16
Rejomi purákaꞌaloji jemaꞌaró Tupana ñakaré chiyá, rimá iyamá théꞌela kele Tupana waꞌatéjenajlo: “Chuwa iꞌijná, ijlámaꞌatiya iyamá kuwáꞌata kaꞌalá tiyela chiyá Tupana yuchá ejaꞌawá nakojé”.
2 Raú Tupana waꞌatéjeri, natukumá táraꞌako, lámaꞌari ritiyélane chiyá Tupana yuchá ejaꞌawá nakojé, raú pachákaꞌaloji nótari neká. Puꞌují péchuruna kamejeri jenami nakú iꞌimakaño neꞌemaká, rií iꞌimari kaja lanaꞌakéjami nanaku. Neká penájemina iꞌimakaño pachákaꞌaloji nota piyukeja nanapona nakuwá napachó, kewini wani riꞌimaká.
3 Rejomi apú Tupana waꞌatéjeri, iyamá laꞌaká, lámaꞌari piño ritiyélane chiyá juni jalomi jakojé. Raú riyuró jirá ke, raú piyuke juni yajné takaꞌatako.
4 Rejomi apú Tupana waꞌatéjeri, weji ke laꞌaká, lámaꞌari piño ritiyélane chiyá apú juni jakojé. Inaꞌathana, muthú kaje waꞌató jakojé rijlámaꞌa riká, riká aú riyuró kaja jirá ke.
5 E Tupana waꞌatéjeri, juni minárikana riꞌimaká, kemari Tupánajlo:
“Palá piwajaka ilé ke neká.
Unká laꞌalá puꞌuwaré piká.
Iꞌimajeri wani piká; piká iꞌimari iꞌimaká.
Re kaja piká meꞌetení.
6 Neká piwajákarena meꞌetení nókeño pileꞌejena inaꞌukena.
Nenoke pipurákaꞌalo jaꞌapátajeño michuna,
kajrú nérami iꞌimajika rewá.
Chuwaka piká aꞌajeri nanuma jirá kaje,
neꞌerakáloje riká penaje.
Chapú nalaꞌakare ajopana iꞌimaká ejé piwajaje neká”,
ke rimaká Tupánajlo.
7 E nomaꞌá purákaꞌaloji mejé keñoꞌótako altar eyá, riká kemari Tupánajlo: “Wawakáraꞌajeri, wapechu iꞌimakare chojé kaphí, piyukeja laꞌajeri kaja piká. Palá pilaꞌaká neká nawajákana aú”.
8 Rejomi apú Tupana waꞌatéjeri, paꞌu kele laꞌaká, lámaꞌari piño Tupana yuchá kamú nakojé, raú ripatá imaꞌá wani, mapeja rikáraꞌataka inaꞌuké.
9 Kajrú nakáraꞌatako raú. Ilé ke nalaꞌakó eꞌiyonaja, unká napajnoꞌotala Tupana ejo napéchuwa, puꞌuwaré nalaꞌakare liyá raú. Kajrú napuraꞌakó puꞌuwaré Tupana nakú; napuraꞌó puꞌuwaré unká weꞌepila ilé kaje laꞌakana nakú.
10 Rejomi apú Tupana waꞌatéjeri, pajluwa théꞌela kele laꞌaká, lámaꞌari Tupana yuchá ilé kamejeri, junápiya jáchoꞌoko cha, raú piyuke rijwaꞌatéjena yuriko kalajeruni chu. Namá kaja kewini wani yajwé, akuwaná najmaꞌatá nalenawa.
11 Ilé kaje yajwé namaka eꞌiyonaja, unká kaja napajnoꞌotala napéchuwa Tupana ejo, puꞌuwaré nalaꞌakare liyá. Apoꞌojó nalaꞌaká: napuraꞌó puꞌuwaré Tupana, jeꞌechú chu iꞌimakare, nakú, namákale chapú kaje yajwé.
12 Rejomi apú Tupana waꞌatéjeri, pajluwaja kuwáꞌata kele laꞌaká, lámaꞌari piño Tupana yuchá, ritiyélane chiyá juni chiꞌitaje Éufrates jakojé, raú rimakáraꞌo, napu meꞌetákoloje penaje. Richuwá ajopana teꞌeré eyájena wakáraꞌajeño iꞌijnaño naleꞌejena suráana waꞌaté. Kamú jeñoꞌoká eyá, nakeñoꞌó richuwá jáchoꞌokano majó.
13 Rejomi nomá piño weji kele jiñana pechu, máwana keja namákana iꞌimaká.
14 Jiñana pechu, jáchoꞌokarona numá chiyá, weꞌepiño nakaje laꞌakana, unká méñoꞌojo ajopana laꞌalare kaje. Weji kele jiñana pechu neꞌemaká, iꞌijnaño ajopana, ajopana ke, wakáraꞌajeño chaje. Neꞌejná nachaje, nawakátakaloje neká penaje, nenókakoloje Tupana waꞌaté. Riwakajé Tupana, weꞌepiri piyuke wani nakaje laꞌakana, wajájeri neká kajrú wani.
15 Jesucristo kemari: “Jemaꞌá, nuká iꞌijnajeri kaꞌajnó. Jataꞌakachi iphákachu nakaje jataꞌajé, unká raꞌalá renó, ñaké kaja nuphájika inaku, unká iweꞌepílaje noná. Puꞌují nuwátajeño pechu iꞌimajika. Palá, unká iꞌimalaño puꞌuwaré laꞌakana nakú, pechu; neká pechu iꞌimajeri nuphájika aú, unká kaja napáñaꞌalajo noꞌopí nuphájika wakajé”, ke Jesucristo kemaká.
16 E kaja jiñana pechu awakátaño ajopana, ajopana ke, wakáraꞌajeño. Armagedón ejé nawakata neká. (Ke naꞌaká pukunaji ií hebréona puraꞌakó chu.)
17 E kaja apú Tupana waꞌatéjeri, iyamá kuwáꞌata kele laꞌaká, lámaꞌari piño Tupana yuchá ritiyélane chiyá. Rijlámaꞌa riká ají ke kawakaje karená eꞌiyajé, rejéchami Tupana kemaká, “kaja”, ke. Mejrí wani ripurákaꞌalo mejé jaꞌakó majó riñakaré riꞌimakare eyá.
18 Ilé ke rimaká ejéchami, kajrú pichaní apíroꞌoka jeꞌechú jimawa, kaphí wani rimejé iꞌimaká, kajrú wani kaja ejaꞌawá ñakaꞌakó raú. Tupana keñoꞌótaka inaꞌuké eyá, maárejecha unká ejaꞌawá ñakaꞌaló ñaké.
19 Raú pajimila Babilonia tamákaꞌato paliyáaka weji kele penaje. “Apú pajimila chaje riká”, ke nemájika riká pajimila nakú. Piyuke wani pajimila apú ewá, apú ewá ke, iꞌimakare ejaꞌawá chu kapichako ejaꞌawá ñakaꞌakó aú. Tupana weꞌepiri puꞌuwaré nalaꞌakare Babilonia e nakojé, pachá namá Tupana yuchá yajwé.
20 Teꞌerí ñakaꞌakó aú paranakuwa kapichó kaja, ñaké kaja piyukeja ipuré kapichako raú.
21 Kajrú kaja juni takaꞌátakanami, kajrú nojé wani, jaꞌakó jeꞌechú chiyá majó. Juni jaꞌakó, ke kaja raꞌakó inaꞌuké cha. Cuarenta kilos ewá pajlúwaꞌala juni takaꞌátakanami jená ñaꞌakó. Riká jaꞌaró jeꞌechú chiyá majó, nótari inaꞌuké, raú puꞌuwaré wani nakhaꞌaká Tupana maná, riwajákale neká íkiꞌija wani.