18
Ilé kaje jaꞌapaka ejomi, nomá piño apú Tupana waꞌatéjeri witúkaꞌaka jeꞌechú chiyá majó. Nawakáraꞌajeri wani riꞌimaká, riká patarí piyuke ejaꞌawá nakojé.
2 Kaphí rawíyoꞌoko, rimaká:
“Kaja nakapichata pajimila Babilonia,
nemakare nakú: ‘Apú pajimila chaje riká’, ke.
Chuwa re kajrú jiñana rewá.
Puꞌuwaré nojena kamejérina,
eyá makaꞌaphana, kajena rewá.
Chapú péchuruna neká ajopana nakú.
3 Kaja nakapichata pajimila,
napichátaka pachá kajrú inaꞌukena pechu.
Ajopana wakáraꞌajeño, ajopana wakáraꞌajeño ke,
jemaꞌakeño riká pajimila nakiyana wakáraꞌajeri jaꞌapiyá.
Raú napajnoꞌotá napéchuwa Tupana liyá,
ñakele nalaꞌá puꞌuwaré.
Leꞌejepelaji minaná apú eyájena, apú eyájena ke,
piyuke ejaꞌawá chu iꞌimakaño, iꞌijnatákeño naleꞌejépela rejo.
Mawó rewá iꞌimakaño pechu iꞌimajika
nakaje warúwaꞌakana najluwa nakú.
Raú kajrú leꞌejepelaji minaná ñaꞌaká najluwa liñeru”.
4 E nomaꞌá piño apú awíyoꞌoka jeꞌechú chiyá.
Rimá: “Nujwaꞌatéjenajlo numá:
‘Jáchoꞌo riká pajimila eyá,
ilaꞌaká piyá puꞌuwaré, imanáicho najwaꞌaté rewá.
Ilaꞌajika ee puꞌuwaré najwaꞌaté,
Tupana wajájeri iká, ajopana puꞌuwaré laꞌajeñó waꞌaté.
5 Kajrú wani nalaꞌaká piyukeja puꞌuwaré,
namanáicho waꞌaté, pachá Tupana wajájeri neká.
Maáreya aꞌajná ñoꞌojó,
unká rijñaꞌalaje neká panaku re joꞌó kaja.
6 Chapú nalaꞌaká ajopana,
ke kaja Tupana laꞌajika neká chapú.
Richaje wani rilaꞌajika neká chapú,
riwajájika neká wakajé.
7 Kajrú keꞌiyapejé nakaje iꞌimajika najló.
Riwajaje neká, namákaloje chapú kaje yajwé rilokópaꞌala’.
Napechu iꞌimaké nanakuwá: ‘Nawakáraꞌajeño weká,
ñakele ajopana chaje weká.
Palá iꞌimakaño weká,
raú unká wamálaje chapú kaje yajwé’,
ke napechu iꞌimajika nanakuwá.
8 Ilé ke napechu iꞌimakale nanakuwá,
manaꞌí chiyó namaje chapú kaje yajwé kajrú.
Kajrú kaja nanakiyana takaꞌajika.
Kajrú kaja inaꞌuké takaꞌajika meꞌepijí nakú riwakajé.
Keraꞌathani aú nakapichátaje riká pajimila.
Tupana wajájeri neká.
Piyuke weꞌepika nakaje laꞌakana riká;
nakaje minárikana riꞌimakale”,
ke rimaká.
9 Ajopana wakáraꞌajeño, ajopana wakáraꞌajeño ke, piyuke ejaꞌawá chu iꞌimakaño, amájeño pajimila káraꞌako, raú neyaje. Neká aꞌakeño nanakojó riká pajimila wakáraꞌajeño purákaꞌalo, rilanakiya unká nemaꞌalá Tupana jaꞌapiyá. Naꞌaké kaja pajimila erúnajlo nakaje, nawátakare kaje, raú náchoꞌota kajrú liñeru najluwa. Neká amájeño pajimila káraꞌako.
10 Jukaja neꞌemajika reyá, keroꞌokajo nakú neꞌemajé, namájikale najñaꞌaká chapú kaje yajwé panaku. Nemaje pajlokaka:
“¡Meke chapú wani,
manaꞌí chiyó wani namá chapú kaje yajwé!
Apú pajimila chaje riꞌimaká.
Re iꞌimakaño amaño chuwa chapú kaje yajwé”,
ke nemájika rinaku pajlokaka.
11 Ñaké kaja leꞌejepelaji minaná iyájika, unkale na kalé warúwaꞌaje naliyá naleꞌejépela.
12 Nawarúwaꞌake naliyá oro, sereni kaje, jipa kapajé nojé, kawemí nojé nejnewá penaje. Perlas kawemí nojé nawarúwaꞌake nalaꞌajowa penaje; palá nojé aꞌarumakaji, ipurélukuni lajnere, seda, kaje maká nawarúwaꞌake naliyá. Nawarúwaꞌake kaja naliyá aꞌawaná iká puꞌumé amarí; nakaje jenami, palá nojé kamejeri aími nakiyá laꞌakanami, kaje maká nawarúwaꞌake kaja naliyá. Nakaje palá nojé aꞌawaná nakiyá laꞌakanami, kaje maká nawarúwaꞌake naliyá; nakaje pejruꞌuwá sereni nakiyá laꞌakanami, nakaje pejruꞌuwá nakiyá laꞌakanami, nakaje palá nojé jipa nakiyá laꞌakanami, kaje maká nawarúwaꞌake naliyá.
13 Naꞌaké kaja najló palá nojé nama aꞌajona marí kaje: canela, especias, aꞌawaná iká, mirra, kaje; naꞌaké kaja najló iꞌirakaje, vino, nakaje jilami, harina, trigo, jémana pirakana, ovéjana, kawaruna, peꞌiyowa jaꞌapaka, kaje maká naꞌaké najló. Nawarúwaꞌake kaja naliyá inaꞌuké, najápakaloje najwaꞌaté mawemiru penaje. Ilé ke leꞌejepelaji minaná aꞌajika najló nakaje.
14 Namájika aú pajimila kapichako, nemaje: “Kaja palá nojé nakaje nawátakare iꞌimaká, kapicharo naliyá. Kajrú keꞌiyapé nojé nakaje iꞌimaká re, palá nojé, kawemí nojé kaje, kaja kapicharo piyukeja naliyá, unká riꞌimalaje piño”, ke leꞌejepelaji minaná kemájika pajimila eruna nakú.
15 Leꞌejepelaji minaná awakátakeño najluwa kajrú liñeru, nakaje najló aꞌakana aú. Neká yuréjeño juká pajimila liyá; keroꞌokajo nakú neꞌemajé, namájika aú najñaꞌaká chapú kaje yajwé panaku re; kajrú neyájika pajimila eruna waꞌaté.
16 Nemaje:
“¡Meke chapú wani nalaꞌaká kaꞌajná!
Apú pajimila chaje riꞌimaká.
Palá nojé aꞌarumakaji reruna aꞌaké nanakuwá:
ipurélukuni, kerálukuni waꞌaté
rilajnere iꞌimaká palá nojé.
Kajrú nalaꞌajowa patoꞌojiko naꞌarumaká nakú,
oro nakiyá laꞌakanami riꞌimaká.
Jipa kawemí nojé, wayajrú kaje nakiyá laꞌakanami,
apú nalaꞌajowa iꞌimaká.
Murewa kaje, perlas nakiyana laꞌakanami
iꞌimari namurewane, nejnewá penaje.
17 Manaꞌí chiyoja ilé kaje kapichako naliyá piyukeja”,
ke leꞌejepelaji minaná kemájika nanaku.
18 Re wapuru kajrú nojé iꞌijnari juni jalomi jakuwá. Richu iꞌijnakaño, richiyá jápajeño, kele amájeño kaja kajrú ija jáchoꞌoko pajimila eꞌiyayá, raú natajnajo juká riká pajimila liyá. Namájika aú kajrú rikáraꞌatako, nemaje: “Unká wani apú pajimila iꞌimalá richaje”.
19 Kamuꞌují napechu laꞌajiko, akuwaná nakaꞌajé nachó muꞌupé, nemaje:
“¡Meke chapú wani!
Apú pajimila chaje riꞌimaká, kele.
Rejé kajrú wapuru arúkaꞌajikono.
Kajrú wapuru minaná awakátajika
najluwa liñeru rejo neꞌejnajika wakajé.
Eyá chuwa, manaꞌí chiyó piyuke nakaje kapichako naliyá”,
“Mariruna iꞌimajeño jeꞌechú chu:
Tupana leꞌejena inaꞌukena,
Jesucristo wakáraꞌakarena,
Tupana purákaꞌalo jaꞌapátajeño, kele.
Nekajlo numá: Ipechu iꞌimá puꞌují,
Tupana wajákale pajimila eruna,
chapú nalaꞌakare iká chona”.
21 E nomá Tupana waꞌatéjeri, jeꞌechú chiyaje, jáchoꞌotaka jipa kajruni. Rejomi rikaꞌá riká juni jalomi jakojé, e rimá:
“Ñaké kaja pajimila kapichájiko,
ilé nemakare nakú: ‘Apú pajimila chaje riká’.
Unká kaja riꞌimalaje piño.
22 Unká jataníkaje, yáleje kaje iꞌimalaje rewá,
reyá aꞌajná ñoꞌojó.
Guitarra kaje nakú waraꞌakana,
kewirí kaje chojé aphoꞌokana,
luwiluwí chojé aphoꞌokana,
unká kaja iꞌimalaje reyá aꞌajná ñoꞌojó.
Unká kaja nakaje nakú jápajeño iꞌimalaje rewá riwakajé;
unká kaja nakaje tojroꞌojeño iꞌimalaje rewá riwakajé;
23 unká kaja nakamaré amálajo piño re.
Unká kaja nawáꞌakalajo pajwaꞌatéchaka re.
Leꞌejepelaji minaná, re iꞌimajíkaño, cháꞌatajeño
ajopana leꞌejepelaji minaná ejaꞌawá chu iꞌimakaño.
Nakaje aꞌakana aú nacháꞌatake neká.
Kajrú naweꞌepika lawíchoꞌokaje nakojé rewá,
raú napajlake inaꞌuké waꞌaté,
napechu iꞌimaká piyá kaphí Tupana chojé”,