Pablo, Bernabé waꞌaté, iꞌijnaká Jerusalén ejo yukuna marí
15
Riwakajé, ajopana teꞌeré eyájena iphaño Antioquía ejo. Judea teꞌeré eyájena neꞌemaká. Neká jewíñaꞌatakeño Jesucristo jaꞌapiyá jemaꞌajeño apoꞌojó, nemaké najló:
—Unkájika ee imataꞌá iyani achiñana chinuma, Moisés michú wakáraꞌaka iꞌimaká ke, unká Tupana iꞌimatálaje iká kapichákajo liyá —ke.
2 Raú Pablo, Bernabé waꞌaté, kemaño najló:
—Unká kewaka kalé, kele imá nakú najló.
Ilé kaje jimaje nakhaꞌako kajrú wani pajwaꞌatéchaka; unká napechu palaꞌaló pajwaꞌatéchaka. Raú Jesucristo jaꞌapiyá jemaꞌajeño wakáraꞌaño Pablo, Bernabé, ajopana nanakiyana waꞌaté, iꞌijnaká Jerusalén ejo, re napuraꞌakóloje Jesucristo wakáraꞌakarena, eyá Jesucristo jaꞌapiyá jemaꞌajeño wakáraꞌajeño, kele waꞌaté rinaku.
3 Jesucristo jaꞌapiyá jemaꞌajeño, Antioquía e iꞌimakaño, wakáraꞌaño Pablo, Bernabé, ajopana nanakiyana waꞌaté, iꞌijnaká Jerusalén ejo. Raú náchoꞌo reyá, ají ke Fenicia ejo, eyá Samaria, kele teꞌeré eꞌiyowá naꞌapá. Nephájikarena nakujlo neꞌemaké mékeka unká judíona kalé iꞌimakaño jemaꞌaká Tupana jaꞌapiyá yukuna. Nemaké nanaku najló:
—Kaja nayurí naliyó pheñawilana michuna purákaꞌalomi kemaká ke laꞌakana, nalaꞌakáloje Jesucristo wátaka ke penaje.
Puꞌují ajopana Jesucristo jaꞌapiyá jemaꞌajeño pechu laꞌakó nayukuna jemaꞌakana aú.
4 E Pablo, Bernabé waꞌaté, iphaño Jerusalén ejo, raú Jesucristo jaꞌapiyá jemaꞌajeño, Jesucristo wakáraꞌakarena, eyá pheñawilana, kele iꞌijnaño najalákaje. Rejéchami, nawakako najwaꞌaté rejé, e Pablo, Bernabé waꞌaté, iꞌimaño najló mékeka Tupana aꞌaká nañathé ripurákaꞌalo jaꞌapátakana aú ajopánajlo, unká judíona kalé iꞌimakáñojlo. Neꞌemá kaja najló mékeka nakhaꞌákako Antioquía e, nakerákoꞌopana achiñana chinuma mataꞌakana jimaje yukuna.
5 Fariséona nakiyana awakaño kaja najwaꞌaté rejé. Judíona nakiyana neꞌemaká; chuwa Jesucristo jaꞌapiyá jemaꞌajeño kaja neꞌemaká, eꞌiyonaja kalé unká nayurike naliyó purákaꞌaloji, júpimi neꞌemakare jaꞌapiyá. Neká jemaꞌañó mékeka napuraꞌakó, raú natáraꞌo peꞌiyojé neꞌiyajé, nemá najló:
—Palani re kaja joꞌó namataꞌaká kerákoꞌopana achiñana chinuma, Moisés michú wakáraꞌaka iꞌimaká ke —ke nemaká ajopana Jesucristo jaꞌapiyá jemaꞌajeño, unká judíona kalé iꞌimakaño, nakú.
6 Ilé kaje aú Jesucristo wakáraꞌakarena awakaño piño pheñawaꞌaní waꞌaté rinaku puraꞌajó.
7 Júpija napuraꞌakó pajwaꞌatéchaka rinaku, nalamáꞌatakaloje riká penaje. E Pedro táraꞌaro neꞌiyajé, rimá najló:
—Nojena, iweꞌepí júpimi Tupana iꞌiwapaká nuꞌumaká eꞌiyayá, nuꞌumakáloje riyukuna ajopana, unká judíona kalé iꞌimakáñojlo. Tupana iꞌimataka iná kapichákajo liyá yukuna nuꞌumaké najló, nemaꞌakáloje Jesucristo jaꞌapiyá penaje.
8 Palá Tupana weꞌepika mékeka iná pechu. Raꞌapiyá jemaꞌajéñojlo raꞌá Ripechu, raꞌaká wajló Ripechu iꞌimaká ke kaja, raú waweꞌepí palá kaja ripechu nanaku.
9 Tupana pechu wanaku, ke kaja ripechu nanaku, ñaké waja piyuke inaꞌuké rijló. Riꞌimatá piyuke kaphí Jesucristo chojé péchuruna kapichákajo liyá —ke Pedro kemaká najló.
10 Rimá piño najló:
—Palá wani Tupana laꞌaká nanaku; unká paala kaꞌajná ijló ilé kele nanaku laꞌakana. ¿Eta, naje iwata nalaꞌaká kajrú nakaje, unká na penaje kalé iꞌimakare? Unká méñoꞌojo wachiꞌiná michuna laꞌalá piyuke nakaje purákaꞌaloji, júpimi nemaꞌakare jaꞌapiyá ke, puwichani rilaꞌakana iꞌimakale najló. Ñaké kaja wajló riká meꞌetení: unká méñoꞌojo wemaꞌalá palá raꞌapiyá.
11 Ñakele unká na penaje riꞌimalá wajló meꞌetení, neꞌemakáloje raꞌapiyá penaje. Unká na kalé walaꞌá ripalamane, Tupana iꞌimatákaloje weká kapichákajo liyá. Jesucristo palamane aú ja kalé Tupana iꞌimatá kaphí Jesucristo chojé péchuruna kapichákajo liyá. Ñaké kaja riꞌimataka kapichákajo liyá unká judíona kalé iꞌimakaño nakiyana —ke Pedro kemaká najló.
12 Ilé ke rimaká najló ejéchami, piyuke inaꞌuké re iꞌimakaño manúmaꞌako. E Bernabé, Pablo waꞌaté, puraꞌañó piño najwaꞌaté, neká iꞌimakeño unká judíona kalé iꞌimakaño nakiyana waꞌaté. Kajrú nalaꞌajika nakaje Tupana Pechu aꞌajíkale nañathé. Ilé kaje nalaꞌaké Ripechu aú, inaꞌuké weꞌepíkaloje raú meke laꞌajérika Tupana.
13 Riyukuna neꞌemaké najló, rejomi Santiago kemari piño najló:
—Nojena, jemaꞌá numájikare nakú:
14 Kaja jemiꞌichá Pedro kemaká wajló mékeka Tupana keñoꞌoká ajopana teꞌeré ewájena nakú laꞌakana palá yukuna. Riꞌiwapá kaja rijluwa nanakiyana, neꞌemakáloje rileꞌejena inaꞌukena penaje.
15 Tupana purákaꞌalo jaꞌapátajeño michuna lanaꞌaká riyukuna júpimi iꞌimaká, keja riꞌimaká. Neká lanaꞌañó marí ke iꞌimaká:
16 “Nupaꞌataje nakaje rapumí chuwá, riꞌimakáloje júpimi, riꞌimaká David michú iꞌimaká neꞌemakana wakajé ke penaje.
17 Nakaje nulaꞌajíkare aú piyuke ajopana teꞌeré ewájena jemaꞌajika riyukuna.
Wátajeño nuká nawakáraꞌajeri penaje, iꞌimajeño nujwaꞌatéjena.
18 Júpimi eyá, Tupana aꞌarí puꞌuwaká Ripurákaꞌalo yukuna inaꞌukejlo”, ke Ripurákaꞌalo kemaká.
19 Eyá Santiago kemari piño najló:
—Ñakele numá meꞌetení, unká wekáꞌana kalé iꞌimakaño nakú: Wawakáraꞌaniña nalaꞌaká nakaje lakaꞌapheji laꞌakana iꞌimakare najló. Kaja nayurí naliyó nachiꞌiná michuna purákaꞌalo jaꞌapiyá jemaꞌakana, nalaꞌakáloje Tupana wátaka ke.
20 Palani wawakáraꞌaka najló purákaꞌaloji, nalaꞌaká piyá marí ke: Najñaka piyá aꞌajnejí, natoꞌotákare penájemi nakaje jenami, napechu iꞌimakare: “Wachiꞌinárikanajlo marí”, ke nakojé. Wemaje kaja najló, nalaꞌaká piyá namanáicho apú waꞌaté, apaꞌawelo waꞌaté ke; najñaka piyá kaja riꞌimi, re joꞌó kaja jirá iꞌimakare eꞌiyá; ñaké kaja neꞌeraká piyá jirá.
21 Ilé ke wawakáraꞌajika nalaꞌaká. Kaja naweꞌepí ilé kaje laꞌakana nakojé, newíñaꞌatakale neꞌemaká rinaku. Pajimila iꞌimaká ewá re waja judíona leꞌejé nawakákaꞌalo ñakarelana. Watánaꞌakaje wakajé keja nawakákono richojé, napuraꞌakóloje Tupana purákaꞌalo Moisés michú lanaꞌakare iꞌimaká waꞌaté —ke Santiago kemaká najló.
22 Palani ilé ke laꞌakana iꞌimaká najló piyukeja. Jesucristo wakáraꞌakarena, rewá iꞌimakaño wakáraꞌajeño waꞌaté, iꞌimaño kaja re najwaꞌaté. Re kaja ajopana Jesucristo jaꞌapiyá jemaꞌajeño najwaꞌaté, piyukeja najló palani nakaje Santiago kemakare nakú iꞌimaká. Raú neꞌewapá iyamá achiñana neꞌiyayá, neꞌejnakáloje Pablo, Bernabé waꞌaté, Antioquía ejo. Jesucristo jaꞌapiyá jemaꞌajeño wakáraꞌajeño nakiyana neꞌemaká. Pajluwaja ií iꞌimari Judas Barsabás; apú ií iꞌimari Silas.
23 Najwaꞌaté nawakáraꞌa papera kaje, richu nemá:
“Wejena, unká judíona kalé iꞌimakaño: eko palá ijló kaꞌajnó. Antioquía ewájena, Siria teꞌeré ewájena, Cilicia teꞌeré ewájena, kele nakú wemá kaja: eko palá najló kaꞌajnó, ke.
24 Nemá wajló inaku: ‘Maare eyájena iꞌijnaño inaku kawílaꞌaje kaꞌajnó. Unká wapurákaꞌalo aú kalé neꞌejná ilé ñoꞌojó, kele kechíraꞌaño ipechu ijló’.
25 Ñaké iꞌimakale, wawakáraꞌa wanakiyana iꞌijnaká ilé ñoꞌojó ichaje Pablo, Bernabé waꞌaté. Íkiꞌija wawátakarena neká.
26 Neká iꞌijnaño apú ewá, apú ewá ke, Jesucristo yukuna iꞌimakana nakú najló. Jesucristo jaꞌapiyá jemaꞌajeño neꞌemakale, neꞌiyajena wátaño nenókana.
27 Najwaꞌaté wawakáraꞌa Judas, Silas waꞌaté, ichaje kaꞌajnó, neꞌemakáloje palá ijló riyukuna.
28 Unká wawakáraꞌalaje ilaꞌaká nakaje unká na penaje kalé iꞌimakare. Palani marí kaje Tupana Péchujlo, ñaké kaja wajló, ñakele rikaja kalé wawata ilaꞌaká:
29 Ajñániña riꞌimi natoꞌotákare penájemi nakaje jenami nemakare nakú: ‘Wachiꞌinárikana jenami riká’, ke nakojé. Iꞌiraniña kaja jirá; ajñániña kaja riꞌimi, re joꞌó kaja jirá iꞌimajíkare eꞌiyá. Ilaꞌaniña kaja imanáicho apú waꞌaté, apaꞌawelo waꞌaté ke. Ilé kajeja wawakáraꞌa ilaꞌaká. Jemaꞌajika ee raꞌapiyá, ilaꞌajé palá. Eko iꞌimá palá ilérowa. Marí ketánaja”, ke napurákaꞌalo lanaꞌakéjami kemaká.
30 E nawakáraꞌa Judas, Silas waꞌaté, iꞌijnaká Pablo, Bernabé waꞌaté. Puꞌukuja neꞌejnaká Antioquía ejo, iphaño rejo. E nawakata piyuke Jesucristo jaꞌapiyá jemaꞌajeño rewá iꞌimakaño, rejomi naꞌá najló napurákaꞌalo lanaꞌakéjami, nawakáraꞌakare najló iꞌimaká.
31 E napuraꞌó riká waꞌaté. Puꞌují napechu laꞌakó napurákaꞌalo jemaꞌakana aú.
32 Re Judas, Silas waꞌaté, yuriño najwaꞌaté. Tupana purákaꞌalo jaꞌapátajeño kaja neꞌemaká. Kajrú napuraꞌakó Jesucristo jaꞌapiyá jemaꞌajeño waꞌaté, napechu iꞌimakáloje ñakeja Jesucristo jaꞌapiyá jemaꞌakana nakú, naweꞌepíkaloje kaja richaje, richájeno ke, Tupana jaꞌapiyá jemaꞌakana nakojé.
33 Meke kala iꞌimajemi, nawakáraꞌa Silas, Judas waꞌaté, paꞌakó. Nemá najló:
—Kaja iꞌimá meketánaja wajwaꞌaté maare, chuwa ipaꞌó piño iwakáraꞌajeño ejo. Eko Tupana laꞌá ipechu palá.
34 Eꞌiyonaja Silas pechu iꞌimá: “Unká nupaꞌalajo; maáreja nuyurejo najwaꞌaté”, ke.
Raú riyuró rewaja najwaꞌaté.
35 Pablo, Bernabé waꞌaté, yuriño Antioquía e. Neká, eyá ajopana Jesucristo jaꞌapiyá jemaꞌajeño waꞌaté, jewíñaꞌataño inaꞌuké, rewá iꞌimakaño, Tupana purákaꞌalo nakú.
Pablo iꞌijnaká piño Tupana yukuna iꞌimajé ajopánajlo, ajopánajlo ke, yukuna marí
36 Júpija neꞌemaká rewá najwaꞌaté, e Pablo kemari Bernabejlo:
—Iꞌijná weꞌejnachi piño Jesucristo jaꞌapiyá jemaꞌajeño, júpimi weꞌemakárenajlo Jesucristo yukuna iꞌimaká ejo, wamíchachijla mékeka neká rewá —ke rimaká rijló.
37 Bernabé wátarijla Juan Marcos wáꞌakana najwaꞌató najwákeꞌewe penaje,
38 eꞌiyonaja unká paala Pablo pechu nakú riꞌimaká, raú rimá Bernabejlo:
—Unká paala riwáꞌakana piño wajwaꞌató. Apú wakajé raꞌapáñaa weꞌemaká, Panfilia teꞌeré e weꞌemaká wakajé. Riwakajé riyurí wañathé aꞌakana Tupana purákaꞌalo yukuna iꞌimakana aú —ke Pablo kemaká rijló.
39 Eꞌiyonaja Bernabé wátari wani riꞌijnaká najwaꞌaté. Rijimaje nakhaꞌako pajwaꞌatéchaka, raú naꞌapáñaa pekowáaka. Bernabé wáꞌari rijwaꞌató Juan Marcos, e kaja nawitúkaꞌa wapuru chojé, neꞌejnakáloje Chipre teꞌeré ejo.
40 Eyá Pablo iꞌijnari kaja reyá. Paineko riwaꞌa Silas neꞌiyayá, rijwákeꞌewewa penaje. Neꞌejnaká yámona, Jesucristo jaꞌapiyá jemaꞌajeño puraꞌañó Tupana waꞌaté nanaku, nemá rijló, raꞌakáloje rinakojó neká. Rejéchami neꞌejnaká reyá,
41 iꞌijnaño ají ke Siria teꞌeré eꞌiyowá, Cilicia teꞌeré eꞌiyowá waꞌaté. Rewá napuraꞌakó Jesucristo jaꞌapiyá jemaꞌajeño waꞌaté, richaje napechu iꞌimakáloje kaphí Jesucristo chojé.