22
“Nojena, jemaꞌá mékeka numájika ijló nunakuwá”, ke Pablo kemaká najló.
2 Nemaꞌaká aú ripuraꞌakó napuraꞌakó chu, hebréona puraꞌakó chu, namanúmaꞌo. E rimá najló:
3 “Judío jaꞌa nuká. Pajimila Tarso e nomothoꞌó iꞌimaká, Cilicia teꞌeré nakú riká pajimila. Maare Jerusalén e nutawáꞌo iꞌimaká. Gamaliel jewíñaꞌatari nuꞌumaká maare. Pheñawilana michuna purákaꞌalomi, piyukeja nakú rewíñaꞌata nuꞌumaká. Nuwátake piyukeja nakaje Tupana wátakare kaje laꞌakana, nupechu lokópaꞌala nulaꞌaké ñaké. Eyá meꞌetení, ilaꞌaká ke kaja nulaꞌajika riwakajé.
4 Júpimi nulaꞌaké chapú Jesucristo jaꞌapiyá jemaꞌajeño; nuwakáraꞌa nenoka neꞌiyajena iꞌimaká; nuwáꞌake kaja achiñana, inaana waꞌaté, nukaꞌakáloje neká inaꞌuké wajákelana chojé penaje.
5 Sacerdótena wakáraꞌajeri, ajopana inaꞌukena wawakáraꞌajeño waꞌató, weꞌepiño kewaka numaká ijló meꞌetení. Najló numá iꞌimaká, nawakáraꞌakaloje nujwaꞌaté papera kaje wanakiyana Damasco e iꞌimakáñojlo, nayuríkaloje nuwáꞌaka tejmuji aú Jesucristo jaꞌapiyá jemaꞌajeño reyá. Nuwata nawáꞌakana majó Jerusalén ejo, wawajákaloje neká maare penaje”, ke rimaká najló.
Pablo kemaká najló rinakuwá mékeka Tupana apiyákaka ripechu yukuna marí
6 E rimá piño: “Raú nuꞌujná ají ke Damasco ejo iꞌimaká; noꞌopá ají ke iñeꞌepú chuwá. Yewíchami nuphaka pajimila nakojé ee, kaápuꞌuku iꞌimá wachá, e manaꞌí chiyó kajrú mejámaꞌatani ke jaꞌakó nunakojé jeꞌechú chiyá majó.
7 Rejéchami nokojnoꞌoká teꞌerí eꞌiyajé, e nomaꞌá purákaꞌaloji kemaká nojló: ‘Saulo, Saulo, ¿naje pilaꞌá nuká chapú wani?’
8 E numá rijló: ‘¿Na chi piká kele?’ E rimá nojló: ‘Jesús nuká, Nazaret eyaje pilaꞌakare chapú’, ke rimaká nojló.
9 Nujwaꞌaté iꞌimakaño amaño kaja kajrú kamareji ke pataká nunakojé, eꞌiyonaja unká nemaꞌalá ripuraꞌakó nujwaꞌaté.
10 E numá rijló: ‘Nuwakáraꞌajeri, ¿na piwata nulaꞌaká?’ Rimá nojló: ‘Páchoꞌo, piꞌijná pajimila Damasco ejo, rejo nemaje pijló piyuke nakaje pilaꞌajíkare nakú’, ke rimaká nojló.
11 Kaphí wani kamareji ke pataká nunakojé. Riká apichátari nujlú, raú nujwákeꞌena wáꞌaño nuká pakoꞌotákeja Damasco ejo.
12 “Damasco e pajluwa iꞌimari, Ananías rií iꞌimaká. Palá remaꞌajika Tupana purákaꞌalo, Moisés michú jaꞌapátakare inaꞌukejlo iꞌimaká, jaꞌapiyá; palá kaja judíona, Damasco eruna pechu iꞌimajika rinaku.
13 Damasco e Ananías iꞌijnari nuchaje, riphaka nunaku ee, rimá nojló: ‘Nujmeremi, Saulo, chuwa pamájika piño’, ke. Rejéchami nomaka riká palá.
14 “E rimá piño nojló: ‘Tupana, waꞌajútaya michuna pechu iꞌimajíkare chojé kaphí, iꞌiwapari rijluwa piká ajopana inaꞌukena eꞌiyayá, piweꞌepíkaloje nakaje riwátakare pilaꞌaká nakojé. Riꞌiwapá kaja rijluwa piká, pamákaloje ilé unká weꞌepila puꞌuwaré laꞌakaná, pemaꞌakáloje kaja ripuraꞌakó pijwaꞌaté penaje.
15 Ñakele chuwa piꞌimajika riyukuna piyuke inaꞌukejlo. Kaja pamá riká, ripuraꞌó kaja pijwaꞌaté. Riyukuna piꞌimajé najló’, ke rimaká nojló.
16 Rimá kaja nojló: ‘Pimaláraꞌataniño pikó maare júpija, páchoꞌo, nalaꞌachí bautizar piká. Pipechu iꞌimakale kaphí Jesucristo chojé, ramajo pichaje puꞌuwaré pilaꞌakare liyá’, ke Ananías kemaká nojló iꞌimaká.
17 “Damasco eyá nupaꞌó majó Jerusalén ejo. E nuꞌujná Tupana ñakaré chojé. Re nupuraꞌó Tupana waꞌaté richu, eꞌiyowá ke nomaka nakaje yaꞌatakó nojló nujlú chu.
18 Nomá wawakáraꞌajeri Jesucristo, riká kemari nojló: ‘Páchoꞌo kiñaja Jerusalén eyá, unká naꞌalaje nanakojó maárowa nuyukuna piꞌimajíkare najló’, ke.
19 Raú numá rijló: ‘Nuwakáraꞌajeri, kaja naweꞌepí mékeka nulaꞌajika maárowa. Nuꞌujnaké nawakákaꞌalo ñakarelana chojé, nuwáꞌakaloje neꞌiyayá paꞌapiyá jemaꞌajeño, nukaꞌakáloje neká inaꞌuké wajákelana chojé penaje. Nuñaꞌatake kaja neká.
20 Esteban michú iꞌimari pijwaꞌaté jápajeri iꞌimaká, riꞌimaké piyukuna inaꞌukejlo. Nomá kaja nenoka riꞌimaká; palani nojló ñaké rilaꞌakana iꞌimaká. Richá jipa kaꞌajeño aꞌarumaká waꞌaphé nuꞌumaká riwakajé’.
21 Eꞌiyonaja rimá nojló: ‘Paꞌapá. Nuwakáraꞌaje piká yaꞌajnaje, piꞌimakáloje nuyukuna ajopana inaꞌukénajlo, unká judíona kalé iꞌimakáñojlo’, ke rimaká nojló”, ke Pablo kemaká najló.
Suráana wakáraꞌajeri wakáraꞌaka nañaꞌataka Pablo yukuna marí
22 Rejenaja nayurí ripuraꞌakó, e kaja naꞌó piño awíyoꞌoje kajrú: “Inó riká ta. Unká na penaje kalé ilé kaje ta iꞌimá marí ejaꞌawá chu”, ke nawíyoꞌoka.
23 Íkiꞌija wani nayúchaꞌako. Nayuchá akuwaná nawíyoꞌo kajrú; nañaꞌataka kaja nekó naꞌarumaká nakiyana aú; nakaꞌá kaja muꞌupé yenoje.
24 E kaja suráana wakáraꞌajeri kemari suráanajlo:
—Iwaꞌa Pablo iñakaré chojé, richu iñaꞌataje riká, riꞌimakáloje nojló puꞌuwaré rilaꞌakare yukuna penaje. Nuwata riweꞌepíkana na chónaka nayúchaꞌako richá íkiꞌija wani —ke rimaká najló.
“Riñaꞌatákana aú kaꞌajná riꞌimajé wajló riyukuna”, ke ripechu iꞌimaká rinaku.
25 E kaja nepoꞌó riká, nañaꞌatákaloje riká penaje. Rejéchami Pablo kemaká nawakáraꞌajeri rawaꞌá táraꞌakojlo:
—Kaja nawíyoꞌo romano nakiyana ñaꞌatákana cha. Unká joꞌó weꞌemakana, raꞌapiyatéjena waꞌaté, jemaꞌalá nuyukuna, naweꞌepíkaloje na chónaka nawajájika nuká.
26 Ilé ke Pablo kemaká rijló aú, riꞌijná suráana wakáraꞌajeri chaje rijló kemaje:
—¿Naje chi piwakáriꞌicha wañaꞌataka riká ta? Unká wani paala ta walaꞌakajla riñaꞌatákana ta aú, romano nakiyana ta riꞌimakale.
27 Raú nawakáraꞌajeri iꞌijnari Pablo awaꞌajé, rimá rijló:
—¿Kewaka chi romano nakiyana piká?
—Aꞌa —ke rimaká.
28 E nawakáraꞌajeri kemari rijló:
—Romano nakiyana kaja nuká. Noꞌó kajrú liñeru, naꞌakáloje nuká romano leꞌejena suráana nakiyana wakáraꞌajeri penaje.
Pablo kemari rijló:
—Romano nakiyana noraꞌapá iꞌimaká, ñakele nomothoꞌó romano nakiyana kaja.
29 Raú unká suráana ñaꞌatala riꞌimaká, nayurí riká rejeja. Ñaké kaja nawakáraꞌajeri jaꞌapaka reyá, riweꞌepika aú romano nakiyana riꞌimaká. Keroꞌokajo nakú riꞌimá, riwakáraꞌakale repoꞌokana.
Pablo táraꞌako judíona wakáraꞌajeño jimaje yukuna marí
30 Suráana wakáraꞌajeri wátari riweꞌepíkana, na pachaka judíona nakiyana yúchaꞌako Pablo cha. Ñakele muní ke rawakata sacerdótena wakáraꞌajeño, piyuke pheñawilana waꞌaté, rejomi rikarákaꞌata Pablo nakiyá kureti nepoꞌokare aú riꞌimaká. E nawaꞌa riká najimaje.