3 —¿Ñaké chi rilaꞌajika?, ke nupechu iꞌimaká pinaku, re joꞌó kaja nuꞌumaká wakajé nuteꞌeré nakú. Ñakele nuwátajla piliyá ñaakano reyá iꞌimaká, nuꞌujnakáloje Tarsis ejo. Nuweꞌepí mékajeka piká. Inaꞌauké wani piká ajopana inaꞌukena waꞌaté; piweꞌepí namuꞌují; unká kaja piyúchaꞌalo kiñaja. Ikiꞌija piwátakale inaꞌuké, unká pikapichátala neká. Pimá kaꞌajná neꞌiyajena nakú: “Nukapichátaje neká”, ke, eꞌiyonaja pamó nachaje, ñakele unká pikapichátala neká. Ilé ke piꞌimakale, numá meꞌetení pijló: Piyurí nutakaꞌaká meꞌetení, palani nojló takaꞌakaje; unká naje kalé nuꞌumá re joꞌó kaja marí ejaꞌawá chu.

4 —¿Palani chi pijló ilé ke nuchá yúchaꞌakano? —ke Tupana kemaká rijló.

5 Rejomi Jonás jáchoꞌoro pajimila eyá, iꞌijnari kamú jaꞌakó ejo pumitá. Rejé rilaꞌá rikaꞌapó, re riyaꞌo. Rewá riꞌimaké Tupana kapichátaka pajimila wátakana nakú. 6 E Tupana wakáraꞌari nakaje punama ina ke iphaka, ripaná iꞌimakáloje ripajré penaje, riꞌimakáloje palá ipeꞌení chu. Raú palá Jonás pechu laꞌakó. 7 E muní ke lapiyami Tupana wakáraꞌari ripiꞌiré, ñamana kaje, noka punama kaje iꞌimakeri Jonás pajré. Raú ripiꞌiré ajñátari punama kaje wanaꞌajré, waꞌató ke piyuke ripaná meríyaꞌatako. 8 Wajé wani kamú jáchoꞌoko ee, Tupana wakáraꞌari karená imaꞌaní waꞌaté aphoꞌoká kamú jáchoꞌoko ejo pumitá nakojó. Unkale ripajré iꞌimalá, riká kamú kamaré patarí Jonás wílaꞌaru nakojé kaphí wani, raú makaꞌaní ritajaꞌatako, raú richuwaja riwátaka takaꞌakaje. “Palani nojló takaꞌakaje. Unká naje kalé nuꞌumá re joꞌó kaja marí ejaꞌawá chu”, ke ripechu iꞌimaká rinakuwá.

9 Eꞌiyonaja Tupana kemari rijló:

—¿Palani chi pijló ilé ke nuchá yúchaꞌakano, pipajré iꞌimakare meríyaꞌatiyakole?

—Aꞌa, palani nojló marí kaje jimaje yúchaꞌakano —ke Jonás aꞌajipaká Tupánajlo—. Makaꞌaní nutakaꞌaká meꞌetení nuyuchá akuwanaja.

10 E Tupana kemari piño rijló:

—Unká piká kalé ejátari kele, riꞌimakáloje pipajré penaje; unká kaja piká kalé tawáꞌatari riꞌimaká. Pajluwa lapí japi riphá iꞌimaká, eyá apú lapí jápija kaja rikapichó. Ilé kaje aú piweꞌepí kamuꞌují rinaku, 11 eyá richaje palaka nuweꞌepika pajimila Nínive eyájena muꞌují. Kajruni pajimila riká, re ciento veinte mil inaꞌukena rewá, unká weꞌepílaño nekó iꞌimatákana kapichákajo liyá. Re kaja kajrú napirana rewá —ke Tupana kemaká rijló nanaku.

Kaja ketánaja riyukuna.