Marí yuku Jesús iꞌimá najló, raú rewíñaꞌatakaloje neká Tupana nakú. Riyukuna marí
10
E Jesús kemari piño najló: “Jemaꞌá marí: Mujlúkaꞌari kaꞌajná ovéjana leꞌejé kurara chojé mapeja, unká rinumaná chuwá kalé, riká jataꞌakachi, rijiyoꞌotákale kurara, rimujlúkaꞌakaloje apú ewá richojé.
2 Eyá nalamáraꞌajeri mujlúkaꞌari palá nachaje rinumaná chuwá.
Jesús el buen pastor (Juan 10.1-21)
3 Palá kaja nanumaná waꞌaphé meꞌetaka rijló nanumaná, rimujlúkaꞌakaloje richojé penaje. Palá ovéjana jemaꞌaká nalamáraꞌajeri núrupi mejé, riwáꞌaka najló ee. Neí aú riwaꞌa najló.
4 Rejomi ráchoꞌota neká kurara chiyá, e raꞌapá natukumá. Palá rileꞌejena ovéjana jaꞌapaka rápumichu, nemaꞌakale palá nalamáraꞌajeri núrupi mejé.
5 Unká neꞌejnalá mapeja apú ápumichu, unkale namánaꞌapa kalé riꞌimakale. Neñáakoja ripiyá, naweꞌepíkale unká nalamáraꞌajeri kalé riká; rinúrupi mejé aú ja naweꞌepí riká”.
6 Ilé ke Jesús iꞌimaká najló ovéjana lamáraꞌakana yukuna, eꞌiyonaja unká naweꞌepila meke kemakánaka riꞌimaká.
Palá Jesús lamáraꞌaka weká, rijwaꞌatéjena weꞌemakale. Riyukuna marí
7 E Jesús kemari piño najló: “Jemaꞌá marí numájikare nakú piño ijló. Nakurárane numaná, palá ovéjana mujlúkaꞌakare chuwá, ke nuká inaꞌukejlo, nupalamane aú inaꞌuké mujlúkaꞌajikale Tupana iꞌimaká ejo.
8 Paineko nutukumá iphákaño iꞌimaká, iꞌimaño piroꞌokéjina. Chapú inaꞌuké laꞌajeño neꞌemaká, ñakele unká Tupana purákaꞌalo jaꞌapiyá jemaꞌajeño jemaꞌaké naꞌapiyá.
9 Pají numaná ke nuká inaꞌukejlo, nupalamane aú namujlúkaꞌajikale Tupana iꞌimaká ejo, neꞌemakáloje makapichako penaje. Ovéjana mujlúkaꞌaka naꞌajnewá kulaje, iphátaño palá nojé aꞌajnejí najluwa. Ke kaja nujwaꞌatéjenajlo nakaje iꞌimajika palá.
10 “Piroꞌokeji iphari, rataꞌakáloje, rinókaloje, rikapichátakaloje penaje. Eyá nuká, unká ilé kaje penaje kalé nuphá majó. Nuphá majó iꞌimataje, nupalamane iꞌimakáloje makapichako jeꞌechú chu.
11 Palá lamáraꞌaka ovéjana, ke nuká inaꞌukejlo. Palá lamáraꞌaka ovéjana aꞌarí rikó kapichákajojlo ripirana chaya, kajrú rimejñátakale neká.
12 Eyá apú kaꞌajná lamáraꞌari ovéjana mapeja, rikánakaloje liñeru namákana wemí aú ja kalé. E kaꞌajná manaꞌí chiyó yawi, ejaꞌawá eyaje, jaꞌaró ovéjana eꞌiyajé, rinókaloje neká. Ilé ke ramaka aú kaꞌajná riñaa neká piyukeja, kaja unká rileꞌejena kalé ovéjana neꞌemakale. Raú kaꞌajná yawi jaꞌapá piyuke ovéjana nakú makajmala.
13 Ilé ke rilaꞌaká neká, unká rileꞌejena kalé neꞌemakale; kaja namákana wemija kalé riwata”, ke rimaká najló.
14-15 Rimá piño najló: “Palá lamáraꞌaka ovéjana ke nuká inaꞌukejlo. Palá Noraꞌapá weꞌepika nuká; ñaké kaja nuweꞌepika riká. Palá kaja nuweꞌepika nuleꞌejena inaꞌukena; eyá neká weꞌepiño kaja palá nuká. Nuká takaꞌajeri nachaya, nakapichájiko piyá.
16 Re kaja ajopana inaꞌukena meꞌetení, unká joꞌó nujwaꞌatéjena kalé iꞌimakaño. Aꞌajná ñoꞌojó chami nuwáꞌaje najló, neꞌemakáloje nujwaꞌatéjena penaje. Rejéchami neꞌemajika pajluwapuku keja ajopana nujwaꞌatéjena waꞌaté; nuká iꞌimajeri pajluwaja nawakáraꞌajeri.
17 “Kajrú Noraꞌapá wátaka nuká, nutakaꞌajíkale nujwaꞌatéjena inaꞌukena chaya. Nutakaꞌajika ejomi, numakápoꞌojo piño.
18 Nupechu keja noꞌojika nokó inaꞌukejlo, nenókaloje nuká penaje. Nuwátakela, unká meke nalaꞌalajla nuká. Kaja ñaké Noraꞌapá pechu nakú riká, nutakaꞌakáloje nachaya penaje, rejomi kalé numakápoꞌojo piño nopumí chuwá”, ke Jesús kemaká najló.
19 Ilé ke rimaká najló aú, unká panakojéchaka ke kalé judíona pechu iꞌimaká rinaku rejéchami.
20 Raú nanakiyana kemaño rinaku:
—¿Naje kaꞌajná nemaꞌá ripurákaꞌalo ta jaꞌapiyá? Re jiñá pechu reꞌiyá ta, raú jewíñami ke riká.
21 Eyá ajopana kemaño kaja rinaku:
—Jiñá pechu iꞌimakela reꞌiyá, unká méñoꞌojo ripuraꞌalojla palá, ripuraꞌakó ke. Unká kaja meke laꞌajé jiñá pechu iꞌimakare eꞌiyá jaꞌapátalajla mejlukaji inaꞌuké liyá.
Judíona nakiyana unká wátalaño Jesús. Riyukuna marí
22 Yawijá iꞌimari nalaꞌaká fiesta Jerusalén e wakajé. Júpimi ke nachiꞌiná michuna ñapátaka piño Tupana ñakaré laꞌakana rapumí chuwá. Chapú nanaku péchuruna iꞌimaká kajyaꞌataño paineko iꞌimakare. Riweꞌepéjona penaje nalaꞌakeno fiesta riwakajé.
Jesús acusado de blasfemia (Juan 10.22-42)
23 Jesús iꞌimari kaja re najwaꞌaté fiesta jaꞌapátakana nakú. Richiraꞌó Tupana ñakaré kópiwa. Richiraꞌakaro ewá nakú, nemaké: “Salomón kopi riká”.
24 Rejé judíona nakiyana awakaño rinakojé tujlá ke pajimájechaka. Nemá rijló:
—¿Meketana júpika chi pimichoꞌotájika waliyá pinakojé weꞌepíkana, na inaꞌukeka wani piká? Kewaka Tupana wakáraꞌakare piꞌimajika ee majó, pimá wajló puꞌukuja pinakuwá, waweꞌepíkaloje piká wani piká.
25 Raú Jesús kemari najló:
—Kaja nuꞌumá nuyukuno ijló iꞌimaká, eꞌiyonaja unká jemaꞌalá noꞌopiyá riká. Noraꞌapá aꞌarí nuñathé, nulaꞌakáloje nakaje rikaja kalé laꞌakare. Nakaje nulaꞌakare aú iweꞌepeje palá, kewaka riká wakáraꞌakare majó nuká.
26 Eꞌiyonaja unká jemaꞌalá noꞌopiyá, unká noꞌopiyatéjena nakiyana kalé iꞌimakale.
27 Nujwaꞌatéjena aꞌañó palá nupurákaꞌalo nanakojó. Nuweꞌepí kaja mékajenaka neká nujwaꞌatéjena, nemaꞌakale palá noꞌopiyá.
28 Neká iꞌimajeño matajnako jeꞌechú chu, noꞌojíkale najló kajmuchaji, ripalamane neꞌemakáloje makapichako nujwaꞌaté penaje. Unká kaja na kalé jáchoꞌotajeri neká noꞌopiyá jemaꞌakana chiyá.
29 Noraꞌapá aꞌarí nojló neká, neꞌemakáloje nujwaꞌatéjena penaje, ñakele unká na kalé kaꞌarijla neká nuliyá.
30 Pajluwa keja weká, nuká Noraꞌapá waꞌaté.
31 Ilé ke rimaká judíona nakiyánajlo aú, nawata jipa kaꞌakana richá, nenókaloje riká penaje.
32 E Jesús kemari najló:
—Noraꞌapá aꞌakale nuñathé, nulaꞌá kajrú nakaje palá ijimaje. Eta, ¿na chi nulaꞌá unká paala, iwátale nonókana jipa aú?
33 Raú judíona nakiyana kemaño rijló:
—Unká nakaje pilaꞌakare pachá kalé wawata jipa kaꞌakana pichá. Puꞌuwaré pipuraꞌakó Tupana nakú, eyá pilaꞌakale pinakuwá Tupana ke kaja, pachá wawata pinókana.
34 Raú Jesús kemari piño najló:
—Tupana purákaꞌalo lanaꞌakéjami kemari iwakáraꞌajeño michuna nakiyana nakú iꞌimaká: “Tupana ke neká”.
35 Ripurákaꞌalo kemaká nakaje nakú keja riká, unká meke laꞌajé riꞌimalá apoꞌojó. Riyuríkarenajlo Ripurákaꞌalo nakú rimá: “Tupana ke neká”. Ñakele unká naje kalé imá nunaku: “Puꞌuwaré laꞌajerí riká”, ke.
36 Tupana wakáraꞌari nuꞌumaká majó marí ejaꞌawá nakojé, eꞌiyonaja imá nunaku: “Puꞌuwaré ripuraꞌakó Tupana nakú”, numakale nunakuwá: “Tupana iꞌirí nuká”, ke.
37 Nulaꞌajika ee nakaje nupechu keja, jemaꞌaniña noꞌopiyá.
38 Eyá nulaꞌajika ee nakaje Nuwakáraꞌajeri wátaka ke, jemaꞌá noꞌopiyá. Raú ilaꞌajé nuká kewaka; iweꞌepeje kaja pajluwa chuwá wapechu rijwaꞌaté.
39 Ilé ke rimaká najló aú, nawata piño ripatakana nawajákaloje riká, eꞌiyonaja riꞌimaó naliyá.
40 E kaja Jesús kuwáꞌari piño ají ke juni Jordán paꞌanajo pitá. Juan michú laꞌajika bautizar inaꞌuké iꞌimajika ejo riphá. Rejé riyuró.
41 Kajrú inaꞌukena iꞌijnaká rejo ramaje. E ramájeño kemaño pajlokaka:
—Unká Juan laꞌaké nakaje Tupánaja kalé weꞌepíkare laꞌakana, eꞌiyonaja waweꞌepí kewaka piyukeja nakaje rimakare marí inaꞌuké nakú iꞌimaká.
42 Ñakele re kajrú inaꞌukena pechu iꞌimaká kaphí Jesucristo chojé.