14
Rejomi nuyakaꞌo piño, amari Jesucristo táraꞌako Jerusalén e. 144,000 rijwaꞌatéjena iꞌimaká. Rií, Raraꞌapá ií waꞌaté, iꞌimari lanaꞌakéjami rijwaꞌatéjena pulá nakú.
2 E purákaꞌaloji jemaꞌaró jeꞌechú chiyá. Kajruni wani jipa mejé jemaꞌakó, ke rinúrupi mejé iꞌimaká; kajrú pichaní majákaꞌako mejé jemaꞌakó rijwaꞌaté. Kajrú inaꞌukena waraꞌaká guitarra kaje nakú mejé jemaꞌakó, ke rinúrupi mejé jemaꞌakó.
3 E kaja rijwaꞌatéjena, neká 144,000 iꞌimakaño, táraꞌaño nawakáraꞌajeri jimaje. Paꞌu kele kajmuruna, eyá pheñawilana táraꞌaño kaja najwaꞌaté rijimaje, e nataní Tupana yale rijló. Wajé yáleje riꞌimaká; neká, Riꞌirí takaꞌakárena chaya, keleja weꞌepiño riyale.
4 Palá laꞌakaño neꞌemaká; achiñana, unká laꞌalaño namanáicho inaana waꞌaté, neꞌemaká. Neꞌejnaké Jesucristo waꞌaté riꞌijnajika ejo. Nachaya Jesucristo takaꞌá iꞌimaká, raú Tupana warúwaꞌa neꞌemaká ajopana ejaꞌawá chu iꞌimakaño eꞌiyayá. Ajopana piyá riꞌimatá neꞌemaká kapichákajo liyá, neꞌemakáloje Tupana, Riꞌirí Jesucristo waꞌaté, leꞌejena penaje.
5 Unká wani kaja napajlala; unká kaja nalaꞌalá puꞌuwaré.
6 Rejomi nomá piño Tupana waꞌatéjeri, jeꞌechú chiyaje, ajraka yenuwa wani. Tupana purákaꞌalo raꞌapata ejaꞌawá chu iꞌimakáñojlo; Tupana iꞌimataka iná kapichákajo liyá Jesucristo palamane aú yukuna raꞌapata najló, unká riyukuna kapichálajo. Piyukeja inaꞌukena marí ejaꞌawá chu iꞌimakáñojlo riꞌimá riyukuna; ajopana, ajopana ke, nakiyánajlo riꞌimá kaja riyukuna; apú, apú chu ke, puraꞌajéñojlo riꞌimá kaja riyukuna; ajopana, ajopana ke, teꞌeré erúnajlo riꞌimá kaja riyukuna.
7 Kaphí wani rimaká najló: “Iphá Tupana jaꞌapí, ipuraꞌó kaja palá riweꞌepíkare laꞌakana nakú. Kaja chuwa, rimájika piyukeja inaꞌuké nakú pajluwano ke, mékeka nalaꞌakana iꞌimajika. Ipechu iꞌimá puꞌují laꞌarí jeꞌechú, ejaꞌawá, juni jalomi, piyuke apú juni waꞌaté iꞌimaká, nakú. Rinaku ipechu iꞌimá puꞌují”, ke rimaká.
8 Apú Tupana waꞌatéjeri, jeꞌechú chiyaje, puraꞌaró piño rapumí chojé. Riká kemari: “Pajimila Babilonia kapicharo iꞌimaká. Marí ke iꞌimakaño, pajimila eyájena iꞌimaká: Napichátake ajopana, ajopana ke pechu; puꞌují napechu iꞌimajika nakaje jenami nakú, nachiꞌinárikana ke riꞌimakale najló. Namata kaja ajopana, napechu iꞌimakáloje ñaké kaja puꞌují rinaku najwaꞌaté, raú napichátake napechu; namata kaja ajopana, ajopana ke, namanáicho laꞌakana aú. Ke nalaꞌajika”, ke rimaká.
9-10 E kaja apú Tupana waꞌatéjeri, jeꞌechú chiyaje, weji kele laꞌaká, iꞌijnari kaja ajopana iyamá ápumichu. Kaphí wani rimaká: “Puꞌují péchuruna iꞌimakaño ilé kamejeri nakú, amájeño chuwa Tupana yuchá yajwé. Re rií lanaꞌakéjami napulá nakú, nayátheꞌela nakú waꞌaté. Íkiꞌi wani Tupana yúchaꞌako nachá; keraꞌathani, azufre waꞌaté, yajwé namaje chuwa. Jesucristo, rijwaꞌatéjena, jeꞌechú chiyájena, kele jimaje namaje riyajwé.
11 Namaka imaꞌaní yajwé eyá ija jáchoꞌoro, matajnako ráchoꞌojiko reyá. Waꞌajini wani namájika imaꞌaní yajwé re, unká rimaꞌáchare watánaꞌatalaje neká. Ilé ke riꞌimajika najló, puꞌují napechu iꞌimajíkale ilé kamejeri kaje nakú. Rií iꞌimajeri kaja lanaꞌakéjami nanaku; puꞌují napechu iꞌimajika renami nakú, rinakojé laꞌakanami riꞌimajika”, ke rimaká.
12 Ilé ke riꞌimajíkale, numá Tupana jaꞌapiyá jemaꞌajéñojlo: Iꞌimá kawajwéruna Tupana jaꞌapiyá jemaꞌakana nakú. Tupana leꞌejena inaꞌukena aꞌañó Ripurákaꞌalo nanakojó, unká nayurila Jesucristo jaꞌapiyá jemaꞌakana.
13 E purákaꞌaloji jemaꞌaró piño jeꞌechú chiyá, rimá nojló: “Pilanaꞌá marí papera kaje chojé: ‘Maáreya aꞌajná ñoꞌojó, inaꞌuké nakiyana jemaꞌajeño Jesucristo jaꞌapiyá. Raꞌapiyá jemaꞌajeño neꞌemajika, aꞌajná natakaꞌajika ejená. Puꞌují péchuruna neꞌemajika, Tupana laꞌajíkale neká palá’.
“ ‘Ke joꞌó’, ke Tupana Pechu aꞌajipaká rijló. Chuwa nawatánaꞌajika najápakaꞌala liyá. Kajrú najápaka iꞌimaká. Chuwa jeꞌechú chu re najló palá nalaꞌakare wemí”, ke Tupana Pechu kemaká nojló.
14 Rejomi nuyakaꞌo piño, nomá juni juwákaꞌala jareni, rinaku nomá na pajaká yáꞌako. Inaꞌuké iꞌimajíkare palamane ke ramákana iꞌimaká. Pútenaji oro nakiyá laꞌakanami iꞌimari richá; jajalu kaje puꞌuwení iꞌimari kaja rikapi.
15 Rejomi nomá apú Tupana waꞌatéjeri jáchoꞌoko Tupana ñakaré chiyá, e awíyoꞌokeja rimaká juni juwákaꞌala nakú yáꞌakojlo: “Chuwa pijápajika ilé pijajálune aú, pijiꞌichá nakaje icha ejaꞌawá eꞌiyayá, kaja richa ñaꞌakana ejaꞌawá eꞌiyayá iphicha rená chojé”, ke rimaká.
16 Raú riká, juni juwákaꞌala nakú yáꞌako, mataꞌarí richa. Pajlúwaꞌama aú ja rijñaꞌá richa ejaꞌawá eꞌiyayá.
17 Rejomi nomá piño apú Tupana waꞌatéjeri jáchoꞌoko Tupana ñakaré chiyá. Jajalu kaje puꞌuwení iꞌimari kaja rikapi.
18 E kaja apú Tupana waꞌatéjeri jaꞌapari mesa awaꞌayá. Keraꞌathani minárikana riꞌimaká. E awíyoꞌokeja rimaká kaphí wani jajalu puꞌuwení iꞌimakare kápijlo: “Chuwa pimataꞌá pijajálune aú kajmú kaje, ejaꞌawá chu iꞌimakare, icha. Kaja rapará chuwa”.
19 E rijajálune aú rimataꞌá richuwaja piyuke kajmú kaje, ejaꞌawá chu iꞌimakare, icha. Rejomi rikaꞌá riká ralá apákaꞌaruna chojé. Íkiꞌija wani Tupana wajájika inaꞌuké, kemakánaka riꞌimaká.
20 Napaꞌá kajmú kaje jalá reꞌiyayá ralá apákaꞌaruna chojé pajimila yámojo. Raú nérami iꞌimari kajrú wani rewá, kaéja ke. Kawarú táraꞌako raꞌata jaꞌapejé ketana juniphuka nérami iꞌimaká. Trescientos kilómetros ketana ewá richipúkaꞌo.