17
Iyamá kuwáꞌata kele Tupana waꞌatéjena, jeꞌechú chiyájena, iꞌimaká tiyela nakapi ke. Pajluwaja nanakiyana iꞌijnari nowaꞌajé, e rimá nojló: “Piꞌijná nujwaꞌaté, nuyaꞌatíyachi pijló mékeka Tupana wajájika pajimila nemakare nakú: ‘Apú pajimila chaje riká’, ke, eyájena. Apú ewá, apú ewá ke, riká pajimila juni cho. Wapichá ke riká pajimila, inaꞌuké pechu iꞌimakale apoꞌojó Tupana liyá napurákaꞌalo jimaje.
2 Ajopana, ajopana ke, wakáraꞌajeño, piyuke ejaꞌawá chu iꞌimakaño, iꞌijnakeño rejo. Re nalaꞌaké puꞌuwaré namanáicho; Tupana apumí chojé ke, napechu iꞌimajika puꞌují apú nakaje nakú”, ke rimaká nojló.
3 Tupana waꞌatéjeri, jeꞌechú chiyaje, wáꞌari nupechu desierto chojé, re nomá inanaru yáꞌako kamejeri kaje wajlé chu. Kerani kamejeri iꞌimaká, re lanaꞌakéjami rinaku, kemari puꞌuwaré wani Tupana nakú. Iyamá kuwáꞌata kaꞌalá riwílaꞌaru iꞌimaká, iyamá théꞌela kele riꞌiwawi iꞌimaká. Riká wajlé chu nomá inanaru yáꞌako.
4 Kerálukuni, ipurélukuni waꞌaté, roꞌorumaká iꞌimaká. Kajrú kaja oro patoꞌokó roꞌorumaká nakú, kawemí nojé jipa kaje patoꞌoró kaja rinaku; perlas kawemini wani patoꞌoró kaja roꞌorumaká nakú. Tiyela oro nakiyá laꞌakanami iꞌimari rukapi; puꞌuwaré nojé wani nakaje iꞌimari richu; puꞌuwareni purákaꞌaloji iꞌimari richu. Riká kaje purákaꞌaloji jimaje kajrú inaꞌukena pechu iꞌimaká chapú Tupana nakú.
5 Rupulá nakú iꞌimari kaja lanaꞌakeja meꞌechuje purákaꞌaloji aú. Marí ke rimaká: “Babilonia nemakare nakú: ‘Apú pajimila chaje riká’, ke. Piyukeja wapichana jaló, ke riká pajimila. Reyá kaja kajrú apú kaje purákaꞌaloji jáchoꞌo, inaꞌuké pajnoꞌotákaloje napéchuwa Tupana liyá raú, neꞌemakáloje apú kaje purákaꞌaloji jaꞌapiyá rilanakiya”, ke lanaꞌakéjami kemaká rupulá nakú.
6 E nomá ilerú inanaru yuwéraꞌako. Kajrú nenoka Tupana leꞌejena inaꞌukena, nérami nakú ruyuwéraꞌo. Jesucristo jaꞌapiyá jemaꞌajeño neꞌemakale, nenota neꞌemaká. Puꞌují napechu iꞌimajika nenókana nakú.
Nomaka aú ilerú inanaru, nupechu iꞌimá: “¡Meke apú kajeru wani ruká!”
7 E Tupana waꞌatéjeri kemari nojló: “¿Naje ilé ke pipechu? Chuwa numájika pijló meke kemakánaka kele inanaru, eyá kele kamejeri kaje pamíchaje. Meꞌechuje riká. Roꞌopá kamejeri kaje iyamá kuwáꞌata kele wílaꞌaruri nakú, eyá iyamá théꞌela kele riꞌiwawi.
8 Kamejeri pamíchaje kajmuni, kapichájero. Rejomi riká penájemija kaja jáchoꞌojero piño ulawí, unká tajákaꞌalo iꞌimalá, chiyá majó; rejomi riꞌijnajé ají ñoꞌojó, nakapichátakaloje piño riká. Ráchoꞌojiko ulawí matajnákaꞌaru chiyá ee, kajrú inaꞌukena amájika riká. Unká Tupana leꞌejena kalé iꞌimakaño amájeño riká. Unká chiyó Tupana keñoꞌota ejaꞌawá, rilanaꞌá rileꞌejena inaꞌukena ií ripapérane chojé. Neká iꞌimajeño matajnako rijwaꞌaté. Nanakiyana unká amálajeño ilé kamejeri kaje; ajopana nakiyana yakáꞌajeño richaje, raú napechu iꞌimajé: ‘¡Meke piyuke wani rilaꞌalaka!’ ”
E Tupana waꞌatéjeri kemari piño nojló: “Ilé kamejeri kaje, pamíchaje kajmuni, kapichájero, eꞌiyonaja kalé inaꞌuké amaje piño riká.
9 “Kapechúruna inaꞌukena weꞌepiño meke kemakánaka kele kamejeri kaje, eyá kele inanaru. Re riwílaꞌaru iyamá kuwáꞌata kele. Iyamá kuwáꞌata kele yenuri ke riká, riká nakuwá pajimila toꞌoró. Pajimila ke kaja ilerú inanaru. Re kaja iyamá kuwáꞌata kele nawakáraꞌajeño.
10 Kaja nakaꞌá pajluwa théꞌela kele nanakiyana, pajluwaja yuriro nawakáraꞌajeri meꞌetení, apú unká joꞌó iꞌimalá nawakáraꞌajeri. Riꞌimajika ee, riꞌimajé meketánaja kalé.
11 Ilé kamejeri kerani kaje, kajmuni iꞌimaká, kapichájero. Riká penájemi iꞌimajeri nawakáraꞌajeri piño. Iyamá kuwáꞌata kele, apú ewá, apú ewá ke, neꞌemaká nawakáraꞌajeño iꞌimaká. Riká iꞌimari kaja nanakiyana iꞌimaká; riká penájemi iꞌijnajeri kaja aꞌajná ñoꞌojó, rejo nakapichátaje riká”.
12 Rimá piño nojló: “Iyamá théꞌela kele riꞌiwawi pamíchaje kemakánaka: Iyamá théꞌela kele nawakáraꞌajeño, ke kaja riká. Unká joꞌó nakeñoꞌolá inaꞌuké wakáraꞌakana, meketánaja kalé neꞌemajika nawakáraꞌajeño. Kamejeri kaje waꞌaté nawakáraꞌaje.
13 Iyamá théꞌela kele nawakáraꞌajeño iꞌimajika. Ñakeja kaja naweꞌepíjika nakaje laꞌakana natukumó, ilé kamejeri kaje wátajika ke.
14 Nenókajo Oveja iꞌirí waꞌaté. Riká, rijwaꞌatéjena waꞌaté, cháꞌatajeño neká. Palá jemaꞌakaño raꞌapiyá rijwaꞌatéjena; inaꞌukena, riꞌiwapakárena ajopana eꞌiyayá, neká; neká waꞌaté richáꞌataje neká. Cháꞌatajeri wani Oveja iꞌirí; ajopana wakáraꞌajeño, ajopana wakáraꞌajeño ke iꞌimakaño, chaje riwakáraꞌaka, ñakele richáꞌataje neká”, ke rimaká.
15 Tupana waꞌatéjeri, jeꞌechú chiyaje, kemari piño nojló: “Juni pamíchaje, apú, apú ke kemakánaka: ajopana, ajopana teꞌeré ke kaja riká; inaꞌukena, ajopana, ajopana ke kaja kemakana riká; ajopana, ajopana ke nakiyana, ke kaja riká; apú, apú chu ke puraꞌajeño, ke kaja juni pamíchaje.
16 Iyamá théꞌela kele riꞌiwawi pamíchaje, iyamá théꞌela kele nawakáraꞌajeño ke kemakánaka riká. Nawakáraꞌajeño, kamejeri kaje, kele pechu iꞌimajeri chapú pajimila eyájena nakú. Napurákaꞌalo jimaje unká inaꞌuké wátalaje Tupana. Nakapichátaje pajimila piyukeja, unká na kalé yuréjero re.
17 Tupana laꞌarí nawakáraꞌajeño pechu, nalaꞌakáloje nakaje ripechu nakú riꞌimaká ke penaje. Piyuke neká kemájeño ilé kamejeri kaje nakú, riꞌimakáloje piyuke inaꞌuké wakáraꞌajeri penaje. Nakaje iꞌimajíkaja Tupana kemaká ke ejená riꞌimajé nawakáraꞌajeri”, ke rimaká.
18 Rimá piño nojló: “Ilerú inanaru pamíchaje, pajimila nemakare nakú: ‘apú chaje riká’, ke ruká. Apú ewá, apú ewá ke, piyukeja nawakáraꞌajeño jemaꞌajika ilé pajimila nakiyá wakáraꞌajeri jaꞌapiyá”, ke rimaká nojló.