Babilonia teꞌeré eyájena nakú nemaké kaja caldéona, ke. Riwakajé neká cháꞌatakeñono wani piyukeja ajopana teꞌeré eyájena, ajopana teꞌeré eyájena ke. Re Daniel iꞌimaká wakajé, reyájena iphá Israel lakénami teꞌeré ejo, nakaꞌakáloje nateꞌeré naliyá penaje. Nacháꞌata neká nókakajo aú, rejomi neꞌemá nakapi ke, neꞌemakana waꞌatéjena neꞌemaká. Kajrú nawáꞌataka najwaꞌató neká Babilonia ejo. Daniel waꞌató nawaꞌa najwaꞌaté rejo. Unkale Israel lakénami jemaꞌaké Tupana jaꞌapiyá palá, riyurí ajopana cháꞌataka neká, ñakele ajopana teꞌeré nakú neꞌemaké.

Re kaja Daniel iꞌimaké júpija, kajrú Tupana aꞌajika riñathé. Iná jemaꞌakachu Tupana jaꞌapiyá, unká riyurila iná. Iná iꞌijnaká ewá, iná wákeꞌewe ke riká iná waꞌaté. Unká caldéona weꞌepike Tupana, ajopana nakú napechu iꞌimaké: “Neká wachiꞌinárikana”, ke.

Unká Daniel yurila nakaꞌátaka reꞌiyajé, ripechu iꞌimakáloje napechu iꞌimaká ke kaja nachiꞌinárikana nakú. Tupana nakuja ripechu iꞌimaké. Palá remaꞌajika raꞌapiyá iꞌimajika; unká riweꞌepike khaí rinakuwá. Rijimaje nawata riwajákana, unkale ripechu iꞌimaké napechu ke kaja. Eꞌiyonaja unká riyurila richó najló, nawátaka riwajákana richona eꞌiyonaja. Tupana jaꞌapiyá jemaꞌakánaja riweꞌepike ritukumó. Tupana Pechu jaꞌapiyá ke rilanaꞌaká riyukuna papera kaje chojé iꞌimaká, ramátakaloje ajopana rinakiyana raú penaje. Wajló waꞌató riyukuna yuró, ramátakaloje kaja weká penaje raú.