15
Rejomi nomá piño apú nakaje, unká wani iná amálare, kaje. Nupechu iꞌimá: “Meke piyuke wani kaji”. Nomá iyamá kuwáꞌata kele (7) Tupana waꞌatéjena, jeꞌechú chiyájena. Pajluwano ke nakaje iꞌimaká nakapi yaripu waja, raú nawajákaloje unká jemaꞌalaño Tupana jaꞌapiyá penaje, raú natajnátakaloje kaja penaje Tupana yuchá penaje.
2 Rejomi nomá kajruni wíluru kaje keraꞌathani waꞌaté toꞌokó. Kajruni, juni jalomi ke riꞌimaká. Rawaꞌá ajopana inaꞌukena táraꞌaño. Unká jemaꞌalaño ilé kamejeri junápiya jáchoꞌoko iꞌimaká, jaꞌapiyá neꞌemaká; unká kaja napechu iꞌimalá puꞌují renami nakú; unká kaja rileꞌejé lanaꞌakéjami iꞌimalá nanaku. Neká táraꞌaño, guitarra kaje Tupana aꞌakare najló, nakapi ke.
3 Re neꞌemá Moisés, Tupana waꞌaté jápajeri, yale jataníkana nakú Tupánajlo, nataní kaja Tupana iꞌirí yale marí ke:
“Wawakáraꞌajeri Tupana. Piyukeja laꞌajeri piká,
palani wani nakaje pilaꞌakare.
Piyukeja inaꞌukena wakáraꞌajeri kaja piká,
palá nojé nakaje pilaꞌakare.
Kewákaje pipurákaꞌalo.
4 Wawakáraꞌajeri, piyukeja inaꞌukena iphaka paꞌapí.
Naꞌapata kaja piyuke nakaje pilaꞌakare yukuna ajopánajlo.
Pikaja kalé, pajluwaja, unká laꞌalá puꞌuwaré.
Piyuke ajopana, ajopana teꞌeré eyájena ke waícha pijimaje,
napechu iꞌimakáloje puꞌují pinaku penaje.
Puꞌují napechu iꞌimajika pinaku,
namákale palá pilaꞌakare iꞌimaká”,
ke natanika.
5 Rejomi nomá Tupana ñakaré jeꞌechú churí, e nomá rinumaná meꞌetako. Richu nomá ukapú, Tupana purákaꞌalo lanaꞌakéjami iꞌimakare chu.
6 Rejomi nomá Tupana waꞌatéjena, jeꞌechú chiyájena, iyamá kuwáꞌata kele mujlúkaꞌaka richiyá majó. Nakaje iꞌimari nakapi, nawajákaloje inaꞌuké raú penaje, unká jemaꞌalaño Tupana jaꞌapiyá wajájona penaje iꞌimari nakapi. Jaré nojé, palá nojé, naꞌarumaká iꞌimaká. Wachaphilaji kaje chipúkaꞌari neꞌekú nakuwá, oro nakiyá laꞌakanami riꞌimaká.
7 E pajluwaja, kajmuruna nakiyana iꞌimakaño, aꞌarí Tupana waꞌatéjenajlo tiyela kaje. Iyamá kuwáꞌata kele rijwaꞌatéjena iꞌimaká. Raꞌá najló tiyela apú, apujlo ke, oro nakiyá laꞌakanami riꞌimaká. Unká tajnákajo penaje kalé Tupana. Riká yúchaꞌaro inaꞌuké cha, unká pachá nemaꞌalá raꞌapiyá, richona riwajaje neká. Nawajájona iꞌimari tiyela nakapi iꞌimakare chu.
8 Piyuke laꞌaká Tupana. Kajrú ija iꞌimaká riñakaré chu. Iyamá kuwáꞌata kele rijwaꞌatéjena wajaño neká, unká jemaꞌalaño raꞌapiyá. Nawajájika neká ketana, unká na kalé mujlúkaꞌajerijla Tupana ñakaré chojé.