Nakaje nalaꞌajíkare júpimi iꞌimaká yukuna marí
9
1-2 Júpimi eyá, Tupana yurí najló Ripurákaꞌalo lanaꞌakéjami iꞌimaká. Riká chu rimá najló iꞌimaká meke riwátaka nawakako pají kajé chojé, napechu iꞌimakáloje palá rinaku penaje. Napirana ímami nakiyá laꞌakanami riꞌimaká, iyamá ukapú iꞌimari richu. Paineko iná mujlúkaꞌakare chojé nakú nemaké: “Tupana pukuna”, ke. Richu re kaja kamareji lapaꞌakó, re kaja mesa iꞌimaké. Riká mesa nakú Tupánajlo naꞌajíkare pan toꞌokó.
3 Aꞌarumakaji kúwaꞌakero richu, riká laꞌakeri riká apaꞌalá ukapú ke penaje. Riká nakú nemaké: “Tupana pukuna wani”.
4 Riká chu altar táraꞌako, rinakuwá kajrú oro patoꞌojiko. Rinakojé nakáraꞌatake aꞌawaná iká, puꞌumé amarí. Richu kaja kaichama yáꞌako, kajrú kaja oro patoꞌojiko rinakuwá, richu aꞌajnejí lupemí maná iꞌimakeri. Riká kaichama chu kaja Aarón michú kutiwáremi iꞌimaké, riká jitunare iphari rinakiyá. Richu kaja iyamata jipa Tupana purákaꞌalo lanaꞌakéjami iꞌimakare nakú iꞌimaké.
5 Iyamá Tupana waꞌatéjena, jeꞌechú chiyájena, kayuphéruna, jenami kúwaꞌakero kaichama cha. Tupana jimaje ke nenami kúwaꞌajiko re. Kaichama pajré ke nenami iꞌimajika. Unká naje kalé nutajata ijló riyukuna iꞌimakana piyukeja wani meꞌetení.
6 Ilé ke riꞌimaká riwakajé najló Tupana ñakaré chu iꞌimaká. Weꞌechú kaꞌalá keja purákaꞌaloji lamáꞌatajeño inaꞌuké chaya Tupana waꞌaté mujlúkaꞌajika ukapú, paineko iꞌimakare, chojé. Re nalaꞌaké najápakaꞌala Tupánajlo.
7 Eyá apaꞌalá ukapú, riyámajo iꞌimakare, chojé ajopana purákaꞌaloji lamáꞌatajeño wakáraꞌajerija kalé mujlúkaꞌakeri richojé pajluwa peja jarechí keja. Rijñaꞌaké rijwaꞌató pirájina írami, raꞌakáloje Tupánajlo riká penaje. Paineko raꞌaké rijló riká puꞌuwaré rilaꞌajíkare chaya, rejomi raꞌaké piño rijló pirájina írami puꞌuwaré ajopana inaꞌukena laꞌajíkare chaya.
8 Renámija kalé nalaꞌaké ilé ke riwakajé, raú Tupana Pechu jewíñaꞌatari weká marí nakú: Paineko ukapú iꞌimaká re ketana, unká méñoꞌojo ajopana mujlúkaꞌake apaꞌalá ukapú ke iꞌimakare chojé, Tupana pukuna wani riꞌimajíkale.
9 Renami keja nakaje nalaꞌajíkare iꞌimajika, raú waweꞌepíkaloje meke kemakánaka riká meꞌetení. Nakaje naꞌajíkare Tupánajlo unká lamáꞌatake inaꞌuké pechu rijló. Pirájina, nenójikarena puꞌuwaré nalaꞌajíkare chaya, unká kaja lamáꞌatake napechu rijló.
10 Ilé ke nalaꞌajika riwakajé renami keja, unká riká wani kalé ñaké laꞌakana iꞌimaká. Aꞌajnejí, iꞌirakaje, kaje iná amákare nakú, nemaké riwakajé; nepake nayátheꞌela chiyá, najimá chiyá, kaje waꞌató. Ilé ke nalaꞌajika aú, nalaꞌaké puꞌuwaré laꞌakaná kaꞌakana nanakiyó jenami. Ilé keja nalaꞌajika renámija, unká chiyó Tupana aꞌá riká wani inaꞌukejlo iꞌimaká.
11 Chuwa marí ke riká wajló: Kaja Jesucristo iphá majó iꞌimaká; kaja ripaꞌó piño rapumí chuwá jeꞌechú chojé. Chuwa, ajopana purákaꞌaloji lamáꞌatajeño chaje wani riká, inaꞌuké chaya Tupana waꞌaté riká meꞌetení. Purákaꞌaloji, weꞌemakare jaꞌapiyá meꞌetení, cháꞌatari jupichumi purákaꞌaloji. Riká wani pukunaji, rijló penaje iꞌimakare, chu Jesucristo meꞌetení. Nakaje marí ejaꞌawá chu iꞌimakare, unká iꞌimalá ñaké kaja jeꞌechú chu. Palani wani riꞌimakale, richáꞌata renami inaꞌuké laꞌakare iꞌimaká.
12 Kaja Jesucristo iphá rapukuna wani penaje iꞌimakare jeꞌechú chojé. Unká kawayá pirakana, jema pirakana, kajena írami rikapi ke kalé rimujlúkaꞌaka richojé, Tupana amákoloje inaꞌuké chaje, puꞌuwaré nalaꞌakare liyá raú penaje. Pajluwa peja ritakaꞌaká wachaya iꞌimaká. Riwakajé rira iꞌijná itapuwa aphumi chiyá iꞌimaká. Wapumí chojé ritakaꞌá iꞌimaká, raú Tupana amó wachaje puꞌuwaré walaꞌakare liyá. Riꞌimatá kaja weká kapichákajo liyá, weꞌemakáloje matajnako rijwaꞌaté raú.
13 Eyá Moisés purákaꞌalomi jaꞌapiyá iꞌimakaño laꞌakeño marí ke: Nawichaꞌaké nachá kawayá pirakana, jema pirakana, kajena írami, rejomi nakáraꞌatake jema iꞌirí altar nakojé. Riká makaꞌapemi nakojloꞌoké juni waꞌaté, nawichaꞌakáloje riká inaꞌuké cha. Raú neꞌemaké unká japi laꞌalaño puꞌuwaré ke Tupánajlo.
14 Ilé ke nalaꞌajika iꞌimajika. Ilé kaje laꞌakana chaje wani palaka Jesucristo írami iꞌimaká wajló, weꞌemakáloje unká japi laꞌalaño puꞌuwaré ke Tupánajlo ripalamane aú. Unká tajnákajo penaje kalé iꞌimajika Tupana. Jesucristo jemaꞌakale palá Tupana jaꞌapiyá aú, raꞌá rikó rijló iꞌimaká, inaꞌuké nókaloje riká aꞌawaná apiyákakanami nakojé. Unká laꞌalá puꞌuwaré iꞌimaká takaꞌarí wachaya iꞌimaká. Riwakajé rira iꞌijná itapuwa aphumi chiyá iꞌimaká. Ilé ke rilaꞌakale wachaya, lamáꞌatakeja ke weká chuwa Tupánajlo, weꞌemakáloje palá laꞌajeñó raꞌapiyá raú.
15 Jesucristo yuriri wajló wajé purákaꞌaloji, weꞌemakáloje raꞌapiyá penaje. Tupana aꞌakárena, rileꞌejena inaꞌukena penájena weká, ñakele wajé purákaꞌaloji jaꞌapiyá weká chuwa. Unká tajnákajo penaje kalé nakaje riyuríkare wajló iꞌimajika, ñakeja riꞌimajíkale. Kaja Tupana kemá wanaku, Jesucristo palamane aú riyuríkoloje ñakeja wajló, ritakaꞌakale wachaya iꞌimaká. Apú purákaꞌaloji jaꞌapiyá weꞌemaké wakajé, walaꞌaké puꞌuwaré iꞌimajika. Ráchoꞌotakaloje weká richiyá penaje ritakaꞌá wachaya iꞌimaká.
16-17 Pajluwa kemakachu ajopánajlo, rinane yuríkoloje najló ritakaꞌajika ejomi, iná weꞌepí unká riyurílajo rijwaꞌaté, kajmuni riꞌimajika ketana. Ritakaꞌajika ejomi, piyuke nakaje rimakare nakú rijló iꞌimaká yurejo najló.
18 Ñaké kaja nakaje iꞌimaká najló Moisés iꞌimaké wakajé. Nawichaꞌaké nachá napirana írami, neꞌemakáloje ripurákaꞌalo jaꞌapiyá raú penaje.
19 Marí ke nalaꞌajika riwakajé: Paineko Moisés iꞌimakeri najló Tupana wakáraꞌakare nalaꞌaká yukuna, nalaꞌakáloje piyuke nakaje riwátaka ke penaje. Rejomi rijñaꞌaké jema pirakana iꞌirí írami, kawayá pirakana írami waꞌaté. Juni waꞌaté nakechípaꞌake rírami, rejomi nawichaꞌaké rinakiyana Tupana purákaꞌalo lanaꞌakéjami nakojé. Rinakiyánaja kaja riwichaꞌaké inaꞌuké cha. Riwichaꞌajona iꞌimari aꞌawaná yainá (hisopo rií). Riká lupukuje nepoꞌoké oveja chijnemi kerani aú; riká aú riwichaꞌaké inaꞌuké cha,
20 rejomi rimaké najló: “Marí írami wichaꞌakana ichá aú wemá Tupánajlo: ‘Wawata Pipurákaꞌalo jaꞌapiyá iꞌimakana’, ke”.
21 Ñaké kaja Moisés wichaꞌajika pirájina írami pají kaje nakojé, rinane iꞌimajíkare chu nakojé waꞌató.
22 Ilé ke nalaꞌajika Moisés purákaꞌalomi jaꞌapiyá neꞌemaké wakajé. Piyukeja nakaje nalaꞌaké palá Tupánajlo pirájina írami aú. Ñaké kaja wajló riká meꞌetení, nakaje Jesucristo laꞌakare wachaya iꞌimaká aú. Rírami, iꞌijnakare itapuwa aphumi chiyá, ritakaꞌaká wachaya iꞌimaká wakajé aú Tupana amó wachaje puꞌuwaré walaꞌakare liyá.
Jesucristo takaꞌaká wachaya yukuna marí
23 Nakaje jeꞌechú chu iꞌimakare jenámija kalé nalaꞌaké riwakajé; chuwa, jeꞌechú chu re riká wani.
24 Tupana ñakaré chu ukapú iꞌimakare nakú nemaké: “Tupana pukuna wani riká”, ke. Nakaje jeꞌechú chu iꞌimakare jenámija riꞌimajika. Unká Jesucristo mujlúkaꞌala nalaꞌajíkare chu renámija iꞌimaká chojé. Riká wani, jeꞌechú chu iꞌimakare, chojé rimujlúkaꞌa iꞌimaká. Re riká meꞌetení Tupana waꞌaté; re ripuraꞌó wachaya rijwaꞌaté.
25 Eyá purákaꞌaloji lamáꞌatajeño wakáraꞌajeri mujlúkaꞌakeri renami laꞌakanami chojé, nemakare nakú: “Tupana pukuna wani”, ke. Pajluwa peja jarechí keja rimujlúkaꞌajika richojé; pirájina írami rikapi ke rimujlúkaꞌajika richojé. Unká Jesucristo aꞌalá rikó Tupánajlo pulapé, inaꞌuké nókaloje riká puꞌuwaré walaꞌakare chaya penaje.
26 Ilé ke riꞌimakela rijló, ramajla chapú kaje yajwé methú ke wani. Ejaꞌawá keñoꞌokó eyá maárejecha, ramajla riyajwé, eꞌiyonaja unká ñaké kalé riꞌimaká rijló. Yewicha ejaꞌawá iphaka rená chojé ritajnákoloje penaje wakajé, riphá majó iꞌimaká. Riphá majó pajluwa peja kaja penaje. Maare ejaꞌawá chu riꞌimaké wakajé, raꞌá rikó pajluwa peja kaja Tupánajlo, ritakaꞌakáloje puꞌuwaré walaꞌakare chaya penaje.
27 Rená iphájeri piyuke inaꞌukénajlo, natakaꞌakáloje penaje, rejomi Tupana kemájeri nanaku meke laꞌajeñoka neꞌemaká.
28 Ñaké kaja Jesucristo takaꞌaká pajluwa peja iꞌimaká. Raꞌá rikó Tupánajlo, ritakaꞌakáloje kajrú inaꞌukena chaya penaje. Raú raꞌapiyá jemaꞌajeño iꞌimaño unká japi laꞌalaño puꞌuwaré ke Tupánajlo. Jesucristo iphájeri piño majó, unká ritakaꞌakáloje piño puꞌuwaré inaꞌuké laꞌakare chaya penaje kalé. Riphaje, riꞌimatákaloje rijwaꞌatéjena penaje. Riphájika wátakana nakú iꞌimakaño weká.