Tupana Pechu witúkaꞌaka Jesucristo jaꞌapiyá jemaꞌajeño eꞌiyajé yukuna marí
2
Naleꞌejé fiesta Pentecostés iphaka wakajé rená chojé, piyuke Jesucristo jaꞌapiyá jemaꞌajeño awakako pajluwa chojé waja. a
2 E manaꞌí chiyó nemaꞌá kajrú karená mejé keñoꞌótako jeꞌechú chiyá majó, ewá nemaꞌaká puwaꞌajné wani rimejé witúkaꞌaka majó jeꞌechú chiyá. Kaphí karená mejé, ke rimejé iꞌimaká “juuu”, ke. Ewá rimejé jaꞌakó nañakaré neꞌemakare chu chojé.
3 Rejéchami keraꞌathani, inaꞌuké lená ñani ke, yaꞌatakó najló. Riká tamákaꞌataro newílaꞌaru nakojé, apú wílaꞌaru chaje, apú wílaꞌaru chaje ke.
4 Ilé ke Tupana Pechu iphaka neꞌiyajé. Rejéchami, Tupana Pechu jaꞌapiyá ke nakeñoꞌoká ajopana puraꞌakó, unká nemaꞌalare, chu puraꞌakano.
5 Riwakajé kajrú judíona iꞌimaká Jerusalén e. Kajrú neꞌejnatájika riwakajé napéchuwa Tupana nakú, raú neꞌejná rejo. Ajopana teꞌeré eyájena, ajopana teꞌeré eyájena ke neꞌemaká.
6 Neká jemaꞌañó kajrú namejé iꞌimaká, aꞌajnare ke “weru, weru, weru”, ke. Raú neꞌejná piyukeja rejo yakáꞌajo, awakaño nanakojé piyukeja. Neká jemaꞌañó napuraꞌakó napuraꞌakó chu waja, raú napechu iꞌimá: “¿Meke kaꞌajná kaji?”. Piyukeja nemaꞌaká napuraꞌakó, napuraꞌakó chu waja pajluwano, pajluwano ke. Napuraꞌakó pajwaꞌatéchaka nateꞌeré ewá, ke kaja nemaꞌaká Jesucristo jaꞌapiyá jemaꞌajeño puraꞌakó.
7-8 Ilé kaje aú napechu kechíraꞌo wani najló, akuwaná nemá pajlokaka:
—Galilea eyájena neká piyukeja. Apoꞌojó wapuraꞌakó pajnoꞌokó paliyáaka, eꞌiyonaja wemaꞌá piyukeja napuraꞌakó wapuraꞌakó chu waja.
9 Re Partia eyájena maare, re kaja Media eyájena, Elam eyájena, Mesopotamia eyájena, Judea eyájena, Capadocia eyájena, Ponto eyájena, Asia eyájena,
10 Frigia eyájena, Panfilia eyájena, Egipto eyájena, ajopana Africa eyájena, Cirene eyájena kajena neká. Re kaja Roma eyájena maare weꞌiyá, maárowa ñakareruna. Neꞌiyajena judíona, eyá ajopana unká judíona kalé, eꞌiyonaja kalé napurákaꞌalo jaꞌapiyá kaja neká najwaꞌaté.
11 Re kaja maare Creta eyájena, Arabia eyájena, eꞌiyonaja wemaꞌá piyukeja palá mékeka nemaká wajló. Nakaje palá wani Tupana laꞌakare yukuna neꞌemá wajló; wapuraꞌakó chu waja wemaꞌá neꞌemaká riyukuna —ke nemaká pajlokaka.
12 Jaujú ke wani napechu laꞌakó raú, unká wani naweꞌepila mékeka riꞌimaká. Raú nemá pajlokaka:
—¿Meke kemakánaka chi kaji?
13 Eꞌiyonaja neꞌiyajena laꞌañó neꞌechajnó neká, nemá nanaku:
—¡Mawirúkeꞌechana ta neká!
Pedro iꞌimari riyukuna najló marí ke
14 Rejéchami Pedro táraꞌako. Ajopana Jesucristo jaꞌapiyatéjena, rijwákeꞌena iꞌimakaño, táraꞌaño kaja rijwaꞌaté. Pajluwaja iphata jimaje nakojé kele (11) neꞌemaká. Rejéchami Pedro kemaká najló: “Judea eyájena, eyá iká piyuke maare Jerusalén ewá iꞌimakaño: jemaꞌá marí numájikare nakú ijló meꞌetení:
15 Unká mawirúkeꞌechana kalé weká, iꞌijnataka ipéchuwa wanaku ke. Unká na kalé yuwéraꞌaro meꞌetení kecha, lapiyami wani joꞌó majó, paꞌu ke kuwáꞌata kele chu (9) kamú jená meꞌetení.
16 Unká ilé kajena kalé weká. Pajluwa Tupana purákaꞌalo jaꞌapátajeri michú Joel kemakare nakú júpimi iꞌimaká, ke amaka nakaje meꞌetení.
17 “Tupana kemari rijló iꞌimaká:
‘Ejaꞌawá iphájika kaja penaje rená chojé wakajé,
noꞌojé Nupechu kajrú inaꞌukénajlo apú ewá, apú ewá ke.
Raú raꞌapiyá ke iyani nakiyana jaꞌapátajika Nupurákaꞌalo ajopánajlo, ajopánajlo ke.
Walijímakanajlo nakaje yaꞌatajo, natapú chu namaje riká.
Eyá pheñawilánajlo numaje nakaje nakú natapú chu.
18 Eyá noꞌopiyá jemaꞌajéñojlo noꞌojé Nupechu riwakajé.
Raú naꞌapátaje Nupurákaꞌalo ajopánajlo, ajopánajlo ke.
Nakaje iꞌimajíkare yukuna naꞌapátaje najló.
19 Jeꞌechú chu nuyaꞌataje ijló kajrú nakaje palá nojé.
Marí ejaꞌawá nakú amaje jirá kaje, keraꞌathani, kajrú ija, juni juwákaꞌala kaje.
20 Unká kaja kamú patalaje majó riwakajé.
Kerani, jirá ke, keri jimá iꞌimajika riwakajé.
Ilé keja nakaje iꞌimajika, Paminárikana wani iphájika majó piyá.
Riphájika ejomi, nakaje iꞌimajé piño palá, reyá aꞌajná ñoꞌojó.
21 Riꞌimataje piyuke neká kemaño Tupánajlo,
riꞌimatákaloje neká kapichákajo liyá’,
ke Tupana kemaká Joeljlo nakaje iꞌimajíkare nakú júpimi iꞌimaká”.
22 E Pedro kemari piño najló: “Israel lakénami, jemaꞌá noꞌopiyá, nakaje numájikare nakú ijló: Nazaret eyaje Jesús iꞌimaká. Palá Tupana laꞌaká rinaku, raú rilaꞌá kajrú nakaje Tupánaja kalé weꞌepíkare laꞌakana. Raú raꞌá wajló rená keꞌená ke, waweꞌepíkaloje rinakojé penaje. Kajrú rilaꞌajika nakaje, unká méñoꞌojo ajopana laꞌalare kaje, Tupana aꞌajíkale riñathé rilaꞌakana aú. Kaja iweꞌepí mékeka rilaꞌajika nakaje maárowa weꞌiyowá iꞌimaká”.
23 Pedro kemari piño najló: “Iká wakáraꞌaño ajopana inaꞌukena noka riꞌimaká aꞌawaná apiyákakanami nakojé iꞌimaká. Chapújneꞌekena neꞌemaká noño riꞌimaká. Kaja Tupana pechu nakú ñaké rilaꞌakana iꞌimaká inaꞌukéjloje penaje.
24 Nenó riꞌimaká, eꞌiyonaja Tupana makápoꞌota riꞌimaká piño rapumí chuwá. Riꞌimatá riká takaꞌakaje chiyá, unká méñoꞌojo takaꞌakaje kapichátala riká.
25 Marí ke weꞌemakana michú David kemaká Jesucristo nakú, unká chiyó riphá marí ejaꞌawá nakojé iꞌimaká:
‘Nuweꞌepí re nujwaꞌaté ñakeja wani nuwakáraꞌajeri.
Nowaꞌá riká,
ñakele unká na kalé laꞌajeri kamuꞌují nupechu.
26 Ilé kaje laꞌarí puꞌují nupechu.
Ñakele notaneje, puꞌují nupechu iꞌimakale.
Nuweꞌepí kaja palá nunapona iꞌimajika nutakaꞌajika ejomi,
27 unkale piyurílaje nupéchumi támijimina toꞌotakelana ejeja.
Unká kaja piyurílaje nunapónami kapichako mapeja.
28 Pipaꞌataje nojló nukajmuchare, ripalamane nuꞌumakáloje penaje.
Puꞌují wani nupechu iꞌimajika, nuꞌumajíkale rijwaꞌaté’,
ke David michú lanaꞌaká Jesucristo yukuna iꞌimaká”.
29 “Nojena”, ke Pedro kemaká, “chuwa nuꞌumajika ijló puꞌukuja weꞌemakana David michú yukuna. Kaja ritakaꞌá júpimi iꞌimaká. Ritakaꞌaká ejomi, natoꞌotá ritami támijimi toꞌotákelana chojé. Re joꞌó kaja maare natoꞌotákare ejé ritami iꞌimaká.
30 Tupana purákaꞌalo jaꞌapátajeri riꞌimaká, ñakele riweꞌepí palá na inaꞌukeka kele Tupana kemari nakú rijló iꞌimaká. Tupana kemari rijló: ‘Pajluwa pilakénami nakiyana iꞌimajeri neꞌemakana, piꞌimaká ke kaja’, ke rimaká.
31 Unká chiyó riꞌimá ñaké, Tupana iꞌimá riyukuna Davidjlo. Ñakele riꞌimá Jesucristo makápoꞌoko yukuna iꞌimaká, rimaká aú marí ke:
‘Nuweꞌepí palá nunapona iꞌimajika nutakaꞌajika ejomi.
32 Tupana makápoꞌotaka Jesús iꞌimaká ejomi, wamá piño riꞌimaká’ ”.
33 Pedro kemari piño najló: “Tupana wáꞌari Jesucristo jeꞌechú chojé iꞌimaká. Rawaꞌá riká meꞌetení, palá ripechu iꞌimakale rinaku. Wajé Jesucristo aꞌachaka wajló Tupana Pechu, rimakare nakú wajló iꞌimaká. Ñakele Tupana Pechu jaꞌapiyá ke wapuriꞌichako, jemiꞌichá iꞌimichaka”, ke Pedro kemaká najló.
34 “Unká David michú napónami jáchoꞌolo riwakajeja jeꞌechú chojé iꞌimaká, rimakale iꞌimaká:
Tupana kemari Nuwakáraꞌajerijlo:
‘Maare piꞌimajé nowaꞌá, palá nupechu iꞌimakale pinaku.
35 Nucháꞌatajika pijló chapú pinaku péchuruna’, ke David kemaká Jesucristo nakú iꞌimaká”, ke Pedro kemaká najló.
36 E rimá piño najló: “Iká, Israel lakénami, iweꞌepí marí palá: Iká wakáraꞌaño Jesús, Tupana wakáraꞌakare majó iꞌimaká, nókana aꞌawaná apiyákakanami nakojé. Piyukeja inaꞌukena wakáraꞌajeri penaje, weꞌematájeri penaje kaja, raꞌá riꞌimaká”.
37 Ilé ke rimaká najló ejéchami, ripurákaꞌalo jemaꞌajeño pechu laꞌó kamuꞌují wani, kajrú neꞌejnataka napéchuwa rejéchami, raú nemá Pédrojlo, ajopana rijwákeꞌenajlo waꞌaté:
—Wejena, ¿chuwa meke walaꞌajika?
38 Raú Pedro kemari najló:
—Ipajnoꞌotá ipéchuwa Tupana ejo, puꞌuwaré ilaꞌakare liyá, raú Tupana amajo ichaje puꞌuwaré ilaꞌakare liyá. Rejomi nalaꞌajé iká bautizar, Jesucristo jaꞌapiyá jemaꞌajeño iꞌimakale. Ilé ke ilaꞌajika ee, Tupana wakáraꞌaje kaja eꞌiyajé Ripechu —ke Pedro kemaká najló.
39 E rimá piño najló:
—Júpimi Tupana kemari: “Noꞌojé Nupechu inaꞌukejlo”, ke. Ñakele raꞌajé chuwa ijló Ripechu, rimaká rinaku iꞌimaká ke. Iyani, meꞌetení iꞌimakáñojlo, waꞌató raꞌajé Ripechu, rejomi iꞌimajíkañojlo waꞌató raꞌajé kaja Ripechu. Piyukeja inaꞌuké, Tupana iꞌiwapakárena rijluwa iꞌimakajlo, waꞌató raꞌajé Ripechu.
40 Ilé kaje nakú rimá najló, kajrú apú purákaꞌaloji nakú waꞌaté, rejomi rimá piño najló:
—Puꞌuwaré wani péchuruna neká maárowa. Ilaꞌá ipéchuwa apoꞌojó naliyá.
41 Riwakajé kajrú inaꞌukena jemaꞌaká ripurákaꞌalo jaꞌapiyá iꞌimaká. Tres mil neꞌemaká, jemaꞌañó Jesucristo jaꞌapiyá riwakajé. Nalaꞌá kaja bautizar neká, rejomi nawakákono ajopana Jesucristo jaꞌapiyá jemaꞌajeño waꞌaté.
42 Jesucristo wakáraꞌakarena jewíñaꞌatakeño neká. Napurákaꞌalo jaꞌapiyá jemaꞌakánaja naweꞌepike natukumó; palá neꞌemajika pajwaꞌatéchaka. Nawakako kaja Tupana waꞌaté puraꞌajó ejomi, najñake naꞌajnewá pajwaꞌatéchaka.
Jesucristo jaꞌapiyá jemaꞌajeño, paineko iꞌimakaño, yukuna marí
43 Jesucristo wakáraꞌakarena laꞌakeño kajrú nakaje, Tupana Pechu aꞌajíkale nañathé, raú piyuke inaꞌuké rewá iꞌimakaño iꞌijnatájika kajrú napéchuwa nanaku, namájikale kajrú wani nalaꞌaká nakaje palá.
44 Pajluwaja chuwaja Jesucristo jaꞌapiyá jemaꞌajeño pechu iꞌimajika; nayurike piyuke nakaje pajlokaka iꞌimajika.
45 Nanane nakiyana naꞌaké ajopánajlo riwemí aú, rejomi natamákaꞌatake riká liñeru kamuꞌují laꞌakáñojlo. Nakaje, nalaꞌajíkare nakú kamuꞌují, wemí naꞌaké liñeru najló, nawarúwaꞌakaloje najluwa riká raú.
46 Weꞌechú kaꞌalá keja nawakájiko Tupana ñakaré chojé. Ajopana ñakaré chojé, ajopana ñakaré chojé, ke najñájika naꞌajnewá pajwaꞌatéchaka keyajupa.
47 Palá napuraꞌajiko Tupana nakú; piyukeja ajopana inaꞌukena pechu iꞌimajika palá nanaku. Weꞌechú kaꞌalá keja Tupana Pechu awakátajika najwaꞌaté ajopana inaꞌukena, ramákarona chaje puꞌuwaré nalaꞌakare liyá, penájemina neꞌemaká.