Tupana apiyákaka Saulo pechu yukuna marí
9
Chapú wani Saulo laꞌajika Jesucristo jaꞌapiyá jemaꞌajeño; kajrú riꞌiratájika namaná. Ñaké iꞌimakale, riꞌijná sacerdótena wakáraꞌajeri chaje.
2 Riliyá rikejaꞌa rinakojé, riꞌijnakáloje pajimila Damasco ejo. Ripurákaꞌalo aú riwata nawakákaꞌalo ñakarelana ejo iꞌijnakana, rikulákaloje Jesucristo jaꞌapiyá jemaꞌajeño neꞌiyowá, riwáꞌakaloje neká neꞌiyayá achiñana, inaana waꞌaté, ají ke Jerusalén ejo, re rikaꞌakáloje neká inaꞌuké wajákelana chojé.
Conversión de Saulo (Hechos 9.1-19)
3 E kaja riꞌijná nakulaje, Damasco awaꞌá chami riꞌimaká ejéchami, kaphí wani kamareji pataká jeꞌechú chiyá majó rinakojé.
4 Raú rikojnoꞌó teꞌerí eꞌiyajé, rejéchami remaꞌaká na pajaká kemaká rijló:
—Saulo, Saulo, ¿naje pilaꞌá chapú nuká?
5 Raú Saulo kemari rijló:
—¿Na chi piká?
Raú rimá rijló:
—Jesús nuká, pilaꞌakare chapú.
6 Páchoꞌo, piꞌijná chuwa pajimila eꞌiyajé, re nemaje pijló naka nuwata pilaꞌaká —ke rimaká.
7 Saulo wákeꞌena, rijwaꞌaté iꞌimakaño, keroꞌoñó kajrú raú, nemaꞌakale na pajaká puraꞌakó rijwaꞌaté, eꞌiyonaja unká na namala.
8 E kaja Saulo jáchoꞌoro teꞌerí eꞌiyayá, rejéchami riyakáꞌakojla, eꞌiyonaja unká méñoꞌojo ramala, raú rijwákeꞌena pakoꞌotaño riká ají ke pajimila Damasco ejo.
9 Weji ke kala ketana riꞌimaká, unká méñoꞌojo ramala; unká kaja rajñala raꞌajnewá; unká kaja na riꞌiraké.
10 Damasco e pajluwa Jesucristo jaꞌapiyá jemaꞌajeri iꞌimari, rií iꞌimari Ananías. Riwakajeja Jesús yaꞌataró rijló, riwaꞌa rijló:
—¡Ananías!
E raꞌajipá rijló:
—Nuwakáraꞌajeri, maare nuká.
11 Jesús kemari rijló:
—Páchoꞌo, piꞌijná chuwa kele iñeꞌepú “Kaꞌañá”, ke naꞌakare ií, ejo. Piphájika penaje Judas ñakaré ejo, pimaje najló: “¿Mere chi Saulo, Tarso eyaje? Tupana waꞌaté puraꞌakano nakú riká meꞌetení”, ke.
12 Palá ramaka meꞌetení pimujlúkaꞌaka ukapú, riꞌimakare chu, chojé. Ramá kaja pitoꞌotaka piyátheꞌela rinakojé, ramákaloje piño penaje —ke Jesús kemaká rijló.
13 Ilé ke rimaká Ananíasjlo aú, rimá Jesusjlo:
—Nuwakáraꞌajeri, kajrú inaꞌukena iꞌimaká nojló Saulo yukuna iꞌimaká. Neꞌemá nojló mékeka rilaꞌajika chapú wani paꞌapiyá jemaꞌajeño, Jerusalén e iꞌimakaño, yukuna.
14 Eyá riphicha chuwa majó. Sacerdótena wakáraꞌajeri wakáraꞌa riꞌijnaká majó, riwáꞌakaloje piyukeja weká, rikaꞌakáloje weká inaꞌuké wajákelana chojé. Weká, pijwaꞌaté puraꞌajeño, riwata laꞌakana chapú —ke rimaká Jesusjlo.
15 Eꞌiyonaja Jesús kemari rijló:
—Piꞌijná, kaja nuꞌuwapá nujluwa Saulo, riꞌimakáloje nuyukuna ajopánajlo, ajopánajlo ke, nateꞌeré ewá. Riꞌimajé nuyukuna nawakáraꞌajeño iꞌimakáñojlo, ñaké kaja Israel lakénamijlo.
16 Numaje kaja rijló mékeka rijñaꞌajika chapú kaje yajwé panaku maare eyá watukumó. Noꞌopiyá jemaꞌajeri riꞌimakale chuwa, nalaꞌajé riká chapú —ke rimaká rijló.
17 Raú Ananías iꞌijnari ají ke Saulo iꞌimaká ejo. Riphaka rinaku ee, ritoꞌotá riyátheꞌela rinakojé, rimá:
—Nujmeremi Saulo, wawakáraꞌajeri Jesucristo wakáriꞌichari nuꞌujnaká majó pichaje. Piꞌijnaká majó iꞌimaká wakajé, ripuraꞌó pijwaꞌaté iñeꞌepú chu iꞌimaká, riká penájemi wakáriꞌichari nuká majó pichaje. Ripurákaꞌalo aú noꞌojé pijló amákaje, waꞌaté raꞌajé kaja pijló Tupana Pechu, penaje riwakáriꞌicha nuká majó —ke rimaká rijló.
18 Rejéchami jiña aꞌajú ke jaꞌakó majó Saulo ijlú chiyá, raú ramá piño palá, rejéchami nalaꞌaká bautizar riká.
19 Rejomi rajñá raꞌajnewá, rejéchami ritejmoꞌotako piño rapumí chuwá. E kaja riyuró Damasco e júpija kemachi. Ajopana Jesucristo jaꞌapiyá jemaꞌajeño, Damasco e iꞌimakaño, waꞌaté riꞌimá re.
Saulo iꞌimaká Jesucristo yukuna Damasco e yukuna marí
20 E kaja Saulo keñoꞌorí Jesucristo yukuna iꞌimakana nawakákaꞌalo ñakarelana chu, rimá Jesús nakú:
—Tupana iꞌirí riká.
21 Piyuke ripurákaꞌalo jemaꞌajeño pechu iꞌimaká: “¿Meke chi riká?” Nemá rinaku:
—Riká kapichátakeri Jesucristo jaꞌapiyá jemaꞌajeño Jerusalén e. Riká penájemi iphari majó, riwáꞌakaloje neká tejmuji aú, raꞌakáloje neká sacerdótena wakáraꞌajeñojlo penaje —ke nemaká rinaku.
22 Ewá richaje, richaje ke, Saulo pechu iꞌimajika kaphí Tupana purákaꞌalo yukuna iꞌimakana nakú. Palá riꞌimajika najló Jesucristo yukuna, naweꞌepíkaloje raú palá Tupana iꞌirí riꞌimaká. Kajrú judíona iꞌimaká Damasco e, kechíraꞌakeja ke napechu iꞌimaká najló rejéchami.
Saulo iꞌimakó judíona nakiyana liyá yukuna marí
23 Júpija kemachi Saulo iꞌimaká rewá najwaꞌaté, rejéchami ajopana judíona nakiyana puraꞌakó pajwaꞌatéchaka rinókana nakú,
24 eꞌiyonaja remaꞌá riyukuna. Weꞌechú, eyá lapí waꞌató, naꞌakó ripé pajimila numaná awaꞌá, nenókaloje riká penaje.
25 Pajimila nakuwá kurara chipúkaꞌakeri yenoje, jipa nakiyá laꞌakanami waja riꞌimaká. E lapí ajopana Jesucristo jaꞌapiyá jemaꞌajeño witúkaꞌataño Saulo kawakaje kajruni kuwáꞌala kaje chu, ají ke kurara yámojo. Ilé ke neꞌemataka riká ripinana liyá.
Saulo iꞌijnaká Jerusalén ejo yukuna marí
26 E kaja Saulo iphari Jerusalén ejo. Re riwata Jesucristo jaꞌapiyá jemaꞌajeño waꞌaté awakákano, eꞌiyonaja nakeroꞌó ripiyá. “Jesucristo jaꞌapiyá jemaꞌajeri riká chuwaka”, ke ajopana kemaká rinaku najló, eꞌiyonaja unká nemaꞌalá naꞌapiyá.
27 E pajluwa nanakiyana aꞌarí riñathé, rií iꞌimari Bernabé. Riká wáꞌari riká Jesucristo wakáraꞌakarena ejo, rimá najló:
—Yaꞌajná iñeꞌepú chuwá Saulo jaꞌapaka iꞌimaká ee, ramá Jesús iꞌimaká. Re ripuraꞌó rijwaꞌaté iꞌimaká, rejomi raꞌapá Damasco ejo. Rewá riꞌimaké kaja Jesucristo yukuna najló. Kaphí ripechu iꞌimaká ripurákaꞌalo yukuna iꞌimakana nakú najló —ke Bernabé kemaká najló rinaku.
28 Raú Saulo yuró Jerusalén e. Jesucristo wakáraꞌakarena wákeꞌewe riꞌimaká.
29 Kaphí ripechu iꞌimajika Jesucristo yukuna iꞌimakana nakú. Ripuraꞌó kaja judíona nakiyana waꞌaté, Griégona puraꞌakó chu puraꞌajeño neꞌemaká. Jesucristo yukuna iꞌimakana jimaje nakhaꞌákako pajwaꞌatéchaka, raú nayúchaꞌo richá. Nawata rinókana,
30 eꞌiyonaja Jesucristo jaꞌapiyá jemaꞌajeño nakiyana jemaꞌañó riyukuna, raú nawaꞌa riká pajimila Cesarea ejo. Reyá nawakáraꞌa riꞌijnaká pajimila Tarso ejo.
31 Riwakajé unká na laꞌaké chapú Jesucristo jaꞌapiyá jemaꞌajeño. Judea teꞌeré, Galilea teꞌeré, eyá Samaria teꞌeré ewá waꞌató, unká nalaꞌaké neká chapú. Raú richaje, richaje ke, napechu iꞌimajika Tupana chojé kaphí, nephake wani Tupana jaꞌapí. Tupana Pechu palamane aú richaje, richaje ke, íkiꞌika Jesucristo jaꞌapiyá jemaꞌajeño ñathé aꞌajiko.
Jesucristo palamane aú Pedro tejmoꞌótaka Eneas yukuna marí
32 E kaja Pedro iꞌijnari apú, apú ke, pajimila ejo. Jesucristo jaꞌapiyá jemaꞌajeño chaje riꞌijnakeno. Riꞌijná kaja pajimila Lida ejo Jesucristo jaꞌapiyá jemaꞌajeño amaje.
33 Re riphata pajluwa inaꞌuké, rií iꞌimari Eneas. Ritami wani riꞌimaká, kaja weji kele kuwáꞌata kele (8) jarechí ketana cha ritoꞌokó cama chu, kaja rinapona takaꞌá rijló kamachá.
34 E Pedro kemari rijló:
—Eneas, meꞌetení Jesucristo tejmoꞌótajika piká. Chuwa páchoꞌo, pilamáꞌata picamané.
Rejéchami Eneas jáchoꞌoko peyajweni.
35 Rejomi piyuke pajimila Lida e iꞌimakaño, Sarón e iꞌimakaño waꞌaté, amaka ritami penájemi iꞌimaká peyajweni. Raú napajnoꞌotá napéchuwa Tupana ejo, nemaꞌakáloje Jesucristo jaꞌapiyá penaje.
Jesucristo palamane aú Pedro makápoꞌotaka Dorcas micholo yukuna marí
36 Riwakajé pajluwájaru inanaru iꞌimayo pajimila Jope e. Jesucristo jaꞌapiyá jemaꞌajeyo ruꞌumaká. Ruí iꞌimari Tabita, apú ruí iꞌimari Dorcas griégona puraꞌakó chu. Ruká laꞌakeyo palá ajopana inaꞌukena nakú; palá rulaꞌajíkano kamuꞌují laꞌakaño nakú.
37 Pedro iꞌimaká pajimila Lida e wakajé, rulaꞌó rutami, rinaku rutakaꞌá. Rutakaꞌaká ejomi, naꞌapitatá rutami, rejomi náchoꞌota runapónami yenoje ukapú chojé.
38 Re joꞌó kaja Pedro iꞌimaká pajimila Lida e, Jope awaꞌá riká pajimila. Jesucristo jaꞌapiyá jemaꞌajeño weꞌepiño re joꞌó kaja Pedro iꞌimaká re, raú nawakáraꞌa iyamá achiñana rejo riwáꞌaje. Neká iphaño rinaku, nemá rijló:
—Piꞌijná wajwaꞌaté Jope ejo, pimaláraꞌataniña pikó maare.
39 Raú riꞌijná najwaꞌaté rejo, iphaño nanaku. E nawaꞌa Pedro ukapú támijimi iꞌimakare chu chojé. E ramá kajrú inaana iwakajílomina awakako rejé, kajrú neyaka ruká micholo. E nayaꞌatá Pédrojlo aꞌarumakaji, kamichá kaje rukujípaꞌakare najló iꞌimaká.
40 E Pedro wakáraꞌari náchoꞌoko ukapú chiyá, kéchami ritáraꞌako riꞌirúpachi aú rutami awaꞌajé. Ripuraꞌó Tupana waꞌaté runaku, rimakápoꞌotakaloje ruká penaje. Rejomi riyakaꞌo ají ke támijimi chaje, rimá támijimijlo:
—Tabita, páchoꞌo.
Rejéchami rujmeꞌetaka rujluwa, amayo Pedro, raú róchoꞌo yáꞌajo.
41 E ripatá ruká ruyátheꞌela nakiyá, ráchoꞌotakaloje ruká, rejomi riwaꞌa Jesucristo jaꞌapiyá jemaꞌajéñojlo, iwakajílominajlo waꞌaté, rimá najló:
—Amá, kajmurú ruká chuwa.