Naꞌaká iyamá kuwáꞌata kele achiñana aꞌajnejí tamákaꞌatajeño penaje yukuna marí
6
Ewá richaje, richaje ke, íkiꞌika Jesucristo jaꞌapiyá jemaꞌajeño iꞌimaká. Judíona nakiyana neꞌemaká. Neꞌiyajena puraꞌakeño griego chu, eyá ajopana puraꞌakeño hebreo chu. E griego chu puraꞌakaño akhaꞌákaño hebreo chu puraꞌakaño maná, nemá nanaku:
—Weꞌechú kaꞌalá keja natamákaꞌataka wajló aꞌajnejí, eꞌiyonaja unká rejenowaja kalé natamákaꞌataka riká wajló. Wanakiyana iwakajílominajlo naꞌá wejápaja aꞌajnejí, eyá nanakiyana iwakajílominajlo naꞌá ñóꞌope.
2 Raú iyamá iphata jiꞌimaji nakojé kele (12) Jesucristo wakáraꞌakarena awakátaño piyukeja Jesucristo jaꞌapiyá jemaꞌajeño rejé, nemá najló:
—Unká wani paala wayurika Tupana purákaꞌalo yukuna iꞌimakana ajopánajlo, ajopánajlo ke, watamákaꞌatakaloje ijló aꞌajnejí penaje.
3 Ñakele iꞌiwapá eꞌiyayó iyamá kuwáꞌata kele (7) achiñana. Marí ke iꞌimakaño iꞌiwapajé eꞌiyayó: piyukeja inaꞌuké kemakárena nakú: “Palájneꞌekena”, ke; palá kaja Tupana Pechu jaꞌapiyá jemaꞌajeño iꞌimajíkaño; weꞌepéjeño kaja palá nakaje nakojé. Ilé kajena iꞌiwapajé eꞌiyayó aꞌajnejí tamákaꞌatajeño penaje ijló.
4 Eyá weká weꞌepéjeño watukumó Tupana waꞌaté puraꞌakano, eyá Ripurákaꞌalo nakú jewíñaꞌatakana kaje —ke nemaká.
5 Rejenowaja napechu iꞌimaká ñaké laꞌakana nakú, raú neꞌewapá neꞌiyayó iyamá kuwáꞌata (7) kele achiñana aꞌajnejí tamákaꞌatajeño penaje. Neꞌewapá neꞌiyayó Esteban, kaphí wani ripechu iꞌimaká Jesucristo chojé. Tupana Pechu wakáraꞌajika ke rilaꞌajika nakaje piyuke. Neꞌewapá kaja neꞌiyayó Felipe, Prócoro, Nicanor, Timón, Pármenas, Nicolás, kele. Antioquía eyaje Nicolás iꞌimaká, unká judío jaꞌa kalé riꞌimaká, eꞌiyonaja napechu ke ripechu iꞌimaká Tupana nakú.
6 Neꞌewapaká neká neꞌiyayó ejomi, nawaꞌa neká Jesucristo wakáraꞌakarena jimaje. Neká toꞌotaño nayátheꞌela neꞌewata chojé, rejomi napuraꞌó Tupana waꞌaté nanaku. Ilé ke naꞌaká neꞌemaká aꞌajnejí tamákaꞌatajeño penaje.
7 Ewá íkiꞌiruna inaꞌukena jemaꞌaká Tupana purákaꞌalo jaꞌapiyá; ñaké kaja sacerdótena nakiyana jemaꞌaká raꞌapiyá.
Napataká Esteban yukuna marí
8 Kajrú Esteban laꞌajika nakaje Tupana pechu palamane aú, raú inaꞌukena weꞌepike na laꞌajérika Tupana.
9 Eyá nawakákaꞌalo ñakarelana chiyájena iꞌimaño, nanakiyana awakákaꞌalo ñakarelana ií iꞌimari “Mapeja jápakaño ajopana waꞌatejlo jáchoꞌotakanami”, ke. Richiyájena iꞌimaño Cirene eyájena, Alejandría eyájena, Cilicia eyájena, Asia teꞌeré eyájena, kele iꞌimaño richiyájena. E kaja neꞌiyajena akhaꞌákaño Esteban waꞌaté.
10 Unká naweꞌepila rapiyákakana palá, kapechú wani ripuraꞌakole najwaꞌaté Tupana Pechu jaꞌapiyá ke.
11 E kaja naꞌá ajopánajlo liñeru, napajlákaloje Esteban nakú mapeja, nemá rinaku mapeja:
—Wemaꞌá ripuraꞌakó puꞌuwaré wani Moisés michú nakú; ñaké kaja ripuraꞌakó Tupana nakú puꞌuwaré.
12 Ilé ke nemaká Esteban nakú aú, piyuke re iꞌimakaño yúchaꞌako richá. Ñaké kaja pheñawilana, eyá Tupana purákaꞌalo nakú jewíñaꞌatajeño, kele pechu iꞌimaká rinaku chapú. Raú nechoꞌó rejo, patañó riká, rejomi nawaꞌa riká ají ke nachaje wakáraꞌajeño ejo.
13 Namichoꞌojnoja nawakáraꞌaka ajopana pajlaka rinaku. Neká kemaño nawakáraꞌajeñojlo:
—Unká wani marí yurila riliyó puꞌuwaré puraꞌakano. Puꞌuwaré ripuraꞌakó marí Tupana ñakaré nakú, eyá Tupana purákaꞌalo, Moisés michú lanaꞌakare nakú waꞌató.
14 Wemaꞌá kaja rimaká: “Jesús, Nazaret eyájemi, kajyaꞌatájeri marí Tupana ñakaré, rapiyákaje kaja piyuke nakaje Moisés michú jewíñaꞌatakare nakú wachiꞌiná michuna iꞌimaká” —ke napajlaka Esteban nakú nawakáraꞌajeñojlo.
15 Raú piyukeja nawakáraꞌajeño, ajopana re iꞌimakaño najwaꞌaté, kele yakáꞌaño Esteban chaje, amaño apoꞌojó rijimá apiyákako Tupana waꞌatéjeri, jeꞌechú chiyaje, jimá ke.