Nacháꞌataka Jiñá Chiꞌinárikana yukuna marí
20
E nomá Tupana waꞌatéjeri witúkaꞌaka jeꞌechú chiyá. Chawi iꞌimari rikapi, kajrú nojé kureti waꞌaté. Ulawí, unká tajnákaꞌalo iꞌimalá, meꞌetájona riꞌimaká.
2 E ripatá Jiñá Chiꞌinárikana, naꞌakare ií Lánawaru, ke; jeí chiꞌinárikana ke nemájika kaja rinaku. Ejaꞌawá keñoꞌokó wakajé riꞌimaká. Riká Jiñá Chiꞌinárikana, Satanás, ripatá, kéchami repoꞌotaka riká. Riyurí riká jepoꞌotákeja mil jarechí ketana.
3 Tupana waꞌatéjeri, jeꞌechú chiyaje, kaꞌarí riká ulawí matajnákaꞌaru chojé. Rejé richawínaꞌa richá, rejomi richútaꞌa rinumaná. Ilé ke ritaká rapu, ripajlaka piyá inaꞌukena, ejaꞌawá chu iꞌimakaño, waꞌaté. Richu riyurejo mil jarechí ketana, rejomi jeꞌechú chiyaje meꞌetaje richaya, ráchoꞌokoloje richiyá penaje, riꞌimakáloje marí ejaꞌawá chu meketánaja.
4 Rejomi nomá kajrú ñákaꞌajori pitakó, neꞌemakánana yáꞌakaloje richu penaje riꞌimaká. Richiyá yáꞌajomi nemaje ajopana inaꞌukena nakú mékeka nalaꞌakana, nakaje nalaꞌakare iꞌimaká pachá. Riká penaje Tupana aꞌá neꞌemaká. Nomá kaja ajopana inaꞌukena, nenókarena, péchumi re. Jesucristo purákaꞌalo jaꞌapátajeño ajopánajlo, ajopánajlo ke, penájemi neꞌemaká. Tupana purákaꞌalo naꞌapátake jimaje nenoke neká. Unká napechu iꞌimaké puꞌují kamejeri kaje nakú; unká kaja napechu iꞌimaké puꞌují renami nalaꞌakare rinakojé nakú; unká kaja nawátake ilé kamejeri kaje leꞌejé lanaꞌakéjami iꞌimaká nayátheꞌela nakú, napulá nakú waꞌaté. Ilé kajena neꞌemaká nenó iꞌimaká; neká penájemina makápoꞌoño piño. Rejomi neꞌemá Jesucristo jaꞌapiyá wakáraꞌajeño mil jarechí ketana.
5 Tupana makápoꞌori piño neká, ajopana kaja takaꞌakaño tukumá iꞌimaká. Ajopana kaja takaꞌakaño iꞌimaká, unká joꞌó makápoꞌolaño riwakajé. Mil jarechí jaꞌapájika ejomi, namakápoꞌojo piño napumí chuwá.
6 Puꞌují ajopana tukumá makápoꞌojeño pechu iꞌimajika raú, Tupana leꞌejena wani neꞌemajíkale, unká neꞌemalaje Tupana liyá kupákejanami. Nephá wani Tupana, Jesucristo waꞌaté, jaꞌapí. Naꞌapiyá nawakáraꞌaje kajrú inaꞌukena mil jarechí ketana.
7 Mil jarechí jaꞌapájika ejomi, Tupana waꞌatéjeri, jeꞌechú chiyaje, meꞌetájeri Jiñá Chiꞌinárikana chaya, ráchoꞌokoloje ulawí matajnákaꞌaru chiyá penaje.
8 Rejomi riꞌimajé piño pajlakaje nakú. Ripajlaje piyuke inaꞌuké, ejaꞌawá chu iꞌimakaño waꞌaté, ajopana waꞌaté, ajopana waꞌaté ke. Gog teꞌeré, Magog teꞌeré e iꞌimajíkaño waꞌaté ripajlaje. Chapú péchuruna Tupana nakú neꞌemajika. Jiñá Chiꞌinárikana awakátajeri neká, nenókakoloje penaje. Íkiꞌiruna wani neꞌemajika.
9 Piyuke nateꞌeré eyájena awakájeño Israel lakénami teꞌeré nakojé. Netaje Jerusalén, pajimila Tupana wátakare cha, nakapichátakaloje riká penaje, eꞌiyonaja keraꞌathani jaꞌajó jeꞌechú chiyá nachá. Riká aú chapú Tupana nakú péchuruna kapichajo.
10 Rejomi rikaꞌajé Jiñá Chiꞌinárikana keraꞌathani, azufre aú lukúnaꞌako, chojé. Kaéja kajruni ke riká. Inaꞌuké waꞌaté pajlájeri riká. Kaja nakiꞌichami richojé ilé kamejeri kaje, apú waꞌaté kemakeri rinakuwá mapeja: “Tupana purákaꞌalo jaꞌapátajeri nuká”, ke. Re najñaꞌajé rijwaꞌaté chapú kaje yajwé panaku weꞌechú, eyá lapí ketana waꞌaté, ilé ke neꞌemajika re matajnako.
Tupana kemájika piyukeja inaꞌukena nakú meke nalaꞌakana iꞌimajika yukuna marí
11 E nomá pajluwaja ñákaꞌajori kajruni, jareni riꞌimaká, nawakáraꞌajerijlo penaje riꞌimaká. Nomá kaja richu yáꞌajero yáꞌako richu. E nomá ejaꞌawá, jeꞌechú waꞌaté, kapichako sujwí keja rawaꞌayá. Unká ramalo reyá aꞌajná ñoꞌojó.
12 E nomá kaja takaꞌakaño táraꞌako rijimaje, ilé yáꞌaro nawakáraꞌajeri ñákaꞌaru chu jimaje. Piyukeja neká táraꞌaño rijimaje; ajopana chaje iꞌimakaño, ajopana jaꞌapejé iꞌimakaño, kele táraꞌaño rijimaje piyukeja. E kaja rijmeꞌetá ripapérane, apú papera waꞌaté; ií iꞌimari lanaꞌakéjami richu, neká iꞌimajeño rijwaꞌaté matajnako. Apú kemari kaja takaꞌakaño nakú meke nalaꞌakana; ripapérane chu nanaku kemakana iꞌimari. Meke nalaꞌajika, marí ejaꞌawá chu neꞌemaká wakajé, lokoꞌopáneje rilaꞌajika neká palá.
13 Juni jalomi jakú kaja takaꞌakaño iꞌimaño, neká kaja táraꞌaño rijimaje. Kaja takaꞌakaño, unká jemaꞌalaño Tupana jaꞌapiyá, péchumi iꞌimari napukuna chu, neká táraꞌaño piño rijimaje. Neká, unká jemaꞌalaño Tupana jaꞌapiyá, péchumi iꞌijnari apú napukuna chojé. Re piyuke kaja takaꞌakaño táraꞌaño rijimaje, rejomi rimá nanaku mékeka nalaꞌakana. Mékeka nalaꞌajika marí ejaꞌawá chu neꞌemaká wakajé, lokoꞌopáneje riwajájika neká.
14 E Tupana kaꞌarí puꞌuwaré laꞌakaño péchumi keraꞌathani kajruni chojé. Richojé kaja rikaꞌá takaꞌakaje. Kaéja kajruni ke riká keraꞌathani. Ilé kaje aú nakapichó piño Tupana liyá.
15 Apú papera chu inaꞌuké ií iꞌimari lanaꞌakéjami, nekaja kalé iꞌimajeño matajnako Tupana waꞌaté. Unká ií iꞌimalaje lanaꞌakeja apú papera kaje chu, nakaꞌajé kajruni keraꞌathani chojé.