Pablo táraꞌako Félix jimaje yukuna marí
24
E kaja pajluwaja théꞌela ke kala jaꞌapari nachá, rejomi Ananías iphari Cesarea ejo. Sacerdótena wakáraꞌajeri riꞌimaká riwakajé. Ajopana pheñawilana iphaño kaja rijwaꞌaté. Pajluwaja nanakiyana ií iꞌimari Tértulo, ajopana chaya puraꞌajero riꞌimaká. Kaja piyuke neká iphaño Félix nakú, neꞌemakáloje rijló Pablo yukuna.
2 E nawaꞌa Pablo najimaje. Rejéchami Tértulo keñoꞌoká Pablo nakú puraꞌakano Félix waꞌaté, rimá rijló:
—Weꞌemakana, palá pilaꞌakano weká, pipalamane palánija weká wañakajela ewá, unká nókakajo iꞌimalá wajló maárowa. Palá wani piweꞌepika inaꞌuké wakáraꞌakana nakojé.
3 Palá wapechu pinaku, palá wani pilaꞌakale wanaku apú ewá, apú ewá ke iꞌimakaño waꞌaté. Ajopana chaje wani piká, Félix, palá wani pilaꞌaká weká.
4 Unká nuwátala pimaláraꞌatakana jupi. Ñakele pilaꞌá wajló nakaje chuwa: pemaꞌá wapurákaꞌalo meketánaja.
5 “Waweꞌepí chapújneꞌeke wani marí inaꞌuké, raꞌapaka ewá rikawílaꞌano judíona nakú mapéjari purákaꞌaloji aú. Raú ajopana jemaꞌañó apú, Nazaret eyájeri, jaꞌapiyá, rewíñaꞌatakale neká ripurákaꞌalo nakú.
6 Rimujlúkaꞌatajla kaja ajopana inaꞌukena, unká judíona kalé iꞌimakaño, Tupana ñakaré chojé iꞌimaká. Ilé kajena wáꞌakana richojé, unká wani paala wajló, ripachá wapatá riꞌimaká.
7 Eꞌiyonaja suráana wakáraꞌajeri Lisias iphari wanaku iꞌimaká, riká wáꞌari waliyá riꞌimaká tejmuji aú.
8 Pikejaꞌa riliyá riyukuna pikó, piweꞌepíkaloje raú kewaka wemaká pijló —ke Tértulo kemaká Félixjlo.
9 Ajopana judíona, re iꞌimakaño, kemaño kaja rijló:
—Kewaka Tértulo kemaká pijló.
10 Raú riyátheꞌela aú neꞌemakana kemari Páblojlo, ripuraꞌakóloje penaje. Raú Pablo kemari rijló:
—Palani nojló nuchayo puraꞌakano pijwaꞌaté. Nuweꞌepí júpicha piká wakáraꞌakaje nakú.
11 Iyamá iphata jiꞌimaji nakojé (12) ke kala iꞌimaká wakajé, nuꞌujná Jerusalén ejo iꞌimaká, nulaꞌakáloje puꞌují nupéchuwa Tupánajlo. Pikejáꞌajla kaja riyukuna ajopana liyá, piweꞌepíkaloje kewaka numaká pijló.
12 Unká na amala nokhaꞌákako kaꞌajná apú waꞌaté; unká kaja nuyúchaꞌatala Tupana ñakaré chiyájena; unká nulaꞌalá ñaké puꞌuwaré pajimila eꞌiyowá iꞌimaká.
13 Unká na purákaꞌaloji iꞌimalá mariruna inaꞌukénajlo, ripachá narukátakaloje nuká pijló penaje, unkale na nulaꞌalá puꞌuwaré.
14 Nemá nunaku: “Pajluwaja Nazaret eyájeri jaꞌapiyá jemaꞌajeri riká”, ke. Kewaka kele nemá nakú. Raꞌapiyá jemaꞌakana aú nuphá Tupana, waꞌajútaya michuna pechu iꞌimajíkare chojé kaphí, jaꞌapí. Meyáleje purákaꞌaloji, riyuríkare wajló iꞌimaká, jaꞌapiyá nomaꞌá, eꞌiyonaja mariruna inaꞌukena kemaño rinaku: “Apoꞌojó riká”, ke. Unká apoꞌojó kalé riká, richuwaja riyukuna. Ñaké iꞌimakale, nulaꞌá Tupana purákaꞌalo, Moisés michú lanaꞌakare iꞌimaká, kemaká ke; nomaꞌá kaja Tupana purákaꞌalo, Ripurákaꞌalo jaꞌapátajeño michuna lanaꞌakare iꞌimaká, jaꞌapiyá.
15 Mariruna inaꞌukena pechu: “Tupana makápoꞌotajeri kaja takaꞌakaño”, ke, ñaké kaja nupechu rinaku. Nuweꞌepí Tupana makápoꞌotajika piyukeja kaja takaꞌakaño: palá laꞌajíkaño michuna, puꞌuwaré laꞌajíkaño michuna waꞌató.
16 Ñakele nupechu lokópaꞌalaja nulaꞌá nakaje palá, nupechu iꞌimakáloje palá Tupánajlo raú. Ñaké kaja nuwátaka inaꞌuké weꞌepika palá laꞌaká nuká —ke Pablo kemaká rijló.
17 Rimá piño rijló:
—Júpija nuꞌumaká ajopana, ajopana ke, teꞌeré nakú, e kaja nupaꞌó piño nuteꞌeré ejo liñeru aꞌajé kamuꞌují laꞌakáñojlo. Ajopana aꞌañó nojló riká liñeru iꞌimaká, noꞌokáloje riká kamuꞌují laꞌakáñojlo penaje. Nuwata kaja nakaje aꞌakana Tupánajlo mapeja, raú nupaꞌó rejo iꞌimaká.
18-19 Kaja ewaja nuphá rejo iꞌimaká. Nupechu lamáꞌatakana nakuja nuꞌumá Tupana ñakaré chu, nulaꞌá riꞌimaká pheñawilana michuna kemaká ke. Eꞌiyowá ke ajopana judíona, Asia teꞌeré eyájena, amaka nuꞌumaká Tupana ñakaré chu. Re nuꞌumá nakaje aꞌakana nakú Tupánajlo. Mekeleja inaꞌuké iꞌimaño nujwaꞌaté re, unká na waꞌaté nokhaꞌákalo re iꞌimaká. Nulaꞌakela puꞌuwaré riwakajé, palani nomájeño iꞌijnakajla majó pijló riyukuna iꞌimajé.
20 Eko pikejaꞌa mariruna inaꞌukena liyá riyukuna, nemakáloje pijló mékeka nemaká nunaku, judíona wakáraꞌajeño jimaje nutáraꞌako iꞌimaká wakajé.
21 Riwakajé nowíyoꞌo najló iꞌimaká: “Apala iwata nunaku kulákatakano, nupechu iꞌimakale kaja takaꞌakaño nakú: makápoꞌojeño piño neká”, ke —ke Pablo kemaká neꞌemakana Félixjlo.
22 Félix jemaꞌaká aú rimaká ilé ke, riwata ripurákaꞌalo jemaꞌakana piño apú wakajé. Júpimi ke Félix jemaꞌaká Jesucristo yukuna, raꞌapiyá jemaꞌajeño yukuna waꞌaté. E rimá Páblojlo:
—Suráana wakáraꞌajeri Lisias waícha. Riphájika majó wakajé, riꞌimajé nojló riyukuna palá, rejomi numaje pinaku mékeka walaꞌajika piká —ke rimaká rijló.
23 Rejomi rimá suráana wakáraꞌajerijlo:
—Eko piꞌimá Pablo waꞌaphé re joꞌó kaja pají chu. Piyurí rilaꞌaká riwátaka ke; piyurí kaja ajopana, palá rinaku péchuruna, iꞌijnaká richaje, naꞌakáloje rijló nakaje rilaꞌakare nakú kamuꞌují —ke rimaká rijló.
24 E kaja meke kala iꞌimajemi, Félix iphari piño Cesarea ejo, riyajalo Drusila waꞌaté. Judíona jaꞌaló ruꞌumaká. E kaja riwaꞌa Pablo maná piño. Riwata rijwaꞌaté puraꞌakano Jesús nakú. Mékeka iná pechu iꞌimaká kaphí richojé, riꞌimakáloje iná iꞌimatájeri penaje nakú riwata rijwaꞌaté puraꞌakano.
25 Raú Pablo kemari rijló mékeka Tupana wátaka iná laꞌaká palá ajopana nakú; rimá kaja rijló, rilaꞌaká piyá nakaje ripechu keja wani. Ripuraꞌó kaja rijwaꞌaté ejaꞌawá tajnájiko nakú; rimá kaja rijló mékeka Tupana laꞌajika palá wani palá laꞌajeñó nakú. Rimá kaja puꞌuwaré laꞌajeñó, namanáicho laꞌajeñó nakú, mékeka riwajájika neká. Ilé kaje nakú rimaká rijló aú, Félix keroꞌoró, raú rimá Páblojlo:
—Chuwa pipaꞌó. Re kaja joꞌó weꞌechú kaꞌalá iꞌimajika ee nojló, nuwáꞌaje piño pimaná.
26 Félix pechu iꞌimá: “Apala raꞌajé japi nojló liñeru, nóchoꞌotakaloje riká penaje”. Ñakele methú ke riwáꞌajika rimaná, ripuraꞌakóloje rijwaꞌaté penaje.
27 Ilé keja iyamá jarechí ketana jaꞌapaka, rejomi Félix jáchoꞌoro neꞌemakana kaje chiyá. Re joꞌó kaja Félix yurika Pablo inaꞌuké wajákelana chu, judíona pechu iꞌimakáloje palá rinaku raú penaje, rapumí chojé, Porcio Festo yuró neꞌemakana penaje.