19
Marí kaje ejomi, nomaꞌá napurákaꞌalo jaꞌakó majó kaphí wani jeꞌechú chiyá. Íkiꞌiruna wani inaꞌukena puraꞌakó mejé, ke remaꞌakó majó. Pajñakani nemaká:
“Puꞌují wapechu Tupana nakú, raú wapuraꞌajó palá rinaku,
¡Aleluya!
Riká iꞌimatari inaꞌuké kapichákajo liyá.
Rikaja kalé weꞌepiri piyukeja wani nakaje laꞌakana nakojé.
Palani kaja rinaku puraꞌakano palá.
2 Nalaꞌakare puꞌuwaré lokóꞌopala riwajá inaꞌuké.
Palá rilaꞌaká raú.
Kaja rikapichata pajimila eyájena.
Napurákaꞌalo jimaje kajrú inaꞌukena,
ejaꞌawá chu iꞌimakaño, pajnoꞌotaño napéchuwa Tupana liyá.
Kajrú kaja napichátaka inaꞌuké pechu napurákaꞌalo aú.
Nenoka pachá Tupana leꞌejena inaꞌukena,
Tupana puraꞌaró naleꞌejé jakumi nakú”,
“Puꞌují wapechu Tupana nakú, raú wapuraꞌó rinaku palá,
¡Aleluya!
Pajimila nemakare nakú: ‘Apú chaje riká’, ke,
eꞌiyayá ija jáchoꞌojero.
Ñakeja ráchoꞌojiko reyá”,
ke nemaká.
4 E kaja veinticuatro pheñawilana, eyá paꞌu kele kajmuruna, kele lámaꞌaño najimá aú Tupana jimaje. Ñákaꞌajori chu riyáꞌako ejé najlámaꞌo rijimaje, e nemá:
“Ñaké riká, puꞌují wapechu Tupana nakú,
¡Aleluya!”.
Tupana iꞌirí wáꞌakako yukuna marí
5 Re Tupana iꞌimaká, eꞌiyowá ke purákaꞌaloji jemaꞌakó, rimá:
“Tupana wátaka ke laꞌakáñojlo numá:
Ipuraꞌó palá Tupana nakú.
Riwátaka ke laꞌakaño nakiyana iꞌimajeño ajopana chaje;
ajopana inakiyana iꞌimajeño ajopana jaꞌapejé.
Iká piyukeja puraꞌajeño palá Tupana nakú”,
ke purákaꞌaloji jemaꞌakó.
6 E nomaꞌá piño napuraꞌakó, íkiꞌiruna wani inaꞌukena puraꞌakó mejé, ke remaꞌakó nojló. Kajruni jipa mejé ke, pichaní mejé ke, napurákaꞌalo jemaꞌakó, pajñakani nemaká:
“Puꞌují wapechu Tupana nakú,
¡Aleluya!.
Paminá wani riká; piyuke laꞌajerí kaja riká.
Wapechu iꞌimakare chojé kaphí riká;
wawakáraꞌajeri kaja riká.
7 Ñakele iꞌijná, walaꞌachí puꞌují wapéchuwa rijló.
Palá wapuraꞌajiko rinaku,
palá rilaꞌakare weká nakú.
Chuwa riphíchaka rená chojé,
Tupana iꞌirí wáꞌakakoloje penaje;
kaja lamáꞌatakejami riꞌiwapaniperu ripé.
8 Kaja raꞌá rojló palá nojé aꞌarumakaji,
mapijaru wani iꞌimakare, sereni ke ramako.
Riká raꞌá rojló, roꞌokáloje runakuwá penaje”,
ke nemaká.
“Palá laꞌakaño, Tupana leꞌejena inaꞌukena,
ke kemakánaka riká palá nojé aꞌarumakaji,
roꞌokare runakuwá”.
9 E Tupana waꞌatéjeri, jeꞌechú chiyaje, kemari piño nojló:
“Pilanaꞌá papera kaje chojé marí: Puꞌují péchuruna neká, Tupana kemakárena nakú, neꞌemakáloje re, namákaloje Oveja iꞌirí wáꞌakako penaje”.
Tupana waꞌatéjeri kemari piño nojló: “Tupana purákaꞌalo, kewákaje iꞌimakare, nakú numíchaje pijló.”
10 E nujlámaꞌo riꞌimá nakojé, nupechu iꞌimakale puꞌují rinaku, raú rimá nojló: “Pilaꞌaniña ilé ke. Nakaje laꞌajeri nuká Tupánajlo, piká ke kaja nuká, pinakiyana keja kaja nuká. Kaphí péchuruna iká Jesucristo purákaꞌalo chojé. Pipechu iꞌimá puꞌujija Tupana nakú”, ke rimaká.
“Tupana purákaꞌalo jaꞌapátajeño jaꞌapátaño Jesucristo purákaꞌalo iꞌimaká. Napechu iꞌimakare chojé kaphí, purákaꞌaloji naꞌapata ajopánajlo iꞌimaká”, ke rimaká.
Apú jaꞌapaka kawarú jareni nakú yukuna marí
11 E nomá jeꞌechú meꞌetako, re nomá pajluwaja kawarú jareni táraꞌako. Riwajlé chu nomá pajluwa yáꞌako. Nakaje Rimakare Nakú ke Laꞌajerí Riká, ke naꞌaká rií. Apú rií iꞌimari Kewákaje, kewaka kemaká riká. Ilé ke naꞌaká rií, palá riweꞌepíkale inaꞌuké wajákana, puꞌuwaré nalaꞌakare pachá. Puꞌuwaré laꞌakaño waꞌaté nókajero kaja riká.
12 Kawarú nakú jaꞌapájeri ijlú amaro keraꞌathani ke; kajrú ripútena iꞌimaká riwílaꞌaru nakú. Rií iꞌimari lanaꞌakéjami rinaku; unká na weꞌepila meke riꞌimaká, rikaja kalé paminá weꞌepiri meke kemakánaka riꞌimaká.
13 Kajrú kaja jirá kaje iꞌimaká raꞌarumaká eꞌiyá. Tupana Purákaꞌalo, ke naꞌaká kawarú nakú jaꞌapájeri ií.
14 Íkiꞌiruna rijwaꞌatéjena, jeꞌechú churuna suráana. Neká jaꞌapaño rápumichu jareruna kawaruna nakú. Jaré nojé waja rijwaꞌatéjena aꞌarumaká iꞌimaká; palani, unká pijá iꞌimalare eꞌiyá riꞌimaká.
15 Nawakáraꞌajeri numá chiyá jajalu kaje puweꞌení jeñoꞌorí. Riká aú richáꞌata ajopana, ajopana teꞌeré eruna. Riwakáraꞌaje neká kaphí wani; namaje Tupana yuchá yajwé. Yurí wani riꞌimajika najwaꞌaté, unká pachá nemaꞌalá raꞌapiyá, kajrú riyúchaꞌajiko nachá.
16 Raꞌarumaká nakú, ritajné nakú waꞌató, lanaꞌakéjami iꞌimaká, kemari:
“AJOPANA WAKÁRAꞌAJEÑO WAKÁRAꞌAJERI RIKÁ. PAMINÁ WANI RIKÁ.”
17 E nomá Tupana waꞌatéjeri, jeꞌechú chiyaje, táraꞌako kamú chu. Reyá rawíyoꞌo kaphí wani, piyuke wayúnajlo rimá: “Chuwa awakó, ajñákaloje aꞌajnejí Tupana aꞌajíkare ijló;
18 chuwa iꞌijná, ajíchachi piyuke inaꞌukena michuna iꞌimi, nawakáraꞌajeño michuna iꞌimi, suráana wakáraꞌajeño michuna iꞌimi, suráana michuna iꞌimi, kawaruna michuna iꞌimi, nanaku jaꞌapájeño michuna iꞌimi waꞌató, ajñákaloje penaje numá ijló. Mawemiru ajopana waꞌaté jápajeño michuna, neꞌiyajena iꞌimaká; ajopana, inaꞌuké chaje iꞌimakaño michuna neꞌemaká; ajopana jaꞌapejena, neꞌiyajena iꞌimaká. Neká kajena iꞌimi ajñaje piyuke”, ke rimaká wayúnajlo.
19 E nomá ilé kamejeri kajruni wani kaje. Piyukeja inaꞌukena, ejaꞌawá chu iꞌimakaño, wakáraꞌajeño iꞌimaká rijwaꞌaté. Naleꞌejena suráana iꞌimaño kaja re najwaꞌaté, nenókakoloje jareni kawarú nakú jaꞌapájeri, rijwaꞌatéjena, kele waꞌaté penaje.
20 E kaja netá ilé kamejeri kaje cha, kéchami napataká riká kemari rinakuwá: “Tupana purákaꞌalo jaꞌapátajeri nuká”, ke. Mapeja ripajlájika rinakuwá; rilaꞌaké kaja kajrú nakaje, unká méñoꞌojo ajopana laꞌalare. Ilé kamejeri kaje awaꞌá rilaꞌaké ñaké iꞌimajika, raú ripajlake kajrú inaꞌukena waꞌaté. Ilé kamejeri kaje leꞌejé lanaꞌakéjami nakú iꞌimakárena neꞌemaká, ripajlá waꞌaté iꞌimaká. Puꞌují péchuruna neꞌemaká kamejeri jenami, nalaꞌakare iꞌimaká nakú, keleruna waꞌaté ripajlá iꞌimaká. Napatá ilé kamejeri; napatá kaja ilé kemari rinakuwá mapeja: “Tupana purákaꞌalo jaꞌapátajeri nuká”, ke. E nakaꞌá neká, iyamá kajmúyaja, keraꞌathani kajruni chojé. Kajruni kaéja ke riká, azufre aú rilukúnaꞌo, riká chojé nakaꞌá neꞌemaká.
21 Kawarú nakú jaꞌapájeri kapichátari kaja najwaꞌatéjena suráana. Jajalu rinuma chiyá jeñoꞌoká aú rikapichata neꞌemaká. Ripurákaꞌalo aú ja rikapichata neká. Rejomi wayuna piyuke iphaño natami ajñaje, namanoꞌoká ejé najñá piyukeja neꞌimi.