Ananías, Safira waꞌaté, yukuna marí
5
Eyá apú aꞌarí kaja rimena liñeru aú. Rií iꞌimari Ananías, eyá riyajalo ií iꞌimari Safira.
2 Riká puraꞌaró riyajalo waꞌaté, nalamáꞌatakaloje najluwa liñeru, ajopana aꞌakare najló namena wemí nakiyana, eyá rijlupemí naꞌakáloje Jesucristo wakáraꞌakarenajlo.
3 Riká liñeru riꞌijnatá najló, e Pedro kemari rijló:
—Ananías, ¿naje Jiñá Chiꞌinárikana kaꞌata peꞌiyajé kajrú wani, pipajlákaloje Tupana Pechu waꞌaté? Kaja pijñaꞌá liñeru, naꞌakare pijló pimena wemí iꞌimaká nakiyana, eꞌiyonaja pimá: “Piyukeja noꞌopátaka ijló riká”, ke.
4 Pimena riꞌimaká paꞌá najló iꞌimaká, ñakele pileꞌejé kele liñeru, naꞌakare pijló riwemí iꞌimaká. Eta, ¿naje pipechu jaꞌachó wajwaꞌaté pajlakana nakú mapeja? Unká wajwaꞌateja kalé pipajlicha, pipajlicha kaja Tupana waꞌaté.
5 Ilé ke rimaká rijló ejéchami, Ananías kojnoꞌoká teꞌerí eꞌiyajé, richuwaja ritakaꞌaká. Rejomi riyukuna jemaꞌajeño keroꞌoñó kajrú wani raú.
6 Ritakaꞌaká ejomi, walijímakana iphaño ritami ñaꞌajé reyá. Paineko namapíraꞌa aꞌarumakaji aú támijimi, rejomi najñaꞌá ritami reyá, najaꞌakáloje riká penaje.
7 Weji kele kamú jená ketana jaꞌapaka ejéchami, riyajálomi iphaka rápumichu, unká ruweꞌepila mékeka ruyajná laꞌakó maapami ke rupiyá.
8 E Pedro kemari rojló:
—Pimá nojló palá, ¿e chi kewaka piyuke maare, imena aꞌakare iꞌimaká wemí?
—Aꞌa, iléreje riwemí iꞌimá.
9 Raú Pedro kemari rojló:
—¿Naje ipuriꞌichó pajwaꞌatéchaka, ipajlákaloje Tupana Pechu waꞌaté penaje? Ilé piyajná michú tami jaꞌajeño waícha. Nekaja kaja ñaꞌajeño piño piká najaꞌakáloje pitami penaje.
10 Ilé ke rimaká rojló ejéchami, rutami jaꞌakó Pedro jiꞌimá nakojé matámiru. Reꞌiyowá ke ruyajná michú tami jaꞌajeño mujlúkaꞌaka pachojo, amaño rutami toꞌokó. E najñaꞌá rutami, rejomi najaꞌá rutami ruyajná michú tami awaꞌajé.
11 Ilé ke nakapichako aú, piyuke Jesucristo jaꞌapiyá jemaꞌajeño keroꞌokó; ñaké kaja ajopana riyukuna jemaꞌajeño keroꞌokó raú.
Tupana palamane palá nalaꞌaká kajrú inaꞌukena eꞌiyowá yukuna marí
12 Piyuke Jesucristo jaꞌapiyá jemaꞌajeño awakájiko Tupana ñakaré chojé. Ukapú ñópoꞌojlo chojé nawakákono, riká ukapú ií iꞌimari Salomón ukapure. Jesucristo wakáraꞌakarena laꞌakeño kajrú nakaje, Tupana Pechu aꞌajíkale nañathé.
13 Unká ajopana awakalo najwaꞌaté richojé, nawó laꞌajíkole najwaꞌaté awakákano aú, eꞌiyonaja kalé palá piyuke inaꞌuké pechu iꞌimajika nanaku.
14 Ewá richaje, richaje ke, kajrú inaꞌukena, achiñana, inaana waꞌaté, jemaꞌajika Jesucristo jaꞌapiyá.
15 Tupana ñakaré awaꞌajé napitaké kajrú natámina iñeꞌepú chuwá. Napitaké neká kuwana kaje nakú Pedro jaꞌapájikano ewá, riñaká jaꞌakóloje neꞌiyajena nakojé penaje.
16 Re kajrú pajimila Jerusalén awaꞌó, reyá kajrú inaꞌukena iꞌijnajíkano Jerusalén ejo. Nawáꞌake natámina, eyá ajopana jiñana pechu iꞌimakárena eꞌiyá. Jesucristo wakáraꞌakarena nakiyana tejmoꞌótakeño natámina piyukeja; jiñana pechu iꞌimajíkarena eꞌiyá nawakáraꞌake jáchoꞌoko neꞌiyayá.
Chapú nalaꞌaká Jesucristo wakáraꞌakarena yukuna marí
17 E kaja Sacerdótena wakáraꞌajeri, rijwaꞌaté iꞌimakaño nakiyana waꞌaté, pechu iꞌimaño chapú wani Jesucristo wakáraꞌakarena nakú, palá wani inaꞌuké pechu iꞌimajíkale nanaku.
18 Ñakele nawakáraꞌa Jesucristo wakáraꞌakarena patakana, nakaꞌakáloje neká rewájena leꞌejé inaꞌuké wajákelana chojé.
19 Eꞌiyonaja lapí Tupana waꞌatéjeri, jeꞌechú chiyaje, meꞌetari nachaya. Rejomi riwaꞌa neká wakaꞌapojo, rimá najló:
20 “Iꞌijná aꞌajná Tupana ñakaré ejo, eko iꞌimá Jesucristo jaꞌapiyá iꞌimakana yukuna najló re”, ke rimaká najló.
21 E muní ke lapiwá namujlúkaꞌa Tupana ñakaré chojé, e nakeñoꞌó inaꞌuké jewíñaꞌatakana Tupana purákaꞌalo nakú. Naꞌapona ke sacerdótena wakáraꞌajeri awakako rijwaꞌatéjena waꞌaté. Rawakata pheñawilana Israel lakénami wakáraꞌajeño, kajena awakaño pajwaꞌatéchaka. E kaja nawakáraꞌa policíana inaꞌuké wajákelana ejo, nawáꞌakaloje Jesucristo wakáraꞌakarena richiyá rejo.
22 Neká iꞌijnaño rejo, nephaka rejo ee, namá meñaru inaꞌuké wajákelana chu iꞌimaká. Unká neꞌemalá richu, raú napaꞌó piño nayámojo riyukuna iꞌimajé nawakáraꞌajeñojlo, nemá najló.
23 —Weꞌemichá rejo. Palá itakeja, eyá chawínaꞌakeja wamíchaka rinumaná iꞌimichaka. Re joꞌó kaja riwaꞌaphena lapiꞌichako rinumaná awaꞌá, e wajmeꞌetiya riká, amíchaño unká na iꞌimalacha richu —ke nemaká najló.
24 Sacerdótena wakáraꞌajeri, Tupana ñakaré waꞌaphena wakáraꞌajeri, eyá sacerdótena, jemaꞌaká aú riyukuna napechu kechíraꞌaro kajrú wani najló, nemá pajlokaka:
—¿Meketana júpika kaꞌajná nalaꞌajika weká ilé ke?.
25 Reꞌiyowá ke pajluwa iphaka nanaku, riká kemari najló:
—Ileruna, ikaꞌakárena inaꞌuké wajákelana chojé iꞌimaká, manaꞌija neká, aꞌajná Tupana ñakaré chu meꞌetení inaꞌuké jewíñaꞌatakana nakú —ke rimaká najló.
26 Raú Tupana ñakaré waꞌaphé iꞌimakaño wakáraꞌajeri, policíana waꞌaté, iꞌijnaño rejo. Unká tejmuji aú kalé policíana wáꞌaño neká, nakeroꞌokole inaꞌuké piyá, kaja napechu iꞌimá: “Walaꞌajika ee chapú neká, apala ajopana kaꞌajeño wachá jipa”.
27 E kaja nawaꞌa Jesucristo wakáraꞌakarena nawakáraꞌajeño wani jimaje. E sacerdótena wakáraꞌajeri kemari najló:
28 —Wawíyoꞌo ijló Jesucristo yukuna iꞌimakana ajopánajlo cha, eꞌiyonaja piyukeja Jerusalén e iꞌimakaño jemaꞌaká jewíñaꞌatakare nakú neká yukuna, eyá imá kaja wanaku: “Neká noño Jesucristo iꞌimaká, napachá riká”, ke.
29 Eyá Pedro, ajopana Jesucristo wakáraꞌakarena waꞌaté, kemaño najló:
—Piyukeja nakaje chaje palaka wajló Tupana jaꞌapiyá jemaꞌakana, riká wakáraꞌari weꞌemaká riyukuna.
30 Iká wakáraꞌaño nenoka Jesús aꞌawaná apiyákakanami nakojé iꞌimaká, eꞌiyonaja Tupana, wachiꞌiná michuna pechu iꞌimakare chojé kaphí, makápoꞌotari piño riꞌimaká.
31 Riká, Tupana aꞌakare wawakáraꞌajeri penaje, iꞌimatari iná kapichákajo liyá. Riwata inaꞌuké pajnoꞌotaka napéchuwa Tupana ejo puꞌuwaré nalaꞌakare liyá, raú ramákoloje nachaje riliyá.
32 Wamá ilé numakare nakú, ñakele waweꞌepí kewaka riká, ñaké kaja Tupana Pechu kemaká rinaku iꞌimaká. Tupana aꞌarí Ripechu piyuke raꞌapiyá jemaꞌajéñojlo —ke Pedro kemaká najló.
33 Ilé ke rimaká najló aú, nayúchaꞌo íkiꞌija wani nachá, richona nawata nenótakana.
34 Eꞌiyonaja re pajluwa nawakáraꞌajeño nakiyana iꞌimari najwaꞌaté, fariséona nakiyana riꞌimaká. Tupana purákaꞌalo nakú jewíñaꞌatajeri kaja riꞌimaká. Rií iꞌimari Gamaliel. Piyukeja inaꞌuké pechu iꞌimaká rinaku palá, riká kemari policíanajlo:
—Iwaꞌa neká wakaꞌapojo meketánaja.
—Israel lakénami, iweꞌepí palá meꞌetení mékeka iwátaka nalaꞌakana.
36 Iweꞌepí meke júpimi pajluwa inaꞌuké iꞌimaká, rií iꞌimari Teudas. Riká laꞌarí rinakuwá ajopana cháꞌatajeri ke iꞌimaká; cuatrocientos ewá rijwaꞌatéjena iꞌimaká. Kaja ewaja ajopana noño riꞌimaká naliyá, rejomi piyuke rijwaꞌatéjenami tamákaꞌatako paliyáaka, rejé piyuke nakaje rilaꞌakare kapicharo iꞌimaká. Nakaje, rewíñaꞌatakare nakú iꞌimaká, kapicharo kaja rijwaꞌató.
37 Ñaké kaja apú iꞌimaká, nalapaꞌataka piyuke inaꞌuké iꞌimaká wakajé, rií iꞌimari Judas, Galilea teꞌeré eyaje riꞌimaká. Kajrú rijwaꞌatéjena iꞌimaká. Ñaké kaja nenoka riꞌimaká, rejomi ñakeja kaja rijwaꞌatéjenami tamákaꞌatako paliyáaka.
38 Ñakele numá ijló meꞌetení: reja ileruna Jesucristo wakáraꞌakarena iꞌimaláreja; reja nalaꞌáreja napechu nakú riꞌimaká ke. Napechu keja nalaꞌajika ee nakaje, rikoja rikapichájiko.
39 Eyá Tupana palamane aú nalaꞌajika ee nakaje, unká méñoꞌojo ikapichátalaje naliyá riká, chapú nalaꞌakana aú. ¡Pa!, ilaꞌaniña puꞌuwaré, nakaje Tupana wakáraꞌakare laꞌakana kaꞌajná iwata tajátakana —ke Gamaliel kemaká najló.
—Ñaké riká —ke nemaká.
40 Raú policíana wáꞌaño Jesucristo wakáraꞌakarena nachaje. E nawakáraꞌa nañaꞌatákana, rejomi nemá najló, neꞌemaká piyá Jesucristo yukuna ajopánajlo.
E kaja waja nayurí náchoꞌoko reyá,
41 raú náchoꞌo reyá. Puꞌují napechu iꞌimaká, Tupana yuríkale najñaꞌaká chapú kaje panaku, Jesucristo jaꞌapiyá jemaꞌajeño nemaꞌakale.
42 E kaja napaꞌó, eꞌiyonaja unká nayurila Jesucristo yukuna iꞌimakana ajopánajlo, ajopánajlo ke; unká kaja nayurila inaꞌuké jewíñaꞌatakana Jesucristo purákaꞌalo nakú. Weꞌechú kaꞌalá keja newíñaꞌatajika neká Ripurákaꞌalo nakú Tupana ñakaré chu, eyá nañakaré chuwá waꞌató.