2 —Chuwa piꞌijná pajimila Nínive ejo, pimicha najló nakaje numájikare nakú pijló yukuna.

3-4 —Je —ke rimaká.

Raú Jonás jáchoꞌoro reyá, iꞌijnari ají ke pajimila Nínive ejo, Tupana wakáraꞌaka riká ke. Kajruni wani kele pajimila Nínive iꞌimaká. Iná tajátakaloje piyuke reꞌiyowá chiraꞌakano penaje, iná jaꞌapá weji ke kala ketana reꞌiyowá. Kaja ewaja riphá reꞌiyajé. Pajluwa kala ketana riꞌimaká riká pajimila eꞌiyowá jaꞌapákana nakú. Marí ke rawíyoꞌojika raꞌapájika ewá najló: “Iyamá inaꞌuké leꞌejé ke kala iꞌimajemi, Tupana kapichátaje marí pajimila eyájena”, ke rawíyoꞌojika.

5 Ilé ke pajimila nakú iꞌimakaño jemaꞌaká rimaká nanaku aú, nalaꞌá kewaka ke najluwa ripurákaꞌalo. Rejenowaja napechu iꞌimaká, ajopana jaꞌapejé iꞌimakaño, nachaje iꞌimakaño waꞌaté, raú nemá pajlokaka: “Weꞌetacho waꞌajné liyá chuwa. Waꞌachí kaja wanakuwá waꞌarumaká puꞌuwaré nojé, costal nakiyá laꞌakanami kaje, kamuꞌují wani wapechu laꞌakole, puꞌuwaré walaꞌakare pachá”, ke nemaká pajlokaka.

6 Piyukeja ilé ke nalaꞌaká yukuna jemaꞌakó pajimila Nínive eꞌiyowá. Neꞌemakana waꞌató jemaꞌarí riyukuna, raú ráchoꞌo riñákaꞌaru chiyá. Rikaꞌá kaja rinakiyó raꞌarumaká palá nojé, neꞌemakánaja kalé aꞌakare nanakuwá. Rejomi raꞌá kaja apú puꞌuwareni, costal nakiyá laꞌakanami kaje rinakuwá. Rejomi riyaꞌo mapeja teꞌerí eꞌiyajé. 7 Meketana iꞌimajemi riká, raꞌapiyatéjena waꞌaté, wakáraꞌaño nanakiyana iꞌijnaká pajimila eꞌiyowá marí purákaꞌalo yukuna iꞌimajé piyukéjajlo: “Unká na ajñálaje raꞌajnewá; unká kaja na aꞌalaje ripiránajlo aꞌajnejí. 8 Piyukeja iká, nujwaꞌatéjena, aꞌajika inakuwá aꞌarumakaji, costal kaje nakiyá laꞌakanami, kamuꞌují wani wapechu iꞌimajíkale, puꞌuwaré walaꞌakare pachá. Aꞌajná ipechu nakú riꞌimajika palá ejé, ipuraꞌó Tupana waꞌaté. Iyurí kaja iliyó piyuke puꞌuwaré ilaꞌajíkareno. Chapú pekowáaka laꞌakana nakuja iká maárejecha, ñakele ilé kaje iyureje iliyó chuwa. 9 Apala ilé walaꞌajika aú Tupana apiyákaje ripechu, raú kaꞌajná riyuchá jaꞌapaje riliyá. E kaja unká rikapichátalaje weká”, ke neꞌemakana wakáraꞌaka nemaká piyukeja pajimila eyájenajlo.

10 Tupana amaka aú kewaka napajnoꞌotaka napéchuwa puꞌuwaré nalaꞌakare liyá, raú unká rikapichátala pajimila eyájena, rimaká nanaku iꞌimaká ke.