8
Saulo iꞌimari re najwaꞌaté. Palá ripechu iꞌimaká nanaku, nenókale Esteban michú iꞌimaká aú.
Chapú Saulo laꞌaká Jesucristo jaꞌapiyá jemaꞌajeño yukuna marí
Riwakajeja nakeñoꞌó chapú Jesucristo jaꞌapiyá jemaꞌajeño laꞌakana, raú neñaó reyá ajopana teꞌeré ejo, ajopana teꞌeré ejo ke. Ilé ke natamákaꞌatako paliyáaka. Judea teꞌeré ejo, eyá Samaria teꞌeré ejo waꞌató, neñaó iꞌimaká. Piyukeja wani neñáatako reyá iꞌimaká. Jesucristo wakáraꞌakarena, keleja yuriño Jerusalén e iꞌimaká.
2 Nenoka Esteban michú iꞌimaká ejomi, nanakiyana achiñana, kaphí Tupana chojé péchuruna iꞌimakaño, jaꞌañó Esteban michú tami. Kajrú neyaka riꞌimaká michú.
3 Kajrú kaja Saulo laꞌajika chapú Jesucristo jaꞌapiyá jemaꞌajeño riwakajé. Riwajlaꞌaké neká nañakaré chojé, nañakaré chojé ke; richíraꞌatake neká nañakaré chiyá achiñana, inaana waꞌaté, rejomi rikaꞌaké neká kalajeruni chojé.
Neꞌemaká Jesucristo yukuna Samaria teꞌeré ewájenajlo yukuna marí
4 Kaja piyuke Jesucristo jaꞌapiyá jemaꞌajeño ñaakó Jerusalén eyá iꞌimaká, iꞌijñaño ajopana teꞌeré ejo, ajopana teꞌeré ejo ke. Rewá neꞌemaké kaja Tupana iꞌimataka inaꞌuké kapichákajo liyá yukuna najló.
5 Pajluwa Tupana jaꞌapiyá jemaꞌajeño nakiyana ií iꞌimari Felipe; riká iꞌijnari Samaria teꞌeré ejo iꞌimaká. Riká kajruni pajimila e riꞌimaké rewájenajlo Jesucristo yukuna.
6 Kajrú inaꞌukena awakájikono ripurákaꞌalo jemaꞌajé; palá nemaꞌajika ripurákaꞌalo raꞌapiyá; namake kaja rilaꞌajika kajrú nakaje, Tupana Pechu aꞌajíkale riñathé.
7 Felipe wakáraꞌakeri kaja jiñana pechu jáchoꞌoko inaꞌuké eꞌiyayá; kajrú jiñana pechu awíyoꞌojika náchoꞌojiko neꞌiyayá yámona. Neꞌiyajena napona takaꞌakeri najló; ajopana unká méñoꞌojo jaꞌapákeño palá. Ilé kajena ritejmoꞌótake.
8 Ilé kaje aú puꞌují wani napechu iꞌimajika rewá, rilaꞌajíkale kajrú nakaje Tupana Pechu jaꞌapiyá iꞌimakana aú.
9 Re kaja apú iꞌimaké, rií iꞌimari Simón, mariꞌichú riꞌimaká. Júpija riꞌimaká rewá. Rilaꞌaké rinakuwá najló kajrú weꞌepika ke; ripajlake Samaria eyájena waꞌaté; rimaké najló rinakuwá:
—Ajopana chaje nuweꞌepika nakaje nakojé, unká na apú iꞌimalá nuká ke kaja —ke ripajlájika rinakuwá najló.
10 Piyukeja inaꞌuké jemaꞌajika Simón jaꞌapiyá palá. Mapeja iꞌimakaño, nawakáraꞌajeño ke iꞌimakaño waꞌató, jemaꞌakeño raꞌapiyá, nemaké rinaku: “Rikaja kalé piyuke wani laꞌaká. Tupana pechu ke kaja kaꞌajná ripechu”, ke nemájika rinaku.
11 Naꞌaké ripurákaꞌalo nanakojó, kaja júpimi ke rikeñoꞌoká lawíchoꞌokaje najló rewá, raú neꞌemaké pajlakaje purákaꞌaloji jaꞌapiyá.
12 Eꞌiyonaja nemaꞌaká aú Tupana jaꞌapiyá, nawata Tupana nawakáraꞌajeri penaje, Jesucristo palamane aú neꞌemakole kapichákajo liyá. Neká nalaꞌaké bautizar inaana, achiñana, kajena.
13 Rikaja kaja Simón kemari rinakuwá: “Kaphí nupechu Jesucristo chojé, riꞌimatákaloje nuká kapichákajo liyá”, ke. Raú nalaꞌá kaja bautizar riꞌimaká. Rejomi riꞌijnaké Felipe waꞌaté. Ramake meke Felipe laꞌajika Tupana Pechu aú kajrú nakaje, Tupánaja kalé laꞌakare kaje, raú re iꞌimakaño weꞌepíkeño piyuke laꞌaká Tupana. Palani wani Simonjlo nakaje Felipe laꞌajíkare iꞌimajika.
14 E kaja Jesucristo wakáraꞌakarena, Jerusalén e yuríkaño iꞌimaká, jemaꞌañó Samaria e iꞌimakaño yukuna. Yuku iphari nanaku: “Kajrú Samaria e iꞌimakaño nakiyana jemaꞌaká palá Tupana purákaꞌalo jaꞌapiyá”, ke. Raú nawakáraꞌa rejo Pedro, Juan waꞌaté, namaje.
15 Raú neꞌejná, iphaño rejo. Re napuraꞌó Tupana waꞌaté Jesucristo jaꞌapiyá jemaꞌajeño nakú, Tupana Pechu yuríkoloje najwaꞌaté penaje.
16 Neꞌiyajena laꞌañó bautizar neꞌemaká, nawakáraꞌajeri Jesucristo jaꞌapiyá jemaꞌajeño neꞌemakale, eꞌiyonaja unká joꞌó Tupana Pechu jaꞌaló neꞌiyajé.
17 E kaja Pedro, Juan waꞌaté, puraꞌañó Tupana waꞌaté nanaku. Natoꞌotá kaja nayátheꞌela nanakojé. Ilé ke nalaꞌaká neká ejéchami, Tupana Pechu jaꞌakó neꞌiyajé.
18 Simón amari meke Jesucristo wakáraꞌakarena toꞌotaka nayátheꞌela nanakojé, waꞌató ke Tupana Pechu jaꞌakó neꞌiyajé. Ilé kaje amákana aú, riwata najló liñeru aꞌakana, naꞌakáloje rijló ilé kaje péchuji, rilaꞌakáloje ñaké penaje.
19 E rimá najló:
—Aꞌá nojló ilé kaje péchuji, notoꞌotákaloje ñaké kaja nuyátheꞌela inaꞌuké nakojé, raú Tupana Pechu jaꞌakóloje neꞌiyajé.
20 Raú Pedro kemari rijló:
—¡Palani Tupana kapichátakajla piká, piyukeja piliñérute waꞌató! ¿Meke chi pipechu rinaku? “Iná warúwaꞌajla liñeru aú apú liyá nakaje Tupana aꞌakare inajlo mapeja”, ¿ke chi pipechu?
21 Unká wani raꞌakana iꞌimalaje pijló, unká wani paala riꞌimakale Tupánajlo.
22 Pipajnoꞌotá pipéchuwa puꞌuwaré pijnaꞌatákare pipéchuwa nakú liyá. Pipuraꞌó kaja Tupana waꞌaté, apala ramajo pichaje puꞌuwaré piꞌijnatíyaje pipéchuwa nakú liyá.
23 Nuweꞌepí mékajeka inaꞌuké piká. Chapú piwó ajopana inaꞌukena cha, nacháꞌatakale piká; pichuwájeja piká puꞌuwaré laꞌajerí; unká méñoꞌojo piyurila puꞌuwaré laꞌakaná piliyó —ke Pedro kemaká rijló.
24 Raú Simón kemari najló:
—Ipuraꞌó nuchaya Tupana waꞌaté, nuꞌumakóloje chapú kaje pimíchaje nunaku liyá.
25 E kaja Pedro, Juan waꞌaté, ñapátaño Tupana purákaꞌalo yukuna iꞌimakana Samaria e iꞌimakáñojlo. Neꞌemá najló Jesús, namákare iꞌimaká penájemi, yukuna. Rejomi napaꞌó reyá napumí chuwá Tupana purákaꞌalo yukuna iꞌimakana nakú. Neꞌemaké najló riꞌimataka iná kapichákajo liyá yukuna ajopánajlo, ajopánajlo ke. Ajopana chaje, ajopana chaje ke, napaꞌakó riyukuna iꞌimakana nakú. Ilé keja nachiraꞌajiko kajrú pajimila, Samaria teꞌeré eꞌiyowá iꞌimakare, nakuwá. Tupana purákaꞌalo yukuna iꞌimakana nakuja napaꞌó, e kaja waja nephá napumí chuwá Jerusalén ejo.
Felipe puraꞌakó Etiopía eyaje waꞌaté yukuna marí
26 Rejomi pajluwaja Tupana waꞌatéjeri, jeꞌechú chiyaje, iphari Felipe nakú. Riká kemari rijló:
—Chuwa piꞌijná ají ke kawakajo, ilé iñeꞌepú Jerusalén ejo iꞌijnaká, eyá ají ke desierto chuwá pajimila Gaza ejo. Riká chuwá piꞌijnajé.
27 Raú Felipe iꞌijnari ají ke rimaká rijló ejo. Iñeꞌepú chu ramá pajluwaja inaꞌuké jaꞌapaka ritukumá. Etiopía eyájeri, neꞌemakánaru liñérute lamáꞌatajeri riꞌimaká. Jerusalén ejo riꞌimá ripéchuwa laꞌajé puꞌují Tupánajlo.
28 Riká penájemi paꞌaró piño rapumí chuwá ricarroné, kawaruna chíraꞌakare raꞌapiyá, chu. Raꞌapaka nakuwá ripuraꞌó Tupana purákaꞌalo lanaꞌakéjami, Isaías michú lanaꞌakare iꞌimaká, waꞌaté.
29 E Felipe iphari rawaꞌajé, rejéchami Tupana Pechu kemaká rijló: “Piꞌijná rápumichu, piphátachi kele carro jaꞌapari pitukumá”, ke.
30 Riphaka rawaꞌajé ee, remaꞌá ripuraꞌakó Tupana purákaꞌalo lanaꞌakéjami, Isaías michú lanaꞌakare iꞌimaká, waꞌaté, rimá rijló:
—¿E chi piweꞌepika meke kemakánaka kele lanaꞌakéjami pipuraꞌó waꞌaté?
31 —Unká, ¿meke laꞌajé chi nuweꞌepijla riká? Riyukuna jaꞌapátajeri iꞌimakela nojló riyukuna palá, nuweꞌepijla riká. Páchoꞌo majó, wamachi riká pajñakani, maare piyaꞌo nowaꞌá.
32 Riká Tupana purákaꞌalo lanaꞌaké a jami ramákare kemari:
“Nawáꞌaka oveja rinókelana ejo,
ke kaja nawáꞌajika riká.
Unká oveja iꞌirí wáꞌala ralojlo, napiroꞌokachu richijné.
Ñaké kaja riꞌimajika, unká meke rimalaje najló.
33 Nalaꞌajé namákaja riká.
Unká na pachá kalé nalaꞌajé riká chapú;
unká kaja nayurílaje ajopana puraꞌakó richaya.
Unká na iꞌimalaje chapú wani nalaꞌajíkare riká yukuna ajopánajlo.
Nenoje riká, ñakele unká riꞌimalaje marí ejaꞌawá chu inaꞌuké waꞌaté”,
ke Tupana purákaꞌalo lanaꞌakéjami ripuraꞌakaro waꞌaté kemaká.
34 E Etiopía eyájeri kemari Felípejlo:
—Chuwa, pilaꞌá nojló nakaje, piꞌimá nojló meke kemakana riká yukuna. ¿Na nakú chi Tupana purákaꞌalo jaꞌapátajeri kemá ilé ke? ¿Rinakuwaja chi rimá ñaké, apú nakú kaꞌajná?
35 E Felipe keñoꞌó riyukuna jaꞌapátakana rijló palá, kele ripuraꞌakaro waꞌaté eyá, rikeñoꞌó Jesucristo yukuna iꞌimakana rijló. Rejomi rimá kaja rijló mékeka apú e Tupana purákaꞌalo lanaꞌakéjami kemaká nakú.
36 Meketánaja naꞌapaka ee, naꞌapá juni awaꞌó, rejéchami Etiopía eyaje kemaká Felípejlo:
—Piyakaꞌo, re juni maare, ¿e pilaꞌakajla bautizar nuká rakojé?
37 Felipe kemari rijló:
—Aꞌa, kaphí pipechu iꞌimajika ee Jesucristo chojé, riꞌimakáloje piꞌimatájeri penaje, nulaꞌajé bautizar piká.
Rimá rijló:
—Ñaké nupechu, nuweꞌepí Jesucristo nakú, Tupana iꞌirí riká.
38 Rejé riwakáraꞌa kawaruna tajnako, e Felipe, Etiopía eyaje waꞌaté, witúkaꞌaño junápeje. Rejé Felipe laꞌarí bautizar riká.
39 Rejomi náchoꞌo junápiya, rejéchami Tupana Pechu wáꞌaka riliyá Felipe. Rejomi unká Etiopía eyaje amala piño riká. Puꞌují ripechu ke raꞌapaka piño reyá, ají ke aꞌajná ñoꞌojó iñeꞌepú chuwá.
40 Eyá Tupana Pechu wáꞌari Felipe ají ke pajimila Azoto ejo. Re riꞌimaké Tupana yukuna rewájenajlo, mékeka Tupana iꞌimataka iná kapichákajo liyá yukuna riꞌimaké najló. Riyukuna iꞌimakana nakuja raꞌapake. Yaꞌajnaje pajimila Cesarea ejená riꞌijná riyukuna iꞌimajé.