Jesús palamane pajluwa mejlurú amaka yukuna marí
9
E kaja Jesús jaꞌapari piño. Raꞌapaka ewá, ramá pajluwa inaꞌuké mejlurú wani iꞌimaká; ñakeja rimothoꞌoká iꞌimaká.
2 E kaja raꞌapiyatéjena kemaño rijló:
—Wewíñaꞌatajeri, ¿na pachá chi rimothoꞌó ilé ke? ¿Puꞌuwaré richiꞌiná laꞌakare iꞌimaká pachá kaꞌajná chi rimothoꞌó ñaké; rikoja rilaꞌakare puꞌuwaré pachá kaꞌajná?
Jesús cura a un ciego (Juan 9.1-41)
3 Jesús kemari najló:
—Unká puꞌuwaré rilaꞌakare pachá kalé rimothoꞌó ilé ke; unká kaja richiꞌiná laꞌakare puꞌuwaré pachá kalé. Inaꞌuké amákaloje meꞌetení mékeka Tupana laꞌaká riká palá wani, penaje rimothoꞌó mejlurú iꞌimaká.
4 Meꞌetení weꞌechú iꞌimanoja, nulaꞌajé Nuwakáraꞌajeri wátaka nulaꞌaká ke, kaja lapí unká méñoꞌojo iná laꞌalá palá iná jápakaꞌala.
5 Nuꞌumaká marí ejaꞌawá nakú ketana, kamareji ke nuká inaꞌukejlo, naweꞌepíkaloje Tupana nakojé raú penaje.
6 Ilé ke rimaká ejomi, rathupá teꞌerí eꞌiyajé, e rikechípaꞌa rawi teꞌerí waꞌaté wejápaja. Kéchami ripatoꞌotaka mejlurú ijlú chojé teꞌerí kechípaꞌakanami.
7 Rejomi rimá mejlurujlo:
—Chuwa piꞌijná aꞌapitakélaji ejo, pipicha pijlú chiyá.
Raú riꞌijná rejo. Siloé riká aꞌapitakélaji ií iꞌimaká. “Iná wakáraꞌakare”, ke Siloé kemakana iꞌimaká napuraꞌakó chu. Riphaka rejo ee, ripá rijlú chiyá juni aú. Rejomi ripaꞌó riñakaré ejo, palá ramaka rejéchami.
8 Rawaꞌá ñakaré iꞌimakaño amaka aú, palá kele mejlurú penájemi iꞌimaká amaka aú, nemá pajlokaka:
—¿Unká chi riká kalé, kele yáꞌakero iñeꞌepú chu inaꞌuké liyá liñeru kejáꞌakana nakú?
9 Raú neꞌiyajena kemaño rinaku: “Riká kaꞌajná riká”.
Ajopana kemaño: “Unká riká kalé riká, ñaké wani joꞌó ramákana”.
Raú rimá najló:
—Mejlurú penájemi nuká, amákare iꞌimaká.
10 E nemá rijló:
—Eta, ¿meke laꞌajé chi pamá chuwa palá?
11 Rimá najló:
—Kele Jesús, ke nemakare nakú, kechípiꞌichari teꞌerí rawi waꞌaté. Rejomi ripatoꞌotiya nujlú nakojé riká. Rejomi rimicha nojló nuꞌujnakáloje nujlú chiyá jipaje Siloé ejo, raú nuꞌumichá rejo nujlú chiyá jipaje. Nupíchaka nujlú chiyá ejéchami nomíchaka palá raú.
12 Nemá rijló:
—¿Mere chi riká, kele pimá nakú?
—Kaapí, unká nuweꞌepila —ke rimaká najló.
Fariséona kejáꞌaka yuku mejlurú penájemi liyá yukuna marí
13 E nawaꞌa mejlurú penájemi fariséona iꞌimaká ejo.
14 Naleꞌejé watánaꞌakaje iꞌimaká wakajé japi, Jesús kechípaꞌari rawi teꞌerí waꞌaté raꞌakáloje mejlurú ñathé.
15 Ilé kaje aú nawaꞌa mejlurú penájemi rejo nakejáꞌakaloje riliyá riyukuna. Nemá rijló:
—¿Meke chi pilaꞌaká pamákaloje penaje?
Raú rimá najló:
—Pajluwaja patoꞌotari nujlú nakojé teꞌerí rawi waꞌaté kechípaꞌakanami. Rejomi nuꞌumá nujlú chiyá jipaje. Nupaká nujlú chiyá ejéchami nomaka, ñakele palá nomaka meꞌetení.
16 Raú fariséona nakiyana kemaño:
—Waweꞌepí unká Tupana waꞌateje kalé riká, kele jaꞌapátari piliyá mejlukaji, unká pachá riphala waleꞌejé watánaꞌakaje iꞌimaká wakajé jaꞌapí.
Ajopana kemaño rinaku:
—Eta, ¿meke laꞌajé chi puꞌuwaré laꞌajerí laꞌajla nakaje Tupánaja kalé weꞌepíkare laꞌakana?
Ilé kaje aú unká rejenowaja kalé napechu iꞌimaká rinaku.
17 Raú nakejaꞌa piño mejlurú penájemi liyá riyukuna, nemá rijló:
—Kaja pamá palá meꞌetení. Eta, ¿meke chi pipechu ilé, jaꞌapátari piliyá mejlukaji, nakú meꞌetení?
Raú rimá najló:
—Nojló Tupana purákaꞌalo jaꞌapátajeri riká.
18 Unká paala judíona pechu nakú riꞌimaká, kaja napechu iꞌimá: “Mapeja kaꞌajná ripajlaka ta iꞌimaká, unká kaꞌajná mejlurú wani kalé riꞌimaká”. Raú nawaꞌa richiꞌiná maná. Neká iphaño nanaku.
19 Najló nemá:
—¿Iꞌirí chi kaji nemá nakú: “Mejlurú riꞌimaká”, ke? Eta, ¿meke laꞌajé chi ramá chuwa palá?
20 Raú nemá najló:
—Waweꞌepí kewaka marí weꞌerí mothoꞌoká mejlurú iꞌimaká.
21 Eyá meꞌetení, unká waweꞌepila mékeka rilaꞌaká ramákaloje palá penaje; unká kaja waweꞌepila mékaje inaꞌukeka jaꞌapátaka riliyá mejlukaji. Kaja phíyuꞌuke chaje riká, ñakele ikejaꞌa riliyá riyukuna.
22 Ilé ke richiꞌiná kemaká najló, nawó laꞌakole judíona nakiyana jaꞌapejé. Kaja nawakáraꞌajeño kemaño inaꞌukejlo iꞌimaká: “Imájika ee Jesús nakú, ‘Tupana wakáraꞌakare majó riká’, ke, unká wayurílaje awakako wawakákaꞌalo ñakarelana chojé wajwaꞌaté”.
23 Ilé kaje aú richiꞌiná wo laꞌó naꞌapejé, raú nemá najló: “Ikejaꞌa riliyá riyukuna, kaja phíyuꞌuke chaje riká”.
24 Raú judíona nakiyana wáꞌaño piño mejlurú penájemi maná. Riꞌijná piño rejo, e nemá rijló:
—Chuwa wawata piꞌimaká wajló palá wani riyukuna Tupana jimaje ke. Waweꞌepí puꞌuwaré laꞌajerí ta kele inaꞌuké jaꞌapátari piliyá mejlukaji.
25 Raú rimá najló:
—Unká nuweꞌepila na inaꞌukeka riká: puꞌuwaré laꞌajerí kaꞌajná, unká kaꞌajná. Rikaja kalé nuweꞌepí: raꞌapátaka nuliyá mejlukaji. Unká wani nomala iꞌimaká, eyá meꞌetení palá nomaka.
26 Nemá piño rijló:
—¿Meke wani chi rilaꞌaká piꞌimaká? ¿Meke chi raꞌapátaka piliyá mejlukaji?
27 Rimá najló:
—Kaja nuꞌumá ijló riyukuna palá, eꞌiyonaja unká jemaꞌalá noꞌopiyá. ¿Naje chi ikejaꞌa methú ke wani riyukuna nuliyá? ¿Iwata kaja chi rijwaꞌatéjena nakiyana iꞌimakana?
28 Ilé ke rimaká najló aú, nakhaꞌá riká, nemá rijló:
—Piwátajika ee, piká jemaꞌá kele inaꞌuké ta jaꞌapiyá; Moisés michú purákaꞌalomi jaꞌapiyá jemaꞌajeño weká.
29 Waweꞌepí Tupana puraꞌakó Moisés waꞌaté iꞌimaká, eyá ilé pimakare ta nakú wajló, unká waweꞌepila mere eyajeka riká.
30 Marí kaje aú mejlurú penájemi kemari najló:
—¿Meke chi kaji? ¿Meke laꞌajé chi unká iweꞌepila mere eyajeka riká? Kaja iweꞌepí raꞌapátaka nuliyá mejlukaji, eꞌiyonaja, ¿unká chi iweꞌepila mere eyajeka riká?
31 Waweꞌepí unká Tupana aꞌalá rinakojó puꞌuwaré laꞌajeñó purákaꞌalo, napuraꞌakochu rijwaꞌaté. Eyá iphaño raꞌapí, laꞌañó riwátaka ke rijwaꞌaté, neká purákaꞌalo raꞌá rinakojó. Raꞌá kaja nañathé.
32 Maárejecha weká unká joꞌó wani wemaꞌalá nemaká apú nakú: “Riká jaꞌapátari mejlukaji, mejlurú liyá”, ke.
33 Tupana waꞌateje riꞌimakale, rilaꞌá kajrú nakaje unká méñoꞌojo ajopana laꞌalare kaje —ke rimaká najló.
34 Raú nemá mejlurú penájemijlo:
—Puꞌuwaré laꞌajerí wani piká ta pimothoꞌoká iꞌimaká eyá. Eta chuwa, ¿naje piwata ta pinakuwá laꞌakana wajló wewíñaꞌatajeri ke?
Ilé ke rimaká najló aú, nakaꞌá riká neꞌiyayó nawakákaꞌalo ñakarelana chiyá.
Mejluruna ke unká jemaꞌalaño Tupana jaꞌapiyá. Riyukuna marí
35 Jesús weꞌepiri mékeka nakaꞌaká mejlurú penájemi nawakákaꞌalo ñakarelana chiyá. Júpichami riphákaꞌako rijwaꞌaté, rimá rijló:
—¿E chi pipechu kaphí Tupana iꞌirí chojé?
36 Rimá Jesusjlo:
—Pimá nojló, na inaꞌukeka riká, nupechu iꞌimakáloje kaphí richojé.
37 Jesús kemari rijló:
—Kaja pamá nuká; Tupana iꞌirí nuká, pipuraꞌó waꞌaté meꞌetení.
38 Ilé ke rimaká rijló aú, mejlurú penájemi táraꞌaro riꞌirúpachi aú Jesús jimaje, rimá rijló:
—Nuwakáraꞌajeri, kaphí nupechu chuwa pichojé.
39 Raú Jesús kemari rawaꞌá iꞌimakáñojlo:
—Majó nuphá iꞌimaká marí ejaꞌawá nakojé, mejluruna ke iꞌimakaño amákaloje nupalamane. Eyá kejluruna ke iꞌimakaño najluwa, iꞌimakáloje meꞌejluruna ke.
40 Raú fariséona re iꞌimakaño nakiyana kemaño rijló:
—¿Mejluruna ke kaja chi weká, ñaké chi ilé ke pipechu wanaku?
41 Rimá najló:
—Iweꞌepíkela inakuwá puꞌuwaré laꞌajeñó ke, unká Tupana wajálajla iká, puꞌuwaré ilaꞌakare pachá. Ilaꞌakale inakuwá palá laꞌakaño ke, pachá puꞌuwaré ilaꞌakare yuró ijwaꞌaté. Pachá Tupana wajájeri iká —ke Jesús kemaká najló.