoꞌoró riꞌiwawi nakú; iyamá kuwáꞌata kaꞌalá wílaꞌaruri riꞌimaká. Rií puꞌuwaré nojé wani iꞌimari lanaꞌakéjami pajluwano, pajluwano ke, riwílaꞌaru nakú. Puꞌuwaré wani ilé kaje iꞌimaká Tupana nakú.
2 Riká kamejeri kaje nomákare, amaro yawi ejaꞌawá eꞌiyowaje ke. Riꞌimá iꞌimari oso jiꞌimá ke; rinuma iꞌimari león numá ke. Ilé lánawaru kaje aꞌarí rijló ripechu, riwakáraꞌakaloje rijwaꞌatéjena, riwakáraꞌaka rileꞌejena ke kaja penaje.
3 Ilé kamejeri wílaꞌaru nakiyana nenó pajlúwaꞌala, raú napechu nakú iꞌimá: “Kaja pajlúwaꞌala riwílaꞌaru takiꞌichá”, ke, eꞌiyonaja ripalaꞌó piño palá rapumí chuwá. Raú piyuke inaꞌuké pechu iꞌimá: “¡Meke piyuke wani rilaꞌalaka!”, ke, raú nakeñoꞌó raꞌapiyá jemaꞌakana.
4 Kajrú inaꞌukena ejaꞌawá chu iꞌimakaño pechu iꞌimaká puꞌují riká lánawaru kaje nakú, raꞌakale riká kamejérijlo ripechu, riwakáraꞌakaloje raú penaje. Puꞌují kaja napechu iꞌimaká ilé kamejeri kaje nakú, raú nemá rinaku: “Unká na iꞌimalá riká ke, unká kaja na kalé cháꞌatarijla riká nókakajo aú”.
5 Tupana yuriri ilé kamejeri kaje puraꞌakó puꞌuwaré wani; riyurí kaja riꞌimaká ejaꞌawá chu iꞌimakaño wakáraꞌajeri. Weji kele jarechí, eyá apú peꞌiyojé ketana, riꞌimaká nawakáraꞌajeri.
6 Puꞌuwaré wani ripuraꞌakó Tupana nakú; puꞌuwaré kaja ripuraꞌakó jeꞌechú, Tupana iꞌimakare e, nakú; piyuke richu iꞌimakaño nakú waꞌató ripuraꞌó kaja puꞌuwaré wani.
7 Rinókako kaja Tupana leꞌejena inaꞌukena waꞌaté. Richáꞌata neká; riwakáraꞌa kaja piyuke inaꞌukena; piyuke riwakáraꞌaka ajopana, ajopana ke. Ajopana, ajopana ke, teꞌeré eyájena wakáraꞌajeri riꞌimaká; riꞌimá kaja apú, apú chu, ke puraꞌajeño wakáraꞌajeri. Unká Tupana italá rijló rapu, riꞌimaká piyá ñaké rijló.
8 Piyukeja inaꞌukena, ejaꞌawá chu iꞌimakaño unká wátalaño Tupana jaꞌapiyá jemaꞌakana, pechu iꞌimaká puꞌují rinaku. Unká kaja neí iꞌimalá lanaꞌakéjami, Jesucristo waꞌatéjena chaya nenókare iꞌimaká, papérane chu. Unká chiyó Tupana keñoꞌota ejaꞌawá, riweꞌepí mékajenaka iꞌimajika rileꞌejena inaꞌukena. Riwakajé eyá, re neí iꞌimá kaja lanaꞌakeja ripapérane chu. Ripapérane chu lanaꞌakéjami ií iꞌimakaño, iꞌimajeño matajnako rijwaꞌaté jeꞌechú chu.
9 Jemaꞌá palá raꞌapiyá.
10 Tupana weꞌepiri mékajenaka napatájika neꞌiyayá,
nakaꞌakáloje neká inaꞌuké wajákelana chojé penaje;
nekaja kalé napataje.
Tupana weꞌepiri kaja mékajenaka nenójika;
nekaja kalé nenoje neꞌiyayá.
Ñakele numá Tupana leꞌejena inaꞌukénajlo: Iꞌimá kawajwéruna; ipechu iꞌimá kaja kaphí Tupana chojé.
11 Rejomi nomá piño apú kamejeri kaje jáchoꞌoko teꞌerí eꞌiyayá. Iyamá riꞌiwawi iꞌimaká kapajé nojé; oveja iꞌirí iꞌiwawi keja riꞌiwawi iꞌimaká kapajé nojé. Lánawaru kaje puraꞌakó, ke kaja ripuraꞌakó.
12 Riká kamejeri, junápiya jáchoꞌoko, awaꞌá riꞌimá. Kaphí riwakáraꞌaka ajopana raꞌapiyá ke. Tejmuji aú riwakáraꞌa piyuke inaꞌuké pechu iꞌimaká puꞌují riká, kamejeri junápiya jáchoꞌoko, nakú. Nenókare pewílaꞌaruya, kaja palaꞌakó iꞌimaká penájemi riꞌimaká.
13 Riká kamejeri, teꞌerí eꞌiyayá jáchoꞌoko, laꞌarí kajrú nakaje, unká méñoꞌojo ajopana laꞌalare kaje. Riwitúkaꞌata keraꞌathani jeꞌechú chiyá ejaꞌawá nakojé. Piyuke inaꞌuké eꞌiyajé riwitúkaꞌata riká najimaje.
14 Rilaꞌá kajrú nakaje, unká méñoꞌojo ajopana laꞌalare kaje, raú ripajlá piyuke inaꞌukena ejaꞌawá chu iꞌimakaño waꞌaté. Riká kamejeri, junápiya jáchoꞌoko, awaꞌá rilaꞌá nakaje, unká méñoꞌojo ajopana laꞌalare kaje. Kamejeri, teꞌerí eꞌiyayá jáchoꞌoko, wakáraꞌari piyukeja inaꞌuké laꞌaká nakaje jenami. Palá napechu iꞌimaká kamejeri kaje junápiya jáchoꞌoko nakú. Raꞌapí iphákana aú nalaꞌá renami iꞌimaká. Nenó riꞌimaká joꞌojoji aú, eꞌiyonaja unká ritakaꞌalá.
15 Nalaꞌá ilé kamejeri junápiya jáchoꞌoko jenami, rejomi nayurí raphoꞌoká rikaéjane renami chojé, raú riyuró kajmuni. Rejéchami ripuraꞌakó. Unkachu inaꞌuké pechu iꞌimaké puꞌují rinaku, rinoke neká.
16 Riwakáraꞌake tejmuji aú piyukeja inaꞌukena. Kajrú péchuruna, wejapa péchuruna, kamuꞌují laꞌakaño, kajrú laꞌakaño, ajopana waꞌaté jápajeño, najluwa jápajeño, neká piyukeja wani riwakáraꞌake tejmuji aú. Nayátheꞌela kaꞌañá chojó pitá yaré naꞌá, napulá nakuwá waꞌató.
17 Unkachu ilé kamejeri ií iꞌimalá nayátheꞌela nakú lanaꞌakéjami, napulá nakú waꞌaté, unká nayurike nawarúwaꞌaka nakaje. Unká kaja nayurila naꞌaká nakaje riwemí aú. Nalanaꞌá ilé ií kaꞌajná, rileꞌejé lapaꞌatákaje kaꞌajná, inaꞌuké yátheꞌela nakú, napulá nakú waꞌató.
18 Kapechúruna iꞌimakaño weꞌepiño rileꞌejé lapaꞌatákaje nakojé rií weꞌepíkana aú, rií keja kaja lapaꞌatákaje. Rileꞌejé lapaꞌatákaje iꞌimari seiscientos sesenta y seis (666).