Tupana palamane aú natejmoꞌótaka pajluwa apichákaꞌalo iꞌimaká yukuna marí
3
E apú wakajé Pedro, Juan waꞌaté, iꞌijnaño ají ke Tupana ñakaré chojé. Weji kele chojé cha kamú toꞌojiko ee, namujlúkaꞌakeno Tupana ñakaré chojé rijwaꞌaté puraꞌajó.
2 Weꞌechú kaꞌalá keja pajluwaja ritami yáꞌajikono re. Apichákaꞌalo rimothoꞌoká iꞌimaká, unká meke laꞌajé raꞌapala, ñakele nawáꞌake riká Tupana ñakaré ejo. Rejé nayurike riká Tupana ñakaré numaná awaꞌajé. “Rinumaná jimáreni”, ke naꞌaká riká rinumaná ií. Re riyáꞌakono liñeru kejáꞌakana nakú rijluwa Tupana ñakaré chojé mujlúkaꞌajikaño liyá.
3 E Pedro, Juan waꞌaté, mujlúkaꞌañojla Tupana ñakaré chojé, ramaka neká aú, rikejaꞌa naliyá liñeru.
4 Rejéchami nayakáꞌako richaje, e Pedro kemari rijló:
—Piyakaꞌo majó wachaje.
—Unká nuliñérute iꞌimalá, eꞌiyonaja kalé noꞌojé piñathé. Jesucristo, Nazaret eyaje, weꞌepiri pitejmoꞌótakana, ñakele rapumí chojé ke numaká pijló: páchoꞌo, paꞌapachi.
7 Rejomi Pedro patarí riká riyátheꞌela kaꞌañá nakiyá. Ráchoꞌota riká, waꞌató ke ritejmú aꞌakó ritajné chojé raꞌapákaloje penaje.
8 Raú jeñoꞌokeja ráchoꞌoko reyá, mujlúkaꞌari Tupana ñakaré chojé najwaꞌaté. Jeñoꞌokeja raꞌapaka najwaꞌaté, palá wani ripuraꞌakó Tupana nakú.
9 Piyuke richu iꞌimakaño amaka raꞌapaka; nemaꞌá kaja ripuraꞌakó palá Tupana nakú.
10 Namaka aú raꞌapaka, napechu iꞌimá: “¿Meke laꞌajé chi raꞌapicha?” Namánaꞌapa riꞌimaká, namájikareno yáꞌako rinumaná awaꞌá, liñeru kejáꞌakana nakú.
Pedro iꞌimaká rapichákaꞌalo yukuna najló. Riyukuna marí
11 Namaka raꞌapaka aú, piyukeja inaꞌukena awakaño jechoꞌokelo rinakojé. Re joꞌó kaja apichákaꞌalo penájemi pataká Pedro, Juan, kele aꞌarumaká nakiyá. Re neꞌemá ukapú, naꞌakare ií Salomón ke, chu.
12 Pedro amaka aú nawakako rejé kajrú, rimá najló. “Nojena, ¿naje chi iyakaꞌo wachaje? ¿Meke chi ipechu wanaku: ‘Napechu aú ja kaꞌajná natejmoꞌótiya kele apichákaꞌalo penájemi? Kaphí wani péchuruna Tupana chojé kaꞌajná neká, raú kaꞌajná natejmoꞌótiya apichákaꞌalo penájemi’, ke kaꞌajná ipechu wanaku.
13 Wachiꞌiná michuna, Abraham michú, Isaac michú, Jacob michú, kajena pechu iꞌimakeri kaphí Tupana chojé. Riká, Tupana tejmoꞌótiyari, kele amá táraꞌako meꞌetení wajwaꞌaté. Palá wani Tupana laꞌaká Riꞌirí Jesucristo iꞌimaká, inaꞌuké weꞌepíkaloje raú ajopana chaje wani riká, eꞌiyonaja iwakáraꞌa riwáꞌakana iwakáraꞌajeri Pilato ejo. Riká wátarijla riꞌimatákana iliyá iꞌimaká, eꞌiyonaja unká iwátala iꞌimaká.
14 Unká iwátala kele palájneꞌeke wani iꞌimaká, unká riweꞌepike puꞌuwaré laꞌakaná. Unká imalá Pilátojlo iꞌimaká, ráchoꞌotakaloje riká penaje. Riká wátarijla ráchoꞌotakana iꞌimaká, eꞌiyonaja unká iwátala, iwátakale ráchoꞌotaka ijló apú, inaꞌuké nójeri penájemi. Riká ráchoꞌota ijló iꞌimaká.
15 Kajmuchaji aꞌajeri inajlo riꞌimaká nenó ipurákaꞌalo aú, eꞌiyonaja Tupana makápoꞌota riꞌimaká rapumí chuwá piño. Weká amaño riꞌimaká rimakápoꞌoko ejomi.
16 Riká Jesús, wapechu iꞌimakare chojé kaphí, tejmoꞌótiyari marí inaꞌuké amá táraꞌako meꞌetení. Kaja iweꞌepí na inaꞌukeka riká”, ke Pedro kemaká najló.
Rimá piño najló:
17 “Nojena, nuweꞌepí ilé ke iká, iwakáraꞌajeño waꞌaté, laꞌaká riꞌimaká wakajé. Unká iweꞌepila palá rinakojé iꞌimaká, raú ipechu jaꞌó rinókana ejo iꞌimaká.
18 Jesús nókana aú ilaꞌá Tupana kemaká júpimi rinaku iꞌimaká ke. Unká chiyó riphá marí ejaꞌawá chojé, riꞌimá riyukuna iꞌimaká. Tupana purákaꞌalo jaꞌapátajeño michuna kemaño rinaku iꞌimaká: ‘Riká, Tupana wakáraꞌajikare majó, ñaꞌajeri kajrú chapú kaje yajwé panaku iꞌimajika.’
19 “Chuwa ipajnoꞌotá ipéchuwa Tupana ejo puꞌuwaré ilaꞌakare liyá, raú Tupana amajo ichaje.
20 Riwakáraꞌaje piño Jesús ichaje majó. Júpimija Tupana kemá rinaku iꞌimaká, riꞌimakáloje inaꞌuké iꞌimatájeri penaje.
21 Jeꞌechú chu Jesucristo meꞌetení. Reja riꞌimajé Tupana paꞌatájika piño piyukeja nakaje ejaꞌawá chu iꞌimakare, riꞌimakáloje piño júpimi riꞌimaká ke, kaja penaje. Ketana riꞌimajika re. Ripurákaꞌalo jaꞌapátajeñojlo Tupana iꞌimá riyukuna iꞌimaká; rimaká najló rinaku iꞌimaká, keja nakaje iꞌimajika.
22 Moisés michú kemari waꞌajútaya michúnajlo Jesucristo nakú iꞌimaká: ‘Iwakáraꞌajeri Tupana wakáraꞌajeri pajluwa ichaje Ripurákaꞌalo jaꞌapátajeri penaje, ikáꞌana nakiyana riꞌimajika. Riwakáraꞌaje riká, riwakáraꞌaka nuꞌumaká ke kaja, ñakele jemaꞌá raꞌapiyá piyukeja nakaje rimajíkare nakú ijló.
23 Unkájika ee iná jemaꞌá riká, Tupana purákaꞌalo jaꞌapátajeri jaꞌapiyá numakare nakú, unká iná iꞌimalaje Tupana leꞌejena inaꞌukena nakiyana’, ke Moisés kemaká rinaku júpimi iꞌimaká.
24 “Ñaké waja piyuke ajopana Tupana purákaꞌalo jaꞌapátajeño michuna iꞌimajika riyukuna. Piyukeja neká, Samuel michú apumí chojé yuríkaño, puraꞌakeño kaja marí wakajé iꞌimajika nakú.
25 Nakaje iꞌimajíkare, aꞌajná ñoꞌojó chami, yukuna Tupana iꞌimaké Ripurákaꞌalo jaꞌapátajeño michúnajlo. Riꞌimakare yukuna najló yuriro kaja wajló. Tupana kemari waꞌajútaya michúnajlo nakaje rilaꞌajíkare nakú, rilaꞌakáloje iká palá raú. Ñaké iꞌimakale, Tupana kemari Abrahamjlo iꞌimaká: ‘Nuká laꞌajeri piyukeja inaꞌukena nakú palá. Pilakénami eꞌiyayá pajluwa iꞌimajeri, laꞌajeri palá wani inaꞌuké nakú’.
26 Tupana makápoꞌotari piño Riꞌirí iꞌimaká. Riwakáraꞌa riꞌimaká ichaje paineko, raú rilaꞌá palá wani inaku iꞌimaká, iyuríkaloje piyukeja puꞌuwaré laꞌakaná iliyó raú”, ke Pedro kemaká najló.