10
Moisés purákaꞌalomi jaꞌapiyá iꞌimajíkaño laꞌakeño nakaje, raú inaꞌuké weꞌepíkaloje nakaje iꞌimajíkare aꞌajná ñoꞌojó chami nakiyana nakojé. Renami keja nakaje nalaꞌajíkare iꞌimajika. Jarechí keja nenójika pirájina nakiyana, naꞌakáloje Tupánajlo neká puꞌuwaré inaꞌuké laꞌakare chaya penaje. Eꞌiyonaja unká neꞌemaké raú unká japi laꞌalaño puꞌuwaré ke Tupánajlo, renámija kalé nalaꞌajíkale.
2 Ilé ke laꞌakana kaꞌakela nanakiyá richuwaja puꞌuwaré laꞌakaná, nayurijla naliyó pirájina nókana nachaya. Eꞌiyonaja unká ñaké laꞌakana kaꞌaké naliyá puꞌuwaré nalaꞌajíkare.
3 Nenoke pirájina puꞌuwaré nalaꞌakare chaya Tupánajlo, raú naweꞌepíkaloje unká wani paala ñaké laꞌakana iꞌimajika rijló.
4 Eꞌiyonaja unká méñoꞌojo jema pirakana írami kaje, kawayá pirakana írami kaje, kaꞌaké inaꞌuké liyá puꞌuwaré nalaꞌajíkare.
5 Ñakele Jesucristo iphaka piyá, marí ejaꞌawá chojé yámona, rimá Tupánajlo:
“Inaꞌuké nóñono napirana nakiyana puꞌuwaré nalaꞌakare chaya,
eꞌiyonaja ñaké nalaꞌakare unká iphala piwátakare lokópaꞌala.
Ñakele piwata nutakaꞌaká napumí chojé puꞌuwaré nalaꞌakare pachá.
6 Unká pirájina káraꞌatakana pijló laꞌalá puꞌují pipechu,
unká kaja nenókana pijló inaꞌuké chaya laꞌalá palá pipechu.
7 Ñakele numá pijló: Maare nuká, nulaꞌakáloje piwátaka ke penaje.
Noꞌó nokó pijló, nulaꞌakáloje Pipurákaꞌalo lanaꞌakéjami kemaká nunaku ke penaje”.
8 Jesucristo kemari Tupánajlo: “Unká piwátala nakáraꞌataka pirájina pijló; unká kaja piwátala nenoka pijló neká, puꞌuwaré inaꞌuké laꞌakare chaya”, ñaké Moisés michú purákaꞌalomi wakáraꞌaka nalaꞌaká iꞌimaká eꞌiyonaja.
9 Rejomi rimá piño: “Maare nuká, nulaꞌakáloje piwátaka ke penaje”. Ilé ke rimaká rinakuwá aú, iná weꞌepí Tupana tajátaka naliyá renami laꞌakana, raꞌakáloje Jesucristo rapumí chojé, ritakaꞌakáloje inaꞌuké chaya penaje.
10 Tupana wátaka ke laꞌakana laꞌajerí Jesucristo iꞌimaká. Raú raꞌá rikó rijló, ritakaꞌakáloje inaꞌuké chaya penaje. Pajluwa peja ritakaꞌaká iꞌimaká, raú kaja unká na takaꞌalaje piño inaꞌuké chaya iꞌimajika.
11 Weꞌechú kaꞌalá keja ajopana purákaꞌaloji lamáꞌatajeño laꞌajika najápakaꞌala. Pulapé nenójikano pirájina nakiyana puꞌuwaré inaꞌuké laꞌakare chaya. Ilé ke nalaꞌajika eꞌiyonaja, re joꞌó kaja joꞌó neꞌemajika puꞌuwaré laꞌajeñó.
12 Eyá Jesucristo takaꞌarí pajluwa peja inaꞌuké chaya iꞌimaká. Ilé ke rilaꞌaká iꞌimaká ejomi, ripaꞌó piño rapumí chuwá jeꞌechú chojé, re riꞌimakáloje Tupana awaꞌá penaje. Rijwaꞌaté riwakáraꞌa re rijwaꞌatéjena meꞌetení.
13 Re riꞌimajé, aꞌajná Tupana cháꞌatajikaja chapú péchuruna rinaku ejená.
14 Puꞌuwaré inaꞌuké laꞌakare chaya Jesucristo takaꞌarí pajluwa peja iꞌimaká. Ilé ke rilaꞌakale, raꞌapiyá jemaꞌajeño meꞌetení unká japi laꞌalaño puꞌuwaré ke Tupánajlo. Ñakeja neꞌemajika rijló.
15 Tupana Pechu kemari kaja rinaku ñaké, iná weꞌepíkaloje riyukuna nakojé raú. Rimá:
16 “Nupurákaꞌalo, nuyuríjikare akijñojo iꞌimajíkañojlo, iꞌimajeri najló marí ke:
Napechu nakuja riꞌimajé, nalaꞌakáloje raú nuwátaka ke penaje.
Napechu wákeꞌeweja riꞌimajika, nemaꞌakáloje noꞌopiyá raú penaje”,
ke rimaká.
17 Rejomi rimá piño:
“Nomajo inaꞌuké chaje puꞌuwaré nalaꞌakare kaje liyá,
namanáicho nalaꞌakare kaje liyá waꞌató.
Rejomi unká noꞌolaje piño nunakojó ñaké nalaꞌakare iꞌimaká”,
ke Tupana kemaká wanaku iꞌimaká.
18 Ilé ke riꞌimakale, Tupana amó wachaje puꞌuwaré walaꞌakare liyá, ñakele unká na penaje wachaya takaꞌakana iꞌimalaje piño.
Weꞌemakáloje Tupana palamane penaje yukuna marí
19 Nojena, Jesucristo takaꞌaká wachaya iꞌimaká wakajé, rírami iꞌijná itapuwa aphumi chiyá. Ripalamane aú Tupana kemari wanaku, weꞌejnakáloje jeꞌechú chojé, weꞌemakáloje rapukuna wani chu rijwaꞌaté.
20 Chuwa re wajé iñeꞌepú ke wajló, ritakaꞌakale wachaya iꞌimaká, weꞌejnakáloje richuwá Tupana ejo.
21 Re purákaꞌaloji lamáꞌatajeri wani wachaya Tupana waꞌaté. Tupana leꞌejena inaꞌukena amájeri kaja riká, Jesucristo.
22 Ñakele chuwa, wapechu aú weká Tupana awaꞌá, rikaꞌakáloje waliyá puꞌuwaré walaꞌakare, raú unká kaja rimalaje wanaku: “Puꞌuwaré laꞌajeñó neká”, ke. Raꞌá kaja wajló Ripechu, ñakele kaphí wapechu, weꞌemakáloje rawaꞌá wapechu aú penaje.
23 Wáchoꞌoniño kaphí Tupana chojé iꞌimakana chiyá; wapechu iꞌimaniña kaja: “Apala unká kaꞌajná riꞌimalaje ñaké wajló”, ke, nakaje wapechu iꞌimakare chojé kaphí, Tupana kemakale wanaku: “Nuꞌumataje neká kapichákajo liyá, neꞌemakáloje nujwaꞌaté penaje”, ke rimaká.
24 Ñakele weꞌemajé marí ke laꞌakana nakú chuwa: Waꞌajé wanakojó palá pekowáaka, walaꞌakáloje palá panakuwáaka penaje. Walaꞌachí kaja penakúchaka, wawátakaloje íkiꞌija pekowáaka, wawátakaloje kaja ajopana nakú laꞌakana palá.
25 Iyuríniña kaja pajwaꞌatéchaka awakákano, jemaꞌakáloje Tupana purákaꞌalo penaje. Kaja inakiyana yurí naliyó ñaké laꞌakana, ilé kaje unká paala. Ilaꞌá papechúwaka kaphí. Yewicha Jesucristo paꞌakó piño majó, ñakele awakó pajwaꞌatéchaka riyukuna jemaꞌajé.
26 Walaꞌajika ee puꞌuwaré mapeja, wapechu keja waweꞌepika eꞌiyonaja, unká paala ñaké laꞌakana. Rejomi kaja unká na takaꞌalaje piño puꞌuwaré walaꞌakare chaya.
27 Raú keroꞌokajo nakuja weꞌemajé, Tupana wajájikale keraꞌathani wani aú chapú péchuruna rinaku iꞌimakaño.
28 Moisés iꞌimaké wakajé, nenoke puꞌuwaré laꞌajeñó. Iyamá kaꞌajná, weji kele kaꞌajná, amákachu nalaꞌaká puꞌuwaré wani, neꞌemaké riyukuna nawakáraꞌajeñojlo. Riká aú nawakáraꞌake ñaké laꞌajeñó nókana, unká naweꞌepike namuꞌují.
29 Ilé ke nalaꞌajika puꞌuwaré laꞌajeñó júpimi iꞌimaká. Ilé chaje Tupana wajájika chuwá neká laꞌañó mapéjari keja najluwa Riꞌirí, takaꞌarí wachaya iꞌimaká. Riwakajé rírami iꞌijnari itapuwa aphumi chiyá. Chapú wani riꞌimajika, laꞌañó nakátajowa keja najluwa nakaje Jesucristo laꞌakare nachaya iꞌimaká. Raú nalaꞌá puꞌuwaré Tupana Pechu, unkale nawátala najluwa nakaje rilaꞌakare nachaya iꞌimaká. Kaphí Jesucristo chojé péchuruna iꞌimaño unká japi laꞌalaño puꞌuwaré ke Tupánajlo, raú neꞌemá kaja Ripurákaꞌalo jaꞌapiyá.
30 Kaja waweꞌepí mékeka Tupana kemaká rinakuwá: “Nuká wajájeri inaꞌuké, puꞌuwaré nalaꞌakare pachá. Nuká kaja puraꞌajero nuleꞌejé jakumi nakú”.
Rimá kaja: “Nuká kemájeri nuleꞌejena inaꞌukena nakú mékeka nojló nakaje nalaꞌakare iꞌimaká”.
31 Matajnako iꞌimajika Tupana; piyukeja nakaje laꞌajerí kaja riká. Chapú wani nakaje iꞌimajika riwajájikarenajlo.
32 Iweꞌepí meke riꞌimaká ijló, ikeñoꞌoká Jesucristo jaꞌapiyá jemaꞌakana iꞌimaká wakajé. Nalaꞌá chapú iꞌimaká rijimaje, eꞌiyonaja ilaꞌá ipéchuwa kaphí rijñaꞌakana panákujlo. Kajrú nókakajo eꞌiyá iꞌimakana, ke riꞌimaká ijló iꞌimaká.
33 Nawaꞌaké kaja iká ajopana inaꞌukena eꞌiyajé, najimaje napuraꞌakóloje inaku puꞌuwaré. Najimaje kaja nalaꞌaké iká chapú. Ajopana, ñaké kaja nalaꞌajíkarena chapú, nakú iweꞌepike kaja kamuꞌují.
34 Nakaꞌaké Jesucristo jaꞌapiyá jemaꞌajeño nakiyana inaꞌuké wajákelana chojé, raꞌapiyá jemaꞌajeño neꞌemakale. Nanaku iweꞌepike kamuꞌují. Nakaꞌá iliyá piyukeja inane iꞌimaká, eꞌiyonaja unká chapú kalé riꞌimaká ijló, iweꞌepíkale nakaje jeꞌechú chu iꞌimakare iꞌimajika ijló inane chaje palaka. Re unká kapichákajo penaje kalé nakaje iꞌimajika.
35 Jáchoꞌoniño kaphí Tupana chojé iꞌimakana chiyá; iꞌimá kaphí richojé iꞌimakana nakuja, rilaꞌajíkale inaku palá wani.
36 Iꞌimá peyajwéruna chapú kaje yajwé ñaꞌakana panákujlo, ñaké kaja nakaje Tupana wátakare laꞌakanajlo. Raú nakaje, rimakare nakú ijló iꞌimaká, yuréjero ijló.
37 Ripurákaꞌalo lanaꞌakéjami kemari:
“Meketánaja yuriro watukumá, riphákaloje majó penaje.
Unká rimaláraꞌatalaje rikó.
38 Nuleꞌejena inaꞌukena iꞌimajeño matajnako jeꞌechú chu nujwaꞌaté,
kaphí napechu iꞌimakale Jesucristo chojé.
Eyá paꞌañó nayámojo nakú unká wani paala nupechu iꞌimajé”,