Pedro, Juan waꞌaté, táraꞌako nawakáraꞌajeño jimaje yukuna marí
4
Re joꞌó kaja Pedro, Juan waꞌaté, puraꞌakó inaꞌuké waꞌaté, eꞌiyowá ke ajopana iphaka nanaku. Sacerdótena neꞌemaká. Tupana ñakaré waꞌaphé iꞌimakaño wakáraꞌajeri, eyá saducéona, kele iphaño kaja najwaꞌaté rejé.
2 Pedro, Juan waꞌaté, jewíñaꞌataño inaꞌuké Jesucristo makápoꞌoko iꞌimaká nakú, raú naweꞌepíkaloje kaja takaꞌakaño penájemina makápoꞌojiko piño kaja ñaké nakojé. Ilé kaje jimaje sacerdótena, najwaꞌaté iphákaño waꞌaté, yúchaꞌaño Pedro, Juan waꞌaté cha.
3 Raú nawaꞌa neká reyá, nakaꞌakáloje neká inaꞌuké wajákelana chojé, e nakaꞌá neká richojé. Najúwaꞌakale, unká nawátala purákaꞌaloji lamáꞌatakana riwakajé, raú richu neꞌemá lapí ketana.
4 Kajrú inaꞌukena jemaꞌaká Pedro iꞌimaká Tupana yukuna najló richu. Kajrú nanakiyana aꞌaká ripurákaꞌalo nanakojó, raú nemaꞌá Jesucristo jaꞌapiyá. Kajrú Jesucristo waꞌatéjena ñathé aꞌajíkono raú; cinco mil ewá achiñana waja iꞌimaká; chaje neꞌemaká nayani, nayani jalona, kajémaka waꞌaté.
5 E muní ke kajrú nawakako piño. Judíona wakáraꞌajeño, pheñawilana, Tupana nakú jewíñaꞌatajeño, kele awakaño Jerusalén ejé.
6 Sacerdótena wakáraꞌajeri Anás iꞌimari kaja najwaꞌaté re; Caifás, Juan, Alejandro, kele iꞌimaño kaja re najwaꞌaté. Sacerdótena wakáraꞌajeri ejena neꞌemaká.
7 E kaja nawakáraꞌa Pedro, Juan waꞌaté, wáꞌakana neꞌemaká ejo, raú nawaꞌa neká neꞌiyajó, nemá najló:
—¿Na chi aꞌarí ijló péchuji, itejmoꞌótakaloje kele inaꞌuké penaje? ¿Na purákaꞌalo aú chi ilaꞌá ñaké?
8 Rejéchami Pedro aꞌajipaká najló; Tupana Pechu wakáraꞌaka ke rimaká najló marí ke:
—Wawakáraꞌajeño, iká, pheñawaꞌaní waꞌaté,
9 kejáꞌaño waliyá kele apichákaꞌalo penájemi yukuna, iweꞌepíkaloje naka tejmoꞌótaka riká.
10 Chuwa nuꞌumajika riyukuna ijló, itelónajlo waꞌaté, iweꞌepíkaloje palá rinakojé. Jesucristo, Nazaret eyaje, palamane aú ritejmoꞌotó, ñakele amá ritáraꞌako ijimaje peyajweni meꞌetení. Riká Jesús, iwakáraꞌakare nókana aꞌawaná apiyákakanami nakojé iꞌimaká, Tupana makápoꞌota piño. Riká penájemi tejmoꞌótari riká, kele.
11 Tupana purákaꞌalo lanaꞌakéjami kemaká rinaku iꞌimaká keja riꞌimaká. Rimá rinaku: “Unká inaꞌukélari riká”, ke. Riká Tupana aꞌá namájeri, riꞌimakáloje ajopana chaje wani penaje.
12 Unká apú inaꞌuké iꞌimalá iná iꞌimatájeri penaje; unká Tupana aꞌalá apú marí ejaꞌawá chu, riꞌimatákaloje iná kapichákajo liyá. Rikaja kalé Jesús, pajluwaja, iꞌimatárijla weká kapichákajo liyá Tupánajlo —ke Pedro kemaká najló.
13 Nawakáraꞌajeño amaño kaphí wani Pedro, Juan waꞌaté, pechu iꞌimaká najwaꞌaté puraꞌakano nakú. Naweꞌepí kaja unká newíñaꞌalo jewíñaꞌakajo ñakarelana chu iꞌimaká, raú napechu iꞌimá: “¿Meke chi neká, kaji?” Rejéchami riphaka napechu nakojé: “Jesús jaꞌapiyatéjena penájemi neꞌemaká”.
14 Namá kaja ilé inaꞌuké, natejmoꞌótakare iꞌimaká, táraꞌako re najwaꞌaté. Ñaké iꞌimakale, unká méñoꞌojo nemalajla nanaku: “¡Mapeja napajlaka ta!”, ke.
15 Raú nawakáraꞌa náchoꞌoko neꞌiyayá aꞌajná ñoꞌojó, napuraꞌakóloje nanaku nekámika ke.
16 E nemá pajlokaka:
—¿Meke walaꞌajika keleruna inaꞌukena? Kaja nalaꞌá nakaje, Tupana Pechu aꞌakale nañathé. Kaja piyukeja Jerusalén e iꞌimakaño jemaꞌaká riyukuna, raú unká méñoꞌojo wemalajla nanaku: “Mapeja napajlaka ta”, ke.
17 Marí ke kaꞌajná walaꞌajika, ajopana jemaꞌaká piyá nayukuna, wemaje najló: “Iꞌimajika ee piño Jesucristo yukuna ajopánajlo, wawajaje iká richona”, ke.
18 E nawaꞌa piño namaná, nephaka nanaku ee, nemá najló:
—Chuwa iꞌimaniña ajopánajlo Jesucristo yukuna; jewíñaꞌataniña kaja neká rinaku.
19 Eꞌiyonaja Pedro, Juan waꞌaté, kemaño najló:
—Tupana wakáraꞌari weꞌemaká riyukuna ajopánajlo, ajopánajlo ke, eyá iká kemaño wajló chuwa, weꞌemaká piyá riyukuna. ¿Na chi palani Tupánajlo iweꞌepika: jaꞌapiyá jemaꞌakana kaꞌajná, Tupana jaꞌapiyá jemaꞌakana kaꞌajná?
20 Unká méñoꞌojo wayurila riyukuna iꞌimakana. Wamá Jesús laꞌaká kajrú nakaje iꞌimaká; wemaꞌá kaja riꞌimaká yuku kajrú, raú riyukuna waꞌapátaje ajopánajlo, ajopánajlo ke —ke nemaká najló.
21 Raú nawakáraꞌajeño kemaño piño najló:
—Unkájika ee jemaꞌá waꞌapiyá, wawajaje iká.
Ilé kaje ejomi, nayurí náchoꞌoko neꞌiyayá, unká na pachá nawajákana iꞌimakale. Piyukeja rewá iꞌimakaño puraꞌakó palá wani Tupana nakú, namákale apichákaꞌalo penájemi tejmoꞌotako, raú unká méñoꞌojo nawajálajla neká.
22 Cuarenta jarechí cha, natejmoꞌótakare Jesucristo palamane aú, riꞌimaká.
Jesucristo jaꞌapiyá jemaꞌajeño puraꞌakó Tupana waꞌaté yukuna marí
23 E kaja nayurí Pedro, Juan waꞌaté, jáchoꞌoko reyá. E napaꞌó ají ke najwákeꞌewena iꞌimaká ejo, iphaño nanaku. E neꞌemá najló mékeka sacerdótena wakáraꞌajeño, pheñawilana waꞌaté, kemaká najló.
24 Rejomi neká piyukeja puraꞌañó Tupana waꞌaté, nemá rijló: “Weꞌemakana, nakaje minárikana waja piká; pikaja kalé keñoꞌótari piyukeja nakaje iꞌimaká; piká laꞌarí jeꞌechú, piyukeja nakaje rewá iꞌimakare waꞌaté; ñaké kaja pilaꞌaká ejaꞌawá, piyukeja nakaje rewá waꞌaté; piyukeja juni, eyá rakuwá iꞌimakaño waꞌató, pikeñoꞌota kaja iꞌimaká.
25 Palá David michú jemaꞌaká Pipurákaꞌalo paꞌapiyá iꞌimaká. Pipechu aú pimá rijló nakaje nakú iꞌimaká, riyukuna rilanaꞌá paꞌapiyá marí ke iꞌimaká:
‘¿Naje inaꞌuké yúchaꞌajo nawakáraꞌajeri cha?
¿Naje neꞌejnataje napéchuwa nakaje, unká na penaje kalé iꞌimakare, nakú?
26 Nawakáraꞌajeño, marí ejaꞌawá chu iꞌimakaño, awakájeño.
Chapú napechu iꞌimajika Tupana nakú, Riꞌirí waꞌaté,
riwakáraꞌajikale riká inaꞌuké iꞌimatájeri penaje’,
ke pimaká rijló iꞌimaká”. a
27 “Kewaka nakaje pimakare nakú rijló iꞌimaká. Marí pajimila eꞌiyá nawakó meyáleje iꞌimaká. Herodes, Poncio Pilato, eyá ajopana teꞌeré eyá wakáraꞌajeño, awakaño kaja riwakajé maare. Ñaké kaja, wekáꞌana, Israel lakénami nakiyana, awakako najwaꞌaté. Chapú nawó iꞌimaká Piꞌirí Jesús nakú. Unká weꞌepila puꞌuwaré laꞌakaná riꞌimaká; piwátaka ke laꞌajerí riꞌimaká; inaꞌuké iꞌimatájeri penaje paꞌá riꞌimaká.
28 “Riká penaje nenó iꞌimaká, raú nalaꞌá Pipechu nakú riꞌimaká ke.
29 Chuwa weꞌemakana, Tupana, kaja piweꞌepí mékeka nemíchaka wanaku, nawata wawajákana. Mapeja pijwaꞌaté jápajeño weká, eko pilaꞌá wapechu kaphí, wakeroꞌokó piyá piyukuna iꞌimakana ajopánajlo, ajopánajlo ke.
30 Eko pitejmoꞌota natámina maárowa iꞌimakaño Pipechu aú. Piꞌirí Jesús unká weꞌepila puꞌuwaré laꞌakaná, piwátaka ke wani laꞌajeri riꞌimakale. Eko piwakáraꞌa rilaꞌaká nakaje weꞌiyá, pikaja kalé weꞌepíkare laꞌakana, raú naweꞌepíkaloje pinakojé penaje”, ke napuraꞌakó Tupana waꞌaté.
31 Nañapátaka Tupana waꞌaté puraꞌakano ejéchami, napukuna neꞌemakare chu ñakaꞌakó naꞌapiyá. Rejomi náchoꞌo reyá. Tupana Pechu jaꞌapiyá ke neꞌemaká Tupana purákaꞌalo yukuna ajopánajlo, ajopánajlo ke.
Piyuke nanane nayuríjika pajlokaka yukuna marí
32 Panakojéchaka ke Jesucristo jaꞌapiyá jemaꞌajeño pechu iꞌimajika; unká na kemaké rinane nakú: “Nuleꞌejeja riká”, ke. Piyukeja nanane kaje nayurike pajlokaka.
33 Tupana palamane napechu iꞌimaké kaphí, raú neꞌemaké Jesús makápoꞌoko piño yukuna ajopánajlo, ajopánajlo ke. Palá wani Tupana laꞌajika nanaku piyukeja.
34 Ñakele unká neꞌiyowá na laꞌaké kamuꞌují nakaje nakú, ilé ke nalaꞌajíkale. Neꞌiyajena aꞌakeño ajopánajlo namena liñeru aú; ñaké kaja pají minaná aꞌajika ajopánajlo nañakaré liñeru aú.
35 Rejomi neꞌejnatake riká liñeru Jesucristo wakáraꞌakarena ejo, natamákaꞌatakaloje riká kamuꞌují laꞌakáñojlo. Kamuꞌují nalaꞌajika nakaje nakú ejé naꞌaké najló liñeru.
36 Pajluwa nanakiyana iꞌimari Leví michú lakénami nakiyana. Rií iꞌimari José, Chipre teꞌeré eyaje riꞌimaká. Tupana wakáraꞌakarena aꞌañó apú rií Bernabé ke. “Iná pechu palaꞌatájeri”, ke kemakánaka rií iꞌimaká Bernabé ke napuraꞌakó chu.
37 Riká aꞌarí rimena liñeru aú, rejomi riꞌimatá riká liñeru Jesucristo wakáraꞌakarena ejo.