Pablo iꞌijnaká Macedonia teꞌeré ejo, rejomi Grecia teꞌeré ejo, yukuna marí
20
Kaja ewaja nayurí awíyoꞌokaje wejápaja. Rejomi Pablo wáꞌari Jesucristo jaꞌapiyá jemaꞌajeño maná, raú neꞌejná richaje. Re rilaꞌá nenakú, napechu iꞌimakáloje kaphí Jesucristo jaꞌapiyá jemaꞌakana nakú. Riꞌimá kaja riyukuno najló, rejomi riꞌijná reyá ají ke Macedonia teꞌeré ejo.
2 Apoꞌojó, apoꞌojó ke, iꞌijnakana nakuja riꞌimaké. Jesucristo jaꞌapiyá jemaꞌajeño chaje riꞌijnakeno. Ripuraꞌakó najwaꞌaté, nalaꞌakáloje kaphí napéchuwa Jesucristo jaꞌapiyá jemaꞌakana nakú. Kaja ewaja riphá Grecia teꞌeré ejo,
3 re riyuró weji keta keri ketana najwaꞌaté. E kaja riwata Siria teꞌeré ejo iꞌijnakana wapuru chu, eꞌiyonaja ajopana kemaño rijló: “Re judíona nakiyana wátaño pilaꞌakana chapú”, ke, raú ripaꞌó riyámojo peꞌiyoówa Macedonia teꞌeré ejo.
4 Chaꞌapá Pablo wákeꞌena iꞌimaká Asia teꞌeré eyájena. Mariruna neꞌemaká: Sópatro, pajimila Berea eyaje riꞌimaká. Eyá Aristarco, Segundo waꞌaté, pajimila Tesalónica eyájena neꞌemaká. Eyá Gayo, pajimila Derbe eyaje riꞌimaká. Eyá ajopana rijwákeꞌena: Timoteo, Tíquico, Trófimo, Asia teꞌeré eyájena neꞌemaká. Kele rijwákeꞌena iꞌimaká.
5 Neká iꞌijnaño Pablo tukumá ají ke pajimila Tróade ejo. Re nawata weꞌemaká.
6 Eyá weká jaꞌapátaño fiesta najwaꞌaté iꞌimaká. Riká fiesta wakajé najñake pan mamúraꞌatakanaru. Fiesta tapúrenami wáchoꞌo pajimila Filipos eyá. Wapuru chu weꞌejná ají ke, iphaño Tróade ejo. Pajluwa théꞌela ke kala wakaꞌaká rejo iꞌijnakana nakú. Re wephákaꞌako wajwákeꞌena, iꞌijnakaño rejo watukumá iꞌimaká, waꞌaté. Re weꞌemá najwaꞌaté pajluwa jápakaje ketana.
Pablo iꞌimaká Tróade e yukuna marí
7 E kaja watánaꞌakaje iꞌimaká wakajé, Jesucristo jaꞌapiyá jemaꞌajeño awakaño pajluwa chojé. Re najñá naꞌajnewá pajwaꞌatéchaka, rejomi Pablo jewíñaꞌatari neká Tupana purákaꞌalo nakú. Lainchiyó rikeñoꞌó najló Tupana purákaꞌalo yukuna iꞌimakana; riꞌimá najló riyukuna aꞌajná lapí jenaji ke ejená.
8 Re neꞌemá nawakákaꞌalo ñakarelana chu, weji kele piso chu, kajrú nakamaré kúwaꞌatako re.
9 Re kaja pajluwa walijímaka iꞌimari najwaꞌaté, rií iꞌimari Eutico. Júpija Pablo iꞌimaká Tupana yukuna najló. Kaja ewaja tapú cháꞌatari Eutico, unká méñoꞌojo rijñaꞌalá riká panaku, tapú akuwaná rikojnoꞌó riyámajo ventana chiyá. Weji kele piso chiyá raꞌó teꞌerí eꞌiyajé, raú ajopana witúkaꞌaño ramaje, amaño kaja ritakaꞌaká.
10 E Pablo witúkaꞌari nápumichu ritami amaje najwaꞌaté. E ritáraꞌo riꞌirúpachi aú támijimi awaꞌajé, rejomi rimawíloꞌo ritami. E Pablo kemari Jesucristo jaꞌapiyá jemaꞌajéñojlo:
—Iwó kaꞌaniño, kaja ripechu iphicha piño.
11 Rejomi Pablo paꞌaró piño najwaꞌaté napumí chuwá weji kele piso chojé. E ritupaꞌá najló pan nakiyana, najñákaloje penaje. Najñaka riká ejomi, riꞌimá piño Tupana yukuna najló, aꞌajná najmeꞌetaka ejená.
12 Rejomi ajopana paꞌañó nañakaré chojé. Kajmuni napaꞌataka najwaꞌató walijímaka, yenuya jaꞌakó, kaja takaꞌaká penájemi. Puꞌují napechu iꞌimaká raú.
Pablo iꞌijnaká Mileto ejo yukuna marí
13 E kaja Pablo kemari wajló:
—Nuꞌujichaka chuwa peꞌiyoówa pajimila Aso ejo, reyako nuꞌujná ijwaꞌaté wapuru chu.
Raú wawitúkaꞌa wapuru chojé. Weꞌejná ají ke ritukumá Aso ejo, iphaño rejo.
14 Re wamá piño Pablo, e riwitúkaꞌa watuꞌuweje wapuru chojé. Reyá waꞌapá piño ají ke pajimila Mitilene ejo.
15 Reyá wáchoꞌo, e muní ke waꞌapaka piño Quío teꞌeré nakojé. Waꞌapá piño muní kaje chu, iphaño Samos teꞌeré ejé. Pajimila Trogilio e wawatánaꞌa, reyá waꞌapá piño muní ke, iphaño pajimila Mileto ejo.
16 Meketánaja weꞌemaká Pablo waꞌaté Asia teꞌeré nakú, ñakele unká weꞌejnalá Éfeso ejo iꞌimaká. Riwakajé yewíchaja fiesta Pentecostés iphaka rená chojé iꞌimaká, raú riwata fiesta jaꞌapátakana Jerusalén e. Raú rilaꞌá rikó tuꞌujné, riphákaloje ripiyá rejo.
Pablo puraꞌakó Éfeso eyájena waꞌaté yukuna marí
17 Pajimila Mileto e Pablo iꞌimaká wakajé, riwakáraꞌa ajopana iꞌijnaká Éfeso ejo pheñawilana wáꞌaje. Jesucristo jaꞌapiyá jemaꞌajeño wakáraꞌajeño neꞌemaká.
18 E kaja pheñawilana, riwáꞌakarena maná, iphaño rinaku, rimá najló: “Júpimi nuphá majó Asia teꞌeré ejo iꞌimaká, kaja iweꞌepí mékeka nuꞌumaká ijwaꞌaté maare.
19 Nuꞌumaká ijwaꞌaté ketana, unká nulaꞌalá nunakuwá ijló icháꞌatajeri ke. Nuyake inaꞌuké waꞌaté, nomájika aú nalaꞌaká puꞌuwaré kajrú wani. Judíona nakiyana laꞌakeño nuká chapú, napachá nomake chapú kajé yajwé.
20 Eꞌiyonaja unká nuyurila Tupana yukuna iꞌimakana ijló iꞌimaká raú. Palani riꞌimakale ijló, nuꞌumá ijló riyukuna. Nowíñaꞌatake iká Tupana purákaꞌalo nakú awakájiko ewá; ñakeja kaja nowíñaꞌatajika iꞌimajika iñakaré chuwá, apaꞌalá chojé, apaꞌalá chojé ke.
21 Nupuraꞌakó judíona waꞌaté Tupana nakú, keja kaja nupuraꞌajiko ajopana inaꞌukena waꞌaté rinaku. Numaké najló, napajnoꞌotákaloje napéchuwa Tupana ejo puꞌuwaré nalaꞌakare liyá; nupuraꞌó kaja najwaꞌaté, napechu iꞌimakáloje kaphí Jesucristo chojé, riꞌimakáloje neꞌematájeri penaje.
22 Chuwa nuꞌujnajika Jerusalén ejo, Tupana Pechu wakáraꞌakale nuká rejo. Unká nuweꞌepila mékeka nuꞌumajika re,
23 marija kalé nuweꞌepí: méñoꞌojoka nuꞌujnajika ejo, nalaꞌajé nuká chapú; nakaꞌajé nuká inaꞌuké wajákelana chojé, ilé ke Tupana Pechu kemakale nojló nunakuwá.
24 Eꞌiyonaja unká nowó kaꞌaló raú, unká kaja nuweꞌepila khaí nunakuwá. Íkiꞌija Tupana wátaka inaꞌuké, ñakele riꞌimatá inaꞌuké kapichákajo liyá Jesucristo palamane aú. Riyukuna iꞌimajeri penaje Jesucristo aꞌá nuꞌumaká, riká nujápakaꞌala nuwata ñapátakana”, ke Pablo kemaká najló.
25 E rimá piño: “Júpimi nuphá majó iꞌimaká, Tupana wátaka inaꞌuké wakáraꞌajeri iꞌimakana yukuna iꞌimajé ijló. Marí pumí chiyó unká amálaje piño nuká marí ejaꞌawá chu.
26 Ñakele nuwata ijló kemakana kaja penaje: Ijwaꞌatéjena kapichájiko ee Tupana liyá, unká nupachá kalé riꞌimajika,
27 nuꞌumakale ijló piyukeja nakaje Tupana wátakare iná laꞌaká, kaje yukuna. Piyukeja, mamujrúmino nuꞌumaká riyukuna ijló.
28 Ñakele aꞌá inakojó neká awakáñono ijwaꞌaté, Tupana Pechu aꞌakale iꞌimaká namájeño penaje. Wawakáraꞌajeri Jesucristo takaꞌarí nachaya aꞌawaná apiyákakanami nakojé iꞌimaká, neꞌemakáloje rileꞌejena inaꞌukena penaje. Marí pumí chiyó unká nuꞌumalaje piño ijwaꞌaté.
29 Nuweꞌepí noꞌopájika maare eyá ejomi, ajopana iphájeño eꞌiyajé. Yáwina, ejaꞌawá eꞌiyajena iphákachu pirájina ovéjana eꞌiyajé, neñaó piyuke paliyáaka. Ñaké kaja ajopana laꞌajika iká chapú, ipechu iꞌimaká piyá rejenowaja Jesucristo nakú.
30 Pajlákachina inakiyana iꞌimajika, unká newíñaꞌatalaje iká kewákaje purákaꞌaloji nakú.
31 Iꞌimaniño kamátaño ke. Kaja iweꞌepí nuꞌumaká ijwaꞌaté weji kele jarechí ketana, nowíñaꞌatake iká Tupana purákaꞌalo nakú. Weꞌechú kaꞌalá keja, lapejé waꞌató, nowíñaꞌatake iꞌimajika pajluwano ke Tupana purákaꞌalo nakú. Nuyako nowíñaꞌatajika iká, nuweꞌepíjikale imuꞌují.
32 “Chuwa nuyuríjika iká Tupánajlo. Riká aꞌajeri rinakojó iká, íkiꞌija wani riwátakale iká. Palá rilaꞌajika inaku, ipechu iꞌimakáloje richojé kaphí richaje, richaje ke, ipechu iꞌimakáloje rimaká rileꞌejena inaꞌukena nakú ke.
33 Maárowa nuꞌumaká ijwaꞌaté ketana, unká nukejáꞌala na liyá nujluwa: aꞌarumakaji, liñeru kaje.
34 Apoꞌojó nulaꞌaká iꞌimaká: nujápake, naꞌakáloje liñeru nojló riwemí, raú nuwarúwaꞌakaloje nakaje nulaꞌajíkare nakú kamuꞌují. Ñaké kaja nuwarúwaꞌajika nujwákeꞌenajlo nakaje, nalaꞌajíkare nakú kamuꞌují.
35 Ilé ke nulaꞌaká aú, nomata iꞌimaká jápakaje aú, ilaꞌakáloje ñaké kaja penaje. Palani inajlo jápakaje, raú iná aꞌakáloje kamuꞌují laꞌakaño ñathé. Iweꞌepí meke wawakáraꞌajeri Jesucristo kemaká rinaku: ‘Puꞌují iná pechu laꞌakó, ajopana aꞌaká aú inajlo nakaje. Eyá iná aꞌaká aú ajopánajlo nakaje, richaje iná pechu laꞌakó puꞌují raú’ ”, ke Pablo jaꞌapátaka najló riyukuna.
36 Riñapátaka puraꞌakajo ejomi, ritáraꞌo riꞌirúpachi aú, e ripuraꞌó Tupana waꞌaté. Ñaké kaja napuraꞌakó Tupana waꞌaté rijwaꞌaté.
37 Rejéchami kajrú neyaka Pablo; namawíloꞌo riká; nachiñoꞌó kaja rijimá chiyá.
38 Kamuꞌují wani napechu laꞌakó Pablo waꞌaté, rimakale najló: “Unká wamálaje piño pekowáaka marí ejaꞌawá chu”. Rejomi nawitúkaꞌa rijwaꞌaté juni turenaje punumaje chojé.