Nenoka Santiago michú ejomi, nakaꞌá Pedro kalajeruni chojé yukuna marí
12
Riwakajé neꞌemakana iꞌimari Herodes. Riká wakáraꞌari rijwaꞌatéjena suráana laꞌaká chapú Jesucristo jaꞌapiyá jemaꞌajeño nakiyana.
2 Riwakáraꞌa kaja Santiago michú nókana najoꞌojowa aú. Juan eꞌewé riꞌimaká michú.
3 Palani ilé rilaꞌakana iꞌimaká judíona nakiyánajlo, raú Herodes wakáraꞌa ñaké rilaꞌakana. Riwakáraꞌa kaja nakaꞌaká Pedro kalajeruni chojé, riwata kaja rilaꞌakana chapú. Riwakajé judíona laꞌañó fiesta iꞌimaká, najñake pan mamúraꞌatakanaru.
4 Napataká Pedro ejomi, nakaꞌá riꞌimaká kalajeruni chojé. Riwakáraꞌa kaja suráana nakiyana iꞌimaká riwaꞌaphé, riñaakó piyá reyá. Dieciséis suráana iꞌimaño riwaꞌaphé, paꞌu keleno ke neꞌemaká riwaꞌaphé pajewémichaka ke. Herodes pechu nakú iꞌimari Pedro wáꞌakana kajrú inaꞌukena eꞌiyajé fiesta tapúrenami, re nalaꞌakáloje riká chapú penaje.
5 Re Pedro iꞌimari kalajeruni chu, palá wani riwaꞌaphé iꞌimakaño amaka riká riñaakó piyá. Naꞌapona ke Jesucristo jaꞌapiyá jemaꞌajeño puraꞌakó Tupana waꞌaté rinaku yaꞌajná apaꞌalá pají chiyá iꞌimajemi. Mawó nalaꞌaká nekó, napuraꞌakóloje Tupana waꞌaté richaya.
Tupana waꞌatéjeri, jeꞌechú chiyaje, jáchoꞌotaka Pedro kalajeruni chiyá yukuna marí
6 Herodes pechu nakú iꞌimari riwáꞌakana kajrú inaꞌukena eꞌiyajé muní ke. E lapí Pedro kamátaro iyamá suráana jiwami chu. Jepoꞌokeja riꞌimá iꞌimaká kureti aú, eyá ajopana suráana lapaꞌañó rinumaná awaꞌá, inaꞌuké nawajákarena waꞌaphena neꞌemaká.
7 E manaꞌí chiyó Tupana waꞌatéjeri, jeꞌechú chiyaje, yaꞌataró rijló. Kajrú kamareji pataká inaꞌuké wajákelana chojé, e Tupana waꞌatéjeri jápari Pedro nakú paparaꞌalaya, apótari riká, rimá rijló:
—Chuwá páchoꞌo kiñaja.
—Paꞌá pinakuwá paꞌarumaká, piꞌimaꞌulá waꞌaté.
Ñaké rilaꞌaká. E rimá piño rijló:
—Paꞌá kaja paꞌarumaká richájeri pinakuwá, piꞌijnakáloje nujwaꞌaté.
9 E Pedro iꞌijnari rápumichu, ripechu iꞌimá: “Nutapúnaꞌakaja kaꞌajná kaji, unká kaꞌajná kewaka kalé kaji nomákare meꞌetení”, ke ripechu iꞌimaká.
10 E naꞌapáñaa suráana paineko lapaꞌakaño riwaꞌaphé; ñaké kaja naꞌapáñaaka ajopana. Kaja penaje nephá rinumaná wani ejé, pejruꞌuwá nakiyá laꞌakanami riꞌimaká. Iñeꞌepú iꞌimaká ejo pitá najmeꞌetá riká. Nephaka rejo waꞌató ke, rijmeꞌetako rikoja najló, náchoꞌokoloje richiyá penaje. Reyá naꞌapá pajñakani ají ke iñeꞌepú chuwá, iphaño apú iñeꞌepú chojé. Rejéchami Tupana waꞌatéjeri, jeꞌechú chiyaje, jaꞌapáñaaka riká, rejéchami Pedro yuriko rikoja.
11 Rejéchami ripechu iꞌimaká: “Chuwa nuweꞌepí kewaka kari nomíchaje: Tupana wakáriꞌichari pajluwaja rijwaꞌatéjeri, jeꞌechú chiyaje, iꞌijnaká nuꞌumataje Herodes liyá, chapú judíona nakiyana wátaka nulaꞌakana liyá waꞌaté”, ke ripechu iꞌimaká.
12 Riweꞌepika aú kewaka riꞌimaká, riꞌijná ají ke María, Juan Marcos, kele jaló ñakaré ejo. Ruñakaré chojé nawakó kajrú, napuraꞌakóloje Tupana waꞌaté Pedro nakú penaje.
13 E Pedro iphari kurara numanaje, amari chawínaꞌakeja riꞌimaká, raú riwaꞌa najló reyá iꞌimajemi. Raú pajluwájaru inaya, Rode ruí iꞌimaká, iꞌijnayo rejo, romákaloje naka wáꞌaka.
14 Romaꞌaká aú Pedro núrupi mejé riꞌimaká, puꞌují wani rupechu laꞌakó, eꞌiyonaja unká rujmeꞌetala rijló rinumaná. Rupaꞌó jechoꞌokelo ropumí chuwá phachojo piño ajopánajlo riyukuna iꞌimajé, rumá najló:
—Pedro iphíchari majó, kurara numaná e ritáraꞌo meꞌetení.
15 Eꞌiyonaja nemá rojló:
—¡Pewíꞌichako chi!
—Unká nowíñaꞌako kalé, kewaka numaká.
Raú nemá rojló:
—Unká riká kalé kele pamicha, apala jeꞌechú chiyaje, riwaꞌaphé iꞌimakare kaꞌajná pamicha táraꞌako.
16 Eꞌiyowá ke Pedro wáꞌaka piño najló. E kaja waja neꞌejná rapu meꞌetaje, amaño riká riꞌimaká, raú nakeroꞌó.
17 E Pedro jáchoꞌotari raꞌanapitá, namanúmaꞌakoloje penaje, rejomi riꞌimá najló meke Tupana jáchoꞌotaka riꞌimaká inaꞌuké wajákelana chiyá yukuna. Rimá kaja najló:
—Eko iꞌimá riyukuna Santiágojlo, ñaké kaja ajopana wanakiyánajlo.
E raꞌapá piño apoꞌojó reyá.
18 Muní ke najmeꞌetaka ee, suráana amaño meñaru Pedro apumí iꞌimaká inaꞌuké wajákelana chu. Unká naweꞌepila méreka riꞌimaká, kajrú nakechíraꞌako pajwaꞌatéchaka rijimaje.
19 E Herodes wakáraꞌari nakulaka Pedro, raú nakulá riká, eꞌiyonaja unká nephátala riká. Rejéchami Herodes kejáꞌaka piño riwaꞌaphé iꞌimakaño liyá riyukuna, eꞌiyonaja unká naweꞌepila meke rijló kemakana. Rijimaje riwakáraꞌa nenótakana. Rejomi Herodes jáchoꞌoro Judea teꞌeré eyá, iꞌijnari ají ke pajimila Cesarea ejo, rejé riyuró.
Herodes takaꞌaká yukuna marí
20 Re neꞌemakana Herodes iꞌimaká wakajé, pajimila Tiro, eyá pajimila Sidón, eyájena iphaño rinaku, napuraꞌakóloje rijwaꞌaté penaje. Júpimi ke Herodes waꞌatéjena wakáraꞌajika najló aꞌajnejí, e kaja waja nayurí riwakáraꞌakana najló, Herodes yúchaꞌakole nachá iꞌimaká. Ñakele napuraꞌó Blasto waꞌaté paineko, neꞌemakana Herodes ñakaré chiyá jápajeri riꞌimaká. Rijwaꞌaté napuraꞌó, ripuraꞌakóloje Herodes waꞌaté nachaya. Nawata ripechu palaꞌakó piño najwaꞌaté palá, riwakáraꞌakaloje piño najló aꞌajnejí riñakarelana eyá.
21 E Herodes aꞌarí najló na wakajeka ripuraꞌajiko najwaꞌaté jená. Kaja ewaja riphá rená chojé najló. Riwakajé raꞌá palá nojé raꞌarumaká rinakuwá, neꞌemakánaja kalé aꞌakare nanakuwá kaje. Rejomi riꞌijná yáꞌajo nawakáraꞌajeri yáꞌakaro chu chojé, reyá iꞌimajemi rikeñoꞌó najló yuku iꞌimakana.
22 Ewá kajrú inaꞌukena keñoꞌoká rawíyoꞌotakana, nemá rinaku: “Unká weká ke kalé riká, apala wachiꞌinárikana nakiyana kaꞌajná riká”, ke nawíyoꞌotaka riká.
23 Rejéchami pajluwaja Tupana waꞌatéjeri, jeꞌechú chiyaje, wakáraꞌaka rijló tami kaje, rinaku rilaꞌakóloje ritami penaje, riyuríkale napuraꞌakó rinaku palá Tupana apumí chojé. Rejéchami jamoꞌonana keñoꞌoká rinapona ajñátakana, riká nakú ritakaꞌá.
24 Riwakajé kajrú inaꞌukena jemaꞌaká Tupana purákaꞌalo yukuna. Apú ewá, apú ewá ke, naꞌapájika riyukuna iꞌimakana nakú.
25 E kaja Bernabé, Saulo waꞌaté, aꞌañó liñeru pheñawilana Jerusalén e iꞌimakáñojlo. Rejomi napaꞌó piño napumí chuwá Antioquía ejo. Riwakajé nawaꞌa najwaꞌató Juan, rií kaja iꞌimari Marcos.