DANIEL
1
Weji kele jarechí ketana cha Joaquim iꞌimaká Judá teꞌeré eyájena iꞌimakana wakajé, Nabucodonosor, Babilonia teꞌeré eyájena iꞌimakana, iphari Jerusalén ejo, piyuke rileꞌejena suráana waꞌaté. Neká chipúkaꞌaño tujlá ke piyuke pajimila nakuwá, nenókakoloje reyájena waꞌaté penaje. 2 Tupana yuriri Nabucodonosor pataká Joaquim. Riyurí kaja rijñaꞌaká ñóꞌope nakaje, Tupana ñakaré chu iꞌimakare nakiyá. Rejomi Nabucodonosor, rijwaꞌatéjena waꞌaté, wáꞌaño patakéjami neꞌemakana Joaquim, ajopana rijwaꞌatéjena waꞌaté, ají ke nateꞌeré ejo. Nephaka penájemi riwakáraꞌa nakaje, najñaꞌakare Tupana ñakaré chiyá yuríkana nachiꞌinárikana ñakaré ke iꞌimakare chojé. 3 Riwakáraꞌa kaja riñakaré chiyá wakáraꞌajeri, Aspenaz rií iꞌimaká, kulaka Israel lakénami wakáraꞌajeño yaní, walijímakana waja iꞌimakaño. 4 Jimáreruna, palá kaja napónaruna, palá newíñaꞌatakarena penájemina, weꞌepiño kaja ajopana inaꞌukena waꞌaté iꞌimakana palá, kajena riwata rikulaka neꞌiyayá. Keꞌejwiruna kaja riwátaka neꞌemaká; kajrú weꞌepíkaño nakaje nakojé kaja riwátaka neꞌemaká. Kaliyáruna kaja riwátaka neꞌemaká, neꞌemakáloje neꞌemakana jaꞌapiyatéjena ñathé aꞌajeño penaje, jápaño re neꞌemakana waꞌaté riñakaré chu. Newíñaꞌatakaloje neká penaje riwata neká, newíñaꞌatakaloje neká napurákaꞌalo nakú. Riwata kaja newíñaꞌataka neká napurákaꞌalo lanaꞌakéjami nakú. Riwakáraꞌaka ke Aspenaz wáꞌaka neká neꞌiyayá, nayuríkoloje riñakaré chu penaje.5 Nabucodonosor wakáraꞌa kaja naꞌaká neká walijímakanajlo weꞌechú kaꞌalá keja aꞌajnejí, naꞌajíkare rijló kaje nakiyana. Eyá riꞌirakala nakiyana kaja, naꞌakáloje najló penaje. Rimá kaja rijwaꞌaté jápajeñojlo, newíñaꞌatakaloje neká weji kele jarechí ketana, rejomi neꞌemakáloje riñathé aꞌajeño penaje.
Daniel iꞌimaká rijwákeꞌena waꞌaté neꞌemakana ñakaré chu yukuna marí
6 Judá michú lakénami eꞌiyayá walijímakana Aspenaz wáꞌakarena iꞌimaño: Daniel, Ananías, Misael, Azarías, kele. 7 Rejomi Aspenaz apiyákatari neí marí ke: Daniel ií raꞌá Beltsasar ke; eyá Ananías ií rapiyaka Sadrac ke; eyá Misael ií raꞌá Mesac ke; eyá rapiyaka kaja Azarías ií, raꞌá Abed-negó ke. 8 Daniel unká wátake neꞌemakana aꞌajné naꞌajikare najló nakiyana ajñakana, pheñawilana michuna kemájikale rinaku, “Unká ilé kaje aꞌajnejí ajñakana iꞌimalaje”, ke. Raú ripuraꞌó namájeri waꞌaté, riwakáraꞌaka piyá najñaka riká aꞌajnejí, nalaꞌaká piyá apoꞌojó, pheñawilana michuna wakáraꞌajika neká liyá. 9 Tupana laꞌakale palá namájeri pechu aú, palá ripechu iꞌimajika Daniel nakú. Daniel kemaká aú rijló, raꞌaká piyá najló ilé kaje aꞌajnejí. 10 Rimá rijló:
—Kajrú wani nukeroꞌokó weꞌemakana piyá, ñakele unká meke laꞌajé nulaꞌalajla apoꞌojó, riwakáraꞌaka nulaꞌaká liyá. Kaja rimá nojló mékajeka aꞌajnejí aꞌakana ijló nakú, eyá mékajeka iꞌirakaje. Eyá ramájika ee kaꞌajná unká peyajwéruna kalé iká, ajopana walijímakana ke kaja, pachá riwakáraꞌaje nonókana.
11 Raú Daniel puraꞌaró piño apú nawakáraꞌajeri waꞌaté. Riká wakáraꞌari Aspenaz iꞌimaká, ramákaloje neká penaje. Rimá rijló:
12 —Pilaꞌá wajló nakaje. Nuwata patáꞌaka naꞌaká wajló aꞌajnejí marí ke: Piwakáraꞌa naꞌaká wajló aꞌajnejí imena eꞌiyá iꞌimakáreja kalé, pijwaꞌaté jápajeño keja weká. Eyá weꞌerakáloje penaje, naꞌaré wajló júnija kalé. Iyamá théꞌela ke kala ketana naꞌaré wajló ilé kaje aꞌajnejí. 13 Rejomi pamaje mékeka wamájiko, ajopana ajñaño neꞌemakana aꞌajné nakiyana liyá. Ñakele palá pamájika weká ejomi, pilaꞌajé weká piwátajika ke.
14 Raú rilaꞌá iyamá théꞌela ke kala ketana Daniel kemaká rijló ke, natáꞌakaloje mékajeka aꞌajnejí cháꞌataka penaje.
15 E kaja iyamá théꞌela ke kala jaꞌapaka ejomi, namá Daniel kajena, ajopana najwákeꞌena ke iꞌimakaño waꞌaté. Amaño peyajwéruna Daniel kajena iꞌimaká, ajopana walijímakana palá ajñákaño naꞌajnewá chaje peyajwérunaka neꞌemaká. 16 Rejomi namájeri aꞌaké najló aꞌajnejí, iꞌirakaje, nawátajikare ajñakana kaje. Raꞌaké najló aꞌajnejí, namena eꞌiyá iꞌimajíkareja kalé.
17 Kajrú Tupana aꞌajika neká, paꞌu kele walijímakana ñathé, neꞌemakáloje kapechúruna wani penaje, naweꞌepíkaloje keꞌiyapejé nakaje nakojé penaje. Raú naweꞌepike keꞌiyapejé purákaꞌaloji lanaꞌakéjami iꞌimakare nakojé. Eyá Daniel weꞌepíkeri kaja palá ajopánajlo natapure yukuna iꞌimakana.
18 Kaja ewaja nephata weji kele jarechí ketana jewíñaꞌakajo nakú, raú namájeri wáꞌari neká neꞌemakana ejo, iphaño rinaku. 19 Re neꞌemakana puraꞌaró najwaꞌaté; rikejaꞌa nakaje newíñaꞌakaro nakú yukuna naliyá. Unká riphátala piyukeja walijímakana eꞌiyá ajopana, iꞌimaño kapechúruna wani Daniel, Ananías, Misael, eyá Azarías ke kapechuka. Neká cháꞌataño piyukeja ajopana walijímakana, ñakele nekaja kalé raꞌá riñathé aꞌajeño penaje. 20 Kapechúruna wani iꞌimakaño, kiñaja weꞌepíkaño nakaje nakojé, keleja kalé weꞌepíkeño kiñaja nakaje purákaꞌaloji, puwicha nojé nakojé. Ilé kajena liyá neꞌemakana kejáꞌakeri nakaje puwicha nojé wani iꞌimajika yukuna. Eyá neká, paꞌu kele walijímakana, raꞌakárena riñathé aꞌajeño penaje, weꞌepiño wani nakaje nakojé. Íkiꞌija wani nacháꞌatajika ajopana kapechúruna, mariꞌichuna, inaꞌuké tukumó weꞌepéjeño, piyukeja rijwaꞌatéjena rewá iꞌimakaño. 21 E Daniel yuriro júpija neꞌemakana waꞌaté jápakana nakú. Apú neꞌemakana, Ciro rií iꞌimaká, yuriko Nabucodonosor apumí chojé ejená riꞌimá re.