Pedro paꞌakó Jerusalén ejo yukuna marí
11
E Jesucristo wakáraꞌakarena, ajopana Jesucristo jaꞌapiyá jemaꞌajeño Judea teꞌeré nakú iꞌimakaño waꞌaté, jemaꞌañó kaja riyukuna. Marí ke yuku iꞌimaká: “Ajopana teꞌeré ewájena, unká judíona kalé iꞌimakaño, jemaꞌañó kaja chuwa Tupana purákaꞌalo jaꞌapiyá”, ke.
2 E Pedro paꞌaró piño rapumí chuwá Jerusalén ejo. E judíona nakiyana, Jesucristo jaꞌapiyá jemaꞌajeño, rewá iꞌimakaño waꞌaté, akhaꞌañó riká.
3 Nemá rijló:
—¿Naje chi piꞌijná unká judíona kalé iꞌimakaño ñakaré ejo? Pajñá kaja paꞌajnewá najwaꞌaté.
—Pajimila Jope e nuꞌumaká wakajé, nupuraꞌó Tupana waꞌaté iꞌimaká. Eꞌiyowá ke nakaje yaꞌatakó nojló nujlú chojé. Nomá nakaje aꞌarumakaji leke, chítaje wani iꞌimaká. Paꞌu kele rimanáure iꞌimaká jepoꞌokeja waja. Riká nomá witúkaꞌaka jeꞌechú chiyá ají ke majó nolokoꞌopani.
6 Raú nuyakaꞌo palá richaje, nomákaloje palá naka iꞌimaká richu. Re nomá keꞌiyapejena kamejérina, eyá pirájina kajena iꞌimaká richu. Nomá kaja jeína, eyá kupiraꞌaphana kajena. Ilé kajena nomá richu.
7 Rejéchami nomaꞌaká na pajaká kemaká nojló: “Pedro, páchoꞌo, pinó pijluwa kamejeri, pajñákaloje riꞌimi”, ke.
8 Eꞌiyonaja numá rijló: “Nuwakáraꞌajeri, unká ajñákaji penaje kalé ilé kaje iꞌimi, ke pheñawilá michuna kemaká nanaku iꞌimaká”.
9 E na pajaká núrupi mejé kemari piño nojló jeꞌechú chiyá: “Kamejérina, eyá pirájina, numakárena nakú pijló: ‘Ajñákajina penájena waja neká’, eꞌiyonaja pimá nanaku: ‘Unká ajñákajina kalé neká’, ke”.
10 Weji ke pe rimaká nojló ñakeja. Rejomi piyuke, kele nomákarena, paꞌakó piño napumí chuwá ají ke jeꞌechú chojé.
11 Meketánaja iꞌimajemi, weji kele achiñana, pajimila Cesarea eyájena neꞌemaká, iphaño rejo nukulaje.
12 Rejéchami Tupana Pechu kemaká nojló: “Piꞌijná najwaꞌaté, pimaniña nanaku: ‘Unká nukáꞌana nakiyana kalé neká, ñakele unká nuꞌujnalaje najwaꞌaté,’ ke”. Raú weꞌejná najwaꞌaté. Mariruna, pajluwa kuwáꞌata kele (6) nujwákeꞌena, táraꞌaño nowaꞌá meꞌetení, iꞌijnaño kaja nujwaꞌaté rejo. Piyuke weká mujlúkaꞌaño riñakaré chojé.
13 Rejomi Cornelio iꞌimari wajló nakaje, ramákare riñakaré chu iꞌimaká, yukuna. Ramá pajluwaja Tupana waꞌatéjeri, jeꞌechú chiyaje, yaꞌatakó rijló. Riká kemari rijló: “Piwakáraꞌa pijwaꞌatéjena nakiyana pajimila Jope ejo Simón wáꞌaje, riká naꞌakare ií kaja Pedro, ke.
14 Riká kemájeri pijló mékeka ilaꞌajika, Tupana iꞌimatákaloje piká, pejena waꞌaté, kapichákajo liyá”, ke Tupana waꞌatéjeri kemaká Cornéliojlo. Ilé ke riꞌimaká nojló riyukuna.
15 E nukeñoꞌochami Jesucristo yukuna iꞌimakana najló, Tupana Pechu jaꞌakó neꞌiyajé. Júpimi raꞌakó weꞌiyajé iꞌimaká, ke kaja raꞌakó neꞌiyajé.
16 Rejéchami riphaka nupechu nakojé meke wawakáraꞌajeri Jesucristo kemaká iꞌimaká. Rimá wajló iꞌimaká: “Juan laꞌarino bautizar inaꞌuké juni aú, eyá nuká aꞌajeri inaꞌukejlo Tupana Pechu”, ke rimaká wajló iꞌimaká.
17 Kaphí wapechu Jesucristo chojé, raú riꞌimatá weꞌemaká kapichákajo liyá Tupánajlo. Ñakele Tupana aꞌaká wajló Ripechu iꞌimaká, ke kaja raꞌaká najló Ripechu. Unká meke laꞌajé nulaꞌalá apoꞌojó nakaje, Tupana wátaka nulaꞌaká ke liyá —ke Pedro kemaká najló.
18 Ilé ke rimaká Jesucristo jaꞌapiyá jemaꞌajeño, Jerusalén e iꞌimakaño akhaꞌañó riꞌimaká penájeminanajlo. Ilé kaje aú nayurí Pedro nakú kulákatakano. Rejéchami napuraꞌakó palá Tupana nakú, nemá pajlokaka:
—Rejenowaja Tupana laꞌaká chuwa palá ajopana inaꞌukena nakú, unká judíona kalé neꞌemaká eꞌiyonaja. Tupana wátari napalaꞌataka napéchuwa puꞌuwaré nalaꞌakare liyá, raú neꞌemakáloje matajnako rijwaꞌaté jeꞌechú chu —ke nemaká pajlokaka.
Antioquía e Jesucristo jaꞌapiyá jemaꞌajeño awakako yukuna marí
19 Nenoka Esteban michú iꞌimaká ejomi, nakeñoꞌó ajopana laꞌakana chapú, reyá aꞌajná ñoꞌojó nalaꞌaké chapú Jesucristo jaꞌapiyá jemaꞌajeño. Ilé ke nalaꞌakale neká, neꞌiyajena ñaañó reyá yaꞌajnaje Fenicia teꞌeré ejo; ajopana ñaañó Chipre teꞌeré ejo; ajopana ñaañó pajimila Antioquía ejo. Rewá neꞌemaké Tupana iꞌimataka iná kapichákajo liyá yukuna judíonajlo. Najloja kalé neꞌemaké riyukuna, unká neꞌemaké riyukuna ajopánajlo.
20 Iꞌimaká eꞌiyonaja Chipre eyájena, Cirene eyájena, kele iꞌijnaño pajimila Antioquía ejo. Rewá neꞌemaké unká judíona kalé iꞌimakáñojlo Tupana iꞌimataka inaꞌuké kapichákajo liyá Jesucristo palamane aú yukuna.
21 Kajrú Tupana aꞌajika riyukuna iꞌimajeño ñathé, naꞌapátakaloje ajopana inaꞌukénajlo palá Ripurákaꞌalo. Raú kajrú inaꞌukena nakiyana yuríjika naliyó nachiꞌinami chuna purákaꞌalo jaꞌapiyá jemaꞌakana, nemaꞌakáloje Jesucristo jaꞌapiyá penaje.
22 E kaja Jesucristo jaꞌapiyá jemaꞌajeño, Jerusalén e iꞌimakaño, jemaꞌañó riyukuna, raú nawakáraꞌa Bernabé iꞌijnaká pajimila Antioquía ejo.
23 Rejo riphaka ee, ramá palá wani Tupana laꞌaká neká rewá, puꞌují wani ripechu laꞌakó raú. E rilaꞌá nenakú, napechu iꞌimakáloje kaphí Jesucristo jaꞌapiyá jemaꞌakana nakú.
24 Palájneꞌeke wani Bernabé iꞌimaká. Tupana Pechu kemájika rijló, keja rilaꞌajíkano nakaje; kaphí wani ripechu iꞌimajika Jesucristo chojé, raꞌakáloje riñathé palá laꞌakaná aú. Raú kajrú inaꞌukena jemaꞌaká Tupana jaꞌapiyá.
25 Rejomi Bernabé iꞌijnari ají ke Tarso ejo Saulo kulaje.
26 Riphátaka riká ejomi, neꞌejná rijwaꞌaté Antioquía ejo. Re neꞌemá pajluwa jarechí ketana Jesucristo jaꞌapiyá jemaꞌajeño waꞌaté. Newíñaꞌatake kajrú inaꞌukena Tupana purákaꞌalo nakú. Ajopana, Antioquía e iꞌimakaño, kemakeño Jesucristo jaꞌapiyá jemaꞌajeño nakú: “Jesucristo waꞌatéjena neká”, ke. Riwakajé eyá nakeñoꞌó neí aꞌakana ñaké iꞌimaká. a
27 Riwakajé Tupana purákaꞌalo jaꞌapátajeño nakiyana iphaño Antioquía ejo. Jerusalén eyájena neꞌemaká.
28 Pajluwaja nanakiyana ií iꞌimari Agabo. Nawakako wakajé ritáraꞌo neꞌiyajé, Tupana Pechu jaꞌapiyá ke rimaká najló nakaje iꞌimajíkare nakú, raú rimá najló:
—Kajrú inaꞌukena ñaꞌajika chuwa meꞌepijí panaku Judea teꞌeré ewá. Claudio iꞌimaká nawakáraꞌajeri wakajé, ñaké riꞌimaká najló iꞌimaká.
29 Riꞌimaká najló riyukuna ejomi, Jesucristo jaꞌapiyá jemaꞌajeño, Antioquía ewá iꞌimakaño, puraꞌañó pajwaꞌatéchaka, nawakátakaloje liñeru nawakáraꞌakaloje riká Judea teꞌeré ejo Jesucristo jaꞌapiyá jemaꞌajéñojlo, raú nawarúwaꞌakaloje najluwa aꞌajnejí ripiyá. Piyuke apú, apú ke, aꞌaká najló naliñérute nakiyana, naꞌakajla najló lokópaꞌala ejé.
30 Ilé ke nawakátaka najló liñeru. Rejomi nawakáraꞌa riká Judea teꞌeré ewájenajlo, Bernabé, Saulo waꞌaté, aꞌakáloje riká Jesucristo jaꞌapiyá jemaꞌajeño wakáraꞌajeñojlo.