Iconio e neꞌemaká yukuna marí
14
E kaja nephá Iconio ejo. Nephaka rejo ee, Pablo, Bernabé waꞌaté, mujlúkaꞌaño judíona awakákaꞌalo ñakarelana chojé. Palá neꞌemaká Tupana yukuna najló richu, raú kajrú judíona nakiyana jemaꞌaká Jesucristo jaꞌapiyá. Ñaké kaja ajopana, unká judíona kalé iꞌimakaño, jemaꞌaká raꞌapiyá.
2 Eꞌiyonaja ajopana judíona nakiyana, unká Jesucristo jaꞌapiyá jemaꞌajeño kalé iꞌimakaño, kaꞌátaño ajopana, unká judíona kalé iꞌimakaño eꞌiyajé, nayúchaꞌakoloje najwaꞌaté Jesucristo jaꞌapiyá jemaꞌajeño cha.
3 Eꞌiyonaja Pablo, Bernabé waꞌaté, yuriño re júpija najwaꞌaté. Kaphí napechu iꞌimajika Jesucristo chojé riyukuna iꞌimakana nakú najló. Neꞌemaké najló meke íkiꞌika Tupana wátaka neká yukuna. Tupana Pechu aꞌakeri kaja nañathé, nalaꞌakáloje nakaje Tupánaja kalé weꞌepíkare laꞌakana, naweꞌepíkaloje raú kewaka riká nemakare nakú.
4 Ilé kajé jimaje pajimila ewá iꞌimakaño pechu pajnoꞌoró paliyáaka: neꞌiyajena pechu iꞌimakeri palá judíona nakiyana nakú, eyá ajopana pechu iꞌimakeri palá Pablo, Bernabé, kele nakú.
5 E kaja judíona nakiyana, eyá ajopana unká judíona kalé iꞌimakaño, nawakáraꞌajeño waꞌaté, puraꞌañó pajwaꞌatéchaka Pablo, Bernabé, kele nakú, nalaꞌakáloje neká chapú penaje. Nawata jipa kaꞌakana nachá,
6 eꞌiyonaja Pablo, Bernabé waꞌaté, jemaꞌañó riyukuna, raú neñaó reyá ají ke Licaonia teꞌeré ejo. Reyá naꞌapá piño ají ke pajimila Listra ejé, rejomi pajimila Derbe ejo. Ilé keja nachiraꞌajiko ajopana teꞌeré nakuwá.
7 Naꞌapájika ewá, neꞌemakeno najló Tupana iꞌimataka inaꞌuké kapichákajo liyá yukuna.
Listra e nakaꞌaká jipa Pablo cha yukuna marí
8 Listra e pajluwa inaꞌuké iꞌimari, unká méñoꞌojo raꞌapala, ñakeja rimothoꞌokó iꞌimaká. Pajluwa chuja riyáꞌako, apichákaꞌalo riꞌimakale.
9 Riká penájemi jemaꞌarí najwaꞌaté Pablo purákaꞌalo. E Pablo yakáꞌaro richaje, amari ripechu iꞌimaká kaphí Tupana chojé, ritejmoꞌótakaloje riká penaje.
10 Raú rimá rijló kaphí:
—Páchoꞌo, pitáraꞌo chuwa puꞌukú.
Raú ráchoꞌo táraꞌajo, rejéchami raꞌapaka.
11 Rewájena amaño mékeka Pablo tejmoꞌótaka riká, raú Licaonia eyájena puraꞌakó chu nawíyoꞌo marí ke:
—¡Wachiꞌinárikana jewíꞌichaño inaꞌuké penaje, iphíchaño wanaku majó!
12 Zeus, Hermes waꞌaté, iꞌimaño nachiꞌinárikana ke najló, ñakele napechu iꞌimá mapeja Bernabé nakú: “Zeus riká”, ke, eyá rijwákeꞌewe Pablo nakú napechu iꞌimá: “Hermes riká”, ke, riꞌimakale najló yuku.
13 Pajluwaja, nemakare nakú: “Wachiꞌinárikana”, ke, ií iꞌimari Zeus. Inaꞌuké iphákaloje raꞌapí penaje nalaꞌá riñakarelana pajimila numaná awaꞌá. Re kaja naleꞌejé sacerdote iꞌimaké, riká pechu iꞌimari kaja: “Wachiꞌinárikana japi iphíchaño majó”, ke. Raú riwaꞌa rejo jémana pirakana, achiñana waja; rijñaꞌá kaja rejo aꞌawaná iwí, repoꞌokáloje riká jémana núrupi nakojé. Rejomi nawata jémana nókana, naꞌakáloje napechu Pablo, Bernabé, kélejlo penaje. Ilé ke nawátaka nalaꞌakana, napechu iꞌimakale nanaku: “Wachiꞌinárikana japi neká”, ke.
14 Eꞌiyonaja Bernabé, Pablo waꞌaté, weꞌepiño mékeka napechu iꞌimaká nakaje laꞌakana nakú. Raú najiyoꞌotá naꞌarumaká, nanaku iꞌimakare, raú ajopana weꞌepíkaloje unká wani paala ilé ke laꞌakana iꞌimaká. Raú neꞌejná inaꞌuké eꞌiyajé, nawíyoꞌoko nemaká najló:
15 —¿Naje chi ipechu ilé ke laꞌakana nakú? Inaꞌuké weká, iká ke kaja. Weꞌejná majó ijló kemaje: Tupana iꞌimataka kaphí richojé péchuruna kapichákajo liyá. Re pajluwaja Chiꞌinárikanaji, Tupana. Jemaꞌakáloje raꞌapiyá penaje weꞌemá ijló riyukuna. Kajmuni Tupana; Chiꞌinárikanaji wani riká; unká mapeja yuku ke kalé riyukuna. Tupana laꞌarí jeꞌechú iꞌimaká, richuwá iꞌimakare waꞌaté; rikeñoꞌota kaja ejaꞌawá, piyukeja nakaje reꞌiyowá iꞌimakare waꞌaté; rikaja kaja keñoꞌótari juni jalomi, rakuwá iꞌimakaño waꞌaté.
16 Júpimi inaꞌuké laꞌaké napechu keja nakaje. Riwakajé, kajrú Tupana ñaꞌajika panaku neká.
17 Palá Tupana laꞌajika inaꞌuké nakú eꞌiyowá, raú riyaꞌatá wajló mékajeka riꞌimaká. Riwakáraꞌa juni jaꞌakó; ritawáꞌata kaja wajló piyuke nakaje wejátakare weꞌekakapere eꞌiyowá, aꞌajnejí iꞌimakáloje wajló penaje, palá wapechu iꞌimakáloje raú —ke nemaká najló.
18 Ilé ke nemaká najló iꞌimaká eꞌiyonaja, unká nemaꞌalá naꞌapiyá. Nawata wani najló jémana pirakana nókana, puꞌují napechu iꞌimakale nanaku, napechu iꞌimakale nanaku: “Wachiꞌinárikana neká”, ke.
19 Reꞌiyowá ke judíona nakiyana iphaka rejo, pajimila Antioquía eyájena neꞌiyajena iꞌimaká, eyá Iconio eyájena iꞌimaño kaja. Chapú napechu iꞌimaká piyukeja Pablo nakú, raú nakaꞌata ajopana eꞌiyajé, nayúchaꞌakoloje richá najwaꞌaté. Nemaꞌá napurákaꞌalo naꞌapiyá, raú kajrú inaꞌukena kaꞌaká jipa Pablo cha, nenókaloje riká raú. Napechu nakú iꞌimari rinaku: “Kaja wenocha riká”, ke, raú nachíraꞌa ritami teꞌerí eꞌiyowá, ají ke pajimila yámojo.
20 Rejé nayurí ritami, e Jesucristo jaꞌapiyá jemaꞌajeño awakaño ritami nakojé. Kaja ewaja riwajá piño ripéchuwa, e ripaꞌó piño rapumí chuwá pajimila eꞌiyajé. E muní ke, ráchoꞌoko reyá Bernabé waꞌaté, ají ke pajimila Derbe ejo.
21 Derbe e neꞌemá najló mékeka Tupana iꞌimataka iná kapichákajo liyá yukuna, raú kajrú inaꞌukena jemaꞌaká Jesucristo jaꞌapiyá napalamane. Reyá napaꞌó piño napumí chuwá Listra ejo, rejomi neꞌejná piño Iconio ejo, reyá napaꞌó Antioquía ejo.
22 Re napuraꞌó Jesucristo jaꞌapiyá jemaꞌajeño waꞌaté, napechu iꞌimakáloje kaphí raꞌapiyá jemaꞌakana nakú. Napuraꞌó najwaꞌaté, nayurika piyá raꞌapiyá jemaꞌakana. Nemá najló:
—Neꞌiyajena laꞌañó iná chapú, iná jemaꞌakachu Jesucristo jaꞌapiyá. Ilé keja iná ñaꞌajika chapú kaje panaku, iná iꞌimakáloje Tupana iꞌimaká e. Rewájena wakáraꞌajeri riká —ke nemaká najló.
23 Naꞌapájika ewá, neꞌewapaké achiñana nakiyana neꞌiyayá, neká iꞌimakáloje Jesucristo waꞌatéjena wakáraꞌajeño penaje. Paineko neꞌetakó naꞌajné liyá, rejomi napuraꞌakó Tupana waꞌaté, rejomi naꞌaké neká Jesucristo waꞌatéjena wakáraꞌajeño penaje.
Pablo, Bernabé waꞌaté, paꞌakó Antioquía ejo yukuna marí
24 E kaja naꞌapá piño ají ke Pisidia teꞌeré eꞌiyowá, iphaño Panfilia teꞌeré ejo.
25 Pajimila Perge e naꞌapata Tupana purákaꞌalo yukuna najló, rejomi naꞌapá piño reyá pajimila Atalía ejo.
26 Re nawitúkaꞌa wapuru chojé, neꞌejnakáloje ají ke Antioquía ejo. Reyá náchoꞌo júpimi ke, paineko chiyó iꞌimaká, neꞌemakáloje Tupana purákaꞌalo yukuna ajopánajlo, ajopánajlo ke. Náchoꞌoko reyá wakajé, Jesucristo jaꞌapiyá jemaꞌajeño puraꞌañó nanaku Tupana waꞌaté, raꞌakáloje neká rinakojó, íkiꞌija riwátakarena neꞌemakale. Napuraꞌó kaja Tupana waꞌaté re iꞌimaká, neꞌemakáloje ripalamane, raꞌakáloje nañathé najápakaꞌala laꞌakana aú. Ilé ke nalaꞌaká neꞌemaká, náchoꞌoko reyá iꞌimaká yámona. Neká penájemi paꞌañó piño napumí chuwá, nañapátakaja najápakaꞌala laꞌakana rewá ejomi.
27 Kaja ewaja nephá pajimila Antioquía ejo, e nawakata Jesucristo jaꞌapiyá jemaꞌajeño, neꞌemakáloje najló mékeka Tupana aꞌaká nañathé Jesucristo yukuna iꞌimakana aú yukuna. Nemá kaja najló mékeka Tupana laꞌaká palá ajopana teꞌeré ewájena, unká judíona kalé iꞌimakaño pechu palá, napechu iꞌimakáloje kaphí Jesucristo chojé raú. Ilé kaje yukuna neꞌemá najló.
28 Re Pablo, Bernabé waꞌaté, yuriño júpija Jesucristo jaꞌapiyá jemaꞌajeño waꞌaté.